Nial Theihlo Sapna (Khen 1) Agen: Richard

November 26, 2016                                                                                          France

Mission Story - Nipi 9na (4th Qtr, 2016)

           Nial Theihlo Sapna  (Khen 1)           Agen: Richard

            1956 kum in Morocco gam Casa Blanca khua ah ka piang a, tua kum mahin Piantit (France) gam panin suahtakna kingah hi. Upna ah a citak mahmah Jew minam innkuan sungah ka piang a, ka pu pen gamdang ah mehza zuakna tawh a lawhcing mahmah sumzong pa ahi hi.

            Ko innkuan pen Morocco ah ka teen zawhuh kum 500 cing dekta hi. Tua ma-in Spain ah ka teng uh hi.   1492 kum ciangin Spain kumpinu in uk a, Jew minamte Catholic suak ding, a suah nop keileh gam panin pai khia ding a, a neih a lam khempeuh uh nusia ding hi cih thukhun bawl hi. Jew minam a tawmzaw tham te’n Spain gam pan Portugal, Netherlands, Turkey, Morocco, leh Africa saklam gamte ah lal uh hi. Taanglai ka pupi te uh Morocco gam ah na lal uh hi.

            Kum (8) ka phak ciangin kanu leh kapa te’n Morocco pan lal khiat ding khensat uh hi. Banghanghiam cihleh, Jew minamte Muslim gam ah a ten dinguh lungmuanna om nawn lo a, ka naihuai khempeuh uh Morocco gam pan lal khia leuleu uh hi. Pawlkhatte Canada gamah, pawlkhatte Israel gamah, lal uh a, ahi zongin ka pa’n Piantit gamah lal ding na teel zaw hi.

            1964 kum in, Marseilles khuapi ah ka lal uh a, ka pa’n nasep ngah zolo ahih manin Paris khuapi ah ka lal leuleu uh hi. Tua khuapi ah ka pa’n pasal puankhuina sai ah nasep kipan thei hi. Puan khui kawm in puan sungsilh, bombi sungteen, khedap mawza cihte zuak kawm hi. Ka pa’n a puankhui nasep behlap in pasal puante, lu pan aa kithun puante, leh puan leh pheituam mel kibang in khui in zuak hi.  Sumzonna nasep hoih a hih manin sai nihna nangawn bawlbeh hi.

Khuapi Nawl ah Nuntak Khawsakna

            Paris khuapi ka tuncil lai un, Morocco gam sangin innte tam manzaw ahih manin Villejuif a kici khuapi nawl ah ka teeng uh hi. Tua mun ah Jew minam tampi teeng kahih manun Jew khuapi “Jewish City” kici hi.      Kum 9 ka phak ciangin Villejuif  ah sangkah ka kipan hi. Jew minam in ka nungta a, ahi zongin mi dang tawh zong ka kikhawl thei hi. Kum (11) ka phak ciangin ka pai nopna ah ka pai theita a, numeite tawh kithuah in ka hih nop bangbang ka hih thei hi. Lasakna leh laamna pawi zong mi khawm in ka bawl thei a, lim taangthei lahna zongah ka pai thei hi. Tuhun lai sangin gamsung lungmuan omzaw ahih manin lau nading omlo hi.

            1968 kum ciangin Paris khuapi sung lamdung ah  sangnaupangte’n lungphona bawl ahih manin sang khempeuh kikhak hi. Gam kumpi President zong a zaa pan khawl hi. A thu nasia lua hi. Hih lungphona a tupnapi pen suahtakna ahi hi. Hih lungphona in Paintit minam khempeuh ah phukhia zo a, ka pate khan lai pek panin a lunggulhna uh ahi hi.

Biakna Lam Ah

            Ko innkuan in biakpiakna bawl ung. Ka pa’n ni simin zingsang tuung, suun lam leh nitak lam ta in thu ngen hi. Sabbath kipat lam pen thupi phadiak hi.  Kigin ni (Friday) nitak pan kipan Sabbath ni a kipat hun ahih manin inn ah ka om hamtang kul hi.  Jew minamte ngeina bangin ka inn uah biakpiakna ka bawl tawntung uh hi.  Ahi zongin ka buaina khat pen uh in, biakkhop theih nading inn ka nei naikei uh hi.

            Innmun neu khat sungah inn thum kizom in ka teeng uh hi. Inn khat ah ka tanau sanggamnu teeng in inn nihna ah ko innkuan ka teeng uh a, inn thumna ah sangkah lai khangno Judah sia, a zi a tate tawh teeng hi.

            Innkuan thum kinai takin teengkhawm kahih manun, Sabbath biakpiakna ka bawlkhawm uh hi.  Biakpiakna pen Kigin ni (Friday) nitaak, Sabbath zingsang leh Jew minam pawinite ah ka bawlkhawm uh hi.  Ka tanau sanggamnu in  Israel gamah peem ding khensat hi. Ka pa in zong ka sanggamnu tenna inn pen biakinn dingin kun a, ka sanggamnu in zong a inn pia hi. Tua inn pen kikhopna biakinn dingin ka pa in puah hi. Thukham (10) koihna singkuang leh savun lai tawh kigelh Torah bu zong ka nei uh hi.   Ka neulai in kikhop nadingin ka zat uh inn pen a siangtho mahmah in ka ngaihsun hi. Banghanghiam cihleh savun lai aa kigelh Torah a kikoihna singkuang ah Pasian om hi cih ka um hi.

Deihkin Thungetna

            Ni khat, ka upaa tawh kimawl in ka kongkhak uh ka khakngawh kha hi. Ka kongkhak uh pen atuamdeuh aa kibawl hi a, sing tawh kibawl in a laizang ah a hoih mahmah leh a tamman mahmah a kizeem limlang kibulh hi.  Kongkhak ka khak ngawh ciangin tua limlang kitam in ka innmai uah kiphah zeekzaak hi.

            Ka pa lah sintom in heh baih mahmah lai! Ka pa’n kei bang hong cih peuhmah tam! ci-in ka dah mahmah ban ah ka lau mahmah hi.

            Ka pa bawl biakinn ah pai ding ka khensat hi. Thukham sawm suangpek nih kikoihna singkuang geiah ka pai hi, banghanghiam cihleh, ka lungsim ah tua munah Pasian a om dingin ka ngaihsun hi. Tualai ah khuk din-in thu nget ka kipan a: “Pasian aw, a om takpi dingin ka hong um a, ahi zongin na om lam ka thei kha nai kei hi. Tu-in a om takpi nahih lam na hong lah ding kong thuum hi. Ka inn aa thupiang mu khin hi teh. Ka pa a hehbaih zong theikhin teh. Hehpihna tawh nitak ciangin ka pa inn hong ciah a, a kitam limlang a muh ciangin bangmah hong cih hetloh nadingin hong huh in” ci-in thu ka ngen hi.

            A kidawngkik thei lo thungetna hi cih pen ka tel hi. Ka pa hong ciah aa, inn hong tun hun ding  nitaak  dong ngak in ka om giauguau hi.

(Mai Sabbath ciangin a zom ngai ni)

#######@@@@@@@@@@@@@@@@@@@#######