Hunbit in Nasem (Agen: Giorrio Bella)

November 12, 2016                                                                                         Italy                  

Mission Story - Nipi 7na (4th Qtr, 2016)

Hunbit in Nasem  (Agen: Giorrio Bella)

            Giorgio (George-e-o) Bella in pawlpi leh veengte kizopna neih nading tawh kisai mang khat man hi.  Sicily gam, Italy tuikulh tung aa om Rafusa khuapi ah ADRA (Adventist Development and Relief Agency) ah a kipumpiak makai nih Giorgio leh Carmela Cascone te’n a taangzaizaw in na sem nuam uh hi.

            Tuma sawtpi laipek in ADRA nasep hong kipat uh ciangin  neek leh dawn silh leh teen kisamte huhna pen nasep thupipen ahi hi. A kipumpiak ADRA nasemte in a nasepna uh, midang tawh kithuahna, gamdang-mite aadingin Italy pau sinsakna, gamdangmi thongkiate aadingin huhna zonsakna leh ngaihsutna lam cidam nading vaihawmsakna cihte tawh hong behlap to uh hi.

Midang Tawh Nasepkhopna

            Tawlkhat khit ciangin, ADRA kipumpiak nasemte’n a sep nasa uh baan ah veengte aading nasep theih ding in khuasung hausate tawh kikup ding  geelna nei uh hi. A kipumpiak ADRA nasemte nih in Ragusa khuapi  aa makaite tawh kimuh ding leh thukin aa huh ding a kasapna uh kuppih dingin khensat uh hi.

            Khuasung makaipite in Seventh-day Adventist pawlpi thu hong telpha nailo ahihlam Giorgio leh Carmella in phawk uh hi. Ahi zongin, khuasung makaipite in a kipumpiak ADRA nasemte nasepna hong etcian uh ciangin ADRA a muanna uh khang semsem hi.

            Hong muanna uh khangto lua ahih manin 2014 kum in “Food Bank Foundation,”   geelna, “inkuan aa anneek tuidawn kisamte huhna” geelna pen ADRA min tawh Ragusa khuapi ah kiphuan hi. Tua geelna (project) ah an leh tui, puansilhte kholna, a kisam innkuante tungah hawmkhiatna nasepnate ki vaihawm hi.

            Hawmkhiatna phualpi dingin Ragusa khuapi  sungaa om Seventh-day Adventist biakinn huang sungah inn thak lam in tua mun kizang hi.

            “Tu-in khuasung mite tawh kimeeltheihna ka bawlthak thei uh a, ADRA bekin anneek ding hawmkhiat theihna hunpha ngah hi” ci-in Giorgio in gen hi.  Tuama hun lai-in Sicily gam sungah Roman Catholic pawlpi bek in kumpi phalna tawh a kisamte aadingin an hawmkhiatna sem thei hi.

            Giorgio in, “Catholic leh a dang kipawlna a tuamtuamte ih pawlpi biakinn ah sam in thu kikupna ka nei khawm uh hi. Tua bangin khat leh khat kimuanna hong khangto a, mihoih in hong mu ta uh hi” ci-in nuihmai kawm in gen hi. “A dang pawlpi tuamtuam pan in zong a kipumpiak ADRA nasem ding ka zol uh a, amau tawh semkhawm in kimeltheih ding ka hanciam uh hi. Amau mai ah kiniamkhiat ding kisam ahihzahkhat in, makaih zia siam ding kisam mahmah hi” ci-in Giorgio in genbeh hi.

Nuntakna Kikheel

            Ragusa khuapi aa om Adventistte’n mi tampi’ nuntakna a kikheelsak bangin Joseph zong a nuntakna hong kikheel hi. Joeseph in nasep neilo in tawlkhat sung om a, kumpi tungah huhna nget ding khensat hi.

            Huhna ngen dingin Kumpi zum ah a va pai ciangin, kumpi nasemte in ADRA nasepna phualpi ahi,  Adventist pawlpi biakinn ah paisak a, a lametna zah sangin huhna ngah zawtham lai hi.  Joseph in, “Hih lai aa sem siate thupi thei mahmah uh hi. Hong huh mahmah uh hi. Amaute’n kei ka ki-it zah mahin hong it uh hi” ci-in lungdam takin gen hi.

            ADRA pan in kum khat leh alang bang huhna hong ngah khit ciangin a ngahna zah sangin a tamzaw in kipumpiak in nasep ding hong khensat ta hi. Giorgio kiangah, Joseph hawh in, kipumpiak aa midangte huhna ah a kihel nopna va kuppih hi. Giorgio zong thukim a, tu in Joseph in ADRA ah a sep zawh kum khat bang hong cingta hi.

            Joseph in, “ADRA ah kipumpiak in na kasep ciangin ka nuntakna hong kikheel takpi hi, a hangin, ka kitangsapna ka ngaihsut ding sangin midangte kitangsapna ngaihsutpih ding leh huh ding ka ngaihsun zawta hi.  Midangte’ kitangsapna ka ngaihsutna in ka zi ka tate thu ka ngaihsutna khangto sak hi. Leitung ka kheel theikei hi. Ahi zongin mi ka huhna in na a neuno khat kikheel sak hi.  Midangte huhzia ding Giorgio in hong pantah a hih manin ama’ tungah lungdamna ko ing” ci-in lungdamtakin Joseph in gen hi.

Munawng Neu

            ADRA ah kipumpiakna nasep baan zomin, Giorgio in inn gol khat lam a, nasep siamna sinna, nasep lungmuanna sinna, Italay kampau sinna leh midangte kisap a tuamtuam sinna dingin dei tampitak bawl hi. Thusinna a kizawh ciangin thusinte in gualzawhna pahtawina lai (certificate) ngah uh hi. Thusinna pan mi tampi Giorgio tawh hong kimeeltheih uh a, Seventh-day Adventist pawlpimi suah ding zong lungluut uh hi.

            Tu lianin, thusin dingin hong pai nuam tam semsem ahih manin  inndei ah ta nawnlo uh hi. Tua hi a, Ragusa khuapi sung aa Seventh-day Adventist pawlpi biakinn huang behlap nadingin munawng a neu khat lei nadingin tu kuata sawm leh thumna sumpi in hong huh ding hi.

#######@@@@@@@@@@@@@@@@@@@#######