Nial Theihlo Sapna (Khen 3) Agen: Richard

December 10, 2016                                                                                          France 

Mission Story - Nipi 11na (4th Qtr, 2016)

           Nial Theihlo Sapna  (Khen 3)           Agen: Richard

            Manuel’ kivuina han ah pai in pastorpa’ thugen ka ngai hi. Hun man khit ciangin pastorpa tawh kimuh ding hun ka kiciam uh hi. Ka kimuh uh ciangin Seventh-day Adventist pawlpi thu ka theih nopna thu ka gen a, Lai Siangtho thu hong sinpih nadingin zong ka gen hi. Pastorpa zong lungdam a, Lilliane tawh Lai Siangtho thu ka sin khawm uh hi.

Kanu leh Kapate Gen Ta Ing

            Lilliane tawh kingai semsemta kahih manun, ka kingaih lamuh kanu kapate genta ing. Kanu leh kapa bel, Jew nungak khat tawh hong kiteengsak nuam uh ahih manin lungkim lo uh hi. “Amah tawh kithuah nawn ken. Khangno lai teh. Numei dang tampi om hi” hong ci uh hi. Ahi zongin Lilliane tawh ka kingaihna hong khaam zo tuanlo uh hi.

            Ka pa’n ngaihsutna thak khat nei hi. “Canada pai lecin hoih venteh aw. Na pai theih nading leh sang nakah theih nadingin thu hong nget sak ning” awkhum taktawh hong ci hi. Ama’ sanggam numei (8) tak Canada ah teeng khin uh hi.

            A masa lamin ka pa hong gen ka thukim kei hi. Ahi zong, ni khat bangci daan hiam thei keng. Ka lung nuam theilo ahih manin ka pa puankhuisai ah pai in, “OK. Nong sawl bangin Canada va pai ning. Sum hong pia in” ka ci hi. Ka lawmngaihnu Lilliane bangmah gen loin vanleeng letmat lei in Canada ka leensan vingveng hi.       Ka lawmngaihnu kapkap a, anu leh apa in a hehnepna thu ka khawnungtheih hi. Ama’n ka nite khat kiang panin Canada aa ka omna mun na theikhia in ngaihna lai hong at hi. Canada ka tunzawh kal thum bek pha pan in, hong laikhak ka ngah ciangin ka lungzuang lua mahmah hi. Ciah nading vanleeng letmat lei kik pah in Piantit ah vanleeng tawh ka ciahkik diildeel hi.

            Ka pa bel lungkim pha hetlo hi. Sang ka kah kik ding hong hanthawn thapaai uh hi. Ahi zong, ko kingai mahmah ta, kikhen zo nawnlo ding cih hong theih ciangin ka pa’n ka inn uah Lillianhi sam a, Judah biakna hong suah ding genpih hi. Ahi zongin, kei Adventist pawlpimi ka suah khitna hong thei khia hi.

            “Taanglai na pupite’n gam tampi ah amau biakna a zuih noploh manin a neih khempeuh uh na suplawh uh hi. Tua bangin nang zong biakna na kheel pah leh, Tapidawte bangmahin Jew minamte a bawlsiapa na suak ding hi” ka pa’n hong cingiau mawk hi.

            Judah biaknasia tampite tawh ka pa kiho uh hi. Judah biakna siate nitak sim hong pai a, tapidaw ka suah loh nadingin hong zolkik dingin ka pa tawh khensat uh hi. Kha khat sung ka inn uah, Judah biakna siate nihta kikheel in nitak sim hong pai uh hi.

            “Jesu pen mi ginalopi hi. Dawivei aa kamsang zuau hi lai hi”, cihbangin Judah biakna siate’n hong zol uh hi.  Ka pa’n ka lungsim ka kheel tuanloh lam hong muh ciangin inn pan hong hawlkhiat ding khensatta hi.

            “Tuni aa kipan ka tapa hinawn kei teh” hong ci a, kei a si bangin hong ngaihsun in hong kap damdam hi.

“Ka Lungsim Kheel Thei Tuan Keng

Adventist pastorpa inn ah om in, E’cole Hotel ah sum sazian bawl nasep sem ing. Inn pan ka pa’n hong hawlkhiat zawh kal nih khit ciangin kanu leh kapa ka nasepna Hotel ah hong pai uh hi. Na lungsim kheel in la, Tapidaw pan khawl in hong ciahkik in”, ci-in ka pa’n hong kun hi.

            “Pa aw, ka lungsim kheel thei tuan keng”, khautakin ci ing.

            Ka pa’n, “Ka ta aw, hehpihna tawh tua bangin khensat ken” ci-in hong thuum hi.

            Thu ka kikup khituh ciangin amau hong ciah san a, kum (10) sung vilvel ka pa ka mu kha kei hi. Kanu bel thu telsiam theizaw a, ahi zong, ka pa’n ka kiangah hong pai ding khaam hi. “I tapa kiangah na pai peuhmah leh hong ma ning” ci-in kanu tawngh hi. Ahi zongin kanu’n vanzuakna saipi ah puankhui sai hong ahih manin kanu kiang ka pai zel hi.

            Tua zawh kum khat hong sawt ciangin Lai Siangtho thusinna ka kipan uh hi. Ngeina tawh kituak in kiginni (Friday) ni-in Lilliane tawh ka kiteeng uha, Sabbath ni ciangin tui kiphum khawm uh hi. Nimasa ni (Sunday) ni-in Adventist biakinn ah a siangtho kiteenna ka bawl uh hi. Ninih ni (Monday) ni  Israel gam ah ka pai khawm uh hi.

            Israel gam ah kal thum sung ka taam uh hi. Hih gam ah Adventist pawlpimi 50 bek om hi. “Jew minam lakah Lungdamnathu tangkona kibawl theilo hi” ci-in Pastorpa’n hong gen hi.  Pastorpa pen Jew minam hilo a, kei Jew minam khat kahih manin a thugen a maan lohlam ka thei hi.

Hih dinmun ka muh ciangin ka kap hi. Ka zi Lilliane in hong hehneem a, “Ni khatni ciangin hihlai ah pastor ka sem ding hi” ci-in ka zi ka gen kha hi. Tua hunin pastor suah ding khensat nai lo napi’ng pastor sem ning ka cihna a haang ka thei kei hi. Ahi zongin, tua kammal ka genkhit phetin, Pasian in Jew minamte lakah pastor a sem dingin hong sam hi cih vei vanvanna ka nei hi.  

            Tu kal thum sung thugenpa Richard in Collonges khua ah a kihong Adventist pilna sangpi sinna (university) ah sang a kah khit ciangin pastor sem hi. Israel gam ah kum tampi a sep khit ciangin Piantit ah a teeng Jew minamte lakah sem leuleu a, Jewish-Adventist Friendship Center a kici Jew minamte leh Adventistte kilawmtaatna phualpi hong phuan khia hi. Tu kuata Sabbath sawm leh thumna sumpi pawlkhat tawh Jew minam leh Adventistte kilawmtaatna phualpi lam nading leitang kilei ding hi. Phalna tak tawh nong huh uh lungdam mahmah hi.

#######@@@@@@@@@@@@@@@@@@@#######