ZI LEH PASAL ZON ZIA DING (AZOM)

4. PASAL ZONZIA DING:

I Sam 25:1-38 Nabal min pen, mihai min hi a, pasal hai, a gilo, ama' thu bek thu a sa pa hangin, azi Abigail lungkham mahmah hi. "Pasal gilo nei, galtuam do" kici hi. India numei ten pasal zongin, lei zaw uh a, ei Zomite in, pasal in numei zongzaw hi. Nungakte aw, pasal nateel khialh uh leh, bawhlung suihin hong kisui ziahziah dinga, vawli bawl betin hong kibeng ding hi. Khanglui ten, "Sial in aki keng, vok in a tuuk keng, mihing in, a gamtat hoih keng" naci hi. Pasian kiangah, pasal hoih ngen masa in.

Numei in, pasal zon, ngeina hilo ahihman, inn ah ngak inla, hong hawhte hoihtak hopih in. Deihteel lua se ken. Na lawmpa "Omzia kantel in." A zi bangzahna nahi kha diam! Ngaihsun in. Pasian um lo, a thadah, thaikap, zunete tenpih peuhmah ken. Khualmial lakah kihona pelh in. (Khuamial gamtatna Pasian in deih lo hi). Kiten ma in, na vankhamte piapah ken. Kiten hitteh "Elzen" ci bibek lel in. Hong zeetna hithei hi. Kha tvei mindai khantawn kimang thei hi. (A duh baihlua ten ngawlbaih thei hi).

Na lawmpa in a nu bangci bawl kan masa in. Na teekpa dingin, a zi leh a sungte bangci bawl cih zong kan masa in. Tua bangin na lawmpa in, nang hong bawlkha ding hi. Biakna kibang nuampen kha ding hi. Na pasal' nu leh pa na itpih thei diam! Na pasal in, na nu leh na pa hong itpih thei diam! Na teek ten nang hong it thei diam! Nang zong, nang na teekte na it theih kei ding leh pasal nei kei zawmai in. Ruth in a teeknu bangci bawl hiam, cih phawk gige sa-in pasal nei in. Pasal hong khoih thuthutte hong gaai masa sak nuamte hi a, pelh ding kilawm hi.

Nang sanga uzaw, pilzawte pasal dingin teel masa in. Na pasal ding teel inla, na kum zong tuatkik zel in. Pasian umin, hau-in, pilin, amel hoih in, a hong it leh ahoihpen hi. Uzaw, nautum, pa khat cihte zong naten ma in, ngaihsun pha-in, khentel in. A gilo, a phincil, zi vuavua, zi mamate limtak ngaihsut huai hi. Ki tenkhitteh, hong kikhel nave, cikha kei in. Midang tawh nau neisapi pasal dingin tenpih ken. Mi' zineu ding leh hingsuan dingin kipan vet ken.

Numei kihoihsak luate pate' beh leh hauhna a suangte val thei hi. Na vakpih ngam loh dingte pasal in nei buang kei in. Inn luah ding, inn tuan ding cihte zong kan masa in. Mi' nu mi' pa na hon/sin nop kei leh pasal nei dah zawmai in. A lauhuai lawmngaih natna in, "Nungak leh tangval ki-awi lopi a, kingaite, ahoih lohna teng a kigen teh, ngaihnateng a neih semsem pen, a lauhuai penpen lawmngaih natna ahi hi. A telsiam ding leh a zangsiam dingin, ih biak Topa Pasian in thupha hong pia ta hen.  Dr. Cin Sian Pau

Zo Phualva Thupuak - Volume 01, Issue 13 by DavidLian on Scribd