ZSS LESSON 11: KHRIS SUNGAH SUAHTAKNA

LESSON 11: KHRIS SUNGAH SUAHTAKNA              September 2-8

NIPI NI (SABBATH) NITAK LAM  September 2

SIMDING TE: Gal. 5: 1 – 15; 1 Cor. 6: 20; Rom. 8: 1; Heb. 2: 14, 15; Rom. 8: 4; 13: 8.

KAMNGAH: Sanggamte aw, note ahih leh a suakta mi ahi dingin Pasian in a hong sap ahi hi. Ahi zongin tua suahtakna pen na pumpi uh ut bangbangin gamtat theihna dingin paulam zon’na-in nei kei un la, itna tawh khatlekhat kikhualna-in zangzaw un (Gal. 5: 13).

Gal. 2: 4 sungah Paul in, Zeisu sungah “suahtakna” tawh kisai a thupit na a tom cingin hong hong gen khin hi. Ahi zongin Paul in, “suahtakna” ci in agengen in bang a khiatna nei a, bang hangin, gen tua kammal gen bel in nei hiam? Tua suahtakna sungah bang teng kihel hiam? Tua suahtakna in koi ciang hong tun ding hiam? Tua suahtakna in e, ciangtan a nei diam? Zeisu sungah suahtakna leh thukham kizop na bang dan hiam?

Hih dotna te tawh kisai Paul in agen kawm in, Galati mite tungah a lauhuai mahmah thu 2 tawh na zom hi.  A khatna ah, “legalism” a ki ci, “Thukham zuihna tawh Gupkhiatna a ngah sawm te” Galati gama Paul a langpang te in, a mau gamtatna tawh Pasian maipha ngah theihna dingin a hanciam mite hi uh a, Zeisu in ahong sepsak hangin i ngah suahtakna a pian theih na dingin, Upmuanna tungtawn pan in, Zeisu sungah nuntakna cih thu a telsiam lo te, a mit ataw te ahi uh hi.

A nihna ah, “Licentiousness” a ki ci, “Hehpihna hangin mawhbawl theihna ding khuan ngah aki sa te” Topa Zeisu in Singlamteh tunga a ei te tang dingin a hong thuakna tungtawn pan in i ngah suahtakna hangin, mawhna in bangmah cih thei nawn lo ci in, Pasian hehpihna a zangkhial, lampial te

ahi uh hi. Tua bang alen mite in, suahtakna i cih in, tangtak in thukham langpan na hi ci uh hi.

Hih Legalism te leh Licentiousness te in suahtakna maan pen do uh hi. Bang hang hiam cih leh amau te in, sila sunga gamtatna te mah kiptak in len bikbek nuam uh hi. Paul in Galati mite a hanthotna ah, Zeisu hanga angah uh tua suahtakna maan sungah kiptak in a letkip theihna na ding uh ahi hi.

NIMASA NI (SUNDAY) September 3
KHRIS IN HONG SUAKTA SAK

Khris in eite hong khahkhiat khitna hangin mi suaktate hi khinta ihih manin tua suahtakna thu-ah kipin om un la, sila va suakkik nawn kei un (Gal. 5: 1). Gapkap honpi kikaih khopna ah Galkap mangpa in, a phe zaizai a galkap te tungah a thalawp theihna dingun a thupiak mah bangin, Paul in Galati mite tungah Zeisu sunga a suahtakna uh a khahsuah lohna dingin a hih theihzah in a hanthawn ahi hi. Lawpna tawh a nasia mahmah in Paul kampau te in, a laigelh te nangawn laimal sung pan in hong a gamtang dingin hong diangkhia dekdek phial hi. Tua bang ding mahin Paul in zong a ngiim hi mai hi. A hi zongin hih Laisiangtho mun in a thu tawh in, bang zuih ding kul a ding leh bang kantan kul ding cih hong gen hi. A langpang te tawh a buaina thu khempeuh Paul in, Khris sungah suahtakna tawh na khum a, Galati mite in tua suahtakna a nusiat ding khak ding uh a lauhuai zia hong theisak nuam hi.

Gal. 1:3, 4; 2: 16; 3: 13 sunga sim in. Hih Laisiangtho sungah Paulin bang gentehna te zang hiam? Eite a dingin Khris in a hong sepsak na tungtawn pan in hih kammal te in hong bang ci telsak thei ding hiam?

______________________________________________________________________________

Paul kammal ahi,”Khrih in hong khahkhiat khitna hangin mi suaktate”(Gal. 5: 1)a cih ciangin hih kammal tungtawn in gentehna thudang khat a hong thei sak nuam ahi hi. Hih laigual paizia tawh a ki valak kammal in salsung pan in suahtak na ahi hi. Bang hang hiam cih leh Sal i cih in, Upadi tawh kituak in hih theihna bangmah a nei kei hi. Mikhat in a suahtak theihna dingin lei thei hi, tua tungtawn pan in suahtakna ngah a, amah in zong tua a lei khia pa tawh hong kisai kik ta hi. Hih thu tawh kizui in Greek te tangthu (BC 201 – 100 BC) hun sunga Delphi gam a Pythian Apollo te thu ahi hi. “Pythian gam a Apollo in Amphissa gam Sosibus aki mun phual pi pan in, Nicaea a ki ci sila numei khat a suahtak sak theihna dingin, hong lei hi. Tua ahih manin Nicaea suak ta a hih manin Apollo tungah suakta takin ki aap hi” – Ben Witherington III, Grace in Galatia, 1998, p. 340.

Hih a tunga tangthu dan mahin Paul in, ama zat kammal te tawh a kibatna a om hangin a deihna a kilamdanna om hi. Paul gentehna sungah tangthu kihel lo hi. Ei te in eite dan mah mihing ki lei thei lo hi (1 Kor. 6:20; 7: 23). Tua lei theihna dingin mihing aman’ tam man (manpha) mahmah hi. Ei leh ei ki hotkhiat theihna dingin thahatna i nei zo kei hi. A hi zongin Zeisu in i hih theihloh khempeuh hong hih sak hi. I mawhna thaman hangin dantatna khempeuh hong hong piak sak khin zo hi. Tua ahih man in mawhsakna thukhen pan in suahtakna i nei thei hi.

Na nuntakna ki-en pha kik in. Nang leh nang a kihon khia thei dingin na kisa kha ngei hiam? Na dawn na in bang zah takin Zeisu hong kipiak na tungah lungdam in ki paak huai hiam cih hong thei sak hi lo hiam?

NINIH NI (MONDAY) September 4
CHRISTIAN TE SUAHTAKNA PIAN ZIA

Paul in gen suahtakna sungah kiptak in om a cih ciangin tuam om ding a cihna hi lo hi. Tua bangin i om theihna dingin in a hong ki bawlkhol sak:”Khris in hong khahkhiat” hang ahi hi. Bang hangin Christian te in a suahtakna tungtawn in kiptak in din kul hiam? Bang hang hiam cih leh Khris in suah takna ahong piak masak man ahi hai. Thudang khat tawh gen leng, Eite suahtakna in eite adingin Khris in ahong bawlkhol sak man ahi hi.

Tua bangin suahtakna neih khit nungah i zuihtoh ding kalsuanna Paul laikhak te sungah ahong ngetna a om hi (1 Cor. 6: 20; 10: 13, 14; Col. 2: 6). Gentehna in: Rom. 6 sungah, Khris sunga omdan hong gen na ah, “I ngeina lui teng khempeuh Khris tawh i si khawm hi” ci hi. Hih mun ah Paul in, sihsak takpi dinga kilawm te sih sak ding mah hong hanthotna hi. “Tua ahih ciangin na pumpi uh deihna na zuihlohna dingun na pumpi uh, mawhna na uksak nawn kei ding uh hi” (Rom. 6: 12). Hih laimun ah Paul gennop in, Khris sungah ki om khin ahih manin a kisam thugui a pulak kik ahi hi. Hih bangin Khris sungah om khit ciangin, Pasian tate i hihna hanciam na tawh lakkhiat sawm na leuleu Paul deih’ Khris sung nuntakna hi tuan lo a, ei leh ei vangik a kiguan kisuak hi. Tua sangin Pasian ta te I hihna tawh I sep theih bangbang sepna in kalsuan na kician suak sak zaw hi.

Bang tungtawn pan in Khris in hong suakta sak hiam? Rom. 6: 14, 18: 8: 1; Gal. 4: 3, 8; 5: 1; Heb. 2: 14, 15.

­­­­­­­­­­­­­­______________________________________________________________________________

“Suahtakna” cih kammal in Thuciam Lui Bu sungah Paul laikhakte sungah kidawk deuh hi. Hih suahtakna cih leh tua tawh a kihuang kammal te, Paul laikhakte sungah 28 vei kidawk a, a mun dang

khempeuh sungah 13 vei ki mu hi. 

Paul in suahtakna a cihin bang hi ding hiam? A masa pen in, tua kammal in lungsim sunga ngaihsutna ciang bek hi lo hi, gamvai ah suahtakna thu hi lo hi, sum leh paai thu ah suahtakna hi lo hi, tua in Zeisu Khris tawh i ki zopna tungtawn in a zungkha ahi hi. Hih a tunga kammal te tungtawn pan in, agen na ah, Thukham tawh a kikhih, a gamtang mite tung pan in, mawhsakna pan in suahtakna kawk hi. Tua bek a hi lo, mawhna pan in suahtakna, tawntung sihna panin suahtakna leh, Dawimang pa kiang pan in suahtak na te kihel hi.

“Zeisu lo”in mihing dinmun in, saltanna vive hi a, Thukham sungah saltanna, Leitung sung’a nate khempeuh tungah saltanna, mawhna sungah saltanna, ci leh sa ah saltanna, Dawimangpa sungah saltanna cih bangin om hi. Pasian in a Tapa hih Leitungah hong sawl a, hi ci banga sila ahong suaksak khempeuh te tung pan in I kikhen theihna ding in a hong pai ahi hi”. – Timothy Goerge, Galation, p 345.

Leitung nuntakna sungah bang tungah sal tang bangin kingaih sun na hi hiam? Gal. 5: 1 lotngah sawm inla, Pasian tungah na suahtak theihna dingin ngen kawm in Khris mahmah na nuntakna sungah teeng sak in.

NITHUM NI (TUESDAY) September 5
THUKHAM BULPHUH LUATNA HANGA LAUHUAI NA (Gal. 5: 2 – 12)

Paul in Gal. 5: 2 – 12 sunga thu konghon na dingin azat kammal te sungah, “En un!. “Ngai un!, “Ciamteh un”!, “Kei, Paul in kong gen in ah!” cih bangin (laisisangtho Version tuamtuam te sungah) kimu thei hi. Paul a mawt paupau a hih lohna kilang hi. Nawh taka a zat”En un” cih kammal a gelhna sungah, laisim te in thusim uh hen la a cihnop na bek hi lo in, ama sawltak hihna tawh a hong hanthawn ahi hi. A mah in mi khempeuh tel dingin adeih thu in, Gentie te peuhmah in Gupna angah theihna dingun Vun-aatna aneih peuh mah uh leh, Galati mite in a theih dingun tua Vun-at dingin khensatna tungtawn in a lauhuai thubuai in zom ding hi cih a thei sak nuam ahi hi.

Gal. 5: 2 – 12 sung sim in. Bang hangin Paul in, Vun-atna tawh kisai dotna tungtawn panin van vauna pia hiam?

______________________________________________________________________________

A masa pen Vun-atna hangin buai theihna, Pasian maipha ngah theihna ding ci in, vun-at dingin kipiakna in thukham khempeuh zuihna dingin,hih loh phamawh danin zop suak kul ding hi. (Aneu 2,  3 sungah) Paul in thugui mal khat tawh gen na ah, “Khris a dingin tua thukham zuih tentan na in (ophelesei) phattuam na om tuan lo a, amau te in thukham zuih tentan (ophelesei) hong kul to ding hi.

Thukham deihna bangin mikhat a nuntak nop leh a mah in a mah deih teel tawh zuih kiau theihna ding om nawn lo a, a bup in zuih hong kul ding hi. A zuih khit kei leh a mawkna hi ci uh hi. A nihna Vun-atna hangin buai theihna, Khris sung pan in “ki phiat siangna” hi ding hi. Thukham zuihna tawh dik kisakna angah nuam te in Pasian anial uh hi pah a, Khris sunga Dik kitan theihna a nial suak uh hi. A nih in ki len tuak thei lo hi. Ei leh ei kihon khia zo lo te a dingin Khris kisam bek hi a, a hi zongin Vun-atna a zang te in Khris lo in piang thei a ci te ahi uh hi” – John R. W. Stott, The Message of Galations, (Leicester, England: Inter-Varsity Press, 1968), p. 133.

A thumna in Vun-atna hangin buai theihna, Kha thu ah khantoh na ding dal (lampial sak) hi. (Aneu 7)sunga: pialsak “dal” cih kammal in galkap sunga kizang hi a, Lampi khaktan cihna ahi aongin, Lei susia cihna ah ahi zongin galte pai na ding lampi ah a dongkholh khat koihcih bangin a mainawt na khempeuh khaktan cih a khiatna anei hi. – The SDA Bible Commentary, Vol. 6, p. 978.

A tawpna dingin Vun-atna in Singlamteh deihna khempeuh tawh ki lehbulh hi. Bang ci bangin maw? Vun-atna i cih limlim in khiatna in, nang leh nang kihon khia thei teh cihna hi a, Mihing kiphatsak theihna dingin panpih hi. Singlamteh thupuak ahih leh, mihing kiphatsakna limlim huaihuai sa hi. Bang hang hiam cih leh Singlamteh in Khris sungah pumpi bupin ki pum aapna a hi hi. Hih bangin lunggulh takin Vun-atna azat uh ciangin Paul zong heh mahmah a, a lem thei bang hi leh temta tawh tua vun-at khempeuh get to mang nuam phial hi. Hi banga uang takin agen na tungtawn pan in, bang zahtak in heh hiam cih ki thei hi.

NILI NI (WEDNESDAY) September 6SUAHTAKNA-UT BANGBANG SEPTHEIHNA HI LO (Gal. 5: 13)

Galati bu bupi sung panin hih (5: 13) in athupi mahmah thubul pi khat ahi hi. A taktak in Paul in a thupuak te sungah a tamzaw Biakna thu tawh kisai angen na hi a, tu in ahih leh Gamtat zia ding tawh kisai in, Christian te in I kalsuan zia ding hong bulphuh ta hi. Thukham zuihna hangin Gupna angah lo mikhat in bang ci bangin nungta ding hiam?

Galati mite in anngah uh Suahtakna a zatkhialh loh na dingun Paul in, bang ci bangin dal nuam a hi hiam? (Gal. 5: 13).

______________________________________________________________________________

Zeisu Khris i neihna hangin thu-um mite in, i ngah hehpihna leh suahtakna aki bulphuh luatna tungtawn pan in, ki zangkhial thei hi cih Paul in thei mahmah hi (Rom. 3: 8; 6: 1, 2). Tua bang buai theihna in Lungdamna thupuak a genkhial Paul hang hi ki ci thei lo a, mihing te in a ma lunggulhna tungtawn pan in a kidawp zawhloh na leh a nuam zaw kalsuan nopna hangin a kilampial hi zaw hi. Leitung tangthu’ te i lem kik ciangin, gam vai te, khuapi lian te, mihing te ngiat in siatna leh buaina a

hong tun theihna bulpi in a mau lungsim te a ki-uk zawhloh man uh hi pi pen hi. Mihing khat hihna tawh nuntak khat sungin kua ta in tua bangin a thuak kha lo om mawk ding? Tua ahih manin Paul in, Zeisu sunga thu-um mi khempeuh te in, ci leh sa lunggulh luatna pan in kidop theih ding a hong hilh a hi hi. Tua tawh a ki lehbulh in Paul in a hong sawlnop zawk thu in, “itna tawh khat leh khat kikhual zawk ding” hong hanthawn hi. Itna tawh midangte’ phattuam na ding i bawlna in, ci leh sa ah ah sihna hi a, A leh lam pan in, eima angsung khualna lungsim si lo pi in, midang te kikhual thei lo mah hi.

Tua ahih manin Zeisu sungah suahtakna in, leitung ci leh sa vai a sila pan in suahtakna bek hi lo a, midangte’ khualna tawh nasep khiat ding sapna zong ahi hi. Lungsim sunga aphul khia Itna tawh midang te na asem dingin mawhpuakna a nei cihna a hi hi. “Kiim leh paam, vengte tungah a dal om lo in, it theihna ahi hi.” Mihing te sungah kipawl khopna a pian theihna dingin za neihna leh vangneih na te sangin khat leh khat phattuam na ding kibawl khop tuakna in muibun zaw hi.” – Sam K. Williams, Galations, (nashville: Ten.: Abingdon Press1997), p. 145.

Christian hihna tawh ki theihcian na leh Gal.5: 13 sunga kammal paizia etcian nate tungtawn panin, Galati bu sung thu hong telsiam sak mahmah hi. A masa pen in, Greek lai pan in, “a gamtang sak Itna” i cih pen ei mihing maimai te ki-itna hi lo hi. Mihing ki-itna in ciangtan nei lua hi. Paul in Greek lai tawh a zat “the love” acih ciangin “the divine love” a ci nuam hi a, tua in “Pasian itna” acih nopna hi zaw hi. Tua “Itna” pen Khasiangtho tungtawn pan bek in kingah thei hi (Rom. 5: 5). Mite a ding “nasem sepna”(serve)a cih zong Greek lai in, “to be enslave” ci ahih manin, “mite a dingin sila suahna” acih nopna hi pah hi. Tua ahih manin ei te neih suahtakna in eima aituam ki-ukna ding hi lo zaw in, Pasian itna sungah mite a dingin sila suahna ahi hi.

Khat veivei Khris hangin na ngah suahtakna tawh mawhna bawl theihna dingin, koimun khatkhat ah na na zang khia dingin na ki ngaihsun ngei hiam? Tua bang ngaihsutna in bangzah tak in sia hiam?

NINGA NI (THURSDAY) September 7
Thukham Khempeuh Kicinna

Paul in a sia lama agen hi, “thukham khempeuh zuihna” (Gal. 5: 4) cih leh, a hoih lama a gen, thukham khempeuh kicin sakna (zuih zawhna)” (Gal. 5:14) cih te gel bang ci bang in  lemtuah thei ding na hi hiam? (Rom. 10: 5; Gal. 3: 10, 12; 5:3; cih leh Rom. 8: 4; 13: 8; Gal. 5: 14. Saikak in).

______________________________________________________________________________

Mi tampi tak te in, Paul laikhat sung pan in, Thukham tawh kisai a sia lam in agen’ “Thukham zuihna” leh, a pha lam in agen’ “Thukham kicin sakna”a cih te tawh kisai in amah leh amah kisaai (ki-tukalh) hi ci uh hi. A taktak in ci le’ng, Paul in hih kammal nih tawh kizui in, Thukham tawh kizopnasungah a thupi mahmah leh a aki lamdang mah lampi nih hilhcian na tawh Christian te gamtat zia dingi telsiam theihna ding ngiimna tawh a hong zang khia ahi hi. Gentehna in: Thukham tawh kisai in aphalam muhna tawh zuih ding in kiphamawh asak na munte ah, “thukham zuihna tawh” (doing the law) cih kammal cik mah hun in zang ngeilo hi. Pasian maipha ngah theihna dingin, thukham kalhna bekmah zuih ding a hanciam (a gamta), thukham ukna nuai a om mite tunga zat bek mah a asiit a hi hi.

 A hi zongin, Khris sungah Gupkhiatna a mu te ading in i thuman’(g) ding kul lo hi a ci nuam

ahi kei hi. Thumaan thutak a zong te a dingin bangmah ki gamla thei lo hi. Thukham a “picing” sak hi, ci in Paul in agen ciangin Christian taktak te gamtatna na in apua lam gamtatna ahi sepkhiatna tungtawn pan in thukham a zui ding te bek hi lo in, a picin theihna dingin a kalsuan ding te ki hi zaw hi. Paul in “picing sak” cih kammal azat ciangin “semkhiatna” cih sangin a khiatna zai zaw hi. Tua bang apian theih na dingin Zeisu sungah i zungkhak’ kul hi (Mat. 5: 17). Tua bang Khris sungah kalsuan na in, thukham zangnawn lo ding ahih kei leh khiamsuk gawp ding cihna hi zaw lo in, Itna tawh thukham deihna khempeuh lunggulh takin a nuntakpih thei dingin kipiak na ahi hi.

Paul tungtang pan in, Thukham a khiatna taktak koi lai mun ah kimu khia thei hiam? Lev. 19: 18; Mark 12: 31, 33; Mat. 19:19; Rom. 13: 9: James 2: 8. 

______________________________________________________________________________

Paul in Siampi Laibu sunga kammal te a laksawn a hi phial zongin, Galati bu sungah thu te Zeisu kammal te tawh kizom veve hi. Lev. 19: 18 sunga, thukham khempeuh a thu pongpi in tomkaih na tawh kisai in, a genkhia ngei To Zeisu bek na hi lo hi. Topa Zeisu leitungah a hong pian ma in mipil Rabbi Hillel in, “Nangin a huat huai na sak te, na vengte tungah bawl ken” na ci hi. A hi zongin Zeisu in ahuampi a tuam dang khatin amuh na (Mat. 7: 12) sungah gen hi. Thukham in a hoihna lam in aki zat theih ban ah, thukham leh Itna in a ki lem lo hi zenzen lo hi. Itna kihel lo thukham zuihna in a mawkna a hi hi. Thukham kihel lo in Itna in a masuan ding bing sak hi.

Thukham sawmte zuih hithiat na leh Midangte It theihna koi zaw baih ding hiam? Banghang hiam?

KIGIN NI (FRIDAY) September 8

SINBEH DING: “Upna maan takpi in Itna tawh mapang khawm hi. Calvary mual tung na et ciangin, na lungsim dai khilkhial in a om khawng ding hi lo a, ihmut na tawh hun te a bei sak ding zong hi lo hi. Zeisu sungah upna ahi a gamtang sak thei upmuanna tawh angsung ngaihsutna lungsim niin te sawp siang sak in. Upmuanna tawh Zeisu ah i kingak tak ciangin a kilawm nasep ding te hong kipan thei ta ding hi. Pasian sunga om a thahat galvan te tawh mikim in i neih mawhna sungah zongsat na leh gamtat hoih lo khempeuh gualzawhna i ngah ding hi. Mihing khempeuh in Upna tawh kisai in galdo ding ki nei tek hi. Mikhat in Zeisu nung a zuih nak leh na khat peuhpeuh ah a ma-zang dinga, lungsim khauhna nei lo dinga, hehpih theihna tawh kidim ding hi. A mah in kammal khauh te zang lo dinga, amah leh amah thupi kisak luatna leh kimuan luatna te nei nawn lo ding hi. A mah in mite simmawh bawl lo dinga, kamsia pau na tawh mite na sak lo in, mawhsak na kosiatna te zang lo ding hi.

“Itna tawh a semkhia mite in, upna nasep na ahi hi. Laisiangtho sunga biakna mi i cih in, nasep akin te cihna hi. “Mite mai-ah na gamtat hoihna uh khuavak bangin na kilangsak un, tua hi leh midangte in na gamtatna hoihte uh a muh ciangin vantungah a om na Pa uh min a phat theih ding uh hi. “ No te sungah Topa Pasian in na a hong sem ahih man in, Lau na lin na tawh no mau hong ki Gupkhiat theihna ding na sem un, sepnop na lungsim leh sep khiat theihna in Pasian lungkim sak hi.” Citak takin na hoih a sem ding te i hih man in, kidawm un, a hoih nasep te a zuun ding te i hi hi. A tawpna ah, hong mu den pa in, “ Na sepna ka thei hi” hong kici ding hi.” “A thu maan mahmah khat ah, a buaihuai mahmah i nasep khiatna te hangin Gupkhiatna tawh kisai ngah theihna ding hi lo a, a maan mahmah  khat zaw in, Zeisu tawh a kipawl Upmuanna a nei te’ lungsim in sepkhiat theihna ding hansuah ding hi. –Ellen G. White Comments, The SDA Bible Commentary, Vol. 6, p. 1111. 

KIKUP DINGTE:

1. Paul in agen, Itna tawh a gamtang upna a cih in bang a khiatna hi ding hiam?

2. Zeisu sungah suahtak na hangin mawhna sung lut na ding a baih sak mah hiam? Hih thu tungtang ah, tua thang pan in bang ci bangin suakta thei ding i hi hiam?(1 John 3:8)

3. Ninga ni (Thursday) ni a, i sinna sung pan in, thukham zuihna sungah bang hangin zuihnop leh zuihnop loh mah kinei se hiam? Thukham picin i cihin bang hi ding hiam?