THAU LEH PASIAN (Mission Story)

Mission Story - 1st Sabbath of 3th Qtr, 2016

July 2, 2016                                                                                                                               Sudan Khanglam

                                        THAU LEH PASIAN     (Agen:  Gina Wahlen)                                                 

            Sudan khanglam pen a lauhuai mun hi ci-in ka thei a,  a hihhang in, tua lai aa om Adventist  sanggamte’ kiang va hawh ding pen a thupi a hihzah khat in Pasian in hong tonpih ding hi cih ka khamuang hi.

            Juba khuapi ka tun ciangin television vai leh Pasian nasepna lam tawh kisai video bawlpa a hi  Earley  tawh ka kimu pah uh hi.

            Sudan khanglam aa om pawlpi mite tawh ni thum sung thu tuamtuam kidong in Pasian in mau’ nuntakna ah a kepna nalamdang thute ka ngai uh hi.

Khualzinna atom in

            Ka vai uh a man ciangin, Earley tawh Juba khuapi sung vak aa, maan kizaih ding ka gel uh hi. Mawtaw hawlpa, pawlpi kem siapa leh Ni suahna-A laizang lam Africa Division ah cidamna lam makaipi (Director) Dr. Fesaha Tsegaye tawh khuapi sung ka vak khawm uhhi.

            Maan kizaih ciangin maanbu zang lo in khuttawi phong (cell phone) te bek zat dingin hong kigen hi. Khuapi sung ka vakna uh ah UN mawtaw tampi ka mu uh hi.  Gal kidalna phualpite leh kulh sangpi te tawh a ki-uum kumpi innte ka mu uhhi.

            Earlley tawh Nile gun ka naih uh ciangin Juba khuapi aa om lei khat bek ka kantan kawm un man pawl khat ka zaih uhhi.  Lei ka khen uh ciangin  tawm khat vak lai in, tua mun pan-in  Adventist huang lam ka ma- nawh kik ta uh hi.

Lei Cing Galkapte

            Lei tung tawn in Nile gun ka khen uh ciangin lei cing galkap khat in a gal ah hong ngak hi. Hangsan tak in mi a kap lum ngam galkap tampi a omna gungal ah lei kantan in a kileh kik dingin hong aana sawl hi.  Maw-taw tungpan hong tuak sakin kulh muanhuai mahmah tawh a ki-uum khaan dei nih a om inn sungah hong lut pih uhhi.

            A tawng pen inndei sungah hong paipih lai in, hong tu sak a,  ka cell phonete uh hong suh sak hi. Tua khit ciangin  ka theih loh uh Arabic pau tawh hong haan gawp uh hi. Bang thu piang hiam cih thei lo in Earley tawh daai takin thu ka ngen uh hi.

            Tua lai ah hong kimat suak leh bel,  “Ka innkuanpihte uh tungah ngai mahmah ung cih hong gen sak un” cih kammal pen lungsim sung aa hong suak masa kammal a hihi.

Sittelna

            Galkap pawlkhat ten Sudan khanglam aa tengte a thusit laitak mah in, a makai pa in kei leh Earley thu hong sit aa, “Kua na hi uh hiam? Banghangin hih lai ah hong pai na hi uh hiam? Banghangin maanzaih na hi uh hiam? Tadensa at te na hi uh hiam? Thauhkhansa letmat na keng uh hiam?!” ci-in hong dong baba uh hi.

            Ko zong General Conference pan hong piak Pasian’ nasepna letmat ka lak uh hi. Makaipa in ka letmat uh sabuai tungah paai in,  “Hih ten kimanna nei kei! Na passport uh hong lak”, ci-in hong haan gawp hi.

            Ka passport uh ka lak uh hi. Ko hong thusitna inndei a zom ah thau tawh mi akaplum galkap nihte a lut lam ka mu hi. “Hong kaplum ding a hi tam maw?” ci-in ka dip uh kua litlit hi. “Topa, na nasem pa hing”ci-in ka lungsim tawng vuah Topa khut sung ah ka ki-ap uhhi.

            Thakhat in, “Topa, nang aa hi ing” ci-in thu ka ngen hi. Tua khit phet Pasian in hong om pih taktak hi cih khamuanna ka nei a, ka si zong in, ka hing zongin a piang bangbang Topa’ deihna hi ka ci thei ta hi.

            Tua leh Pasian in “Tua makai pa thu nget sak in” ci-in  hong huau hi.

            “Aw leh, Topa, bangci thunget ding hong hilh in,” ci-in daaitak in ka dawng hi.

            Topa Pasian in, “Amah Thumaan na gen kei leh, kuan gen nawn ding?” ci-in hong huau kik hi.

            “Hi mah veen! “Tu in makaipa tung Thumaan gen kei leng, banghun ciangin ama’n Thumaan za thei mawk mah ding hiam?” ci-in ka ngaihsun hi.

            Ka kim ka paam ka en kawikawi hi. Hih makaipa leh a galkapte nuntakna in, mi tawh kitawng in mi thahna tawh kidim!  Hehpih huai zen si e maw. Tu in Thumaan ka gen kei leh amaute aa dingin bangmah lametna om nawn thei peuhmah lo ding hi ven? ka kici hi.  “Aw leh, Topa, ka gen dan ding hong hilh in” ci-in thu ka ngen kik hi.

“Hih thu hoih hi”

            Mi piak ding letsong te leh laihawm  (“Ih Leitungah Khuavak Taangsak” - aang ipa aa guan theih) te ka thongip sungah ka puak lam ka phawk hi.  Nawhsa takin  Adventist Mission ballpen 5 leh “Suahtak na a bei ciangin” cih laihawmte 5 te ka khut ah ka tawi hi.

            Tua khit ciangin lamdang takin galkap ten ka phone uh  hong pia kik hi. Ka phone sang dingin ka dintoh ciangin  ballpen 5 makaipa sabuai tungah ka koih hi.

            “Aw! Hih thu hoih hi,” hong ci hi. “Suahtakna a bei ciang” cih laihawm ka piak kawm in,  “Hih lai hawmte sim nuam ding hi teh. Ahangin, a sawt lo aa hong piang ding thute hong gen ding hi” ci-in nuihmai kawm in ka gen hi.

            Makaipa in ka laihawm piak hong sang hi. Tua khit ciangin, “Bupa aw, thu kong nget sak ding hiam? ci-in ka dong hi.           “Aw, hong ngetsak o leh” ci-in hong dawng hi. “Na min bang eita?” ci-in ka dong a, “Wilson hi” ci-in hong dawng kik hi.

            Kei zong Wilson aa ding, a innkuanpih aading, a galkapte leh a innkuanpihte aading leh a gam uhah sawt lo a gamnopna a om nadingin  thu ka nget sak hi.

            Thu ka nget sak khit ciangin limtak in khitui luang kawmsa in ka khut hong len hi. Suakta tak in ka pai khia thei ta uh hi.

            “Hih a leitung nuntakna a hu nuamte in a nuntakna bulpi nangawn tawh suplawh ding a, keima hangin hih a leitung nuntakna a suplawhte in a nuntakna bulpi huzo ding hi.” (Matt. 16:25).

Ciapteh ding thute;

1.  Susan khanglam gam pen 2011 in a kiphut hi a,   leitung ah a moi bel gam khat a hihi.

2.  2011 kum pan mah in, gal kidona tampi phukha hi..

3.  Sudan khanglam gam pen Africa ah kampau nam a tampenna gam khat zong a hihi. A za aa sim in kampau a zang minam tuamtuam om hi.

4.  Sudan khanglam gam ah Khristiante a tam pen a hihi.