Zo Phualva Thupuak - Volume 01, Issue 12

ZI LEH PASAL ZON ZIA DING

Tangval: Tangval cih ciangin, mi val hi a, a mahkia a om ahihman, alawm ding nungak/ngaknu azon kul hi.
Nungak/ngaknu: Nungak/ngaknu cih ciangin, numeite cihna hi a, alawm ding, ama zon kul loin, a ngak hithiat ding a kisam ahi hi.
1. ZI LEH PASAL CIK CIANG NEI DING
"Zi neihbaih leh lo pawibaihki khial thei" ci Zomite sun-gah kum -15 aa zi nei om mah bangin kum-70 teh zi nei pan zong omhi. Laisiangtho in:
Paunak 24:19 "Na nuntak nading, zong masa inla, na nek ding a kicin ciang bekin, na inn ding lamin, zilehta neipanin."
Jer. 29:5,6 "Inn lamin, huan bawl unla zi pi-in tanu tapa nei un. Na ta pate ading mo la unla na ta nute uh mo kha-in, kiam loin, pung unla, khang zaw un."
Paunak 18:22 "Zi mu zote na hoih mu hi a, Topa' maipha ngah hi."
Paunak 19:14 "Inn leh neihsate pen pate' tung pan gamh (go) hi aa, Zi pil ahih leh Topa bekin hong pia thei hi.” Pasian in, zi leh pasal nei dingin hong awi hi aa, a hun maan aa neih ding leh kikhen kik nawn loh ding hong deih hi.
2. ZI LEH PASAL NEI HUN DING
Sangkah te in degree angah ciang hileh hoih a, sumzongte te in sumlepai neihzek ciang hileh hoih hi. Lokho te bel aneih baih hang poilo hi. Pasalte kum 25-35 kikal hoih pen a numeite pen kum 18-25 kikal hoih pen hi. Numei kum 25 aphak laitak a pallun laitak hi aa, kum 2,3 khitteh pak banga vul ding hita hi. Ni bang hileh sun 12:00 asat laitak hi. Hunin mi ngak lo, „kum tam semsem khangmoi deih semsem, nungak/tangval ten hong gimneih semsem‟. Zi leh pasal ding teel mah-mah ding hi aa, ih kum zong tuat zel ding kul hi. "Zi ding leh mitsawk ding kithei kholhlo, deih teel a val ci, "zabeel teel khialh" cih thu paunak in na om hi. Kitenpih peuh tawh lungkim theite mi hampha. Kum tuat selo aa zi teelteelte in zi hong' neih uh teh atate uh tawh putuu bang, et lawm het lo zel hi.
3. ZI ZON ZIA DING:
Lawm nangaih leh ni khatin 2 vei thu ngen inla, zi neih na sawm leh 4 vei thu ngen in (EG. White). Topa kiangah zihoih, zidik ngen masa in. Nanu napa dong masa hamtang in. Lawm leh gualte zong dongsim khian2 in. Bawmta galsuak' kidawm in. “Ngai kei leng, ngai mah ding hi veng, ka ngai a, ka ngai kei hi.” Eimi
eipawl eikhuapih eibeh ei' naihuai hoihpen kha ding hi. Namdang, pawldang khuapua na tenpih leh eimi eipawl eikhuapih eibeh suaksak inla ahi zawdeuh khatbeek teelzek in. Namdang pawldang tawh kitengte abuai tamzaw hi. Na lawmnu in apa bangci bawl hiam? Na sungnu dingin, a pasal bangci bawl? Na zi in a nu' tat bangin hong tading "sakhi api san ano kang lo hi, san hi. "khaikha a gui ah gah hi" Zi-hoih sang zidik teel masa zaw in mi tampite gensiatte a hoih om kei zaw. Nute gawm zong nial kenla, nute' khen zong mang thei in.
Nute'n zong tate ngaih luat tawh, khen ding kilawm sam diam? Nuten zong tate pen a hilo liang tawh gawm buang ding hiam. Kizep laitak leh a nasep laitak enkak in. Na zi neih nanu napa te a kipak diam? Na zi-in na innkuanpihte hong it pih diam? Nang na zi innkuanpihte na it pih diam? Nang sang upa zawte leh mi maksate nunun in a guh peh ding hi kei, a gial nei hi kei civial ken, gial neite ki puah thei a gial nei lote mah ki buai pih hi. Numei teek baih a a gial kituak lo a, a ki buai tampi om hi. khuamial sunga lawm helte satan sawltak ten vil gige hi. Ta mel hoih na deih leh kiten ma-in phengtat ken. Hong tenpihnop man ka gai cithei ding hi. Pasal leh numei vai tam a thei luate mi hoih kici thei lo a, dam loh lawh thei, kamsiat lawh thei hi. Lawm ngaih na hang tawh kibum, zawl ai pia, tuituak, gui-awk gudawn, kithat, kisia gawp, kentuak, zi neinuam nawn lo cih pen lauhuai mahmah a, lawki vai, dawi vai peuh mah hi.
Khaici pal kideih bek a, ta pallua kideih lo hi, na zi in kuata peuh hong keng kha diam? Na ta in kua hong sun diam? Na lawm nu nau paipi-in innkuan in kiletthat hethat dah un. Jesu in kitenna siangtho leh innkuan nuam munuam hi. Mopawi bawlzawh loh manin kiciahpih, zawltai, zawlgai, kimakik,nau bawlkhia cihte lawki vailua hi. Numei melhoih a tamzaw zulhzau in, mi tawh minsia thei uh hi. Tua hi a zi melhoih lua zong hoih hong sakpih tamlua in kibuai thei hi. Zawlta neite meimapawn tawh kibang in mang siang thei lo ahihman, kidop huai hi. Nute pate awi bangin,zi zong thei leng, thupha kingahzaw ding a, leitung innkuan nuam panin, vantung inn nuam dong tungto ding uh hi.
ZOP LAI DING
 Dr. Cin Sian Pau, Church Pastor