Sinna 5: Tua Ni Hamsia Paih

Nipini (Sabbath) Nitak lam Oct. 22
Sim Dingte: Job 3:1-10; John 11:11-14; Job 6:1-3; 7:1-11; James 4:14; Job 7:17-21; Late 8:4-6.
Kamngah: Topa aw, “Nang mah in na khempeuh na piang sak a, nang mah deihna hang in piang in a om uh ahih ciangin, tua minthanna, pahtawina leh vangliatnate ngah dingin na kilawm hi” ci in aphat uh hi. (Mang. 4:11).
Job tangthu ih sin ciangin koici tawp in koici dan hiam cih avek in aomzia teng thei ih hih manin athuak nuam mahmah khat suak hi.
Job in bel tua te thei kha vet lo hi. Ama theihna ah bel nuam tak a nun-tak laitak, tha khat in thuaksiat leh thubuaite khat khit khat ama tung ah hong kinelhsiah hi. Tua khit ciangin, “ni suahna lam pan a milian pen pa” (Job 1:3, NKJV), vut leh vai lak a hehna dahna teng tawh kidiahcip cih thu ahi hi.
Job thu ih sin tohtoh ciangin, Job mun ah kikoih sin leng, hih athuak buainate, hehna dahnate ih telsiam thei tuam kha ding hi. Ei adingin hong thuak hak lualiang lo buang ding hilo hiam? Job thuak bang ih thuak ngei man hi lo in, tang tak a Topa na ih sep nop ciang tua bang apiang thei zel mah ahih lam athei ngei lo om lo hi hang.
*Oct. 29 Nipini sinna ading tu kal sinna hong kiging in maw.

Nimasani (Sunday) Oct. 23
Tua Ni Siacip Hen
Job bangin kingaihsun in. Na nuntakna lian simloh na sepsa khempeuh, na gualzawhnate khempeuh, na thupha sansate khempeuh maimang hiau mawk. Ngaihsut theih nang om vet lo. Ahang, asia apha, gen theih lah om peuh mah lo khong.
Kum tampi lai in sang bus khat lam pial khial in naupang tampi si hi. Pasian um lo pa khat in khiatna, deihna leh masuan omlo leitung ah hih bang apian ding mah hi lel ci pong hi. Hih bang thusia in khiatna nei lo in hih lei-tung bup mahmah in zong khiatna nei lo hi.
Hih bang ngaihsutna bel Pasian a um mite adingin apiang hi kei. Topa tung ah amuanhuai Job adingin zong piang lo hi. Adawnna bang hi a, koici telkheh mawk ding, tua ahi leh? Job in zong dawng thei lo hi. Ama neih pen athuaksiatna teng leh adot nop honpi teng himai hi.
Job 3:1-10 sim in. Job in akhasiatnat koici paulap hiam leh? Ama cih tawh ei ngaihsut kibang kha na lo dia maw?
__________________________________________________________________________________________________________________________________________________________________________________________
Nuntak ngiat pen, Pasian letsong ahihi. Eite hong piansak man a aom ih hihi (Sawl. 17:28, Mang. 4:11). Ei ih om mahmah zong na lamdang hi pah a, tu lai nate thu in akankhiat zawh loh bulpi hi pah hi. “Nuntak” ih cih at-elkhehzia uh zong kibang lo tham lo in, hong koici piankhiat a, bang hang hiam cih ngiat pen thupi zaw lai hi.
Ih lungkiat hun teh nuntak thamanh aom bek hiam? ci in ki lungngai kha tek hi lo hiam? Ih ki sihbawl liang kei zong in Job bangin apiang lo hi leng ih cih hun peuh om kha thei tek hi lo maw?
Tanglai Greek mite in, sihna cih loh ahoih pen thu bel pian vetloh ding hi lel, peuh na ci mawk uh hi. Cih nopna ah, nuntak ih cih pen sawinawng lua mahmah ahih manin ih om vetloh pen ahoih bang khat hi a, tua hi leh bel a buaihuai teng tawh kipelh ding hi hang.
Job ngaihsut bangin ih ngaihsut khak hun aom kha ngei hiam?, apiang lo hih peuh na ut zaw kha ngei hiam? Tawl khat khit teh bel hong kimang zaw zel sam hi lo hia? Tua ziak in ih tuahsiatpen laitak mah in a deihhuai leh apha to semsem ding cih lametna ih nei hi.
______________________________________________________________


Ninihni (Monday) Oct. 24
Han Ah Khawlnga
Job 3:11-26 sim in. Job in bang agen hi mawk? Atauna koici zop? Sih-na vai koici gen?
__________________________________________________________________________________________________________________________________________________________________________________________
Job tuah khasiat lunglenna athuak luatzia ngaihsun thei pong bek hang. Neih leh lamh teng leng mang ban ah natna thuak in ata teng avekpi un mangthang hi. Tate khat bek mangthang cih zong ngaihsut hak kim lai, avekpi un mangthang hiau hi, 10 aneih hi a. Asi hi leh a ut ding mah hi mawk hi. Job in bang ci vai hi mawk cih thei kha beeklo a, thei leh zong aphatuam ding hi kei sam na ven?
Sihna vai Job genna en leng asi hi zaw leng, tua hileh bang ci ding? Van gam nuam maw? Pasian maipha maw? Van mite tawh zaila awi ding maw? Tua bang ngaihsutna vai omlo hi. Job in acih bang? “Dai takin ka kual ding a; ka khawlnga ding hi” (Job 3:13, NKJV).
Thuhilhna 9:5 leh John 11:11-14 sim in. Sih khit ciang a thupiang vai Job gen dan leh Laisiangtho gen dan koici bangin ki zawitawn hiam?
__________________________________________________________________________________________________________________________________________________________________________________________
Laisiangtho sung a kigelh masa pen sung a, “misite omzia” akigen masapen pan hih thute kimu thei hi. Hih mun ah Job lunggulh pen “khawl ngak” ding ahihi. Anuntak hong khasiat lunglen huai in hong haksa lua mah-mah ahih manin sihna pen lung muang tak a khawlngakna ci in lunggulh hi. Lunglen khasiat, na sa in, hih tuahsiat vai malam teng mangngilh mang a, asuah a sipah hi leh ut liang hi.
Ei Christiante in mailam hun ding alamdang kamciam ih nei hi. Tua kawm mah in, tu lai thuaksiatnate kawmkal ah ingahsa lungnop tawl-damnate phawk a lung nop kha muanna nei thei ding in koici sin thei ding ihi hiam?
______________________________________________________________


Nithumni (Tuesday) Oct. 25
Midangte’ Thuaksiatnate
Alian 3 a Job thumna taunate hong man‟ta hi. Azom alian 2 te sung ah alawmte khat Eliphaz in thuhilhna hun khat hong zangh hi (kal kik teh en pha ni). Alian 6 leh 7 ah Job in athuaksiatna vaite hong genbeh hi.
“Ka khasiat ka lunglennate leh ka tuahsiat vaite kigawm leh bel maw! Tuipi gei a sehnel teng sang in gikzaw ding hi ven” (Job 6:2,3, NKJV). Hih mun ah Job in na asakzia hong koici gen hiam?
__________________________________________________________________________________________________________________________________________________________________________________________
Job in athuaksiatnate amuhzia hih bang lim tawh hong lak hi. Tuipi sehnelte tawi langkhat ah leh ama “dahna kahnate” leh “tuahsiatnate” alang ah kikhai leh ama thuaksiatnate in lek ding hi. Na asakzia tua zah dong ahihi. Hih pen Job a teng bek hi a, kuama dang a kihel lo hi. Khat veivei “mihing khempeuh te thuaksiatna kigawm” cih bang zong kigen thei hi. Hih bang bel taksuak thei lian lo hi. Ki thuak khawm taktak khol lo hi. Mite a kithuakpih taktak lo in ei a bek mah ahihi. Ei thuaksiatna, ei natna bek mah kithei hi. Job thuaksiatnate, nasia ihci tateu zongin khat thuak theih zah kan ki thuak thei tuanlo hi. Pawl khatte‟n “hong thuakpih mahmah ing” peuh kicing pong kha thei hi. Hi thei tak khol lo in kithuak takpi lo hi. Mite thuakna hang a amau thuak bel om thei sam hi. Tua zong mi athuakpih hi lo in amau a mah athuak ahi uh hi.
Apiang tawm leh mi bawl haksatna, luang tampi asawngg om thei hi. Asi aliam zah cihte in hong lung hihmawh sak hi. Tua bang pen ngaihsut hak ih sa hi. Job mah ahi zong ei mawh nei mihing Adam leh Eve suan leh khakte in Eden pan a kipan leitung bei hun dong ei ma thuakte bek mah aki thuak hi a, adang om tuanlo hi.
Mihingte thuakna aneu seh bel ihih loh hang ei Christian te in tua bang thute ah ahaksatnate uh phadawm sak ding in ih hih theih bang a ih panpih ding ahihi (James 1:27,Matt. 25:34-40 en in). Bang zah ta in thuaksiatna tam mah leh mi mawh khat thuak theih kan kithuak lo ahih manin ih lung-dam ding ahihi. (Atuam diak khat bel om a; sinna 12 en leng).
Mihing thuaksiatna pen mi khat tang tek bek mah ahi hi. Thuaksiatna vaite na ngaihsut teh hih thu in thuaksiatna na muh na et dan hong koici kilamdan’ sak hiam?

Nilini (Wednesday) Oct. 26
Siamgante’ Muiphei
Anuai a holimna lungngai in. Mi 2 te in mihingte thuakna vai ahi sihna lungbuai pih uh hi. Bang zah ta in nuntak hoih nungta in bang gualzawhnate ngah mah leng, hanmual ah tawp veve ding hi mawk hi. “Hi kisa” Methu-shalah nangawn kum 800, 900 dong om in tua khit teh beimang hi. Tawntung tawh ngaihsut in tua 800, 900 te bang hi lel? (Pian. 5 en in).
Kum za sim a nuntak ding ei ading in haksa ahih hang (Methushala in ata Lamech aneih in kum 187 pha a, tua zawh kum 782 nungta lai hi); tuiciim tun ma lai mite in zong sihna athuak uh ciang nuntak hun tom sa mahmah veve uh hi.
Job 7:1-11 sim in. Job bang vai in phun hiam? Late 39:5, 11; James 4:14 zong en in.
______________________________________________________________
______________________________________________________________
____________________________________________________________________________________________________________________________
Job in sihna‟ piak ding noptuamna leh khawlngakna adeih hi ta hi. Nuntak hun tom lua ci in thuum hi. Acihnop bulpi ah, nuntak haksa in, natna satna dim in, sihna in zomh hi. Ih phut khak thute en leng: nuntak haksa in dahna tawh dim ih cih kawm mah in nuntak hun tom lua ci in ih thuum zel hi.
SDA numei khat in lungkia lua a, kisuam asawm vai gen hi. Tua ban ah: “kei lah Adventist hi sawnsawn in midangte sang kum 6 nuntak sau zaw ding a, annek tuidawn akidawm khat ka hihi” kitukalh peuh mah hi. Ih lung-kiat ciang bel ahi lolo suak mawk hi. Ih nat ih sat ciang akilawm ngaihsutzia cih te kinawlkhin kha a, ih heh ih dahnate kawmkal ah lametna ih mu thei kei hi. Ei sang a thutheizaw Job nangawn in (Job 19:25), lungkia, lamet bei tak in awng a: “O, ka nuntakna husan bek hi! Ka mit in ahoih nate mu nawnlo ding hi (Job 7:7, NKJV). Sih ding bek angak Job adingin hong nai sem ta a, tua hun haksa kawmkal mah ah nuntak hun tom vai tawh thuum in tau hi.
Mawhna sung lut vai, sihna, thawhkikna, leh lametna vaite in leitung nuntak atom vai ah bang thu ngaihsut siamna nei thei sak dingin hong huh hiam?
______________________________________________________________

Ningani (Thursday) Oct. 27
“Mah Enosh?” (Mihing ih cih bang hi mawk?)
Job mun ah kikoih kik ni. Pasian in hih bang teng bang ci a kei tung ah hong tung sak hi mawk, ahihkeh bang cia hih teng ka tung ah apian ding phal hiam? Ahuampi mu kha lo hi. Bang muh theih na mah ding? Akiim apaam leh ama tung a piangte bek aman‟n thei a tuate telsiam lo hi.
Tua bang dinmun atung ngei lo kua om hiam?
Job 7:17-21 sim in. Job in hiah bang agen hi mawk hiam? Bang dotna dongh hiam? Ama dinmun ngaihsut in, tua dotnate bang hang in adot huai mah suak hiam?
__________________________________________________________________________________________________________________________________ Pawl khatte in Late 8:4-6 sung a thute a ci kik bang khat in nei a: “na phawk khak dingin minhing in bang hi lel a, na don dingin bang hi mawk hiam? Bang hang hiam ci leh nangmah in vantung mite sangin aneu zawdeuh in na bawl a, minphatna leh vangliatna na guan hi. Na bawlsate tung ah ukna na nei-sak a; na khempeuh na uksak hi (NKJV; Late 144:3, 4 zong en in). Ataktak in bel Late akigelh mapek in Job akigelh khin ahihi. Tua hi a, Late gelhpa in Job tauna teng mah aman kik hi zaw ding hi.
Alang nih pan in “MahEnosh?” (mihing in bang hi lel hiam?) cih thu in ih dot ding athupi pen ahihi. Kua hi mawk ih hi hiam? Bang cia hiah om dih mawk? Ih nuntakna khiatna leh deihna bang hi mawk hiam? Job in bel, Pasian in amah “mui tum” bangin nei ahih manin bang dia Pasian in hong hi cih mawk aci ahihi. Pasian lian lua a, A piansak nate tam lua in; bang dia Job tua cih lai zang ding hiam? Eite khat peuh Pasian in hong tuaci awlmawh mawk ding hi-am?
John 3:16 leh I John 3:1 sim in. Hih munte in mihingte leh Pasian’ ki nahvawhzia hong koici gen hiam?
__________________________________________________________________________________________________________________________________
“John in Pa Pasian in siatna amanawh hih lei mite hong itna; asan‟zia, athukzia, leh azaizia amuh atheihna tawh lundamhna leh zahtaakna tawh kidim hi. Hih bang itna omzia genna ding kammal mu zolo ahih manin leimite aw ngaihsun dih un: “vantung ih Pa in eite hong itna, tate hong cihna thu lungngai un” na ci hi. Hih thu in mihingte tung ah manphatna hong pia hi! Palsatna hangin mihing‟ tate Satan sawltakte suak uh hi. Manh tawh, gen theih ahi lo Khazih hong kipumpiakna tungtawn leh Ama min ah upmuanna tungtawn in, Adam suante in Pasian tate cihna ih ngah hi. Mi bang a hong pianna tungtawn in lei mite hong tawisang hi. - E.G. White, 4T p. 563.

Kiginni (Friday) Oct. 28
Ngaihsut beh Ding: Nate thu theihna leh ngaihsut tuamtuam hong tam semsem ciangin Christiante‟ “lungdamna thu” in akilang omziate, nuntakna omzia thu leh la te leh, ngaihsutna vaite ah zong up huai zolo sem hi. Athu hong kipatkhiatna mahmah en leng zong - mong nei lo, tawntung Pasian in hun khat mun khat ah mi bangin hong piang a, thahlup thuak lelngel cih mahmah zong up huai zo tak lo hi. Tu ma kum 2000 lai a pilna siamna, theihna, om nai lo mun kawm lak khat bek ban ah tu lai ih theih semsem teh gen tham ahi peuh mah lo ni aneu sim khat akimvel leitung no khat ah kuama phawk khak loh thupiang khat in vannuai bup atawntung a akilamdang sak ding thu piang cih pen thu ngaihsun theite adingin cingtaak mel lo hi. Hih alianpi vannuai in anengno khat abang hih leitung ah hong lung himawh ding cih bel thu hi kei. Hih bang a zai tak a ngaihsutnate leh natethu theihsiamna tuamtuamte kawmkal ah Christian cih mahmah zong hong vul lel hi.” - Rich-ard Tarnas, Passion of the Western Mind (New York: Ballantinte Books, 1991), p. 305. Hih bang ngaihsutna ah bang tasamh mawk hiam? Hih lai at pa‟ ngaihsut khak loh bang hiam? Hih atung a lai atpa‟ gen thute in “natethu leh ngaihsutna” vai ah lei mite ngaihsutnate in hong koici lah in, Pasian leh Ama hong itna ataktak ahihna ih tel zawhlohzia leh thumann thutak hong kitheih sak akul ngiatna vai leh “natethu leh ngaihsutnate” in amuh khak theihlohzia bang hong lak hiam?
Kikup Dingte:
1. “Mihing ih cih bang hi mawk hiam?” cih dotna, Christian khat na hihna tawh bangci dawn ding na hi hiam? Laisiangtho Pasian a um lote tawh na dawnna kikoici lamdan ding hiam?
2. Misite adingin aom takpi mah hiam? cih dotna leh “sihna ih cih pen anungtate’n apuak kawikawi uh ahihi’ ci in Cormac McCarthy in na gelh ngei hi. Sihna khit ciang a thupiangte thei a, ih telsiamna in; ih it ih ngaih a sisate vai ah, lungnopna bang hang in hong pia thei ding hi-am? Ki hehnepna bang khat peuh ih ngah thei ding hiam? Misite amau muanhuai takin khawlnga in nuntak haksatna leh buainate om nawnlo cih ih theihna in hehnep lung nop hong pia thei kha hiam?
3. Nuntak haksat mahmah te zong, bang zah in buai’huai mah ta leh nungta nuam tentan cih pen bang hang hi in na um hiam?
4. Mihing a pian thamanh tawh kisai mi khat bek nuntakna zong amanhphatzia singlamteh in hong hilh vai thute kikum ni.