SINNA 01 - LAISIANGTHO, PASIAN' THUBU

Thupatna - Lai Siangtho in leitunga a khang hampen laibu a hihi. Kam nam tul valin kikhen khia-a, laibu dang dangte' sangin bu tam kilei zaw a hih manin, a khang moipen leh a kisimpen laibu zong a hihi. Tu ma kum tul tampi lai mah bangin tu hunin zong mi awn tampite in amau' nuntakna sangin Lai Siangtho it zaw uh hi. Bang hangin tua zahta-in kideih hiam?

Thukhun Lui leh Thukhun Thak ci-in Lai Siangtho khenpi nih kisuah hi. A nihin a manphatna kikim hi. Thukhun Thak pen Thukhun Lui sangin kum 400 phial zekai zaw hi. Lai Siangtho sungah a bu tuamtuam 66 oma, mi 40 khawng in kum 1600 sung bang a gelh uh a hihi. Kimkhatte kamsang, kimkhatte kumpi, kikhatte ngabeng, kimkhatte vaihawm ulian, kimkhatte siampi, cih khawng a hi uh hi. Amaute a kampau uh a tuam ciat, a tenna mun uh a tuam ciat, a lai gelh hun uh a tuam ciat hi napi-in, a thute a ki-elpuak om lo-in kithuhual kim a hih manin, Laibu khat takpi suak thei hi.
A thu a tom lua laibu tawm khat longal, Lai Siangtho bu khempeuh phial a phung leh a taangin kikhen hi. Tua in ih deihna mun ih zonna ding ol sak tuam hi. A masa-in a bu min, tua ciangin a phung, tua ciangin a taang in hong zui hi. Lai Siangtho bupi a kipatna lama a kigual suk a bu neuneute' min phanin ih sim nop laibu kizong thei hi.

1. Pasian in mite' kiangah A thu koici puak hiam? Amos 3:7. Theih ding: Lai Siangtho sung buppi ah, "Topa'n ci hi," "Topa in hih bangin ci hi," "Topa' kammal ka kiang hong tung hi," cih kammalte tamveipi tak kimu hi.

2. Kamsangte in mai lam thupiang dingte koici theih uh hiam? 2 Timothy 3:16 & 2 Peter 1:21. Theih ding: Mai lam thupiang ding a hi bang liana a gen kholh theihna in Lai Siangtho a maanna sittelna lianpen a hihi. Hih pen mihing' hih theih hi vet lo-a, Pasian bek in a hih theih a hi hi. Kamsang kimkhatte in Pasian' hopihna awging za uha, kimkhatte in mangmuhna panin Pasian' thupuak ngah uh hi.

3. Kamsangte' laigelhte bang kici hiam? Rome 16:26 Theih ding: Kamsangte' laigelhte Pasian' kiang pana hong pai thu siangtho a hih manin Lai Siangtho kici hi.

4. Mite' kianga Pasian' thupuakte bang kici lai hiam? 1 Thesalonika 2:13. Theih ding: Lai Siangtho sunga a kigelh thute pen Pasian' makaihna banga kamsangte in a gelh Pasian' kammal a hihi.

5. Bang deihna tawh Lai Siangtho hong kipia hiam? Rome 15:4. Theih ding: Thutheihna leh lametna ih neih ding hong deihsakna-in Pasian in Lai Siangtho a hong pia a hihi. Khang khat sunga ding beka A piak hi lo-in a khang a khanga mi khempeuh' a ding a hihi.

6. Ei' a dingin Lai Siangtho a kimanna bang hiam? 2 Timothy 3:16,17. Theih ding: Lai Siangtho in (a) thumaan thutak ih mai-ah hong lui hi, (b) ih khialhnate hong lak hi, (c) ih khialhnate ih kipuah phatna ding dan hong gen hi, (d) picinna dong ih kalsuan dan ding hong hilh hi.

7. Pasian' kammal a omzia koi bang hiam? Hebrew 4:12. Theih ding: Pasian in mite' lungsim leh a kitangsapna uh thei khin a hih manin, mihing khempeuhte' kitangsapna a hutna dingin A Thubu a hong pia a hihi. Tua Thubu in a sia leh a pha, a maan leh a khial khentelna, nuntakziate kikhel sak zo hi.

8. Pasian' kammal bang tanvei kip ding hiam? Isaiah 40:8, Matthew 24:35. Theih ding: Lopa vul a, paak pulh hi; ahih hangin i Pasian thu kho tawntung ding hi. Van leh lei a mangthang ding hi; ka thu ahih leh a mangthang ngei kei ding hi.

9. Lai Siangtho sim dan ding koi bang hiam? Isaiah 28:9,10 Theih ding: Ruby suangte diamon suangte a hoih leh a hoih lo theihna dingin a kiukiu panin langlianmit ( ) tawh et kawikawi a kul mah bangin, thu khat peuh tawh kisai-in Lai Siangtho' hong hilhna ih theihna dingin, Lai Siangtho gelhte in bang gen uh cih mun khat leh mun khat ih etkak kawikawi ding kisam hi. Tua teng ih khuituah khit ciangin ih theih nop thu kitel thei pan hi.

10. Phattuamna ih ngahna dingin Lai Siangtho koici sim ding ih hiam? Sawltakte 17:11. Theih ding: Ih pumpi in tha a neihna dingin nisimin an nek a kul mah bangin, ih nuntakna sungah Pasian in mun hoih a ngahna dingin, nisimin Lai Siangtho ih sim ding kisam hi.

11. Nuntak kalsuanna ah Pasian in Ama kammal, ei' a dingin bang hih sak nuam hiam? Phatna La 111:105 Theih ding: Hih leitung kha lam khawmial sungah nuamtaka ih kalsuan theihna dingin, Pasian' kammal in ih lampi hong taang sak hi.

12. Limtaka Lai Siangtho simna in bang phattuamna hong pia ding hiam? 2 Timothy 3:15, 2 Timothy 2:15.

Thukhupna: Leitung buppi-a mi tampi takte' nuntakna sungah Lai Siangtho in mun golpi tak la hi. Bang hang hiam cih leh amaute in Lai Siangtho pen Pasian' kammal a hih lam tel uh hi. Lai Siangtho hong pianna dingin Pasian mahmah in a sep khiat mah bangin, kum za tampi langpanna sung tawntungah Pasian in kem gige hi. Lungsim takpi tawh a sim mi khempeuhte' nuntakna sungah Lai Siangtho in, siatna a zawhna ding uh vangliatna laka, thuthukpite thei khia saka, lungkhamna meii kaai lakah lametna guan hi.
Tua a lamdang vangliatna na ngahna dingin Lai Siangtho maanmaanin sim lo ding na hiam?