Christ Kiang Zuatna - Chapter 3: KISIK-KIKNA

Koici bangin mihing, Pasian tawh kilem kik thei ding hiam? Koici bangin mi mawhte midik suak thei ding uh hiam? Christ hang bekin eite, Pasian leh sianthona tawh a kilem thei ding ih hi hi; ahih leh Christ kiang koici tun theih ding ih hi hiam? Pentecost ni-in mi honpite in a mawhna uh a phawk uh ciangin, “Bang hih ding ka hi uh hiam?” acih uh mah bangin, tu-in zong mi tampi lung himawh uh hi. Peter in, “Kisik un,” na ci masa hi (Sawltak 2:37, 38). Tua zawh a sawt lo-in, “Kisik un la, na mawhnate uh a ki phiat bei theihna dingin Pasian’ lamah kihei un, na ci leuleu hi (Sawltak 3:19).

Kisikkikna in mawhna hanga dahna le tua mawhna pana kihep khiatna ahi hi. Mawhna a siat huaina ih muh mateng kinusia thei lo hi; lungsim takpi tawh ih kihep khiat mateng kikheelna taktak zong om thei lo hi.

Kisikkikna a man taktak a tel siang lo mi tampi om hi. A khialhna un amau’ tungah gimna a tun sak ding lau uh ahih manin, mi tampite in a mawhna uh hangin kisikin, puatham kipuahna zong nei sam uh hi. Lai Siangtho in a gen kisikna pen tua bang hi lo hi. Amaute a mawhna uh sangin athuak ding uh dah zaw uh hi. Hih bang dahna pen Esau in a innluahza taan suak takpi ding cih atheih cianga a dahna bang hilel hi. Balaam in, namsau lik sa-a a na pang vantung mi amuh ciangin, asih ding alau manin a khialhna pulak hi; ahi zongin mawhna kisikna taktak nei lo-in, a tupna lah khel tuan lo, siatna lah mudah tuan lo hi. Judah Iscariot in a Topa a lehhek khit ciangin, “Mawh nei lo sisan hek kha ka hih manin ka khial hi,” ci hi (Matthew 27:4).

A thuak ding mawhsakna le thukhenna a kihtak manin, a lungsim kisuantakna tawh a pulak khia hi bek hi. Ama tunga a tu kik ding teng a kihta hi bek a, mawh nei lo Pasian’ Tapa a hek man le, Isreal Misiangtho-pa a nial man a lungsim kitam kham zaha dahna taktak a nei hi lo hi. Pharaoh in Pasian’ thukhenna athuak ciangin, gimna athuak thuah lohna dingin a mawhna a pulak hangin, gimnate aven tak ciangin, Vantung mah langpan kik zel hi. Amaute in athuak ding teng bek uh a kah pih uh hi-a, a mawhna uh hanga adah uh hi lo hi.

Ahi zongin lungsim in Pasian Kha Siangtho’ zolna a zuih ciangin, khua hong phawk dinga, Pasian in van-le-lei a ukna ahi A thukham siangtho a thupina, mawhnei mi in hong ngaihsun thei ding hi. “Leitung ah hong pai-a mi khempeuh khua a musak Khuavak” in alung sungkua-tawng teng a kaap ciangin, khuamial sunga a kisel sim teng hong kidawk hi (Johan 1:9). Mawhna kisuantakna lungsim hong om ta hi. Mawhnei mi in Pasian’ dikna hong phawk in, lungsim a Kankhiapa’ mai ah ama mawhna leh kihhuaina teng tawh a kidawk ding hong lau thei ta hi. Pasian’ itna hong mu-in, sianthona a hoihna leh a nuam huainate zong hong mu ta hi; sianthona ngah a Vantung tawh kikholh theih kik ding hong ut ta hi.

David apuk khit cianga a thungetna in, mawhna hanga dahna taktak hong lak hi. Ama kisikkikna pen a lungsim takpi ahi hi. A khialhna a kiphelh ding hanciam lo hi; Thukhenna tawh kipelh ding zong ut tuan lo a hihna a thungetna ah kilang hi. A thu palsatna a nasiat lam David in mu hi; a kha a kihhuaina zong mu hi; a mawhna hong kih hi. Mawh maisakna ding bek ngen lo-in, lungsim siangtho zong hong ngen lai hi. Sianthona a nopna – Pasian tawh kilemna le kikholh kik theihna lunggulh hi. Lungsim takpi tawh hih bangin thu ngen hi:

“A thu palsatna kimai saka, a mawhna a kikhuh sak mi in thupha ngah ahi hi. Topa in khialhna a suat lo mi, a lungsim sunga zuau thu a vom lo mi in thupha ngah ahi hi.” (Late 32:1, 2). 

“Pasian aw, itna na neih mah bangin kei hong hehpih in la, Na hehpihna atam mah bangin ka thu palsatnate Hong phiat bei sak in… Ka thu palsatnate ka thei-a, ka mawhna ka mai ah om ngitnget hi… Husop tawh hong nul lecin, ka siang dinga, hong sil lecin vuuk sangin ka ngo zaw ding hi…. Pasian aw, ka sungah lungtang siangtho hong guang in la, lungsim maan ka sungah hong bawl pha in. 

Na kiang panin hong nawh khia kei in la, Na Kha Siangtho hong laak khiat sak kei in. Na hot khiatna lungdamna hong pia kik in la, Na lungsim neem tawh kei hong dom to in…. Pasian, kei hong hon khia Pasian aw, mi thahna mawhna panin kei hong hon in; Tua hileh ka leii in Na dikna la nakpi-in sa ding hi.” (Late 51:1-14).

Hih banga kisikkikna pen ei’ hatna kia tawh ahi zo ding hi lo hi; a sangna ah kah to-a mite’ tungah silpiakte apia Christ’ kiang panin ki ngah bek hi.

Mi tampi in a khialh theih uh hih mun san tak hi-a, tua ahih manin Christ in a piak nop huhna amaute in ngah kha lo uh hi. A mawhna uh a maina dingin kisikkikna kisam ahih ciangin, a kisik masak phot loh un Christ’ kiang a zuan thei ding kisa lo uh hi. Kisikkikna a om ciangin mawhmaina a om thei pan bel himah hi; banghang hiam cihleh lungsim kitam khamte bek mah in Honpa a kisap lam uh phawk uh hi. Ahi zongin mawh nei mi in a kisik masiah Christ’ kiang zuan thei lo ding hiam? Mawh nei mi leh Honpa’ kikal ah kisikna a dong kholhin koih ding ih hi hiam?

“Van gik pua-a a gim mi khempeuhte, ka kiangah hong pai un, tawldamna kong pia ding hi,” ci-a Christ’ sapna adawn theihna dingun, mawh neite a kisik masak phot kul hi, ci-in Lai Siangtho in hong hilh lo hi (Matthew 11:28). Kisikkikna taktak a piang sak pen Christ kiang pana hong pai khia hoihna ahi hi. “Isreal mite’ tungah kisikkikna le mawhmaina apia dingin, Pasian in Amah, Mangpa le Honpa-in Ama tak lamah a lamto hi,” ci-a Peter in Isreal mite’ kiangah agen ciangin hih thu hong kitel sak hi (Sawltak 5:31). Christ lo-in mawhmaina kingah thei lo hi; khua hong phawk sak ding Christ’ Kha lo-in kisikkikna kinei thei lo zaw kan lai hi.

Ngaihsutna maan khempeuh bulpi Christ ahi hi. Mawhna muhdahna lungsim ahong guan thei zong Amah bek ahi hi. Thuman le sianthona ih lunggulhna khempeuh, mawh ih hih lam ih kiphawk theihna khempeuh in ih lung sungah, Christ’ Kha gamtang ahih lam a kilatna ahi hi.

Jesu in, “Lei panin Kei hong kikhai kang leh mi khempeuh Ka kiangah Ka kai ding hi,” ci hi (John 12:32). Christ pen leitung mite’ mawhna hanga a si Honpa ahih lam mawh nei mi’ kiangah a kilat kul hi; Calvary singlamteh tunga Pasian’ Tuuno ih et ciangin, ih lungsim sungah tatkhiatna thu thuk hong kilanga, tua ciangin Pasian’ hoihna in kisikna hong nei sak hi. Mawh neite’ tang dinga a sihna ah a kithei khin zo lo itna Christ in hong kilangsak hi; tua itna mawh nei mi in amuh ciangin a lungtang hong nipin, a lungsim hong sukha-in, kisikkikna takpi hong nei hi.

Mite in a mawh gamtatnate uh maizum pihin, a zongsatna hoih lote uh nusia thei zel mah uh hi. Christ in amaute a kai a hih lam amaute in phawk lo uh hi. A man gamtat nopna taktak tawh kipuah pha dinga a hong hanciamna uh pen amaute a kai Christ’ vangliatna ahi hi. A phawk khak loh uh vangliatna khat in amau’ sungah na sem a, khuaphawk theihna hong nei-in, a gamtatna hong kikhel hi. Ama singlamteh a en ding leh, a mawhna un a sut gawp Pa amu dingin Christ in amaute akaih ciangin, a ngaihsutna sung vuah thukham zong hong lut ta hi. A gamtatna uh a siatna le, a sung uha a tektang mawhnate hong kilang ta hi. Christ’ dikna thu pawl khat hong thei ta uh ahih manin, “Mawh neite tatkhiatna dinga hih zahta kipiakna a kisam sak mawhna bang hi mawk hiam? Eite kisia lo-in nuntak tawntungna ih ngahna dingin, hih zahta itna, hih zahta thuakna, hih zahta kiniam khiatna a kisam himawk maw?” hong ci ta uh hi.

Mawh nei mi in tua itna nialin, Christ’ lama a kikaih ding zong nolh thei hi; ahi zongin ama’n anial kei nak leh Christ’ lamah amah kikai ding hi; hotkhiatna thu hong theih ciangin, Pasian’ Tapa gimna athuak sak a mawhnate hong kisikin, sing-lamteh phung hong zuan ding hi.

Nate’ tunga na a sem Pasian’ lungsim mah in mite’ lungsim sungah thu gena, a neih loh uh na khat deih valvalna nei sak hi. Leitung nate in amau’ deihna cin zo lo hi. Lungnopna le tawldamna apia thei nate – Christ’ hehpihna le sianthona a nopna – bek mah azong dingin Pasian’ Kha in amaute sawl hi. Hong lungkimsak zo lo mawhna tawh kipawl gualnopnate panin, Ama sungah a kingah thei a kicing thuphate, mite in akin zawk theihna dingin, muh theih muh mawh nate’ tungtawn in Honpa in na sem tawntung hi. Hih leitunga akeh sa tuikuangte pana dawn ding tui a mawk zonzon mi khempeuhte’ kiangah Pasian in, “A dangtaak mi hong pai ta hen. A dawn nuam khempeuh in nuntakna tui a khawnkhong in dawn ta hen,” hong ci hi (Kilaakna 22:17).

Hih leitung in ahong piak theih sanga ahoih zaw na a lunggulh mi aw, tua na lunggulhna pen Pasian’ hong hopihna ahih lam phawk in. Kisikkikna hong guana a kicing itna le sianthona tawh na kiangah Christ ahong lahna dingin ngen in. Honpa’ nuntakna sungah Pasian’ thukham bulpi – Pasian itna le mihing itna – kicing takin kilang hi. Citna siamna le, ang sung khualna om lo itna pen Ama nuntakna ahi hi. Eite in Honpa en a, Ama kiang pana khuavak in eite ahong kap ciangin ih lung sung mawhna tawh kidim ahih lam kimu thei hi.

Ka gamtatna hoih a, ka lungsim zong maan hi, ci-in Nicodemas mah bangin ei-le-ei kisathei-in mawhnei dangte bangin Pasian’ mai-ah lungsim kiniam khiat kul kei, ih ci kha ding hi; ahi zongin ih lung sungah Christ kiang pana khuavak ahong tan ciangin, kihhuai mahmah ih hihna ih kimu ding hi; ih gamtatna khempeuh a kihhuai sak, Pasian’ muhdah huaihamna lungsim ih neih lam ih kithei ding hi. Tua tak ciangin ei’ dikna pen puansia nin bang bek hi takpi a hihna, a kihhuai mawhna panin Christ’ sisan bek mah in hong silsiang thei a hihna le, Amah a sun dingin ih lungsimte hong bawl pha thei a hihna ih thei ding hi.

Pasian’ thupina mal khat, Christ’ sianthona zang khat in lung sung a kap ciangin, kihhuaina mal khat nangawn kitel sinsen sak a, mihing’ zia-le-tong gina lo khempeuh kilang kilkel sak hi. Lunggulhna hoih lote, lungsim kawite le, kampau siangtho lo khempeuh zong kimu khia sak hi. Pasian’ thukham pai-a thuman lo-a a gamtatnate, mawh nei mi in hong muh tel ciangin, Kha Siangtho’ nasepna hangin hong patau-in hong lung gim hi. Christ’ zia-le-tong kawk bang lo, a siangtho a muh ciangin amah le amah hong kikih hi.

Kamsangpa Daniel in ama kianga hong pai vantung mi’ kimkot a vanglianpi amuh ciangin, ama zawngkhalna le kicin lohna teng hong phawk hi. Tua a lamdang mangmuhna hangin, “Ka sungah thahatna a om nawn kei hi. Ka mai suah hong kidang gawp a, thahatna ka nei nawn kei hi,” ci hi (Daniel 10:8). Tua bang atuak mi in huaihamna hong mudahin, ang sung khualna hong zadahin, Christ’ dikna pana Pasian’ thukham le Christ’ zia-le-tong tawh a kilem lungsim siangtho hong zong ding hi.

Paul in, “thukham sunga om dikna tawh kisai-in, pua lam gamtatna ciangciang ah, “pau ka baang kei hi,” ci hi (Philippi 3:6). Ahi zongin kha lama thukham’ omzia a ngaihsut ciangin, amah mawh nei ahih lam hong kimu hi. Mite in pua lam gamtatna thukham tawh a teh uh bangin kiteh leh amah mawh baang lo hi; ahi zongin thukham siangtho limtak a, a hong et tel ciangin, Pasian in amah a muh bangin amah le amah hong kimu-a, kiniamkhiatna tawh kunin, a  mawhna pulak hi. “Thukham tawh lo-in ka nungta ngei hi; ahi zongin thupiakna ahong tun ciangin, mawhna nungta kik a, kei ka si hi,” ci hi (Rom 7:9). Kha lama thukham’ omzia ahong muh ciangin, mawhna pen ahi bang lianin hong kilang a, ama kisaktheihna teng bei ta hi.

Pasian in mawhna khempeuh a kikim in seh lo hi; mite’ seh mah bangin Ama sehna ah zong mawhna a dawldawlin om hi; ahi zongin mite’ muhna ah mawhna aneu leh alian a om hangin, Pasian’ muhna ah mawhna a neu om lo hi. Mihing’ muhna pen khen khat bek hi-a, kicing lo hi; ahi zongin Pasian in na khempeuh ahi bang lian in seh hi. Zuhaite mawh nei hi ci-in kisimmawh in, vantung tung lo ding hi, kici napi-in, kiphatsakna, huaihamna leh hazatnate kikhah khong zel hi. Tuate zong Pasian in a zakdah mahmah mawhna mah hi veve hi; banghang hiam cihleh tuate pen Ama citna le siamna, mawhna a om lo khua vannuai-a om ki-itna tawh kilehbulh hi. Mawhna a lian zaw a nei mi in ama zum huaina, cihmawhna le Christ’ hehpihna a kisapna hong phawk thei zaw hi; ahi zong in kisak theihna a nei mi in kisapna nei kisa lo ahih manin; Christ ahi zongin, Christ in a piak ding thuphate ahi zongin sang nuam lo hi.

“Pasian aw, mawh nei keimah hong hehpih in,” (Luke 18:13) ci-a thu a ngen siahdong pa in amah-le-amah mi gilo mahmah bangin kingaihsun a, midangte in zong tua mah bangin mu uh hi; ahi zongin ama kisapna ama’n thei-in, kisuantakna le maizumna tawh Pasian hong zuanin, hehpihna hong ngen hi. Pasian’ Kha in na asep theihna dingin ama lungsim kihonga, mawhna khut nuai panin amah suakta sak hi. Kha Siangtho in na asep theihna dingin Pharisee-pa’ lungsim kihong lo a hihna, kisialhna le amah-le-mah dik a kisakna tawh thu a ngetna in hong lak hi. Pasian tawh kigamla ahih manin, a kicing Pasian’ sianthona tawh a kilamdang ama kihhuaina hong phawk kha lo hi. Kisapna nei kisa lo ahih manin, bang mah zong ngah lo pah hi.

Mawh nei nahih lam na kitheih leh kipuah phat theih dong ngak kei in. Christ kiang a zuan dinga hoih a kisa zo lo mi tampi tak om uh hi. Nang kia’ hanciamna tawh ahoih zaw thei dingin kilamen na hiam? “Ethopia mi in ama ci, kamkei in ama gial, khek thei ahi hiam? Khek thei hileh siatna bawl ding a zongsang note in zong ahoih na bawl thei ding uh hi” (Jeremiah 13:23). Pasian’ sung bek ah ei’ a ding huhna om hi. Zolna a nasia zaw, hun ahoih zaw leh lungsim a siangtho zaw ih ngak kei ding hi. Ei’ thu-in bang mah ih hih thei kei hi. Ih hihna bangin Christ kiang ih zuan ding hi.

Ahi zongin Ama hehpihna a nialte nangawn, itna le hehpihna tawh Pasian in hon khia veve hi, ci-a ngaihsutna tawh kuamah kikhem kei ta hen. Singlamteh khuavak sung bek ah, mawhna a nasiat zia kithei thei hi. Pasian dik lua ahih ciangin mimawhte hawl khia lo ding hi, a cite, Calvary en sak un. Mihing in hotkhiatna a ngahna ding lampi dang om lo ahih manin, kha lam nuntakna ngah kik thei-a, mi siangthote tawh a kikholh kik theihna dingun, mawhna’ khut nuai pana a suahtak theihna ding uh hanciam theihna dang om lo ahih manin, Christ in thumang lote’ mawhna Amah-le-Amah kisuan a, mimawhte’ tanga gimna ahong thuak ahi hi. Pasian Tapa’ hong itna, hong thuakna le hong sihna in, mawhna a kihtak huaina le, Christ tunga ki-apna lo tawh mawhna’ khut nuai pan suahtakna om lo a hihna, nuntak a sang zaw lamet om lo a hihna hong kilang sak hi.

A kisik lote in, “Kei zong amau mah bang lel ing. Amau zong kei sangin kidekna, kidopna le thukhualna nei zaw tuan kei uh. Amau zong keimah bangin a ut a nuam un gamta lel uh,” ci-in Christiante paulamin ki awnghon thei uh hi. Hi bangin mi dangte’ khialhna paulam in amau’ ginat lohna kipengsak uh hi. Ahi zongin mi dangte’ mawhna le ginat lohnate in kuamah pengsak tuan lo ding hi, banghang hiam cihleh Topa in akhial thei mihing pen etteh dingin hong pia lo hi. Kawk baang lo Pasian’ Tapa pen eite’ etteh dinga hong kipia hi-a, Christiante’ khialhna a paulam nilohte in, nuntak hoih zaw leh etteh kician zaw ahong lah ding uh hizaw hi. Amaute in Christiante’ omzia ding ahoih zaw thei uh ahih leh amau’ mawhna lian zaw kan lai hi lo ahi hiam? Amaute in ahoih thei napi-in gamta nuam lo uh hi.

A ni khin kei in. Na mawhna nusia-a Jesu’ tungtawn a lungsim siangthona zon ding khawl kei in. Mi atul athente in hih mun ah khial uh a, manthan lawh uh hi. Nuntak hun tom a, ahun ding kithei lo a hihna gengen kul lo hi; ahi zongin mawhna sung mah ah nuntak ding teelzaw a, Pasian’ Kha Siangtho’ hong zolna zuih ding zekaina ah kicing taka a kithei khin zo lo a kihtak huai mahmah khat om hi; mawhna sung mah ah om nopna in zekaina taktak ahi hi. Mawhna, a neu mahmah tawh a kibang phial zongin, bawlbawl lehang a lauhuai supna dong kitung teitei ding hi. Ei’ zawh loh pen in ei hong lehzawh in siatcipna hong tun ding hi.

A kikham singgah nekna lel tawh Pasian’ cihzah a a lauhuai lua piang liang ke’n teh ci-in Adam le Eve in ngaihsun uh hi. Ahi zongin hih thu neuno mah pen akip a siangtho Pasian thukham palsatna hi-a, mihing pen Pasian tawh kikhen sakin, leitung ah sihna leh gen zawh loh gimnate hong tungsak hi. Khang khat khit khang khat ih leitung ah kahna aw ging ngitnget a, mihing’ thuman lohna hangin piansak khempeuh in gimna thuakin tau uh hi. Mihing in Pasian a dona hangin vantung in zong thuak lawh hi. Calvary in Pasian’ thukham palsatna leptuah kikna dinga a kisam kipum piakna-i mual suang ahi hi. Tua ahih ciangin mawhna neu seh kha kei ni.

Thu palsatna khat peuh, Christ’ hehpihna don lohna le nialna khat peuh pen nangma tung hong tu kik veve ding hi; na lungsim aleh lam in hong khauh sakin, utna hong kiam sakin, theihna hong hai sakin, Pasian’ Kha Siangtho’ hong zolna hong mang nuam lo zaw sak bek tham lo-in, hong mang zo lo sak lai zaw ding hi.

Ka ut hun peuhpeuh ciangin siatna lampi pan kihei kik thei na-ning, ci-in mi tampite ngaihmuang hit-hiat thei uh hi; hehpihna in a sapna thudon lo-in, tua sapna a za kikkik thei ding peuh kisa uh hi. Hehpihna Kha simmawh bawl a, Satan’ lam a apan khit uh, a lauhuai mahmah hun atun ciangin, a lampi uh a kheel thei ding kisa uh hi. Ahi zongin hih pen abaih ding hi lo hi. Khan tawna ih sinsa thute in ih zia ih tong hong bawl khin ahih manin, tua bang hun ciangin mi tawm cik bek in Jesu’ lim-le-meel hong deih zo bek uh hi.

Gamtat hoih lo khat peuh, mawh nopna lungsim khat peuh nangawn khawi den lehang, tua in lungdamna thu-i vangliatna khempeuh kiam sak ding hi. Mawhna tawh kipawl utut a gamtatna khempeuh in Pasian hong deih lo sak semsem hi. Pasian zahtakna nei lo-a, Pasian’ thuman zong a thudon lo mi in, ama vawh banga agah a at ding ahi hi. Mawhna a neu seh mite’ a dingin, mawh nei mi “ama mawhna khau tawh kikhih ding hi,” (Paunak 5:22) ci-a mi pil pa in a gen kammal sangin a lauhuai zaw hilhna Lai Siangtho sungah om tuan lo hi.

Mawhna pan hong hon khia dingin Christ kiging sa-in om a, ahi zongin Amah in hong zawh thawh hih lo hi; A thu ih palsat teiteina tawh siatna bekbek ih bawl nop a, suahtak ding ih ut kei leh, Ama hehpihna ih saan nop kei leh, Ama’n bang hong cih thei nawn ding hiam? Ama itna ih nial hamtangna tawh ei-le-ei a kisusia ih hi hi. “Tu hun in a san huai hun ahi hi; tu hun in hot khiatna ni ahi hi.” “Tu ni-in Ama aw na zak leh na lungsim uh khauh sak kei un.” (2 Corin 6:2; Hebrews 3:7, 8).

“Mihing in apua tham en a, Topa in lungsim” – nuamna le dahna a kigawigawina mihing’ lungsim – “a en hi.” (1 Samuel 16:7). Topa in lungsim, ngaihsutna le ngimna khempeuh thei hi. A kihhuai pi mahin Ama kiang zuan in. Na khempeuh a mu Pa’ kiangah na lungsim kongkhak hon in la, laphuak siampa bangin, “Pasian aw, kei hong entel in la ka lungsim hong thei in! Kei hong sit in la ka ngaihsutnate hong thei in! Kei sungah siat theihna a om kha hiam hong en in la, tawntung lampi ah kei hong kha in!” ci in (Late 139:23, 24).

Mi tampite in a lungsim uh siangtho lopi-in, biakna akin kineih in, mipilte’ biakna zui uh hi. “Pasian aw, lungtang siangtho hong guan in la; ka sungah, lungsim maan hong bawl pha in,” ci-in thu ngen in (Late 50:10). Lungsim takpi tawh ngen in. Na nuntakna abei pah ding hileh na hih ding bang mah in ngen tentan in. Hih pen Pasian leh nangma kikala, a tawntung a dinga khentat ding thu ahi hi. Lamen bekin bang mah hih kei lecin, siatna na tung takpi ding hi.

Thungetna tawh Pasian’ Kammal sim in. Na mai a kiphah kammal in sianthona thuguipite ahi Pasian’ thukham leh Christ’ nuntakna hong lak a, tua thu lo-in “kuamah in Topa a mu kei ding hi” (Hebrews 12:14). Tua thu in mawhna hong phawksak in, hotkhiatna lampi tel takin hong lak hi. Pasian in nang hong hopihna ahih lam thei khial kei in.

Mawhna a nak siatzia thei-a, nangmah na hih bang liana na kimuh leh lungkia kei in. Christ in ahot khiat ding pen mimawhte ahi hi. Pasian tawh ih kilemna ding ei abawl ding ih hi kei hi; A lamdang mahmah itna tawh Pasian in Christ tung tawnin “leitung mite Amah tawh kilem kik sak in, hong lawmta kik sak hi.” (2 Corinthians 5:19). A duai ngingei itna tawh Amah in lam khial A tate hong zol hi. Pasian in ahot khiat nop mihingte’ tunga a lungduai zahin, a tate’ khialhna leh mawhna ah a lungduai zo mihing leitung ah om lo hi. Thu palsatte dam takin kuamah in va zol thei lo hi. Amah zahin kuamah in avak thapte zolna kam khum zang ngei lo hi. Hong kamciamte le hong thuhilhna khempeuh pen a kigen khin zo lo itna huging ahi hi.

Satan na kiangah hong pai-a, mawh neipi khat na hihna hong gen ciangin, hong Tanpa en to in la, hong hehpihna thute gen khia in. Ama khuavak na etna panin huhna na ngah ding hi. Na mawhna pulaak in la, ahi zongin galpa’ kiangah, “Mawh neite ahon khia dingin Christ Jesu leitung ah hong pai,” a hihna le, Ama itna tawh hotkhiatna a kingah ding a hihna gen in (1 Timothy 1:15). Leiba nei mi nih tawh kisai thu khat Jesu in Simon dong hi. A topa uh tungah khat pa in tawm khat ba-a, khat pa in tampi ba hi; ahi zongin a topa un anih un maisak hi, kua in a topa uh it bel ding hiam, ci-in Jesu in Simon dong hi. Simon in, “Leiba tampi a kimaisak pa in it pen ding hi,” ci hi (Luke 7:43). Eite zong mawhna alian pipi anei vive ih hi-a, ahi zongin mawhmaina ih ngahna dingin Christ hong si hi. Eite’ tanga Pa’ mai-ah a kilui dingin Ama kipum piakna kicing mahmah hi. Mawh maisakna tam a ngah pente in Amah it pen dinga Ama hong itna leh hong kipum piaknate hanga Amah aphat dingin, Ama tokhom neh belin ding ding uh hi. Pasian’ hong itna ih theih semsem ciangin, mawhna a kihhuaina kiphawk semsem hi. Eite’ kiang dong hong kikhia suk itna khau a sauna ih mu-a, eite’ tanga Christ hong kipum piakna ih theih ciangin, kisikna tawh ih lungsim nipin hong nem hi.