Chapter 11 THUNGET HUN NUAM

NATE le Lai Siangtho pan hi taleh, Ama vaihawmna pan hi taleh, A Kha Siangtho’ nasepna tawh Pasian in eite hong hopih hi. Ahi zongin tuateng kicing lo hi; eite in Ama kiangah ih lungsim teng ih sun khiat ding kisam lai hi. Kha lam nuntakna le thahatna ih neihna dingin, vantunga om ih Pa tawh a kician kizopna ih neih kul hi. Ih lungsimte Ama lamah kikai thei hi; Ama nasepnate le, Ama thuphate kilungngaingai thei hi, ahi zongin hihteng pen Amah tawh kikholhna a kicing taktak hi nai lo hi. Pasian tawh ih kikholh theihna dingin, ih nuntakna ahi bang lian a Ama kiangah ih gen ding pawl khat om hi.

Thungetna pen, ih lawmte khat tungah ih lungsimteng ih gen khiat mah banga, Pasian’ tungah ih lungsim teng gen khiatna ahi hi. Tua in, ei bang ih hiam cih Pasian’ kiangah kigen ding a kisap man hi lo-in, eite in Amah ih saan theihna ding hizaw hi. Thungetna in eite’ kiangah Pasian a kaisuk hi lo-in, Ama kiangah eite ahong kaito hizaw hi. Jesu leitung ah a om lai-in, a nungzuite thunget dan na hilh hi. A nisim kitangsapnate uh Pasian’ kiangah pulaak a, alunghihmawhnateng uh Ama kiangah asung dingin amaute hilh hi. Amaute’ thuumnate Ama’n na za ding a hihna Ama kamciam pen eite’ a ding zong ahi hi.

Jesu mahmah in, mite’ lakah hong om lai-in thu ngen tawntung hi. Honpa in, a masuan le ze-etnate azawh nading, tha thak a ngahna dingin, a Pa’ kiangah a thuumpa le a ngenpa ahong suahna tawh, eite’ thanemna le kitangsapna bang mah Ama’n zong nei ahih lam hong kilangsak hi. Na khempeuh ah Amah ih etteh ding ahi hi. “Eite mah bangin ze-etna a pawlpawl athuak mah bangin,” ih zawng khalnate ah Amah ih U ahi hi; ahi zongin Amah mawhnei (94) lo ahih mah bangin siatna tawh Ama pianzia kipelh hi; mawhna adim leitung ah lunggimna le bawlsiatna hong thuak hi. A mihing hihna in thungetna, a kisam khat le hamphatna khat suaksak hi. A Pa tawh a kikholhna panin hehnepna le lungnopna Ama’n ngah hi. Mite a Honpa, Pasian’ Tapa in thungetna kisam sa ahih leh, thanemna le mawhna tawh a kidim; asi thei mihing in nakpi a thu nget tawntung ding a kisap lam aphawk ding kilawm zaw kan hi.

Vantunga om ih Pa in a thupha kicing takin eite hong pia nuam hi. Kang ngei lo itna tuinak pan a tui tampi ih dawn ding pen eima hamphatna ahi hi. Thu tawm cikcik bek ih nget pen lamdang sak huai mahmah hi! A gina lobel a tate in, lungsim takpi tawh thu a ngetna, Pasian in za nuamin a kiging sa-in om hi; hi napi eite in Pasian’ kiangah ih kisapnate ih gen ding nangawn ih kin peuhmah kei hi. Ze-etna thuak a, a hehpih huai mihingte, itna tawh a kidim Pasian in, amaute’ a ding lung himawh giugiau-in, amau’ nget theih zah le ngaihsut zah sanga atam zaw apia thei dingin kigingsa in om hi napi-in, amaute in tawm cik bek ngen a, upna zong tawm kha bek aneih uh pen, vantung mite in bang a ci ngaihsut ding uh hiam? Pasian’ mai-a kun ding vantung mite lawp uh hi; Ama kiang nai ah zong om nuam uh hi. Pasian tawh kikholhna pen nopna lianbel in amaute in ngaihsun uh hi napi Pasian bek in apiak theih thupha tampi tak a kisam lei mihingte pen, Ama Kha khuavak le Ama ompihna lo tawh nuntak ding a lungkim uh tawh kibang uh hi.

Thu nget ding akin lote, gilopa’ khuazing in tuamcip hi. Galpa in huau siam khiankhian a, a zolna tawh amaute in mawhna bawl uh hi; banghang hiam cihleh amaute’ a dinga Pasian in a vaihawmsak thungetna ahi hamphatnate azat loh man uh ahi hi. Thungetna pen upna’ khut sunga tawhtang, Vanglian Topa in abei thei lo sumgilteng a senna vantung innpi kong honna hi napi-in, bang hangin Pasian’ tanu le tapate in thungetna awlmawh lo thei (95) ding uh hiam? Tatsat lo-in thu ngen a, vil gige-a ih om kei leh, kidopna mel ih nei thei kei dinga, lam maan panin ih pial khia kha ding hi. Nakpi-a thuumna le upna tawh, mawhzolna ih nan zawhna ding hehpihna le hatna ih ngah loh theihna dingin galpa in hehpihna tokhom zuatna lampi a khaktan dingin hanciam tawntung hi.

Pasian in, ih thungetnate hong za a, hong dawn kik ding lametna ih neih theihna ding thu pawlkhat om hi. A masa penin, Ama kiang pana huhna kisam ih hih lam ih phawk ding hi. “A dangtaak mi tui ka tulh dinga, a keugaw lei tungah tui ka sung ding hi,” ci-in kamciam hong pia hi (Isaiah 44:3). Anduh tuiduh banga dikna aduh mite, Pasian a lunggulh mite pen, lungkimna kipia taktak ding hi. Kha Siangtho in na asep theihna dingin lungsim a kihon kul hi; tua lo-in Pasian’ thupha kingah thei lo hi.

Ih tangsapna mahmah pah phot pen paulap khat hipah a, tua in eite’ tangin thu nak gen zaw lai hi. Ahi zongin tua nate a hong sep sak dingin Topa ih cial ding hi. “Ngen un, hong kipia ding hi,” hong ci hi (Matthew 7:7). “Ama Tapa haza lo-a, ih vekpi’ a dinga ahong pia khia Pa in, Amah tawh na khempeuh hong pia khawm lo-in om ding ahi hiam?” (Rom 8:32).

Eite in khialhnopna lungsim nei-a, mawhna khat peuh ih bawlbawl leh, Topa in ih thungetna hong za lo ding hi; ahi zongin lungsim kitam kham a akisik mimawhte’ thungetna a tawntungin kisang hi. Ih khialhna khempeuh ih kipuah phat ciangin, ih thuumna khempeuh Pasian in hong dawng ding a hihna ih um ding hi. Eite’ hoihna phatnate in Pasian’ maipha hong musak zo ngei ding hilo hi; eite ahong hon ding pen Jesu’ kilawmna hi-a, ahong silsiang ding Ama sisan ahi hi; ahi zongin eite ahong kisaanna tawh kizui-in ih sep ding khat om hi.

(96) Thungetna a muibunsak ding dang khat in upna ahi hi. “Pasian’ kiang azuan mi peuhmah in, Amah om a hihna le, lim taka Amah azongte, Amah in thaman pia a hihna a up kul hi” (Hebrews 11:6). Jesu in a nungzuite’ kiangah, “Na deih khat peuhpeuh uh na nget uh ciangin, ngah hihang ci-a na up uh leh, na ngah ding uh hi,” ci hi (Mark 11:24). Ama cih bang lian in ih saang hiam?

Hih kamciam zai-in ciangtan om lo hi. Kamciam ahong pia pa lah muanhuai hi. Eite in ih nget khat, ih nget hun lianin ih ngah loh hangin, Topa in ih ngetnate hong za-a, hong pia ding hi cih ih um veve ding hi. Eite in ngaihsun khialin, ih muhna zong toi ahih manin, ei’ a dinga thupha ahi lo ding pipi ih ngen kha zel hi. Van a om ih Pa in hong it in, ei’ phattuampihpen ding hong piakna tawh ih thungetnate hong dawng hi. Eite in kha mittang tawh na khempeuh ahi bang lianin mu thei hi le’ng, tuate ih deih ding veve mah ahi hi. Ih thungetnate hong kidawng lo tawh a kibat ciangin, kamciam ih pom cinten ding hi; dawnkikna hun hong tung teitei dinga, ih kitangsap mahmah thupha ih ngah ding hi. Ahi zongin thungetna pen, ei’ nget bang lianin hong kipia dinga, ei’ lunggulh pen tektek hong kipia tawntung ding, ci-a ngaihsutna pen upmawh thu ahi hi. Pasian a khial thei ngei ding hi lo-a, hoihtak a a gamta mite’ tungah na hoih khat zong pia lo-in a om thei ding hilo hi. Tua ahih ciangin, na thungetnate hong ki dawn kik pah lian loh hangin, Amah muang lah kei in. “Ngen un, hong kipia ding hi,” ci-in hong kamciam pen muang un.

Ih uplahnate le launate’ deihna ultung sak in, ih muhtel theih loh nate upmawh seh ding ih hanciam leh, eite in upna ih neih ma-in lungkhamna kibehlapin hong nasia zaw ding hi. (97) Ahi zongin eite in ih hi bang lianin, ih cihmawhna le ih guaksuakna phawkin, kiniam khiatna tawh Pasian’ kiang zuan a, theihna a kicing pa, piansakna ah na khempeuh a mu pa, Ama deih banga A thu tawh na khempeuh a uk pa’ kiangah, upna taktak tawh ih kisapnate va gen lehang, Amah in ih kikonate hong za, hong donin, ih lung sungah khuavak hong taangsak ding hi. Lungsim taktak tawh thungetna panin, Vanglianpa’ lungsim tawh a kizom ih hihi. Hehpihna le itna tawh hong Tanpa in hong et suk lai takin, eite in bangmah ih muh khak loh hangin, Ama’n a hong en takpi ahi hi. A khut tawh ahong lawn lam ih phawk kha kei zongin, ih tungah itna le hehpihna tawh akhut hong nga hi.

Pasian’ kiangah hehpihna le thupha a ngen dinga ih pai ciangin, ih lung sungah itna le mawhmaisakna lungsim ih neih ding kisam hi. Midangte’ mawhna mai sak keei lo pi-in, “Ko’ tungah hong mawhte ka mai sak uh bangin, kote’ mawhna zong hong maisak ta in,” ci thei mawk ding ih hiam? (Matthew 6:12). Ih thungetnate hong kisaan ding ih deih leh, ei mahmah in mawhmaisakna ih deih mah bangin le ih deihzah lianin, midangte’ mawhna ih maisak kul hi.

Ih deih ih ngahna dingin lungkia lo-a ngetna zong a kisam khat ahi hi. Upna le theihna ah ih khantoh nop leh, a tawntungin thu ih nget kul hi. Eite pen “thungetna ih cihtak ding,” “thu ngen ngitnget in, lungdamna ko a ih ngak ding,” ahi hi (Rom 12:12; Colossians 4:2). “Thu na nget theihna dingun, lungsim navak sakin, kidek-kidamna nei un,” ci-in Peter in thu-umte hanthawn hi (1 Peter 4:7). Paul in zong, “Na khempeuh ah thungetna le thuumna tawh lungdamna ko-in, na deihnate uh Pasian’ kiangah gen un,” ci hi (Philippians 4:6). Jude in, “Ka itte aw,…Kha Siangtho sungah thu na ngen un;…Pasian’ itna sungah nomau mah na kikem un,” ci hi (Jude 20, 21). Ih nuntakna sungah Pasian’ kiang pan a nuntakna ahong luan theihna dingin, tatsat lo-a thungetna pen, tatsat lo (98) a, ih kha, Pasian tawh zopkhawmna ahi hi; tua ciangin eite’ nuntakna panin Pasian’ kiangah sianthona luang kik hi.

Thunget kuhkal ding kisam hi; bangmah nok khak sak kei in. Jesu tawh na kha a kikholh tawntung theihna ding hanciam in. Pasian tawh kikholh ding a hanciam taktak mite, thunget kikhopna ah kimu dinga, asep ding peuh uh citak takin semin, Phattuamna a ngah ding khempeuh uh lamen ding uh hi. Van pan a khuavak taang a ngah theihna ding mun uah a om hamtang thei dingin hanciam ding uh hi.

Innkuan kikhopna ah thu ih ngen ding hi. Tua banah simtham thungetna awlmawh lo-in ih om peuhmah kei ding hi, banghang hiam cihleh tua in kha nuntakna ahi hi. Thungetna a ki-awlmawh loh ciangin, kha in khantohna nei thei lo hi. Innkuan thungetna le mipi laka thungetna bek a kicing hilo hi. Gamdaihna mun, Pasian’ mit in hong muhtelna muh ah ih kha ih lui khia ding hi. Simtham thungetna pen thungetna aza Pasian bek mah in azak ding ahi hi. Lung sunga om khempeuh pulaak a thuumna pen kuamah dangin azak ding hilo hi. Simtham thungetna ah kim-le-pam gamlumna le patauhnate om lo hi. Lungsim taktak tawh ngetna ahih manin Pasian’ kiang tung teitei hi. A simthamte mu khia-a, lung sung pana a pusuak thungetna aza dinga abilpil pa’ kiang panin ompihna a nuam hong pai ding hi. Upna in Pasian tawh hong kikhawl den sak a, Satan tawh ih kidona ah hong hatsak ding le hong kipsak dingin, Pasian’ ompihna hong muang sak hi. Tua pen ih thahatna kulhpi ahi hi.

Na inn sungah thu ngen in la, na sem dinga na kuan khiat sialin, Pasian’ lamah na lungsim laamto tawntung in. Pasian tawh Enoch a kikholhna zong tua bang mah ahi hi. Hih (99) banga thu nget khinkhiannate, pak namtui bangin hehpihna tokhom mai-ah kahto hi. Hih banga a lungtang Pasian’ tungah a kinga mite, Satan in zozo lo hi.

Pasian’ kiangah thuumna ih bawlna ding a kilawm lo mun ahi zongin, hun ahi zongin omlo hi. Lungsim taktak tawh thu ngena , ih lungtang ih laptoh ding, ahong dal thei bangmah om lo hi. Kongzing mihon lak khawng, nasep silbawlna lak khawng ah zong, kumpipa Artaxerxes mai-a a deihna a nget lai-a Nehemiah in ahih mah bangin, ei zong Pasian’ kiangah thuumin hong makaihna ding kingen thei hi. Koikoi ah ih om zongin Pasian tawh kikholhna kinei thei hi. Eite in ih lungsim kongkhak a tawntungin honga, Jesu in ih lung sungah vantung lengla bangin hong pai-a ahong ten theihna dingin ih sam ding hi.

Ih kim ih pam ah siatna le buaina a om hangin, eite in tuate’ gimnam va diik se lo-in; vantung huih siangtho lakah ih nungta zaw ding hi. Cih takpi-in thu ngen a, Pasian’ mai-ah ih kha laptohna tawh, a kihhuai lungsim le a siangtho lo ngaihsutnate a hong lut lohna dingin, eite in kong kikhak thei hi. Pasian’ huhna le thupha asang dinga a lungsim uh a kihong mite, leitunga sanga a siangtho zaw huih lakah om ding uh a, vantung tawh kikhawl tawntung ding uh hi.

Eite in a kician zaw a Jesu muh theihna le, tawntung nate a manphatna theih zawkna ih neih ding kisam hi. Pasian’ tate’ lung sungah sianthona-i hoihna a kidim ding ahi hi; hih banga apian theihna dingin, Pasian in vantung nate ahong lah ding ih ngen ding hi.

Pasian in ih diik ding vantung huih hong piak theihna dingin, tung lamah ih lungsim kaito ni. Nitang lamah paakte a kihei mah bangin, theih kholh loh a ih thuak haksatna (100) khempeuh ah, ih ngaihsutnate Ama lamah a kiheina dingin, Pasian’ kiangah ih om tinten ding hi.

Na kisapnate, na lungdamnate, na dahnate, na lung khamnate le, na launate Pasian’ mai-ah lui in. Pasian in gik asa kei dinga, zong a gim kei ding hi. Na luzang a samzangteng asim khin Pa in, A tate’ kisapna don lo-in om lo hi. “Topa in hong hehpihin hong khual mahmah hi” (James 5:11). Ih dahnate le, tuate ih genkhiatna in Ama itna lungtang khoih kha hi. Na lungsim hong buaisak khempeuh Ama kiang tun in, Ama puak dinga alian lua bangmah om lo hi; banghang hiam cihleh leitungte Ama’n lenkip a, khuavannuai a thu khempeuh Ama’n vaan hi. Ih lungnop nading a apiang thu khat peuhpeuh, Ama hong phawk pih tham dinga athu neu lua omlo hi. Ama muh theih loh ding zah a ih nuntakna sung amial lua mun om lo-a; Ama sian sak zawh loh ding zah a buaina a haksa lua om lo hi. A tate a neu bel tunga a tung gimna, lungkhamna, lungdamna, kam pan a pusuak thungetna cihte van a om ih Pa in a theih khak loh a hi-a, thakhat a adon pak nop loh ahi zongin bangmah om lo hi.” Amah in lungsim kitamkhamte damsak a, amau’ liamnate tuam sak hi,” (Late 147:3). Leitung ah Ama kep ding midang a om lo bang keek leh, a it mahmah a Tapa apiak ding midang a om lo ding zahin, Pasian le mi khat sim kikal ah kizopna tuamdiak le a kicing om hi.

Jesu in, “Ka min suangin na ngen ding uh hi. Pa ngiat in note hong it ahih manin note’ a ding Pa’ kiangah thu ngen ning, ka hong ci kei hi” “Note ka hong teel khin zo hi… Ka min suanga Pa’ kiangah na nget peuhpeuh uh, Pa in ahong pia ding hi,” ci hi (John 16:26, 27; 15:16). Ahi zongin Jesu’ min suanga thu ngen cih pen, thunget a kipatna le a tawpna-a (101) Amin lawh ziau lel bek hi lo hi. Ama kamciamte um in, Ama hehpihna muang a, Ama gamtat bang gamta-in, Jesu’ lungsim pua a nget ding ahi hi.

Pasian bia a ki-ap nadingin atol tente peuh or phonggyi (yahan) peuh suak a, lei nun masuan ngeina pan a kidaithah dingin Pasian in hong sawl lo hi. Ih nuntakna pen mual tung le mihon lak akawm niloh Christ’ nuntakna bang hiding hi. Bang mah sem lo-a thu bek a ngente, a sawt lo-in thungetna hong khawl dinga, hong khawl kei leh zong a thungetnate kamngah gen hong bang lel ding hi. Taangpi kithuah khopna lak pan kihem khia in, Christian nasep le singlamteh puakna pan kidaithah uh a, amaute’ a dinga nakpi a na asem Topa’a ding nasep akhawl uh ciangin, thunget a thupitna thei nawn lo-in, biakpiak ki-apna ah zong lawpna nei nawn lo hi. A thungetnate uh zong amau’ aituam le huaihamna bek suak hi. Amaute in mihing’ tangsapnate ahi zongin, Christ’ gam khansak nadinga sep zawh bawl zawh nading tha ahi zongin, ngen nawn lo uh hi.

Pasian’ nasepna sungah khat le khat kihansuaha, thangah nadinga kipawl khopna ih neih loh ciangin eite asum ih hihi. Ama thumaante in zong ih lungsim sungah manphatna le thupina hong nei nawn lo hi. A thu siangthote in hong phawng nawn lo-in, ih lung sung hong taang sak nawn lo-a, kha lamah ih kiam suk ta hi. Christian kipawlna sungah zong khat le khat kikhualna om lo ahih manin ih supna tam hi. Ama a ding bek a na khempeuh ahuam gai mi in, ama panna dinga Pasian in a sehna mun ah a pang lo ahi hi. Taangpi kikholhna neih theihna dinga ih pianzia kipuah phatna in, midangte khualna lungsim hong nei sak a, Pasian’ nasepna sungah khantohna le hatna zong hong guan hi.

Christiante kipawl khawmin, Pasian’ hong itna le hong tat khiatna thumaante (102) kikum le-uh, amau’ lungsim mahmah zong thak suakin, khat le khat zong kithanopsuah ding uh hi. Nisim in eite in van a om ih Pa’ thu sinin, Ama hehpihna thupha a thakin ih ngah zel thei hi; tua ciangin Ama hong itna thu ih gen thanuam dinga; tua banga ih om ciangin eima lungsim zong hong kisatsuah in tha ih ngah ding hi. Eite in eima thu sangin, Jesu’ thu ngaihsunin gengen zaw lehang, Ama ompihna atam zaw ih ngah ding hi.

Pasian in eite hong kepna ih muh sialsialin, Ama thu bek ngaihsun lehang, ih ngaihsutnate ah Amah hong suak den dinga, Ama thu gengen nuamin, Amah ih phat nuam ding hi. Leitung nate bek mah kinin ih neih manin tuate bek mah ih gengen hi. Ih lawmte it ih hih manin amau’ thu ih gen hi; ih nuamna le ih dahnate amaute tawh ih pua khawm hi. Ahi zongin eite in ih leitung lawmte ih it sangin Pasian ih it zawk nading athu lian zaw hi; ih ngaihsutna khempeuh ah Amah a masa bel hisak in, Ama hoihnate gen a, Ama vangliatnate ih pulaak ding a thupi bel hizaw hi. Pasian ih piak kik ding bangmah a om lo ding zah a eite in Ama hong piak thupha bekbek ngaihsut le pahtak in nei a Pasian ih piak kik ding akul vet lo bangin ih ngaihsut ding pen Ama deihna hilo hi. Tuate pen Amah ih phawk tawntungna ding, itna le lungdamna khau tawh eite, vantunga Phatuamsakpa tungah itna le lungdamna khau tawh eite ahong khih kawmna hizaw hi. Eite in leitung thuniamte ngaihsutin ih nei lua hi. “Ama tungtawn a Pa’ kiang azuan khempeuh, mi gina lo pente donga ahon khia thei pa,” ahi Christ’ maitang a ataang Pasian’ thupina khuavak a omna, tung lam a biak innpi kong kihong lam nga-in khuadak to dih ni (Hebrews 7:25).

“Ama hoihna le mihing’ tate’ tunga Ama bawl na lamdang te hangin,” nakpi-a Pasian ih phat ding kisam zaw hi (Late 107:8). Ih biakpiaknate pen ngetna le ngahna bekbek (103) ahih ding kilawm lo hi. Ih ngah thuphate ngaihsun lo-in, ih kitangsapna bek ngaihsutin nei kei ni. Eite in tampi tak ngen hi napi-in, lungdamkohna tawm cik bek ih nei hi. Pasian’ hehpihna a tawntunga asangte hi napi-in, ei’ a ding ahong sep saknate hangin Amah ih phatna zong tawm lua hi.

Ni dang lai-in, Isreal mite in biakpiakna abawl uh ciangin Topa in, “Topa na Pasian uh’ mai-ah na ne ding uh hi. Na hihna khempeuh uah Topa na Pasian un thupha hong pia ahih manin, no le na innkuanpihte na lungdam ding uh hi,” ci hi (Thuhilh-kikna 12:7). Pasian’ minthanna dinga a kihih peuhpeuh pen lungdamna, phatna le lungdam kohna lasakna tawh hih ding hi-a, dahna le maigumna tawh hih ding hi lo hi.

Pasian pen migitna le hehpihna tawh a kidim ih Pa ahi hi. Amah ih biaknate dahna le lunggimna banga ngaihsut ding hilo hi. Topa ih biak ding le Ama nasepna ah ih kihel ding pen nopsakna ahi hi. A tate’ a dinga hot khiatna lianpi ahong vaihawm sak Pasian in, agen hak a phinciil nasem topa banga a tate in Amah abiak ding uh deih lo hi. Amah a lawm pha bel uh ahi hi; amaute in Amah a biak uh ciangin, amaute tawh Amah om khawmin, amaute thupha pia-in, lung damna le itna alung sung uh dimsak nuam hi. A tate in Amah a biakna ah lung kimna ngah a, Ama nasepna ah gimna sangin nopsakna a ngah zawk ding uh Topa in deih hi. Amah bia dinga a pai mite in, ni sim nuntakna masuan khempeuh ah lungkimna nei-a, na khempeuh thumaanna le cihtakna tawh asep zawh nading uh hehpihna a ngah theihna dingun, Ama kepna le itnate ngaihsut a aneih tawntung ding uh Ama’n deih hi.

Singlamteh kiim ah ih kituah kul hi. Ih ngaihsutna, ih kam pauna le ih lungdamna (104) lianbelte ah, a kikhai lumpa Christ pen a bulpi ding ahi hi. Pasian’ kiang pan a ih ngah thupha khempeuh ih ngaihsut tawntung ding hi-a, Ama hong itna lianpi eite in ih tel ciangin, singlamteh tunga ei’ a dinga a kikhen let khut sungah na khempeuh ih ap nuam ding hi.

Phatna lasakna in vantung tawh ih kha kinai zaw sak hi. Vantung innpi ah la le tumtheihte tawh Pasian kibia hi; eite in zong lungdam a la ih sak ciangin, vantung mi honpite’ biak piakna tawh ih kinai zaw hi. “Lungdam biakna a pia mi in Pasian a pahtawi ahi hi” (Late 50:23). Lungdam kohna le lasakna aw” tawh lungdam kipaak takin hong Piangsakpa’ mai va zuan ni (Isaiah 51:3). 

xxXxx