Zo Phualva Thupuak - Volume 06, Issue 19 - Pulaakn Loh Mawhna Ih Nei Kha Hiam

PULAAK LOH MAWHNA IH NEI KHA HIAM?

“A khialhna a im mi a dau pailo dinga, mawhna pulakin a kikhel mi in hehpihna a ngah ding hi” (Paunak 28:13).

Nupa nuntakna ah thu ipsim leh selsim a omsung tengin nupa kizopna nuamsiang theilo a, kimuan taktakna zong cik-mah hunin tung ngeilo hi. Thu ipsim khat pen hun khat ciang hong kithei veve a, ahun lai-a ih pulaak loh in nupa kikal ah siatna tampi tun thei hi. Tua mah bangin nang le Jesu zong nupa bangin hong kigenteh mah bangin (Matt. 9:14, 15), Jesu tawh na kikal ah ipsim le selsim na neih sungin lungmuanna le khamuanna taktak kingah ngeilo ding hi.

Mawhna pulaakna leh kisikkikna pen gupna ngahna dingin akisam mahmah kalsuanna ahi hi. Pentecost ni in Topa Khasiangtho hong kibuahsuk ciangin thu-um mite in mawhna aneih lam uh hong kiphawk ahih manin, Peter kiangah bang cih ding cih na dong uh hi. Peter in Pasian’ Hehpihna Jesu Christ tungtawn a ngah theihna dingin mawhna pulaak-in kisikkik in Pasian kiang zuan dingin na gen hi. (Sawltak 3:19-20). Gupkhiatna kitelcian khit ciangin zong ih nisim nuntakna hong mapi dingin nisim Siangthosakna (Sanctification) a kisam mahmah lai ahi hi. Banghang hiam cihleh pianthak khit ciangin a kimawh kik theilo hilo-in, Pasian hong ompihna tawh aki mawhlothei hizaw hi. Leitung a ih om sungin mawhna tawh omkhawm den ihih manin khatveivei ciangin kisawhkha thei ding hihang. Tua hun ciangin Pasian’ thukham ih lungsung a Pasian in hong gelh (Heb. 10:16) in, ih mawhlam hong theisak ding hi. Tua ahih manin, eite in imcip lo-in, ahi bangbangin kipulaak in Pasian kiangah mawhmaisakna ih lak ding kisam mahmah hi. Mawh gige, ih mawhlam kithei gige in Pasian kiangah ih pulak kei a, mawhmaina a ngen nuamlote Topa’ Kha Siangtho in zong ompih taktak lo hi. 

Kisikkikna taktak in mawhna bawlna hanga poisakna le mawhna nungngatsannate kihel hi. Tua kisikkikna mann pen mawhna’ siatnate mu tel a, lungsimtak tawh a nungheisan kei leh anuntakna ah kikhel taktak zolo hi. (Steps to Christ 23.2). Mawhna pulaakna leh kisikkikna pen akisam mahmah hi a, mawhna tuamtuam a om mah bangin ei le Pasian kikal-a mawhna pawlkhat gamdaihna munah Pasian tung-a pulaak ding zong om a, pawlkhat ahih leh mipi tung-a pulaak ding pawlkhat zong om ding hi. Mimal tung mawh kha nahih leh zong kiniamkhiat takin vapai-in mawhna pulakin hong maisakna dingin va thuum ding kisam ding hi. Mawhna ih pulaak ciangin mawhna kihna lungsimtak le tua mawhna ah lutkik nawnlo ding khensatna kician kisik taktakna lungsim tawh pulaak ding kisam hi. Pharaoh kumpi in athuak beh ding akihtak man bek a kisikna bang lungsim pen Topa in deihlo hi. Lungsimtak tawh kisikkikna pen Topa in hong sang hi. Topa deih pen akitamzan le akisik lungsim ahi hi. (Steps to Christ p.24.1)

Mikhat mawhna hangin leitung ah mawhna hong kidim-a, (Rom 5:12), tua mawhna kisikkikkik in apulakte’ a dingin Topa Zeisu in tawntung nuntakna hong khaamzo hi (Rom 6:23). I Pasian pen itna le lainatna tawh akidim Pasian hi a, mawhneite in amawhna uh kisikkik in akiangah azuat nak leh kai lua cihbang omsak vetlo hi. Mawhna hong maisak dingin ih Pasian cikmah hunin zekai ngeilo a, kisikkikna lungsim maantak aneite Topan thei ahih manin, amawhna uh pulaak-a mawhmaina anget ma nangawn in na maisak khinzo hi. Tapa Taimang Tangthu gentehna i et ciangin a Pa in a tapa lungsimtak tawh akisiknate thei khin ahih manin athuum ma in na maisak khin mawk hi (Luke 15:1). Tua bangmah in nang le kei mawhna sungah ih puk ciangin Topa kiang lam ih zuatnop nak leh Topan hong sang den hi cih thu kilangh hi.

I Pasian pen mi pawlkhatte in hehpihna neilo, mawhna banga athuk ciatciat Pasian bangin nagen thei uh hi. Adiak diakin Thuciamlui hunlai-a Pasian pen mite thukham tawh thukhen in amawhna bangin thukhenpa in na ciamteh uh hi. Topa Zeisu pen zanni, tuni, le a tawntung in akikhel ngeilo Pa (Heb. 13:8) ahih manin Thuciam Lui hunlai-a Pasian zong hehpihna tawh akidim, mite amawhna banga thuk pahpah lo, alungduai acitak Pasian ahi hi. Noah hunlai-in Pasian in mite mawhna kisikkikna dingin kum 120 sung hun napia a, tua sung a kisikkiklote pen kum 100 apiakbeh zongin kisik tuanlo ding cih amuh manin amaute a susia nahi zaw hi. Pasian tate mawhna khat peuh tawh aki-awk ciangin Pasian in amaute thuk pahlo in, a kisikkikna ding le mawhna pulakna dingin a kicing hunpia tawntung hi.

Israel te Egypt gam salsuahna pan paikhia in Canaan gam azuat uh ciangin Pasian ompihna tawh Jericho khuapi hong zo uh hi. Pasian in Israel thukante asel sim Rahab le a innkuanpihte simloh midang le ganhing khempeuh suksiat ding thupia-a, ngun le kham, sumngo le sik tawh kibawl vante ahih leh Topa sumkoihna-ah koih dingin thupia hi (Joshua 7:17-19). Ahih hangin Akhan in Babylon puantualpi le sum pawlkhat a iplah manin apuanbuk nuai-ah na selsim hi. Kua mah’n theilo dingin um mah leh, na khempeuh athei Topa in athu manlohna gu pen Isreal mite tung na tungsak hi. Jericho khuapi alak khit uh ciangin tua khuapi sanga neuzaw tham Ai khua pen sim dingin hong kithawi uh a, Topa ompihna omlo ahih manin Ai khua mite in naleh delh in Israel mi 36 nathahsak mawk uh hi.

Hih bangin Israel mi 36 sihna pen Akhan mawhna hang hi a, Akhan in thei mah leh amawhna pulaak nuamlo mawk hi. Tua thu azak uh ciangin Joshua le makai pawlkhat in apuan uh balkek in ip-hampi silhin leilak ah Topa maipha azong uh hi. Topa in ‘Israelmite lakah thukham apalsat khat om hi, zong khia in’ ci-in asawl ciangin Joshua in Israel mi khempeuh sam khawm in thugenna nei a, Akhan in tua takah zong amawhna pulaak nuamlo lai hi. Pasian sawlna bangin aisan na nei a, Judah behte tung hong tu a, tua panin Zerah te beh, Zerah te beh pan in Zabdi, tua panin Akhan pianna pa Karmi innkuan tungah, tua khit ciangin atawpna ah Akhan tung hong tu ta hi.

Hih thu ih et ciangin Pasian in Akhan mawhna thei in, amah in amawhna pulaak in mawhmaina anget ding na ngakden in, thakhat in amah lakhia pahlo hi. Akhan in ahihleh mi 36 asihna hang, makaite puan balkekin hihzah-a adahnate khempeuh ama hang cih theisim gige mah leh amawhna pulaak nuamlo lailai hi. Abanban-a kan suksuk ciang nangawn in Pasian in amawhna pulaak ding hunhoih apia lai hi-a, ahih hangin amah in pulaak nuamlo lailai hi. Atawpna hehpihna kong kikhak khit, apaulap ding le bukna ding a om nawn loh ciangin amawhna pulaak pan mawk hi. Ahih hangin tua hun ciangin hehpihna kong kikhak khin a, ama’ a dingin Pasian in hunhoih tampi pia mah leh thudonlo ahih manin Pasian in na saanglo in, sihna thuaksak veve hi.

Hih Akhan khialhna pen tuhun ciangin leitung kumpite sungah om bek thamlo in pawlpi sungah zong hong omta hi. Mite in angsung khualna lungsimte nei-in, piakkhiatnate mangngilh bawl uh a, Pasian ading ahi sawm-ah-khatte le sumpite nangawn Akhan bangin amau ip sungah selta uh hi. Pawlpi sungah Akhan kinei ta-a, amaute in Pasian samsiatsa van tampi thumanlopi tawh angahte uh selsim kawmin Topa sabuai mai-ah kisuanna neilo in tu uh hi. (PP 479.1)

Tuni in ute naute aw, Pasian mai ah sepkhialh bawlkhialh mawhna, ih pulak khak loh mawhna a om kha hiam? Kisittel tek ni. Akhan bangin mawhna selcip ih neih khak leh Topa in tu in ih mawhna pulak in Ama kiangah mawhmaina ngen dingin hunhoih hong pia lai hi. Amah in hong ngak gige hi. Mawhna sel lo a apulaakte tungah hehpihna om bek ding ahih manin, mawhna selcippi mah tawh Pasian hehpihna ngah ding ki lamen kei ni. Mihing lungsim khempeuh athei Pasian hi.

Eite nisim Siangthona ih ngahna dingin Pasian’ deihloh mawhna ih bawlkhak ciangin ih mawhnate imlo in, pulaak leng Pasian in eite mawhna hong maisak ding hi. John laikhak sungah, “Ahi zongin Pasian kiangah ih mawhnate va pulaak lehang, amah citak in thumaan ahih manin, ih mawhnate hong maisak in ih hoihlohnate khempeuh hong siangsak ding hi” (I John 1:9) na ci hi. Nisim nuntakna ah Pasian deihloh mawhna ka bawl kha hiam ci-in ei le ei kisittel den in, ih mawhkhak ciangin ih mawhnate imlo in Pasian kiangah pulaakin mawhmaina angenthei atate ahi dingin Topa’n thupha hong pia tahen. Amen.     

By: Daniel Shoute.