Chapter 8 CHRIST SUNGAH KHANTOHNA

Pasian’ ta ahong suak sak lungtang kikhelna pen Lai Siangtho in suahna ci-in na gen hi. Tua banah lokho pa in a vawh khaici hoih hong po khia tawh na genteh lai hi. Tua mah bangin Christ’ lam a kikhel mite, Christ Jesu sungah nupi le papi asuah dong uh a “khangto” ding “naungek suakthakte” ahi uh hi (1 Peter 2:2; Ephesians 4:15). Tham lo-in, lo sunga a kivawh khaici hoih bangin, khangto a gah agah ding ahi hi. Isaiah in, amaute “A minthanna dinga Topa in asuan dikna singkungte kici ding hi,” ci hi (Isaiah 61:3). Kha lam nuntakna thumaante ih tel zawh theihna dingin, nate’ nuntakna pan gentehna kizang hi.

Mihing’ pilna le siamna khempeuh in zong, na aneu bel khat sung nangawn ah nuntakna guang thei lo hi. Singkung hi taleh, ganhing hi taleh, a nuntak theihna ding pen Pasian teekteek in aguat ciang bekin nuntakna nei thei hi. Tua mah bangin mite’ lungtang sunga apiang kha lam nuntakna zong Pasian’ kiang pan a hong pai nuntakna bek mah tawh apiang ahi hi. Mi khat peuh “tung lam panin asuah khiat kei leh” Christ in a piak ding nuntakna ama’n ngah kha lo ding hi (John 3:3).

Khantohna thu zong nuntakna thu mah tawh kibang hi. Paak ngumte palh sak a, paakpalhte agah sak pen Pasian ahi hi. Khaicite khangsak a, “a masa-in ateh, tua ciangin avui, tua ciangin avui tungah atang” apiangsak pen Ama vangliatna ahi hi (Mark 4:28). Kamsang Hosea in, Isreal-te “unok bangin khang ding hi.” “Ankung bangin hing dinga, lenggui bangin zaam ding hi,” ci hi (Hosea 14:5,7). “Unok kungte’ khan dan a ngaihsun dingin” Jesu in (68) hong cial hi (Luke 12:27). Singkungte le paakkungte zong amau’ lung hihmawhnate, amau’ hanciamnate tawh akhang hi lo-in, amau’ nuntakna dinga Pasian’ vaihawm sakna bangbang a saanna uh tawh akhang ahi hi. Naupang in zong ama lung hihmawhna le thahatna tawh a tun behlap thei tuan lo hi. Nang zong na lung hihmawhna le na hanciamna tawh kha lam khantohna na bawl thei tuan kei hi. Singkung hi taleh, naupang hi taleh, amau’ nuntakna dinga na a sem, akim apam uh a om – huih, nitaang, an – cihte a ngahna panun khang thei bek hi. Nate pan a thuphate tawh singkung le ganhingte a khuasak uh mah bangin, Christ zong Amah a muangte’ a dingin khuasakna ahi hi. Christ pen amau’ “tawntung khuavak,” “nitaang leh lum” ahi hi (Isaiah 60:19; Late 84:11). Amah pen “Israel mite’ a dingin daitui ahi hi.” “A kimet lopate’ tungah guah bangin Amah zu suk ding hi” (Hosea 14:5; Late 72:6). Amah nuntakna tui hi-a, “Leitung mite nuntakna apia, vantung pan a ahong pai suk Pasian’ anlum ahi hi” (John 6:33).

Huih in leitung pumpi atuam cip bang teek in Pasian in tehkak theih aom lo, a Tapa ahong piakkhongna ah, a hehpihna thupha-huih kuumpi tawh leitung buppi atuam cip ahi hi. Christ Jesu sungah a khangcing nupi le papi asuah dong uh, tua hehpihna thupha-huih a diik mi khempeuhte nungta-in akhang ding uh hi.

Nitaang in paak ahoihna le a etlawmnate apicin theih nadingin a kicin sak theihna dingin paak in nitaang lamah a kihei mah bangin, eite’ tungah vantung khuavak hong taang a, ih zia ih tongte Christ a’ asuun dinga ahong khan theihna dingin Dikna Nitaang lamah ei zong ih kihei ding kisam hi.

Jesu in, “Keima sungah om un, tua hileh note’ sungah kei ka om ding hi. Lenggui hiang in a guipi sungah aom kei leh ama thu-in gah aneih theih loh mah bangin, keima sungah na om kei uh leh note in zong bangmah na hih thei kei ding uh hi… Kei lo-in note in bangmah na (69) hih thei kei ding uh hi,” acih ciangin hih thu mah ahong hilh ahi hi (John 15:4,5). Ahiang in khanna le gahna aneih theihna dingin akungpi abelh mah bangin, nang zong nuntak siangtho na neih theihna dingin Christ na belh akul ahi hi. Amah tawh lo-in nuntakna na nei kei hi. Mawh zolna na dona ding ahi a, hehpihna le sianthona sungah na khanna ding ahi zongin, thahatna na nei kei hi. Ama sungah na om leh na khang ding hi. Nuntakna Ama kiang pan la in; kung keu-in gah lo-in na om kei ding hi. Gunpi tui luang gei-a kisuan singkung tawh na kibang ding hi.

Mi tampi in khantohna pen amau kia-a sep dingin ngaihsun uh hi. Mawhna a mai sak dingin Christ muang uh hi napi-in, tu-in amau’ hanciamna tawh ahoih gamtat ding hong sawm uh hi. Tua banga a hanciam uh hangin piang zo lo ding hi. Jesu in, “Kei lo-in bang mah na hih zo kei ding uh hi,” ci hi. Hehpihna sungah ih khanna, ih lungdamna, ih kimanna, cihte khempeuh Christ tawh ih kipawlna pan bekin piang hi. Amah tawh ni sim nai sima kikholhna, - Ama sunga omna bek mah tawh hehpihna sungah a khangto ding ih hihi. Amah pen ih upna ahong mapat sak bek hi lo-in, ahong mahial sak ding Pa zong hi lai hi. A masa bel, a nunung bel le a tawntung in Christ ahi hi. Ih masuan a kipatcilna le a tawpna bek ah Amah hong om ding hi lo-in, ih ih kalsuan sim in lamdungtawn ah eite ahong ompih ding ahi hi. David in, “A tawntung in ka masuan ah Topa ka om sak hi; ka tak lamah Amah om ahih manin, kei ka ling kei ding hi,” ci hi (Late 16:8).

“Christ’ sungah bang cih om theih ding ka hi hiam?” ci-a na lung akham leh, Amah na saan cil lai-a na hih bang mahin hih in. “Topa ahi Christ Jesu na saan uh mah bangin, Ama sung-ah nungta un.” “Midik in upna tawh a nungta ding hi” (Colossians 2:6; Hebrews 10:38). Ama a’ ahi khin ding, Amah bia-a athu a mang dingin, Pasian’ tungah nang mahmah kipia-in, na Honpa dingin Christ na saang hi. Nang le nang na mawhnate kimai sakin, na lungtang na kheek (70) thei kei hi; ahi zongin Pasian’ tungah na kipiak ciangin, Christ hangin Amah in tuate khempeuh hong hih sak hi, ci-in na um hi. Upna tawh Christ a’ na hi hi; upna tawh Ama sungah na khangto ding hi – hih pen piakna le laakna ahi hi. Na lungtang, na utna, na sepna – a vekpi-in Amah na pia ding hi, - Ama hong ngette khempeuh amang dingin Ama tungah nang mahmah kipia in; tua ban-ah thu na man na-dingin tha ahong pia ding—na hatna, na dikna, le na tawntung huhpa ahi ding, na lung sungah Christ ahong om nading, in thupha khempeuh a kicinna ahi Christ, a vekpi in na la ding hi.

Zingsang tungin Pasian’ tungah kipia in; hih pen na nasep a masa bel hisak in. Hih bangin thu ngen in: “Topa aw, Nang’ a hong hi khin sak in. Na khe phung ah ka ngimna khempeuh kong koih hi. Na nasepna sungah tuni hong zangh in. Kei tawh hong om in la, ka nasep khempeuh Nang’ sungah kisem ta hen.” Hih pen ni sim vaipi ahi hi. Zingsang simin tua ni’ a dingin Pasian’ tungah ki-ap in. Na ngimna khempeuh a kisep khiat zawhna ding, ahih kei leh, Ama deihna ahih zawk leh zong sep loha a om zawkna dingin Amah ap in. Hih bangin nisim in Pasian’ khut sungah na nuntakna na pia dinga, hih bang mahin na nuntakna zong Christ’ nuntakna tawh a kisuun zaw sem dingin hong kizuun ding hi.

Christ’ sunga nuntakna pen tawldamna ahi hi. A lungdam banga omna mawk bek hi lo-in, lung muang taka omna ahi hi. Na lametna nang’ sungah om lo-in, Christ’ sungah om zaw hi. Nang’ thanemna pen Ama hatna tawh kipawlin, nang’ haina pen Ama ciimna tawh, nang’ zawngkhalna pen Ama thuak zawh hatna tawh kipawl hi. Na lungsim nangma tung bekbek ah a kingak lohna dingin, nang le nang ki-en kei in la, Christ en zaw in. Ama hong itna, Ama zia-le-tong a hoihna le a kicinna bekbek mah ngaihsut in nei in. Christ in Ama ang sung a nialna, Christ a kiniam khiatna, Christ a sianthona le a hoihna, a kidem zo lo Christ’ hong itna, (71) cihte pen kha-i lung ngaihngaih ding thute ahi hi. Amah itna, Amah ciinna, Ama tung bek a kingakna, cihte tawh Amah a suun dinga a kikhel ding nahi hi.

Jesu in, “Keima sungah om un,” ci hi. Hih kammal sungah tawldamna, kipna le khamuanna thu om hi. “Ka kiangh hong pai un,…tawldamna ka hong pia ding hi,” ci-in hong sam lai hi (Matthew 11:28). “Topa’ sungah tawlnga un la, Amah ngak hithiat un,” cih la phuak siam pa’ kammal ah zong hih thu hong kilang hi (Late 37:7). Isaiah in zong, “Om hithiatna le khamuanna sungah na hatna uh om ding hi,” hong ci hi (Isaiah 30:15). Hih tawldamna pen mawk omna tawh a kingah hi lo hi; bang hang hiam cih leh Honpa in tawldamna ahong khapna sungah, “Keima hakkol kisuan un;…tua hileh tawldamna na ngah ding uh hi,” cih nasep ding sawlna zong kihel hi (Matthew 11:29). Christ’ tunga a tawlnga hithiat lungtang pen, Ama a ding nasepna ah zong kuhkal in thanuam bel zel ding hi.

Lungsim in ang sung bek a ngaihsut ciangin, hatna le nuntakna bulpi ahi Christ tawh kigamla hi. Honpa’ kiang pan ih lungsim kipeel khia-a, tua banga Christ tawh ih kha kipawl a a kikholh theih lohna ding pen, a tawntung a Satan’ hanciamna ahi hi. Leitung gualnopnate, nuntak lung hihmawhna, lungkhamna le dahnate, mihingte’ khialhnate, ahih kei leh, nangma khialhna le kicin lohnate, - hihte khat peuh ahih kei leh, a vekpi-in zangin na lungsim hong hei khia ding hi. Ama khemnate tawh lam khial kha kei in. Pasian’ a dinga nungta nuam a a thumaan mi tampite, amau’ khialhna le thanemnate bekbek a ngaihsun dingin Satan in zol ahih manin, tua bangin amaute Christ tawh kikhen sakin, zawhna zong ngah thei zel hi. Eite in ang sung (72) bek ngaihsun a, gupna ih ngah ding leh ih ngah loh ding lung himawh giauguau sa-a ih om ding hi lo hi. Hihte in hatna Bulpi panin eite hong khen khia hi. Pasian’ tung-ah na kha ap tinten in la, Amah muang in. Jesu’ thu gen in la ngaihsun in. Ama sungah nangma ang sung thu bei sak in. Up lahna khempeuh paai khia in; na launate zong bei sak in. Sawltak Paul tawh, “Ka nungta hi; ahi zongin kei ka hi kei-a, ka sungah Christ a nungta ahi hi; tu-a pumpi tawh ka nuntakna in, kei hong it a, kei’a dingin Amah mah hong kipia Pasian’ Tapa ka upna tawh a nungta kahi hi,” ci khawm in (Galatian 2:20). Pasian’ sungah tawlnga in. Ama tunga na piak khempeuh Ama’n kem thei hi. Ama khut sungah nang mahmah na om nak leh, nang ahong it Amah hangin Amah in nang a gualzobel hong suaksak ding hi.

Christ in mihing’ pianzia ahong laak ciangin, itna khau tawh mihingte, Amah mah tawh a hong hen khawm hi-a, mihing’ ut thu lo ngal tawh bang mah dang in tua khau a sutat zo ngei kei ding hi. Christ’ kiang pan a ei mahmah a kihem khia ding, - tua itna khau a sutat dingin, Satan in a tawntungin eite hong khem ding hi. To dang a teel dinga bangmah in ahong khem zawh lohna dingin, ih vil ding, ih hanciam ding le, thu ih nget ding a kisapna hih mun ahi hi; banghang hiam cihleh ut bangbang ih teel thei hi. Ahi zongin Christ bek mah mitsuan ni; tua hileh Ama’n hong kem bit ding hi. Jesu en le’ng lau na’ng om lo hi. Ama khut sung panin bang mah in eite hong sut khia zo lo ding hi. Amah et tintenna tawh, “Topa’ Kha in a vangpi ahong taan sak mah bangin, eite in vangliatna khat pan vangliatna khat ah Ama lim bangin ih kikhel hi” (2 Corin 3:18).

Nungzuipite’n zong hih bang mahin a it huai Honpa tawh kibatna a ngah uh ahi hi. Amaute in Jesu’ kammalte a zak uh ciangin, Amah a kisap lam uh hong phawk uh hi. Amaute in zongin, mu-in, A nung zui uh hi. Amah tawh inn sung khawng, ankuang gei khawng, (73) gamdaihna mun khawng leh lo sung khawng ah om khawm uh hi. Sang naupangte le siapa bangin amaute om khawm uh a, Ama kam pan a thumaan thute nisim in saang uh hi. Nasemte in asep ding uh a theihna dingin a pu uh a et uh mah bangin amaute in Jesu en uh hi. Tua nungzuite zong “eite mah banga mi mawkmawk” mah hilel uh hi (James 5:17). Mawhna tawh kidona ahi gal do ding mah nei uh hi. Nuntak siangtho a neihna dingun amaute zong hehpihna mah kisam veve uh hi.

Honpa’ sun in avang alengsakbel, it ngah nungzui, John nangawn zong, a it huai azia atongte a pianpih hi tuan lo hi. Ama ang sung ding bek ngaihsun a minphat a ut mahmah khat ahih bek tham lo-in, thuakna aneih ciangin a lungtom aheh baih khat ahi hi. Ahi zongin Pasian’ zia-le-tong ama kiangah ahong kilat ciangin, ama ginat lohna hong kimu in hong kiniam khiat hi. Pasian’ Tapa’ nisim nuntakna sunga a muh hatna le thuak zawhna, vangliatna le thunemna, thupina le kiniam khiatna cihte, deihna le pahtakna ama lung sung hong dim hi. Ama ang sung mangngilh a, a Topa itna bek ahong neih dong-in, nisim in ama lungsim Christ lamah kikai tawntung hi. Ama lungtomna le hehbaihnate, Christ’ vangliatna nuai hong tung hi. Kha Siangtho’ vangliatna in ama lungtang athak in hong bawl hi. Christ itna in hihzawhna nei-a, zia-le-tong kikhelna piangsak hi. Hih pen Jesu tawh kipawlna hang ahi hi. Lung sungah Christ hong om ciangin, pianzia buppi hong kikhel hi. Christ’ Kha, hong itna, cihte in lungtang nip sakin, kha hong thuzawh in, Pasian le vantung lam lunggulhna hong khang sak hi.

Christ vantung akah toh ciangin, Ama ompih laina A nungzuite in phawk thei uh hi. Itna le khuavak tawh kidim in Amah mah in a ompih ahi hi. Amaute tawh lam apai khawm, (74) thu agen khawm, amau’ lung sunga lametna le hehnepna thu agen Honpa Jesu, A kam panin lungnopna thugen kawmkawm sa-in, amaute’ kiang panin vantung ah kila to-a, vantung mite in Amah a tonpih kawmkawmin, “En un, leitung hun a bei dongin, note tawh kong om khawm ding hi,” cih awging amaute’ kiang dong kiza suk hi. (Matthew 28:20). Mihing lim mah pua-in vantung kahto hi. Pasian’ tokhom mai-ah Amah om a, amau’ Lawmpa le Honpa mah hilai ahih lam; Ama khualnate zong kikhel lo ahih lam; gimna athuak mihing mah a kibulh lai ahih lam amaute in thei uh hi. Mihing atat khiatna dinga apiak khiat zah phawkna dingin, a liamsa Ama khut le khete lakin, Pasian’ mai-ah Ama sisan manpha, thupha tawina-in va lui hi. Amaute’ a ding mun abawl khol dingin vantung ah Amah apai a hihna leh, Amah hong pai kik a amaute Ama kiangah hong la ding a hihna amaute in thei uh hi.

Topa vantung akah khit zawh amaute a kikhop uh ciangin, amaute in Jesu’ min tawh Pa’ kiangah a deihnate uh nget ding lawp uh hi. Zahtakna tawh thu ngenin kun uh a, “Ka min tawh Pa’ kiangah na nget peuhpeuh uh, Pa in note ahong pia ding hi. Tu ciang dong ka min tawh note in bangmah na ngen nai kei uh hi. Na lungdamna uh a kicinna dingin ngen un; na ngah ding uh hi,” cih kamciam paulam uh hi (John 16:23,24). “Sihna athuak tham lo-in sihna panin tho kik a, Pasian’ tak lamah tu-in eite’ a ding thuumna ahong bawl sak pa in Christ ahi hi,” ci-in nakpi-a panna tawh a upna khut uh a saang zaw semin laam to uh hi (Romans 8:34). “Note’ sungah hong om ding hi,” ci-a Jesu in a gen Hehnempa pen Pentecost pawi-in amaute tawh om khawm hi. Tua tham lo-in Jesu in, “Kei ka pai khiat ding note’a dingin ahoih zaw ding hi. Bang (75) hang hiam cihleh kei pai khia kei leng Hehnempa note’ kiangah hong pai lo ding hi. Kei pai khia-in hi leng note’ kiangah Amah kong sawl ding hi,” ci hi (John 14:17; 16:7). Tua hun a kipan Kha Siangtho ompihna hangin Christ in a tate lung sungah aom tawntung ding ahi hi. Amaute tawh a pumpi a om khop lai sangin tu-in amaute Amah tawh a om khopna uh kinai zaw ding hi. A sung uh a om Christ’ hihzawhna, itna le khuavakte amaute’ tung panin taang khia-a, mite in amaute a et uh ciangin, “Lamdang sa-in, Jesu tawh amaute om khawm ngei ahih lam uh aphawk kik uh hi” (Sawltak 4:13).

A nungzuite’a dinga ahih bangbang tu ni-a A mite’a dingin zong Christ hi nuam hi; tua ahih manin Ama kianga om nungzui tawm khat tawh thu a nget nunungna ah Jesu in, “Hih mite’a ding bekin thu kong ngen kei hi, amaute’ thugenna pana kei hong um ding mite’ a dingin zong kong ngen hi,” ci hi (John 17:20).

Jesu in ei’ a ding thu hong nget sak hi. Pa tawh Amah pum khat ahih mah bangin, eite zong Amah tawh pum khat ih hihna dingin thu ngen hi. Hih pen kipum khatna taktak ahi hi. Honpa in Ama thu hong gen a, “Tapa in ama thu-in bangmah ahih thei kei hi.” “Ka sunga a teeng Pa in asem ahi hi,” ci hi. (John 5:19; 14:10). Ih lung sungah Christ ahong ten ciangin, “Ama deihna bangbang asem nuam dingin,” ih sungah Ama’n na hong sem ding hi (Philippians 2:13). Ama sep bangin eite in ih sem ding hi. Ama lungsim bang ih kilangsak ding hi. Tua bangin Amah it in Ama sungah om lehang, “Lutang ahi Christ’ a dingin na khempeuh ah ih khangto ding hi” (Ephesians 4:15).

Facebook ah zong kisim thei hi.

 xxXxx