Sabbath 13na Hungeelna (Mission Story)

13th Sabbath of 3rd Quarter, 2016

Sabbath 13na Hungeelna

1.      Kipatna la:                   “Khazih Galkap ten Gal Sim Ding Kuan Un”

2.      Mipi muakna:                Sabbath School Chairman

3.      Kipatna thungetna:    

4.      Thuthang genna:          “A Gi Hetlo Dawipi”

5.      Tawpna la:                   “Galdona Awng Un”

6.      Tawpna thungetna

Mission thuthang genna ah a kihel ding te: Thuthang gen ding mi 2 leh lai sim ding nungak khat.

Zat ding vante: Laan (Lai tawh bawl tawm thei)  Rwanda leh Sudan khanglam cih laimal te a kilang mahmah dingin a gol theithei in at ding.

Thugen (1)na:      Tu kuata thumna ah Nisuahna- a laizang lam Africa Division pan in adiak in Sudan khanglam gam leh Rwanda gam pan a dipkuat huai leh a lawphuai thute ih za khin hi. Topa Pasian in haksat lauhuaina pan a huhna ih tel hi. Tuni in Sudan khanglam gam panin thuthang khat za ding hi hang. “Leitung bup zel aa Thumaan tangko” Pasian’ nasem khat tung panin “A Gilo Mahmah Dawipi” cih thu a hihi.

Thugen (2)na:      “Leitung bup zel aa Thumaan tangko” Pasian’ nasem siapa pen pawlpi khat pan a kiteel pawlpi mi khat a hihi. Amah in khasum tawm bek ngah in lungdamna thu a sepna mun ah tang ko hi. Amah in mun thak aa om mi thakte kiangah kingiamkhiat takin nasep kipan hi. Mite tawh kilawm bawl in, leite bawlkhawm uh a, kum nga bang tua bangin Pasian’ na sem hi.

Thugen (1)na:      Tu in “Leitung bup zel aa Thumaan tangko” Pasian’ nasem Ajak Bol Ayuel thu kong gen ding hi. Ama’ sepna mun pen a pianna khua kiim Nile gun ii a khunglam a hihi. Sudan khanglam gam ii nisuahna leh a saklam a hihi. 2015 kum pan in nasep kipan hi.

Thugen (2)na:      Ajak Bol Ayuel pen Adventist pawlpi lian pan hi lo hi.  Saklam mun khempeuh ah gal kidona a om ciangin pawlpi mite tampi gal tai uh hi. Ahi zongin Ajak innkuan in pawlpi mi (10) tawh Pasian’ nasepna zom uh hi. Khua dang pan in zong pawlpi mi hong kibehap a, innkuan a hoih khop khat Ajak in Lai Siangtho sin pih thei hi.

Lai sim pa:           Dawi gilo khat ka vengte a hi, numei sungah lut in hong awng zakzak hi. Tua numei a inn pan ko inn ah hong pai in kei hong muh ciangin, “Hih pa en thei keng, hih pa en thei keng”, ci-in awng keka hi. A awt kawm in UPC biakinn lam zuan in tai khia hi. UPC biakinn ah lut in sual tungah kihual gawp in a tha neihzah in awng hi. Mipi hong pai in, uum huan in mancip uh a hihman in taai thei nawn lo hi.  Ama’ kiang ka va pai hong muh ciangin, ‘Hih pa hih lai aa a om deih vet keng” ci-in awng gawp hi. Thu nget sak dingin ka kithawi aa,  a maitang puak suuk semsem a hih man in tawm khat ka nung kik hi.

                              Bangbang a hita zongin hih numei dawi gilo khut sung pan a suahtak nadingin thu nget loh phamawh hi. Kei zong numei kiang ka naih kik a, Dawi gilo khut sungpan Topa Pasian in numei suakta sak ding hi cih upna lianpi tawh thu ka nget sak hi. Ka thunget sung in Dawi gilo in numei khah khia in numei sungpan pai khia ta hi. Numei zong hong hak in khuadak kawikawi a, “Kei koi bangin hih lai ah tung thei ka hiam?” ci-in hong dong hi.

                              Ama’ pianzia hong theih ciangin Pasian’ tungah numei in lungdam ko hi. Inn ah ka ciah kawm un, “Nang hong mancip Dawi gilo khut sung pan Pasian in hong suakta sak hi. Thu nget den ding kisam hi. Tua ciang bekin dawi hong lut kik thei nawn lo ding hi” ci-in tha ka pia hi.

Thugen (1)na:      Tu in tua numei Ajak in Lai Siangtho thu sinpih a, dawi gilo a lut kik nawn loh manin tua numei zong lungnuam mahmah hi. A sawt lo in tui kiphum ding hi.

Thugen (2)na:      Tu kuata sung in ih zak sa bangin Sudan khanglam gam ah a nasia galkidona om hi. Bang bang hitase leh pawlpi khangto hi. Juba khuapi kiim aa teeng te’n radio pan kikhah khia thu leh la ten a ngai uh hi. Pawlkhatte thugenna phual ah thugen hong ngai uh hi.  Adventist thu tangkona pan Pasian’ thumaan a na kan zong om uhhi. Lawmte kiang pan beh leh phung te kiang dongah Thumaan kizeel kawikawi hi.

Thugen (1)na:      Sudan khanglam gam aa om Adventist pawlpite in kikhop nading biakinn leh innte nei zo nai lo uhhi. Khuahun a hoih ciangin hungeelna bang Singliim nuai ah kikhawm in Pasian bia uh hi. Khua hun a hoih loh ciangin hungeelna phiat in biakpiakna nei thei nawn lo uh hi.

Thugen (2)na:      Tu kuata sung aa kingah sumpi pen khangno te kha lam khantoh nadinga a kizang ding innte lam nadingin kizang ding hi. “Tuu kulh” ci-in tua innte min kivawh ding a, tua innte sungah thusinna, la sinna, kikhopna cih bangin hun tuamtuaam kibawl ding hi. Tua innte in khangnote aa dingin khua hun a hoih lo hang in zong tatsat lo in khangnote kha lam leh taksa lam ah a khantoh nading mun hong suak ding hi.

Thugen (1)na:      Tu kuata sumpi khen khat pen Africa a laizang lam gam aa om Adventist sangpi (University) te ah ki zang ding a, Kigali leh Rwanda gamte ah zong kizang ding hi.

Thugen (2)na:      Tu kuata sung aa ih zaksa thu om mahbangin tualgal hangin vut leh vai a suak Rwanda gam in hong khuasa kik a hih hangin Pasian’ hehpihna tawh hong naak kik thei uh hi.

Thugen (1)na:      Nisuahna-A laizang lam Africa Division sung aa om Kigali zatuilam sinna sangpi ah zatuilam pilna bek hi loin, zatui tawh lawhcing muibun taka nasep theih nadingin kihilh hi. Topa Zeisu tawh mi cina bawl khopna, lungsim pumpi leh kha lam thu thum gawmkhawm in thu kihilh hi.

Thugen (2)na:      Africa nisuahna- alaizang lam gam pan sangnaupangte om nading leh anhuan buuk leh anneek nading inn kilam ding a,  tua aa dingin kuata thumna sumpi khen khat kizang ding hi.

Lai sim pa:           Tuni aa phalna tak tawh nong piak uh sumpi pen Sudan khanglam gam leh Rwanda gam aa om sangnaupangte aadingin inn kilam ding hi. Tuni aa phal tak a, na piak khiat uh sumpi in kha mang thang tampi honkhia ding hi ci in um un. Note khat ciat tungah Topa Pasian in thupha tampi hong pia ta hen. Amen!