ZSS LESSON 6: SEP MASAK DING KICIAMNA

LESSON 6: SEP MASAK DING KICIAMNA                   July 29 – August 4

NIPI NI (SABBATH) NITAK LAM July 29

SIMDING TE: Gal. 3: 15- 20; Pian. 9: 11- 17; Mat. 5: 17 – 20; Pai. 16: 22 – 26; Pian. 15: 1 – 6.

KAMNGAH: “Pasian’ hong piakkhong pen Thukham zuihna hang tawh a kingah hi mawk leh piakding hong ciamna hangin a kingah hi nawnlo ding hi. Ahi zongin Pasian in Abraham tungah letsong a piakna pen a thuciamnasa tawh kizui-in a piak ahi hi” (Gal. 3: 18)

Nikhat, gam makai khat kiangah mikhat in, “Hi bangin gam makai na suah theihna dingin mite na zawl kawikawi lai (campaign)takin, na kiciam na khempeuh na khin thei hiam?” ci in dawnga, amah in, “ Aw…hoih ei!, piak dinga kageel kamciam na te bel khin mah ing e” cih san hi. Khat vei ahi kei leh atam zaw kamciam na a pelh ngei I om hiam? Ei te in I piak kamciam a hi zongin, mite in a hong piak kamciam na kin lo in ki theihmawh bawlna kamciam te kipelhna I tuak kha ngei hiam?

Khat veivei ciangin mi te in, kamciam na a kip mahmah ding dan-in mite kamciam pia lanlan napi in, a nungah pelh veve thei hi. Kam tungtawn ahi zongin, lai tawh ahi zongin kamciam kipia ngeingai na pi, hong khem veve lel uh hi. 

A hi zongin, kamphatna tawh Pasian in eite tungah ahong piak kamciamna te kikheel ngei lo hi. Pasian kammal te kician in kikhel ngeilo hi. “Thu ka gen khin a, ka tungsak ding hi. Ka geel khin a, ka sem ding hi (Isai. 46: 11). 

Tu kaal Lesson sungah Paul in eite I lungngaih dingin a deih, Pasian in Abraham tungah a piak a kamciam na leh, kum 430 nunga Israel te tungah Thukham a piakna tawh kisai a ki zopna thu I sin ding hi. Hih thu nihte a koi ci bangin kizom cih leh Lungdam na thupuak genkhiatna ah koi ci bangin zang khia thei ding I hi hiam?

NIMASA NI (SUNDAY) July 30
THUKHAM LEH UPMUAN NA (Gal. 3: 15 -18)

Thukham a bulphuh a langpang te tawh in, Abraham’ nuntakna zong Upmuanna bek mah tawh kalsuan hi ci in, Paul in a nial zawh hangin, Tua ahih leh Abraham nung kum tampi khit (kum 400) khit ciangin Isreal te tungah Pasian in Thukham pia hiam cih dotna dong kik veve dinguh ahih lam Paul in thei hi. Thukham a kipiak ma in, bang geelna ki bawlkhol khin hiam?

Mihing te sihkuan ciangin a nunung pen kam vaikhak na I neihna leh, Abraham tungah Pasian in thuciam abawlna tawh kisai in, a kibatna bangte om a hi hiam? (Gal. 3: 15 – 18) 

______________________________________________________________________________

A thu in bel, a nunung pen kam kivaikhak na leh Thuciam bawlna kibang thei sam lo hi. Thuciam na cih ciangin mi nih leh a tungsiah kikaal ki thukim khopna tawh a kibawl “contract” laak na hi a, kam nunung vaikhak I cih ciangin mikhat bekin ama lunggulh teng sungkhiatna ahi hi. Greek lai tawh a kigelh Laisiangtho (Septuagint) sungah “Pasian in Abraham tawh Thuciamna aneihna” uh pen, Greek lai in (syntheke) “thuciamna”, I cih mi nih kilung tuak tak a thuciam khop na dingin a kizang kammal zang lo zaw in, (diatheke) I cih, “kam vaikhakna” zang zaw mawk hi. Bang hang hi mawk ding hiam? Bang hang hiam cih leh, “Pasian leh Abraham kikaal a Thuciamna” pen mihing nih ki thutuak a a kibawl ahih loh zia tua Laisiangtho gelh te in thei lua a hih man uh ahi hi. Thu dang khat pan-in, Pasian in abawl a Thuciam na pen, Abraham tungah thudang kihel lo in, Ama lunggulh lian bek a sung khia ahi hi. “nong tua cih uh leh..., a hi zongin…,”(dinmun khat tun theihna dingin kalhna) kammal te kihel kilkel lo hi. 

Abraham in Pasian gen bangbang a ngaih ding hi ziau hi.

Abraham tungah Pasian’ thuciamna tawh kisai, Paul in “kam vaikhak” cih leh

“Thuciamna” cih kammal nih tungtawn pan in, a khiatna, a deihna, a tuamtuak tawh I tel theihna

dingin a zangkhawm ahi hi. Mihing lam panin, thu nunung pen vaikhak dan in tua thuciam na

I et ciangin, Abraham leh a suan akhak te bek in, tua hamphatna angah ding uh hi (Pian. 12: 1-

5; Gal. 3: 16), gamhluah na tawh zong kisai hi (Pian. 13: 15; 17 : 8; Rom. 4: 13; Gal. 3: 29). Paul

in thupi asak penpen in, a kikhel ngeilo Pasian’ kamciam pianzia mahmah ahi hi. Tua mah

bangin, Mihing khatin a kam nunung vaikhak pen, a gelh khit zawh a kisim khiat khit nak leh

a kikhel theih nawnloh mah bangin, Moses tungtawn in Thukham aki piakna hangin, nidang in

Pasian in Abraham tungah a piak Thuciamna te kiphiat thei tuan lo hi. Pasian thuciam na in

kamciam na hi pah hi (Gal. 3: 16). Pasian in cik mah ciangin ama kamciam te khel ngei lo ding

hi (Isai. 46: 11; Heb. 6: 18).

A nuai a Laisiangtho mun sunga “thuciamna” khempeuh “kamciamna” cih tawh

laih suk in. Tua laigual khat tek sunga “thuciamna” te in bang khiatna hong nei sak hiam?

Pasian’thuciamna khempeuh a kamciam na hi cih theihsiam na in, tua laigual te hong

koi ci telsak semsem hiam? Tua bek tham lo in, Thuciamna cih mahmah bang hiam cih

hong koi ci telsak hiam (Pian. 9: 11 – 17; 15: 18; 17: 1 – 21). Hih thu te hangin Pasian’

pianzia koi dan hi a, ama tungah bang ci bangin hong muangsak thei hiam?

NINIH NI (MONDAY) July 31
UPMUAN NA LEH THUKHAM (Rom. 3: 31)

Mihing nuntakna sungah Pasian tawh aki zop theihna dingin Upmuanna in a thupi pen, ahih zia Paul in khauhtak in a gen khin zo hi. Gupkhiatna ngah theih na dingin akisam sungah, vun-atna ahi zongin Thukham zuihna tawh a hi zongin a kingah loh zia tampi vei mah gen khin zo hi. “Thukham zuihna hang tawh kuamah in Pasian tawh kipawl theihna ngah zolo hi(Gal. 2: 16). Tua ban ah, thukham zuihna hang hi lo in, Upmuan na in thu-um mi taktak ciapteh na hi ci hi (Gal. 3: 7). Hi ci bangin thukham zuihna nial luatna in dotna hong lut sak hi. Tua ahih leh, “Thukham in manphatna anei vet nawn lo hiam?”, “Pasan in Thukham kalhna khempeuh phiat siang ta hiam? cih dotna te a hi hi.

Gupkhiatna ngah theih na dingin Thukham zuihna hang hi lo in, Upmuan na hang bek a hih leh, Upmuanna in thukham a beisak hi, ci in Paul in agen nuam ahi diam? A nuai a Laisiangtho mun te in bang gen hiam? Rom. 3: 31 leh Rom. 7: 7, 12 tawh ahi zongin, Rom. 8: 3 leh Mat. 7:17 – 20 saikak in.

_____________________________________________________________________________

Rom. 3 sunga thubuai mah bangin Galati mite sungah zong Upmuanna leh Thukham

zuihna tawh kisai telkhialhna tampi hong piang hi. Paul laigelh te tungtawn pan in, amah in

Upmuanna a bulphuh luat man in, thukham manphatna beisak hi, ci uh hi. Paul in bel dotna

dawnna tawh kikup pih a, “Upmuanna thu i gen ciangin Thukham a phiat ihi hiam?ci hi (Rom. 3: 31). “Phiat/paikhia”(overthrow) cih kammal Greek lai in, “katargeo” hi a, Paul in azat tawntung laimal khat ahi hi. Rom. 3:3 sungah “maimang sak” cihna hi a, Ephet. 2: 15 sungah “phiat” ci hi. Rom. 6: 6 sungah “su cip” cih leh, 1 Kor. 6: 13 sungah “beisak” ci hi. Tua hi a Paul in, Singlamte tungah thukham a beina ciang khat om ahih zia hong lak nuam hi ci ding hi, ci in mi honkhat te in a kihilh mah bangun, a tunga thu hangin a sansiam hong kul kha mai ding  hi.

A hi zongin Paul in, tua ngaihsut khialhna thalnial bek tham lo in, Ama Lungdamna Thupuak in, “Thukham kipsak zaw sem” ahih zia bulphuh mahmah hi. Upmuanna hangin Diktan theih na ding ngimna sungah, Pasian in a Thukham te thupi asak na leh, kisikna tawh kipiakkhiat na ding a hong kal’ zaw hi. Dik kisak theihna ngah na dingin Upmuanna bek hi hen la, thukham a kul nawn lo ahih leh, mimawh khat in a mawhna pan un a kisik kik na theihna ding uh leh, Pasian tawh a kilem kik theihna dingun, mimawh te ai tang in, Zeisu a hong sihna leh ahong kipiakna kisam nawn lo ding hi. 

“Tua bek tham lo in, Upmuanna man taktak neih theih na dingin, Pasian deihna bangin gamtat theihna dingin ama thukham kalhna khempeuh, lungsim takpi tawh zuihnop na hong nei sak hi. Hong Gumpa tungah lungsim khempeuh tawh a it te in, Upmuan na a kician anei na hang un, thumanna lampi ah kalsuan nuam ding uh hi.” The SDA Bible Commentary, Vol. 6, p. 510.

Upmuanna neihna in, thukham kalhna kulsak nawn lo hi ci in, Paul in agen nuam takpi bang hi leh, ngaihsun dih in. Nu leh Pa mawhna, guktakna, tualthah na te in, mawhna hi nawn lo ding hi. Thukham na zuihna hangin natna, dahna, haksatna tampi tawh a kipelh thei na hih zia ngaihsun dih in. Tua mah bangin Pasian thukham aki palsat na hangin, mi bang zahin haksat athuak khin cih leh nang mahmah in bang haksatna thuak cih ki ngaihsun in.

NITHUM NI (TUESDAY) August 1THUKHAM’ DEIHNA

Gal. 3: 19 – 29 sungah Paul in, “Thukham” tawh kisai a nam tuamtuam hong gen hi. Galati laikhak sungah a diakdiak in bang thukham Paul in bulphuh in gen bel in nei ahi hiam?

______________________________________________________________________________

Gal. 3: 19 sunga “ciang dong bek” a cih laigual in, in tawm vei sung bek aki zang thukham

hi ding a hih manin zehtan biakpiak na tawh kisai thukham hi ci in mi tampi takin um uh hi.

Bang hang hiam cih leh tua thukham’ deihna khempeuh Singlamteh kicing khin ahih man in

kul nawn lo hi ci uh hi. A hi ding mah tawh kibang na pi in, Galati laikhat sunga cihnop thu in tua dan hih tuak nai lo hi. Gamtat khialhna hangin thukham aki “piakthuah”na sungah Moses zehtan thukham bek ahi lo, Thukham sawmte zong a kihel khawm mah ahi hi. A nuai a dotna te tungtawn pan in, Paul in Pasian Thukham Sawmte mah a lungsim ah ngaihsut bel in nei ahih zia kilang hi.

Paul in thukham tawh kisai in piakthuah om a ci mah ahi hiam? Bang ci bangin cih leh, bang hang in piakthuah hiam? Gal. 3: 19 leh Rom. 5: 13, 20 sung enkak in.

______________________________________________________________________________

A tung pek a om khin Pasian in a ngimna te, a deihna thudang tawh a behlap nop man in, Pasian in Abraham tawh aneih Thuciamna tungtang ah piakthuah hi cih dan in Paul in agen

nuam ahi kei hi. Thukham mahmah zong Sinai mual mapek in om khin zo hi (zingciang thusin ding sungah kihel ding). Paul in agen nop thu zaw in, Isreal tungah a kilamdang ngimna tuamtuam te tungtawn in Pasian in thukham na pia hi. Upmuan na tawh ama kiang azuan nuam mi khempeuh te tungah, a hehpihna tawh a makaih kik theih na dingin Pasian in a piak ahi hi. Thukham in mawhnei te dinmun hong kilang sak a, Pasian’ hehpihna I kitangsap zia hong phawk sak hi. A hi zongin thalawh na tungtawn pan a Gupkhiatna ngah theih na dingin, geelna mawkmawk tawh thukham deihna hi lo hi. Tua thu tawh a kileh bulh in Thukham a kipiak na in, “Khialhna a tam semsemna dingin” (Rom. 5: 20) mawhna pianzia bangci bang taktak hiam, cih a kitheihna dingin (Rom. 7 : 13)kipia ahih zia, Paul in gen hi.

“Zehtanna tawh kisai thukham te in a hong tung ding Messiah tawh kisai a kawkna hi a, Gumpa a kisap na leh, sianthona lam ah picin theih na dingin bulphuh hi. Thukham sawm sunga “tua cih ken” cih kammal sungah, mawhnei mihing te pianzia, a dinmun uh hong phawk sak bek tham lo in, mawhna in Pasian’ Thukham palsatna a hih lam hong thei sak hi (Rom. 3: 20; 5: 13, 20; 7: 7, 8, 13). Tua ahih manin Paul in, Thukham om kei leh, khialhna zong a om kei ding hi (Rom. 4:15 RSV) ci hi. “Thukham in gol-et theihna (maan-bi-lu) tawh kibang hi. Tua maan-bi-lu- in a nin mahmah puan tungah ninbang khat anit semsem theihna dingin bawl thei lo na pi, mihing ngeina mit te’ muhzawh nawn loh niin te siangtak in hong mu sak thei hi”. William Hendriksen, NT Commentary, Exposition on Galations, 1968. p. 141.

NILI NI (WEDNESDAY) August 2
PASIAN THUKHAM’ A NEIH HUN SAWT TAN

Sinai mual tungah Thukham ki piakthuah cih thu tawh kizui in, Paul in tua hun ma in Thukham a om khin mah hi a ci nuam ahi ding hiam? Om lo a hih leh, Sinai ma leh nung ah a kilamdan na bang hi ding hiam? Pian. 9: 5, 6; 18: 19; 26: 5; 39: 7 – 10; Pai. 16: 22 – 26 sim in. 
Pasian in Abraham tungah ama’Thukham a piak laitak in, vanging te, khawphe te, sih dan cih te tawh pulaak kul se lo hi (Pai. 19: 10 – 23). Tua ahih leh bang hangin Pasian in a Thukham Isreal te tungah apiak laitak in tua dan thupiang tawh pia se hiam? Tua bangin vangliatna tawh a piak sese na in, Egypt gamah sal in a om sungun, Isreal mite in Pasian’ lungsim pian zia leh, Ama vangliatna te mangngilh cip ta uh hi. Tua ahih manin, Pasian in amau te mawhna sungah a kidawp theihna ding uh leh, Ama Thukham sianthona a phawkna dingun theihsak a kul man ahi hi. Tua bangin kipulaak na tawh, Sinai mual tunga kilaakna a kipia ahi hi.

Paul in, a gen ”Kiciamna angah a suan a khakte a hong pai mateng in khialhna hangin a kipia thuah thukham”a cih in bang agen nuam hi ding hiam? Gal. 3: 16 – 19 (RSV).

______________________________________________________________________________

Hih Laisiangtho mun tawh kisai in mi tampi te in, Sinai mual tunga kipia Thukham in tawmvei sung bek a kikhawm dingin a kipia hi ci in tel uh hi. Tua Thukham in, Abraham khit kum 430 nungah a kipia hi a, Zeisu hong pai masak lai ciang dong kikhom hi ci in um uh hi. Ahi zongin, hih hilhcianna tawh kisai in Paul in Rom sunga agen Thukham tawh a hi zongin mundang ahi Mat. 5: 17 – 19 sung thu te tawh ki tukalh hi.

Hih laigual tungtang ah, laisim mi tampi te khialh thei zel uh a, ahang in “mateng in” cih kammal in hun bi ciangtan nei hi, ci in a saan khialhna hang uh ahi hi. Tua bang dan hi lo hi. Late 112 : 8 sungah, Pasian alau thei te a gen na ah, “Amah lunghimawh loin om hithiat a, amah a langpangte gu alzawh ma tengin lau na tawh kisawh kha lo ding hi”(ESV). Hih Laisiangtho mun tungtawn in, “guazawh mateng in lau lo ding a”, “gualzawh khit ciangin lau san ding” hi cihna a hi ding hiam? Mang. 2 : 25 sungah Zeisu in, “Ka hong pai matengin na neihsa teng uh na lenkip ta un” ci hi. A cihnop na ah, a hong pai khit ciangin neihsa teng lenkip a kul nawnlo mah ding hiam?

Thukham tawh kisai in zong, Topa Zeisu a hong pai na tawh kituak in a bei ding hi lo hi. Thukham a om lai sung teng, mawhna in bang hiam cih thukham in hong lak khia ding hi. Paul in agen nop thu in, Christ ahong kum na in, mihing te tangthu a dingin a lamdang kikhel na lianpi hong piang ding hi a ci, na hi hi. Thukham in asep theihloh thu te Christ in a hong sem ding hi. Mawhnei te tungah mawhmai sakna a piak na hangin dik tan theihna ngah ding uh a, amau sunga om khasiangtho tawh amau sunga om Thukham kalhna khempeuh tangtung sak ding uh hi (Rom. 8: 3, 4).

Topa in kei a dingin, hi thu khat, hua thu khat ahi zongin thukhat peuhpeuh hong bawlsak khin bang hi zen leh, ama tungah upkhialhna ahi zongin dotna atuamtuam te a hi zongin ka nei nawn kei ding hi ci in na ngaihsun kha ngei hiam? Sinai mual dawn a thupiang, vangliat na tawh a kidim Pasian vaihawm sakna Isreal mi te in mu in thei mah ta le uh, anung ah bang thu piang veve hiam? Hih thu tungtawn in Upmuan na I cih in bang hi a, koi ci bangin kemcing thei ding I hi hiam? (Kol. 2: 6).

NINGA NI (THURSDAY) August 3
KICIAM NA’ VANGNEIH NA

“Amah pen Israel mite tawh gamlakah a ompa hi a, Sinai Mual tunga ama kiangah thu a gen vantung mi leh i pute tawh a kikhawlpa ahi hi. Eite tungah hong gensawn dingin Pasian kiang panin a tul ngeilo thu a ngah ahi hi” (Sawl. 7: 38).

Gal. 3: 19, 20 sungah, Paul in, Thukham tawh kisai agen beh na ah, thukham in hehpihna kamciam’ tawh kisai beisak lo zia a hih zia a hong kimu thei hi. Hih thu tawh kisai theih dingin a thupi khat in, a langpang sia te’ san dan in a piang thei bang ding hi leh, mawhna sung pan suahtak theihna dingin Pasian hehpihna hang’ a hi lo, thukham zuihna tungtawn pan in hong hi mawk leh, a tawpna ah suahtak theihna dingin lampi om thei lo ding hi.

Gal. 3;19, 20 sung thu Paul in agen na tawh kisai, a kicing in I telcian loh hangin, a deihna bulpi leh a theih huai thu in, Thukham nasep’ in hehpihna kamciam te’ a panpih thei bek hi zaw hi. Tua thukham in Vangtungmi leh Moses kikaal palai hong sep sak hi. Vantungmi leh thukham piakna tawh kisai in, Paikhiatna bu sungah a kidawk loh hangin, mundang dang te ah kizopna a nei hi (Thuhilhkik. 33:2; Sawl. 7: 38, 53; Heb. 2: 2). 1 Tim. 2: 5 sunga a gen, “kilem sak”, “palai”a cih in, Khris Zeisu a gen nuam ahi hi. A tunga Gal. 3 sung a gelh lai takin Paul in, Thuhkna. 5: 5 sung lungngai kawm hi kha ngel ding hi, Tua sungah Moeses in “Note’ tungah Topa’ thu a gen dingin Topa leh note’ kikalah ka din’ laitakin” a cihna tungtawn pan in, “kikaal ah” a cih in kammal “palai sem” cihna tawh a kibang a hi hi. 

Sinai mual dawn ah, vanglian takin Thukham a kipiak laitak in, sim zawhloh Vangtungmi tampi tak te kihel uh a, a thupi mahmah Thukham pia pa in mihing ahi Moses tung ah tua thukham na pia sawn hi. Tua tawh a kileh bulhin Abraham tung leuleu ah Pasian in ama kamciamna te’ direct in pia hi. (Tua ahih manin thu-ummi khempeuh a dingin, palai nasep kisam nawn lo hi). Thukham in bangzah takin a thupit hangin Hehpihna tung tawn panin, Upna tawh Gupkhiatna ngah theih na mun ah laih theih ding, hehpihna tangin zat theih ding hi tuan lo hi. A hi zongin, Tua Gupkhiatna thu tawh kisai a lamdang kamciam na , I tel theih zawk na dingin Thukham in hong theisiam sak semsem hi. Pasian leh Abraham ki maingat in kamciam kipiakna tawh kisai a kizop dan uh gen in. Pasian tawh tua banga kizopna hanga manphatna gen in. (Pian. 15: 1 – 6; 18: 1 – 33; 22: 1 – 18 sung sim in).

______________________________________________________________________________

Laisiangtho sung panin, Pasian tawh direct kizom na te ngaihsun in, Eden huan sunga Adam, Eve leh Pasian (Pian. 3.), Jacob kahlei (Pian. 28), Damascus lamdung ah Paul (Sawl. 9), Amau danin kimaitang ngatin kizopna I neihloh hangin Pasian tawh koici bangin kizop na nei thei zel na hiam? Pasian tawh kimuh khopna anei thei Abraham nuntakna dan mah in, na nuntakna sungah Pasian tawh a kimu khawm thei dingin ahong khaktan bang te hiam? Ngaihsun in la, tua bang maipha ngah theih na dingin a bang ci kalsuan na ah I kikheel hong kul ding hiam?

KIGIN NI (FRIDAY) August 4

SINBEH DING: Sila suahna hangun Isreal te in, Abraham tung tawn in Pasian kamciamna te leh, tua thu tawh kisai phawktheihna te mangngilh ta uh hi. Ama vangliatna leh ama hehpihna a lahkhiat theih na dingin, Pasian in sat tanna Egypt gam pan amau te in, amah a it theihna dinguh leh amuan theihna ding un a sapkhiat ahi hi. A mau te in vangliatna bangmah aneih lo zia, a vanglian Pasian huhna bek kisam uh a hi zia, a phawk theihna dingun, suahtak theihna ding lampi a om vet lo, gal te in thah dingin a delh na uh, San Tuipi mun ah a paipih khit ciangin amau te a honkhia hi. Tua a hih manin, amau te in Topa tungah itna leh lungdam na tawh Amah tungah muan theihna hong nei ta uh hi. Leitung  salsuahna pan in tankhia pa cih tawh kizopkhop theihna hong nei thei ta uh hi”.

A hi zongin a maute lungsim sungah tua zah sangin a vangnei thumaan a theih na ding uh kisam lai hi. Tua in, Gumkhiapa a kisap na uh ahi hi. Milim biakna leh lungsiam siatgawp na sungah a nungta ahih man un, Pasian sianthona phawkin a nei zo kei uh hi. Amau te lungtang sung in mawhnop na tawh kidiah lai uh ahi manin, Pasian Thukham tungah thuman theihna ding lungsiam maan anei zo kei uh hi. Tua khempeuh te amau te in a kipuahphat theih na ding un asin uh kul lai ding hi.” Ellen G. White: Patriachs and Prophets, p. 371.

“Sinai mual tunga vangliatna tawh a kipia Pasian Thukham in, thukham a palsat mimawh te

tungah mawhsakna thupuak a ki tangko khiatna ahi hi. Tua thukham in mawhna te pholak khia thei bek a, ahi zongin mawhna sung pan in, mawhmaisak theihna ding leh tatkhiat theihna dingin vangliatna a nei kei hi.” The Ellen G. White comments, The SDA Bible Commentary, vol. 6, p 1094.

KIKUP DINGTE:

1. Kiciam na tawh kisai in, kamciam hong pia khatin, tua a kamciam a pelh man in, na lungsim a nat ngeungau hun a om ngei hiam?

2. Kamciam piakna a mi a tuamtuam a om na sungah,(a) A kamciam na tawh kizui in a tangtun te, (b) Tua a kamciam a lem loh man in thudang khat tawh a tangtun sak veve te cih leh, (c) Kamciam pia na pi in cikmah hun in a tangtun ngeilo te cih bangin kimu thei hi. Mikhat in tua a kamciam na hong pelh ciangin na muanna leh na ama tungah na lungsiam puakzia koi dan hiam? Pasian in ahong kamciam te bang ci bangin thupi seh in muang thei ding?

3. Kiim leh paam siatna sung lauhuai dinmun ah, kidiah khak luatna hangin, Pasian hong piak thumaan muhtheihna pan in lam I pial loh na dingin koi ci lampi tawh kidawm thei ding I hi hiam?