Chapter 9 SEPNA LE NUNTAKNA

Khuavannuai a’ dingin Pasian in, nuntakna, khuavak le lungdamna bulpi ahi hi. Ni pan a taang khia khuavak bangin, tuinak pan a luang khia luituite bangin, A pian sak khempeuh te’ kiangah Ama kiang panin thupha luang khia hi. Mihing’ lung sung, Pasian’ nuntakna a omna mun peuhpeuh panin, mi dangte’ kiangah tua itna le thupha luang khia ding hi.

A puksa mite tatkhiatna le domtohna ah ih Honpa lungdam hi. Tua ding mahin Amah in A nuntakna pammaih sa lo-in, maizumna khual lo-in, singlamteh hong thuak hi. Tua mah bangin vantung mite in zong midangte’ nopsakna ding na sem tawntung uh hi. Tua pen amau’ lungdamna ahi hi. Zia-le-tong le dinmun ah ginatna khat zong a nei lo, a cimawh mite’ a dinga na sep sakna pen ang sung khual lungtangte in za neuna bangin ngaihsun uh ahih hangin, tua pen mah mawh nei lo vantung mite’ nasep ahi hi. Angsung khual lo itna ahi Christ’ lungsim pen vantung teng a kidim lungsim hi-a, vantung nopsakna laigil ahi hi. Hih pen Christ’ nungzuite in a neih ding uh lungsim, ahih ding uh nasep ahi hi.

Christ’ hong itna ih lung sungah a kidim ciangin, paak namtui bangin kibilh cip thei lo hi. Ih kituah khak pih mi khempeuh in agim namtui hong za ciat ding uh hi. Lung sunga om Christ’ lungsim zong, na khempeuh ahing sak ding le, asia ding mite nuntakna tui aduh sak dinga aphul khia, sehnel gam a ciktui tawh kibang hi.

Christ in mihingte’ nop tuamna ding le khantohna ding na asep mah bangin, Ama sep bang sepna tawh Ama’ itna hong kilang khia ding hi. Vantunga om ih Pa in akepna nuai a om a nungta piansak khempeuh tungah itna, hehpihna le khualna zong hong neibehsak lai ding hi. (78)

Leitung a Honpa’ nuntakna pen Ama nopsak bang bek a om hilhialna hi lo hi. A mangthang mite a hotkhiatna dingin gim le tawl zong don lo in nakpi in hanciam in sem tinten hi. Gan-an-kuang panin Calvary dong angsung nialna lampi tawn in, a haksa nasepte, gimpi-a khualzinate, tha bei-a donna le bawlnate pelh ding hanciam lo hi. Amah in, “A maang dinga Mihing’ Tapa hong pai ahi kei-a, na asem ding, mi tampi tatna dinga a nuntakna apia dinga hong pai ahi zaw hi,” ci hi (Matthew 20:28). Hih pen Ama nuntakna-i ngimna bulpi khat ahi hi. Thu dang khempeuh ahih leh thu nautang hilel hi. Pasian’ deihna bangbang sem a, tua nasep zawh ding pen Ama an le tui ahi hi. Ama nasepna ah angsung le angsung khualna om lo hi.

Christ in sihna athuak lawh midangte in zong vantung thupha a ngah theihna dingun, Ama hehpihna atang sa mite in kipiak khiatna khat teitei neih kul hi. Leitung ah a om manun phat tuamna apian sak theihna dingun ahih theih zah un sem ding uh hi. Hih bang lungsim zong a kikhel taktak mi a kitheih khiatna ahi hi. Mi khat peuh Christ’ kiang hong tun ciangin, Amah alawm pha bel ahih lam, midangte’ kiangah hong gen nuam pah hi; hotkhiatna le sianthona a ngah sak thumaan pen a lung sungah bilh cip thei nawn lo hi. Christ’ dikna ih silh a, Ama Kha Siangtho tawh ih kidim tak ciangin, ih mawk om thei nawn kei ding hi. Topa hoihna ciam a, hoih hi cih ih muh khit ciangin, gen khiat ding ih nei hamtang ding hi. Philip in Honpa amuh lai-a ahih mah bangin, Ama kiangah midang ih paipih ding hi. Christ a ngaih bannate le ahong tung (79) ding leitung thak thu ih gen thanuam ding hi. Jesu’ totsa lampi tot nopna lungsim nakpi-in hong om ding hi. Ih kim ih pam a mite in, “Leitung mite’ mawhna ala khia Pasian’ Tuuno,” a et theihna ding uh deih sakna nasia takin hong om ding hi (John 1:29).

Midangte’ nop tuamna ding ih hanciamna pen eima tung hong tung kik ding hi. Tatkhiat nasepna sunga Pasian in eite hong kihel sakna zong a deihna himah ahi hi. Amah in mite’ tungah Pasian’ pianzia puak theihna thupha hong pia-a, tua mah bangin mite in midangte’ tungah tua thuphate apuak sawn ding ih hi hi. Hih in Pasian in mihingte’ tunga apiak theih pahtawina sangbel le lungdamna lianbel ahi hi. Hih bang itna nasepna sunga a kihel mite pen amaute a Piangsakpa tawh a kinai belin hong om hi.

Lungdam thu puak khiatna le itna nasepna khempeuh Pasian in vantung mite sawl thei hi. Ama deihna asep khiat theihna ding na dang khat peuh zong zang thei lai hi. Ahi zongin ang sung khual lo-a nasepna pana a piang thuphate, lungdamnate le, kha lam khantohnate eite in ih ngah theihna dingin, Amah mah tawh ahi zongin, Christ le vantung mite tawh ahi zongin, nasem-khawmte ahi dingin, itna lianpi tawh Pasian in eite hong teel hi.

Christ bangin gimnate ih thuak ciangin, Amah bangin thukhualna kinei thei hi. Midangte’ phattuamna dinga kipiak khiatna khempeuh in, apia mi’ lung sungah citna thahat saka, “ama zawnna hangin note in na hauh theihna dingun, hau napi-a note’ hang mah a mizawng ahong suakpa,” ahi leitung Tanpa tawh hong kinai zaw sak hi (2 Corin 8:9). Pasian in eite hong (80) pian sakna ah a ngimna, hih bangin ih kicin sak ciang bek mahin nuntakna pen ei’a in thupha hong hiding hi.

Christ’ geelna banga nungzuite’ sep dingte sem a, Ama a dingin kha na ngah leh, siamna a kicing zaw le Pasian’ thu lamah theihna alian zaw na kisap lam na phawk dinga, gilkial dangtak bangin dikna na lunggulh ding hi. Pasian’ kiangah na thuum dinga, na upna zong hong thakhauh in, na kha in zong hotkhiatna tuikhuk panin tui hong dawn ding hi. Hong kido bawlna le zia-etnate in Lai Siangtho simna le thungetna hong hahkat sak ding hi. Hehpihna le Christ theihtelna ah khangto in, siamna zong na hau ding hi.

Citna le siamna tawh midangte’ a ding na sepsakna in zia-le-tong akip akho le Christ banga it huaina hong guan a, tua bang zia-le-tong a neite’ tungah lungnopna le lungdamna hong tung hi. A thupi zaw nate lunggulhna hong om hi. Thadahna le huaihamna zong hong om nawn lo hi. Hih banga Christian gamtat hoih a neite khangto in, Pasian’ na asem dingin hong thahat ding uh hi. Amaute in kha lam thu theihtel zawkna le akip alian zaw upna hong nei ding uh a, thungetna ah zong vangg hong nei zaw ding uh hi. Pasian’ Kha in amaute’ lungsim ah na semin, Pasian’ deihna tawh kituak ngaihsutna a siangthote hong nei ding uh hi. Midangte’ phattuamna dinga angsung khual lo-a hanciam a na asemte in amau’ kihot khiatna ding na asem taktak ahi hi.

Hehpihna ah khantohna ding lampi khat bek a om pen, Christ in eite tunga ahong suat – ei’ huh ding a kisam mite’ tunga nop tuamna ahi dinga ih siamna zah siit lo-a ih hanciamna ahi – nasep pen mah lawp taka sepna ahi hi. Hehpihna pan a hong pai thuphate saanna tawh Christian nuntak kipsak ding hanciam a, Christ’ a ding bangmah asem lote in, bangmah sem lo-a annekna tawh nuntak asawm ahi hi. Kha lam thu ah hi taleh leitung thu ah hi taleh (81) hih banga omna in kiamsukna le siatna hi tawntung hi. A thagui a thatang azang khia nuam lo mi in, asawt lo-in tuate hong zang thei nawn lo ding hi. Tua mah bangin Pasian in apiak a siamna uh azang khia nuam lo Christiante, Christ’ sungah khangto lo bek tham lo-in, a neihsa hatna nangawn taan lai ding uh hi.

Christ’ pawlpi pen mite hotkhiatna dinga Pasian’ sehsa khutzat ahi hi. Leitung khempeuh ah lungdam thu va puak ding pen pawlpi’ nasep ahi hi. Tua pen Christian khempeuhte’ masuan hipah hi. Akua mapeuh in ih siamna zah le ih hih theih tawpin, Honpa’ hong sawlna ih sep ding ahi hi. Eite’ tunga hong kilang Christ hong itna in, Amah athei nai lo khempeuhte’ tungah eite leiba nei hong suak sak hi. Pasian in khuavak hong pia-a, tua pen ei’ a ding bek hi lo-in, midangte’ tungah ih taan sak sawn ding ahi hi.

Christ’ nungzuite in a masuan uh phawk uh hileh, tuni-a khuamial gam sunga lungdam thu atangko mi khat a omna mun ah atul a simin om ding hi. Hih nasepna sungah pumpi tawh a kihel thei lote in zong, a neihsate uh, a thukhualnate uh le, a thungetnate uh tawh tua nasepna panpih ding uh hi. Christian gamte ah zong kha ngah nading nasepna nasia takin hong kisem zaw ding hi.

Eite in Christ’ a ding na ih sep theihna dingin, sep ding a om nak leh ih innkuan sung nangawn zong nusiat kul lo-a, khuamial gam zong va pai kul tuan lo hi. Ih innkuan sung, ih pawlpi sung, ih kikholhpihte’ lak leh, ih nasep-pihte’ lakah zong kisem thei hi.

Nazareth khua khutsiampa’ sep mun ah lungduai tak a nasepna tawh Honpa in a leitung nuntak hun atam zaw hong zang hi. Kuama phawk khak loh le kuama thudon loh ahi thatang tawh lokhote leh (82) nasemte tawh ma apan khopna ah sawltak vantung mite in nuntakna Topa ompih hi. Tua banga tualniam nate asepna ah zong Topa in cinate adam sak lai le Galilee tuihualte’ tunga lam apai laite mah bangin, ahong paina vai citak takin sem in tangtun veve hi. Tua ahih manin nasep thupi bel le panmun niambel ah zong Jesu tawh na kisem khawm thei-a, vai kikuan khawm thei hi.

Paul in, “Mi khat ciat in amah a kisap laitak a, a omzia bang ciat mahun Pasian tawh om paisuak uh hen,” ci hi (1 Corin 7:24). Nasem mi in ama nasepna khat peuhpeuh ah citak taka asepna tawh a Topa minthang sak thei hi. Amah Christ nungzui taktak ahih nak leh a nasepna khempeuh ah a biakna zong keng dinga; mite’ kiang ah Christ’ lungsim kilangsak ding hi. Set tawh nasemte zong, Galilee mual kawm tenga nuntak thupi lo lak a na asem Pa’ a dingin a citak, a muan huai pa zong hithei veve hi. Tua mah bangin Christ’ min alo mi khempeuh in zong, amau sepna phate midangte in amuh uh ciangun, amaute a Piangsakpa le Tankhiapa a pahtawisak theihna dingun gamta uh hen.

Christ’ a ding nasep nadingin, midangte in siamna le phatna lian pipi nei-a, ko bangmah nei lo hi ung, ci-in mi tampi in paulap zong thei uh hi. Siamna a neite bek mah in amau’ siamnate, Pasian’ nasepna dinga azat ding uh hi, cih ngaihsutna hong om hi. A kipakta mi kimkhatte’ tung bek ah siamna kipia-a, adangte ahih leh nasem ding le thaman sang dingin zong kicial vet lo hi, cih bang lamin mi tampi in seh thei uh hi. Ahi zongin gentehna sungah hih bang lamin hong kigen lo hi. Innteekpa in a nasemte samin, mi khempeuh a nasep ding ciat uh guan hi.

‘Topa’ nasem mah bangin,” ih nuntak nasep thupi lo belte zong itna lungsim tawh (83) kisem thei hi (Colossians 3:23). Lungtang sungah Pasian itna a om nak leh nuntakna ah zong hong kilangkhia ding hi. Christ’ namtuina ih kimkot teng kizel in, ih huzaap in midangte domto dinga, nuam tuam sak ding hi.

Pasian’ a ding na sem dinga na kuan khiat ma-in, hamphana lian ahi zongin, siamna tangtuam ahi zongin, na ngah dong na ngak ding hilo hi. Mite in nang hong koici muh ding cih zong ngaihsut phot tadih ding hilo hi. Na nisim nuntakna pen na upna tawh kizui-a a siangtho le a takpi ahih nak a, amau’ phat tuam nading adeihsak takpi nahih lam midangte in ahong muan nak uh leh na hanciamnate a mawkna suak lo ding hi.

Jesu’ nungzuite lak a athupi lobel le azawng belte zong midangte’ a dingin thupha hithei veve hi. Phattuamna khat peuh abawl ahih lam uh amaute kiphawk kha khol lo ding uh hi; ahi zongin amau’ phawk khak loh huzapte pan mahin, tui bangin thupha azai zaw le athuk zaw-in luang khia-a, aphattuamnate pen a nunung thaman saanna ni mateng amaute in thei kha khol lo ding uh hi. Nasep thupi asem ahih lam uh amaute in phawk khol lo uh hi. Lawhcing maw, lawhcing lo cih lung hihmawhna amau nei se lo uh hi. Pasian’ vaihawmna banga amau’ nasep ciat thumaan takin sem a, mai anawt ding uh hibek hi; tua hileh amau’ nuntakna zong a mawkna suak lo veve hi. Amaute’ kha zong Christ tawh a kibat dongun khangkhang ding hi; akhan sung uh Pasian tawh nasem khawmte hi uh a, a thupi zaw nasep asem ding le, hong tung lai ding nuntakna ah lung damna lianpi a ngah dinga a kilawmte ahi uh hi.

xxXxx

FACEBOOK AH