“Mithatte kiangah Thugenna – Khen 1na” (Mission News)

August 13, 2016                        

7th Sabbath of 3rd Quarter, 2016

                                                                   Rwanda

                                                                                                                      

“Mithatte kiangah Thugenna – Khen 1na”

(A gen:  Phodidas Nadamugabe)

           

            Phodidas min a khiatna pen “Topa ka bia hi” cihna hi. Phodidas Nadamugabe pen Rwanda gam mual-dung ah a teeng Seventh-day Adventist innkuan sung pan piang hi. A kummoi lai-in Phodidas in makaih theihna nei in Pasian’ Kammal tawh kituak in a ki-ap khat ahihi. A sangkahna, Pathfinder leh AY lam ah zong a kizang thei mahmah khangno khat a hihi. A lawmte lakah aman kha lam tha hat nadingin makai sem in, sang ah zong nisim in zingsang biakpiakna ah Pasian’ thu tawh hansuah hi.

            Kumsim in a sim den a Lai Siangtho pen a thupi munte ciaptehna tuamtuam leh a nuai kigitna tawh kidim lialua hi. Tua bang a limtak a sim a, ciaptehna tuamtuam a bawlna in 1994 kum in a lauhuai khia mahmah minam bei nading a, amah nangawn a that ding mithat te kiangah Pasian’ thu a gentheih nadingin a nuntak a honkhia ding Lai Siangtho a hih lam thei kha lo hi. Hih hun sung in Phodidas tung ah a piang thute ama’ kam pan mah in ngai dih ni.

Ka Haankhuk Ding Ka Tawh Laitakin

            “Kei hong thah ma-un, mithat te’n ka hankhuk ding hong to sak uh hi. Kei zong ka hankhuk ding ka tawh laitakin thu ka ngen hi. ‘Topa aw, hih mithatte thah nading panin hong hon khia thei lua teh. Humpi nelkai kua sung pan Daniel na hotkhiatna leh Shadrach, Meshach leh Abednego te meilipi sungpan na hotkhiatna thu ka hilh hi. Ka Pasian aw, tua Daniel’ Pasian mah na hi lai hiam?  Tu in Daniel, Shadrach, Meshach leh Abednego te upna kei sungah hong guan in’ ci-in thu ka ngen hi.”

            Topa Pasian in ka len theih nadingin kha hong pia ding, a hih keileh van pan meikuang tawh mithatte hong thah sak ding ka lamen hi. Ahi zongin Topa Pasian in kei lametna tawh a kilamdang in ka thungetna hong dawng hi.

            Ka hankhuk ding ka tawh laitak mahin, mithatte khat in ka Lai Siangtho la in veel hi. Ka ciaptehna te a muh ciangin, ‘Laitui meel tuamtuam tawh na ciaptehna te bang na deihna hiam’ ci-in hong dong hi.

            “Tuate hoih ka sak munte hi” ci-in ka dawng kik hi.

            Ama’n zong lawptakin meeltuamtuam tawh ka ciaptehte sim pah hi.  “Hih munte na sim khin takpi hiam? ci-in um pha lopi in hong dong hi..

            “Sim takpi mah ing” ci-in dawng kik ing.  Mithatpa maitang ah kei hehpihuai hong sakna ka mu thei hi.            Amah a lawm mithatte lamah kihei in, “Lawmte aw, hih pa ih thah ding ka thei hi. Ahizongin hehpihna tawh a haankhuk tawh kei hong huh sak un” ci-in thuum hi.

            A makai pa in thu a piak ciangin hankhuk ah hong tuak suk in hong tawh pih hi. “Topa, hankhuk tawh a kizo ding hi ta! Nang bang hih ding na hiam?” ci-in ka lungsim ah thu ka ngen hi.

Topa Pasian in Geelna Khat Nei Gige

            Topa Pasian in geelna khat nei gige a, ahi zongin eite’n khatveivei Amah ih muan ding sangsik in a hoihpen ding aa ih ngaihsut ih thungetna hong dawng dingin ih Pasian ih tawsawn thei zel hi.

            Lamdang ka sak in, hankhuk tawh ka zawh phet un kei hong huhpa in a lawmte kiangah, “Banghangin ih theih ngei loh hih pa thah nadingin hih hankhuk zang laizang ding ih hiam? Mawtaw lamziikpi gei lam ah ama’ hnakhuk ding to sak ni. Hih mun pen ih huang hi. Banghangin hih lai ah amah phum laizang ding ih hiam? ci-in gen hi.

A lawmte zong thukim uh a, kei tawh hankhuk ah denmah a a thah uh midang khat phum dingin khensat uh hi. Mithatte khat in, “Hih ih thah pa ih phum ma in thu nget sak lo ding ih hiam?” ci-in thu tuampi khat vai hawm hi.

            Dendeuh a, a thah uh misipa luang kiim ah hong ki-uum in, “Mary, Topa Zeisu’ nu aw, ama’ kha na sang in,” ci-in thu ngen  uhhi. Kei kiphum nadingin hong tawh sak hankhuk sungah amah phum uh hi.

            Ka ngaihsutna khempeuh thakhat in hong kikheel hi! “Topa, Nang kua na hiam cih ka gen ma in hih mithatte tawh hong kikhen sak ken maw!  Amaute’n Nangma’ thu za ngei lo uh hi. Amaute’n a thah uh misite aa ding thu nget sak dingin kingaih sun uh hi. Ih theih sak ding ih (tavuan) mawhpuak a hihi.  Amaute kiang ah ka pai ngei kei a, Nangma’ thumaan ka hilh ngei kei hi” ci-in thu ka ngen hi.

            Misi pa a phum khit phet in, mawtaw lam zikpi lam ah ka pai uh hi. Kei haankhuk thak to ding ka kipat ciangin k alai Siangtho la pa’n ka tang thei ding hiam ci-in hong dong hi.I was about to dig another grave when the man who had my Bible asked if he could keep it. “Tang thei mah teh” ci-in ka dawng a, ahizongin, a lawm mithatte khat in, “Tangh thei lo ve! Ko aa hi – na deih leh a man ding na piak kul ding hi” ci-in heh dawn hi.

            Kha Siangtho in ka Lai Siangtho la pa’ lungsim lawn sak khin hi cih thei ka hih manin, “Hehpihna tawh hankhuk dang ka tawh ma in tua Lai Siangtho sung pan in thu tawm kong gen thei ding hiam” ci-in ka thuum hi.

            Tua pa zong lawp in, “Hong gen o leh!” hong ci a, a dang khat hong awng in, “Hi thei lo hi. Amah ih galpa hi. Ama’n ei hong gen ding bangmah om kei” ci hi.

            Ken thu gen ding maw, gen thei lo ding cih amau lak ah kinialna nasia semsem hi. Khat leh khat a kilai ding dinmun hong tungta uh hi. Amauteng lak ah a haampen pa in, “Na theih ngei loh uh hi pa hangin banghangin kilai ding na hi uh hiam? A ngai nuam te’n tuu hithiat in ngai un. A ngai nuam lo te’n tu hithiat in na bil uh hum un. A gen nop teng a gen khitciang that ni” ci-in hong hang buabua hi.

            Mithatte zong hong tu dimdiam in, kei zong thugen ka kipan hi.

******Mai Sabbath ah a zom gen ding*****