Dawisiampu Khat’ Tapa (Agen: Muyi)

November 19, 2016                                                                                      Italy     

 

Mission Story - Nipi 8na (4th Qtr, 2016)

Dawisiampu Khat’ Tapa  (Agen: Muyi)

                       

            Muyi pen Africa nitumna lam, Nigeria gam, Italy ah khangkhia in, Dawisiampu khanggui pan hong khangkhia hi. A pu dawisiampu khat hi a, a pa zong dawisiampu  khat mah hi in, Muyi zong a khua uah a pa zom in dawisiampu ding ahi hi.

            Dawisiampute pen amau teenna veeng ah vaang nei mahmah uh hi. Dawisiampute pen kha lam tawh kisai in a sisate tawh kizopna bawl thei uh hi. Tua baanah cina damsak thei in, kha gilote hong daalsak thei a, mi zong hong bumsak thei uh hi.

            Hih bangin hihtheihna vangliatna a nei thei ding ahih hangin Muyi in a pa’ khekhap zui nuam lo hi. Muyi’ pa pen dawisiampu ahih baanah, zi thum tak nei hi. A pa in zi thumna a neih ciangin a zi masa Muyi’ nu in taisan a, a nu tawh a kimuh lohzawh kum (11) valta hi.

            Muyi in a inn uh ah simmawhna thuak ahih manin lungzuang khuangai in om tawntung hi. Nitaak khat, Muyi kiangah Tapidaw pastor khat hong hawh hi.

            Pastorpa in awzol tawh, “Bang khawng semsem nahi hiam?” ci-in a dot ciangin  Muyi in zong a thuakna khempeuh gen khin hi.

            Pastorpa in hih khangnopa hehpihhuai sa in leitungmite hong it mahmah Topa Zeisu om hi cih genpih a, biakinn ah hong kikhop nadingin zong Muyi sam hi. Muyi zong pastorpa sapna saangin biakinn ah hun maan takin hong kikhawm a, lapawl lasate lakah zong hong kihel hi. A sawt loin Topa Jesu ama’ Gumpa leh Honpa in hong saang hi.

            A tapa a vaakthap nawnloh ciangin Muyi’ pa lungdam a, ahi zongin Tapidaw a suah pen a lungdam hetlo hi. Dawisiampu innkuan sungah Tapidaw a suah ciangin, Muyi in, “leitung nih ah a teeng tawh kibang ing” ci-in lungzuang takin gen hi.

            Atawpkhakna ah, nungak Giory tawh Muyi hong kiteeng in inntuan uh hi. A tuamten uh hangin Tapidaw pan khawl in a pa khekhap ahi Dawisiampu a suah nading in a pa in zol kik thapaai hi.  Bangbang hitaleh, Muyi in bel, a Tapidaw upna khahsuah vetlo hi.

            A sawt loin a pa si a, Muyi in innlam nasep leh  leh innsung vanzatte bawlna a sepna mun Libya ah a zi tawh hong lal uh hi.

            Libya pan in Sicily tuikulh tungah a om Ragusa khuapi ah Muyite nupa naugil tawh hong lal uh hi. Hong tunzawh uh a sawt loin tapa naungeek Joseph piang hi. Muyi in innsung vanzat tuamtuam bawlna set innpi ah nasep ngah a, kum thum sung khawng nuamtakin nungta uh hi. Ahi zongin, nasem tampi set innpi pan-in kikhawlsak , Muyi zong kihel ahih manin innkuan nuntakna hong haksa simsim hi.

            Ni khat, Joseph’ phuat sang-ah a sem siama khat Muyi kiangah hawh a, khut siamna sinna sang a om lam leh siamna tuamtuam kisin thei ahihna leh Italy kampau zong kisin thei ahihna genpih hi. Siama in, “Thusinnate na zawh ciangin, gualzawhna pahtawina laipi (certificate) na ngah ding a, tua gualzawna laipi tawh nasep na ngah baih thei tuam ding hi” ci-in hanthawn hi.

            Muyi zong siamsinna sang ah kah dingn khensat pah hi. Seventh-day Adventist khat ahi, Ragusa khuapi ah mite kisapna huh ding a kan Giorgio Bella’ nasepna phual ah Italy kampau sinna leh khutsiamna sinnate kihilh hi.

            “Pasian’ hong hehpihna tawh hih siamnate ka sin thei hi” ci-in Muyi in lungdam takin gen hi. Muyi in, “Thusinte hoih thei lua baanah, mi khempeuh kingaih bawl hi. Siate in sangnaupang bangin hi loin a sanggamnu a sanggam pa bangin hong hilh uh hi” ci-in maitai takin gen hi.

            Thusinte hanciam kul himah taleh, “Siate in van tawh hanciam in hong sin sak uh a, Italy kampau zong pautheih hamtang nadingin deihsakna taktawh hong sinpih uh hi. Ka sinte uh limtakin ngaihsut mahmah ding kisam hi, a hangin tua bangin lim ngaihsut kei leng bangmah kithei thei lo ding hi” ci-in Muyi in thangah takin genbeh lai hi.

            Hih bangin khut siamna leh Italy kampau sinna tawh a kipanpihna hangin Muyi kipaak mahmah a, mailam a nasep nading munah zat dingin tupna nei hi. Tua sangin a thupi zawkan lai thu in, Seventh-day Adventist pawlpimite in a itna uh leh a khualna uh hangin Muyi’ nuntakna a hoih lam in a kikheelna thu ahi hi.    Tu kuata 4na Sabbath sawm leh thumna sumpi pawlkhat pen Ragusa ah a kitangsam innte lambeh nadingin kizang ding hi. Hehpihna tawh cinghtakin sumpi pia ciat un. Lungdam hi.

#######@@@@@@@@@@@@@@@@@@@#######