Zo Phualva Thupuak - Volume 06, Issue 08: LUNGKIA LOTE GUALLEL NGEILO

Paunak 24:10 “Haksatna natuah ciang nalung akiat leh a ginalo mi na hi hi.”
Galati 6:9 “Lungkialo in ihsep nak leh ahun ciangin thaman i ngah ding hi.”
Mihing te leitung ah ihnun tak sungin ih sepna khempeuh ah gualzawhna ngah nuam vive ki hi aa, ahi zong mi khempeuh in gualzawhna ki ngah zolo hi. Agualzo mite ih et ciangin apil pen, khuak hoih pen, cidam thahat pen te hituan lo aa, Kahpasik lungtang nei a, lungkia pahpah lote, a gualleh na, atuk na mun uh pan a thokik teitei te, khatvei akipan kik teitei te a tawpna ah gualzawhna ngah kik veve uh hi.
Piantit (France) mipil Louis Pasteur in “Tamveipi katuk ngei a, ahi zong ka tukna ah lumsuak lo in ka thokik teitei hi. Ka pum tunga leivui te sing-khia zel in atawpna ah gualzawhna ngah kik veve ing” ci hi.
I Gualzawh kik theihna ding Lampi
1. I tukna mun ah lumsuak lo in tho kik teitei ding.
2. I khialhna koimun hi a, bang hang hiam? cih lungngai kik ding.
3. I tukna tungtawn in mailam ah koici kalsuan ding cih ki puahphatna nei ding.
4. Nuntakna ah aki tangsam pen bang hiam cih kankhia ding, neihloh phamawh ahih manin khah suah lo ding.
5. Ihtup ihsawm ihgel nate Pasian deihna tawh aki-tuak hiam sittel ding. Pasian deihna tawh akituak takpi nak leh ih gualzo taktak ding hi.
Leitung ah mi minthang tampite’ nuntak na i et ciangin amaute pen a guallel ngeite , apuk ngeite le a khial ngei vive hi uh a, ahi zongin a nuntakna uh bangzah takin nuaikiat taleh alungsim uh niamsak het-
lo uh hi. A tukna uh pan thokik in, a khialhna uh ki puahpha kik uh a, kipan phakik teitei ahih man un atawpna ah gualzawhna hong ngah takpi uh hi.
Etteh ding mi minthang khat (Werner Von Braun): A mahpen Germany gam a piang Jews mipil khat hi. Galpi nihna sungin German makai Hitler in London khuapi akap nang V-2 rocket bawl dingin sawl hi. A madeih hunin zo theilo ahih manin sam sak aa, a zekaina hang dong hi. Aman adawnna ah , “hih V-2 rocket pen a om sa khat peuh ka et teh hi lo ahih manin 65121 vei bang ka khial khin hi” ci hi. Hitler in bang zah vei khial lai ding na hiam? ci’n adot leh “ atawm pen 5000 vei bang khial thei lai kha ning ahi zong V-2 rocket pen ahun lap in hong bawl zo veve ding hing ci hi.
Hitler in “Russia leh American te in a bawl man ding ka lung himawh simsim hi” ci hi. Werner in, “ Russia ten zong bawl ding kipan uh aa, 30,000 vei bang khial khin uh a lung kia in khawl khin uh hi. American te ahih leh bel khatvei nangawn khial ngam lo uh ahih manin V-2 rocket abawl ding uh pen lung himawh huai nailo hi.” Na cih san hi. Galpi nihna a ven khit ciangin America ah va lal a July 20, 1969 ni a American te khapi tung kahna rocket pen zong ama bawl mah ahi hi. Amah pen 1977 kum in si a, asih ciang dong lungkia ngeilo hi.
Tua ahih manin guallelhna, khialhna, supna cihte ih tuah ciangin lungkia lo in ih hanciam ding ban-ah tua haksatna ii galkhat ah gualzawhna in hong ngak gige ahih lam ih phawk kawm in khat vei tha sankik zel ni. Topa’n thupha hong pia ciat ta hen! Amen.
SB Ngaih Cin, Church Pastor

Zo Phualva Thupuak - Volume 01, Issue 08  on Scribd