“Ka Khan Sungah A Thupi Pen” (Mission Story)

6th Sabbath of 3rd Quarter, 2016

August 6, 2016                                                                                  Sudan Khanglam                                                                                                           

“Ka Khan Sungah A Thupi Pen”

(A gen:  Maureen Edward)

 “Kei mi sia hi saam keng,” ci-in Juba khuapi aa teeng Maureen Edward in gen hi. “Lungdam bawl hun lo buang Lai Siangtho sim keng.”  “Ahi zongin ‘94.0 Gupkhiatna FM’ ka muh khitciangin  Lai Siangtho sim lo in  nisial in vai ka hawm thei kei” ci-in gen beh hi.

            A masa in 2012 kum pan in radio ah tumtheih gingte leh la zaknopte hong mu khia hi. Tua khitciangin ‘Radio Hope’ a kici geelna khat hong za hi. ‘Radio Hope’ cih a khiatna bang hiam?” ci-in lamdang sa hi. A ni dang khat ciangin Radio Hope geelna “Pasian’ Kammal” cih thu ngaih ding hong kipan hi. A zak late leh thu hilhna te in a lungsim sukha a, radio tawh thugenna ah a makaite tawh kihona nei hi. Amah in radio thugen na pan in Pasian thu bangci sinbeh thei ding a, a sin a theih thute bangci genkhia sawn thei ding cih radio lam makaite tungah dong hi.

            Maureen  in, “Radio 94.0 ka ngai den a, ka ni khat sungah a thupi pen a hihi,” ci hi. “Lametna Sabbath School” leh “Tuni aa ding Topa Kammal” hih thu nihte Maureen in deih phadiak hi.

            Ni khat, radio tawh thugenna a bawlpa in radio thugenna phual lungdam kohna ah a hong pai dingin Maureen sam uh hi.

A Tumdang Sapna

            A sawt lo in radio thugenna phual ah geelna a tangko pa in amau tawh Juba Central Seventh-day Adventist biakinn ah Sabbath kik ciang a kikhawm dingin Maureen sam hi.

            “Sani ni in Pasian bia in kikhawm maw?” ci-in lamdang sa mahmah hi. “Kei Sunday ni ta a, a kikhawm hi veng, lawp huai kei si” ci hi.

            Ama’n a pai nop loh manin paulap tuamtuam nei a, radio thugenna phual pan siate in ama’ aa ding thunget sak dingin thu za sak uh hi.  Bangbang a hizongin, Maureen zong siate in na khual uh ahih manin kikhawm dingin khensat

Mi khempeuh in Sabbath ni kikhop nuamsa uh hi cih Maureen in hong kikhop ni mah in thei pah hi. Radio thugenna phual aa om siate leh Maureen te kimeltheih khin uhhi. Siaten mipi mai ah Maureen thu pulaak uhhi.  A Sabbath kik aa kipan in Lai Siangtho sinna a hi “The Happiness Class,” ah citak takin hong pai in Lai Siangtho sin hi.

Lai Siangtho Sung Kamciamnate pan Hamphatnate Empowered by Bible Promises

            A sawtlo in Maureen pen pawlpimite tawh zato ah cinate veh in inn lak vak a thunget saknate ah hong kihel hi. Pastor pa tungah tui kiphumna tawh Seventh-day Adventist pawlpi sung a lut nadingin gen a, 2015 kum September 12 Sabbath ni-in tui kiphum hi. Thungen pawl sungah kihelna tawh Pasian’ na sem hi. Ama’ pianzia pen maizum thei in a patau thei khat a hih ngei hangin tu in zatote leh thonginnte ah Pasian’ thu hilh ta hi.

`           Ni khat, thong ah Maureen thu gen dingin a kisawl ciangin amah patau a, thongkia numei leh pasalte aa dingin a gen ding thei lo hi. Amah khukdin in, “Topa, mai Sabbath ciangin thong ah thu gen ding ka hih manin ka gen ding thu hong hilh in” ci-in thu ngen hi.  Ama’n  Jeremiah 1:6, 7 sung hong sim a, “Tua ciangin keimah in, ‘Ah, Topa Pasian aw, kei thugen ka siam kei a, naupang khat ka hi lel hi," ka ci hi.” Ahih hangin Topa in,
" 'Naupang khat ka hi lel hi,' ci kei in; bang hang hiam cih leh kong puakna khempeuhte kiangah na pai ding a, kong sawl peuhpeuh na gen ding hi” hong ci hi.

Maureen’ patauhna hong bei in a thu gen ding bekmah ngaihsut in hong neih ciangin thu khempeuh hong lem hi.

Radio Thugen Phualno Pan Phattuamna (Impact of the Small Radio Station)

             Radio thugenna in Maureen mailam a nawt dingin tawsawn in tha pia hi ci-in 94.0 Gupkhiatna FM a bawlpa William Aruna Okumo in gen hi. Ama’ thangahna hangin radio tawh thu tangkona phual aa sem siate in Lai Siangtho sung thu ih tangkona te mite kiang va tung hi cih thei uh a, tha ngah mahmah uh hi. Tua in radio aa thugente  thumaan kanbeh sak in gen khiat ding hanciam sak hi.

            Kumpi zalian khat in radio thugenna pen ama’ tenna munah zong a kigen nadingin huhna ngen hi. A dang thugen a ngaite zong Lai Siangtho thumaan hangin hong kikheel uh hi. Maureen hong pai ciangin hoih takin ka na muakna uh hangin amah zong innkuanpih thak a nei bangin kingaihsun  hi ci-in Okumo in gen hi. Amau zong amau kiim aa om mite kiangah radio thungenna tawh va pha nuam uh hi.

Nile Gun Kang tung aa om Juba khuapi ah mi 400,000 teeng hi. Juba khuapi in Sudan khanglam ie khuapi zong a hihi.    

             94.0 Gupkhiatna FM pen  Adventist Mission huang sungah om hi. Siate in zingsanglam nai 6 pan zan lam nai 10 dong nisim in 30 KM hatna bek tawh huihlak ah khah khia uh a, Juba khuapi sung nangawn zeel khin zo lo hi.

            Hih set lam picin lohna in Maureen leh nasem siate lungkham sak tuan lo hi. Maureen in, “Topa Pasian na it ciangin Ama’ minthan nadinga geelnate, Ama’ tungah ngen le hang Ama'n a kisam ciimna leh dawnnate hong pia ding hi” ci hi.