“Mithatte kiangah Thugenna – Khen 2na” (Mission Story)

8th Sabbath of 3rd Quarter, 2016

August 20, 2016                                                                                           Rwanda

                                                                                                                      

“Mithatte kiangah Thugenna – Khen 2na”

(A gen:  Phodidas Nadamugabe)

           

            Amasa pen in amau tungah lungdam ka ko hi.  “Na thah uh misipa aadingin thu na nget sak uh lungdam ing. Bangbang ih ci ta zongin Lai Siangtho in bang gen cih na theih ding uh kisam hi. Gupkhiatna na ngah theih ding uh hun pen tu aa na nuntak sung bek uh a hihi. Sih khit ciang hi pan lo hi. Thuhilhna 9:5 sungah, “A nungta laite in a sih ding uh thei a, a hih hangin a si khin te in bangmah thei lo hi.” Kei hong suakta sak un ci-in kong thuum kei ding hi. Banghanghiam cih leh kei nong thah uh hangin ka thawh kik ni ciang ka tho kik ding hi,” ci-in thu ka gen hi.

            “Na thahte uh Hutu a hih keileh Tutsis minam hi lo hi. Amau pen Pasian’ tate a hi uh hi. No pen minam khat leh khat gal kido in na kingaihsun uh a, na khial uh hi. Hih gal kidona pen Zeisu Khazih leh Satan kikal kidona a hihi. Na thah te uh Tutsis minam in na ngaihsut uh hangin amau pen Pasian’ tate hi uh a, Topa Zeisu tungah a lungtang uh a pia te a hi uh hi” ci-in ka gen hi.

            Tua khitciangin 1 Peter 2:9-10 sung ka sim beh a: “Ahi zongin note pen Pasian in a hong teelkhiat minam, Kumpi siampi pawl, a siangtho minam, Pasian' mite na hi uh a, khuamial sung panin a lamdang mahmah ama khuavak sungah a hong samkhiapa' nasepna a lamdangte a genkhia dingin Pasian in a hong teel mite na hi uh hi.  Nidangin Pasian' mi na hihloh uh hangin tu-in ama mi na hi uh a, nidangin Pasian' hehpihna na theihloh uh hangin tu-in ama hehpihna na ngah uh hi.”

            Thu ka gen kawm in ka khuadak a, a kap pawlkhat ka muh ciangin Kha Siangtho in a lungsim uh lawng a hih lam ka thei hi. Minute 15 pan 20 sung thu ka gen khitciangin  amau tungah, “Tawpna thungetna kong nei ding a, tua khit ciangin ka haankhuk ding a dang ka to ding hi” ka ci hi.

            Thungetna ka man khin phetin,  “Hih siapa a that peuhmah siapa’ sisan gu a thatte tung tung ta hen” ci-in mi pawlkhat awng uh hi.

            “Amah thah het lo ding hi hang!” ci-in pawlkhat in zong na thukim uh hi. A dang pawlkhat leuleu in, “Suakta takin ciah sak un! Siapa that het lo ding hi hang” ci ngeingai uh hi.

            Tua khitciangin, “Hih siapa etlawm lo tak aa thah ding a geel keimah ka hihi. Tu in ahih leh amah that lo ding hi hang” ci-in a makai pipa un hong taangko hi.  

            Pasian’ hong hehpihna hang bekin sihna ding pan a suakta ka hih lam ka thei hi. Kei leltak kua ka hihiam?  Bangmah hihtzawhna nei keng. Topa Pasian hoih lua hi.

Kamciam

            1994 kum, April 7 pan July kha lang dong kidona tualgal sung ah,  ka innkuan buppi te tawh kigawm in mi awn khat bang kithat hi. Sih theih nading ka tuah zel hangin Topa Pasian in sihna pan in hong honkhia tawntung hi.

            “Hih tualgal sung panin ka suahtak peuhmah leh ka khua vuah ciah kik in ka innkuanpih hong thah sak te kiangah nong hotkhiatna thu ka gen ding hi” ci-in Pasian tungah kiciamna ka bawl hi.  Tualgal ven ciangin Kigali khuapi aa om pawlpi lianpen khat ah pawlpi kep tavuan hong kipia hi. Khuapi sungah Pasian’ thugenna mun 42 ah bawl ka hih manin ka manlah mahmah hi.  Bangbang hitaleh, Pasian tungah ka kamciam om bangin inn ka ciah ding a hihi. Topa Pasian in “Pai in” hong ci a hihmanin ka inn uah ka ciah a, lungdamna thu ka tangko leh kha thak 120 tui hong kiphum pah uh hi.

Gentheina Om Lo Nuntakna

            “Bangteng kantan in  genthei het lo in bangci nuntak theih na hiam? ci-in pawlkhat te’n hong dong kha ding hi. Pasian pen hoih takpi mah hi. Mi tampi takin tualgal sung in a u a naute tampi suplawh uh hi.  Ahizongin atha ngah huai thu khat pen Topa Pasian in Amah a it te kemcing in thupha pia hi. Topa tawh kizop zia ka theih khak pen hampha kisa mahmah ing.  Pasian’ kammal sim ding thupi mahmah hi, banghanghiam cih leh thusia hong pai ciangin thuakzawhna hong guan ding hi. Tua in thunget zia ding hong hilh a, Pasian in thungetna hong ngai hi cih zong hong thei sak hi. Kei leh kei nangawn ka kiphawk nawn kei a, buaina zong ka nein awn kei hi. Pasian in hong kemcing a, midangte haksatna a huh zo ding in zong hong huh hi.

Tualgal pan Mabaan Thak

            2000 kum in, Philippines gam aa om to study Adventist International Institute of Advanced Studies (AIIAS) ah pilna zom dingin Phodidas va pai a, tua sangpi pan in 2006 kum in Ph.D ngah hi.

            Tuni in, Dr. Phodidas Nadamugabe pen Africa Laizang ah a om Kigali khuapi sung Adventist University (AUCA)  ah Philosophy of Science leh Biakna, Lai Siangtho thu bulpite leh Greek lai te hilh hi.    Tu kuata 13na sumpi pawlkhat pen zatui lam tawh kisai sang thak lam nadingin kizang ding hi. Tua sumpi pen sangnaupangte lup nading bawda leh an neek nading inn lam nadingin kizang ding hi.

            “Cidamna lam tawh Pasian’ nasepna pen thupi mahmah hi,” Dr. Phodidas in ci hi. “Sangnaupang te’n hih sangpi ah cinate tungah Pasian’ na a sep theih nading uh sin ding uh hi. Tua bangin cinate omna mun ah Pasian min thang sak thei in, cinate tawh thu ngen khawm thei ding uh hi. Amaute’n cinate tungah Topa Zeisu thu hilh thei ding uh a, tawntung nuntakna zong Gumpa a upna hang un ngah thei ding a hihna zong hilh thei ding uh hi” ci-in genbeh hi.