“A Kimaisak Theilo Ding Mawhna Maisak – Khen 1na” (Mission Story)

9th Sabbath of 3rd Quarter, 2016

August 27, 2016                                                                                            Rwanda

                                                                                                                      

“A Kimaisak Theilo Ding Mawhna Maisak – Khen 1na”

(A gen:  Pastor Isaac Nawanyi)

            

Buaina Lianpi Khat

            Buaina lianpi khat ka nei uh hi. Rwandan te lungnuam takin a gam vuah teeng khawm uh a, ahi zongin 1994 kum in ka vengte un ko tung heh in hong that mawk uh hi. Dawi gilote hih leitung ah a om takpi a hihi.

            Tua hun lai in Rwanda Khanglam Munthak kicihna mun ah laibu hawmkhiatna department ah director makaipi ka sem hi. Kibuye aa kici gam aa om mission huang sungah zumpi, biakinn, sang, siate omna innte leh Mugonero Zatopi te kilam khawm hi.

            1994 kum, April 6 ni-in Kigali khaupi sung aa om Rwanda Union Mission zum ah laibu hawmkhiatna lam meeting ka nei uh hi. Tua zan mah in Rwanda gam President pa a vanleng tawh kikap lum hi. Tua hun pan in tualgal kipan ta hi. A zingciangin The next day, Mugonero zatopi ah na a sem sia khat in hongs am a, a tapa kum 14 a pha Paul pen kithah sak a hih manin ka zi leh ka ta dangte tawh biakinn ah hong buk kul ding a hihna thu hong gen hi.

            Pawlpi huang sungah mun muanhuai hi ci-in kigen a hih manin mi tampi in huang sung hong beel uh hi.  Pastorte leh a innkuanpihte, pawlpi mite, a vek un huang sungah biak inn sung muan huai pen sa in om khawm ngeingai uh hi.

Mithatte Hong Pai

            Sabbath ni, April 16ni -in, mithatte hong pai ta—mission president mahmah in a tapa tawh, zatopi a sem siavuan khat tawh  huang sungah hong pai khawm uh hi.

            Hi thei peuhmah ding maw? Ka pa, pastor khat hi a, ka neu lai in president tawh na sem khawm uh hi. Kei zong hih president tawh na a sem khawm ngei hi veng! Ama’ lungtang sungah bang ngaihsutna nei hi ding hiam cih ngaihsun thei het keng.

            Kei hong dah sak mahmah thu pen biakinn sungah a bu pastor te leh ka zi leh ka tate in mission president tungah, “Mithat te ko hong that dingin hong pia lam ka thei uh hi. Congo bual ah gunkuang tuang in ka suahtak theih nading uh hong huh tapeuh in” ci-in lai khak uh hi. Biakinn sung pan amaute hong pai khia thei lo ahihmanin tua laikhak Amaute a cing galkap khat in lak sak hi. Dah huai lua! Pasian bek in hong huh thei ding hi ci-in president in thuk kik hi.

            Amaute a that dingin gamsung mun khempeuh panin hong pai zen uhhi. Mithatte lakah Adventist pawl khat kihel hi. Mi a thah theih nadingun thau leh tem tawh hong kuan uhhi.

Biakinn Sungah

            A kithat dingte in biakinn sungah  Pasian bia uhhi.  Pastor pa in Pasian’ thu a gen laitak mahin mithat-te’n amah kap lum masa in a dangteng zong a banban in kaplum hi. Ka zi leh a tate huhna ngen dingin president inn ah vatai a, ahihhangin na nungngat san hi. Adangte zong a suahtaak nadingun zatopi lamah a tai hangin thau tawh a napang te-in na man uh hi. Mission huang sungah kithahna ni tampi sung kizom hi. A sun a zan in kuamah a taikhiat loh nadingin mithatte’n vil thapaai uh hi. Sawl kawm ah a bute nangawn ui tawh zong tazen uhhi.

            Ka innkuanpihte, pastorte leh a innkuanpihte’n amaute a kithah ma, a ni nunung pen un Lai Siangtho sin khawm uh a, tua in ka tha hong khauh sak hi. Hih bang buaina hun ciangin pawlpi mite khat leh khat mawhna kimaisak in, thu ngen khawm uhhi.  Tua in mailam ka nuntak sung aadingin thakhauhna hong guan hi, banghanghiam cihleh Topa Zeisu hong pai kik ciangin mu kik ning cih ka tel hi. Topa Zeisu sungah a ihmu hi a, ni khat ni ciangin hong tho kik ding hi cih thei ka hihmanin hih kithahna hangin Pasian ka mawhsak kei hi.

Galtaina Phual Khat Ah

            Hih kithahnate hangin inn ka ciah thei kei hi. Kigali khua pan in kei leh midangte thah dingin hong kizong hi a, kumpi langpang galkapte’n hong honkhia in, galtaina phualpi ah hong kha uhhi.

            Tua mun ka tun ciangin kei tawh Pasian hong omkhawm bek lo-in hong huh kinken hi. Friday nitak khat, ka giahphual uh tawh a kinaai khuapi lam ah ka vak leh a lian RC biakinn khat mu ing. Tua biakinn sungah biakpiakna bawl in thu ngen leeng, buaina a om ding hiam ci-in mi pawlkhat dong ing. Buaina om kei hong ci uh ahihmanin giah phual ah kilehkik in Sabbatt ni ciangin a kikhawm dingin galtaite sam ing.

            Giahphual ah kei bek pastor ka hihmanin thusia lasia ka ngaihsut ding hun om peuhmah lo hi. Thupha bawlna tawh ih manlah ciangin ih tungah a piang thusia lasia te hong mangngiIh sak hi cih thu ka thei hi. Tua pen Topa hong piak ka thakhauhna hi.

Mai Sabbath ciangin zom kik ni.