Thuciam Thak Nuntakna

  

Lesson 13                                              *June 19–25

 

Thuciam Thak Nuntakna

 

 

Sabbath Nitaklam                                       June 19

 

Tukalsung Simding: 1 John 1:4; John 5:24; Rom. 3:24, 25; 2 Cor. 5:21; 1 John 4:16;  Mang. 2:11; Mang. 20:6, 14; Mang. 21:8.

 

Kamngah: “A nungta maimai bek hilo in, nuntakna cingtaak a neihtheih nadingun a hong pai ka hihi.” (John 10:10).

 

          Tu quarter bup thuciamna i sin uh a, a tel baihpen leh a kicianpen dingin kizem a, a thubulpi bel Pasian in Mawhna panin hih bangin Kong honkhia ding hi a cihna ahi hi.

          Hong piang hamphatna bel, thuciam kamciam ahi lei thaka tawntung nunna hi a, tuhun in tua thuciam pan thupha lamet pah ding hi lo hi. Topa in ei nuntakna hong don mahmah a; a hoihpen hong deihsak hi. Thuciamna cih pen, nang hiteng hong bawl inla, ke’n tuabang teng hong pia ning ci a kithalawhna hi lo hi. Thaman pen piakkhong hi a, tua thuciam sungah upna tawh a lut mi peuhmah tu leh a tawntungin kizopna hoih neiden dinguh hi.

          Tukal sinna pen, thuciamna gah nunung pen hi a, tu le tu a thupha, Pasian kamciamsa Ama’ hehpihna hangin ei lungsim sungah hong tungsuk in, kongkhak hong kiuh i zak ciangin, kihonthei hi. Tukal sung panin thupha tampitak mah mukha ding hihang. Ahih hang hihte pen a kipatna hipan a, cikmah in tawpngeilo ding hi. 

 

Tukal Enpak: Banghangin lungdam ding? Tua kamciamna bang bulphuh in lamen ngam ding? Mawhna pan hong suaktasak thuciamna in abang hi peuhmah hiam? Lungtang thak in bang a cihna hiam?

 

Sunday                                                                   June 20

Lungdamna       

           “Note lungdamna a cingtaak theih nadingin, hih lai ka hong gelh uh hi” 1 John 1:4.

          John laigelhte sim in. Kammal ngeinate mah tawh, thuciamna mite hamphatna lianpi pen, lungdamna hong kamciam ci hi.

          Christiante in, lawpna bekpen upna hi lo kici tawntung a, lawpna khengsuak in a taktak ban ding i cihcih ahi hi. Lawpna, thanopna leh omzia neikei mawkleng lah mihing kihi-lo zel ding hi. Lawpna pen nialtheih zong hi tuanlo a; telsiam ding kisam, kul leh kisam bangin, mun i piaktheih ding leh kep siam ding kisam hi. Tua lawpna nial mawkleng mihing i hihna a nial ki hi ding hi (A kual khat a bem cihloh ding). Hihlai ah lawpna bek hi lo, lungdamna hi a, tuate cingtaak ding hi. Lawpna pen nial luatloh ding himai lomaw?

          A tunga Lai Siangtho munte apatna lam simphakik in. John in Christian masate tungah amau lungdamna a cingtaak theih nading lametna tawh bang lai gelh hiam?

………………………………………………………………………………………………………………………………………………………………...…

          John pen 12 lakah khat hi a, Khazih in a leitung nasep kum thum leh alang akipatna ngiat panin a om ngiatpa; Zeisu’ nasep lamdang khempeuh ah teci hi (Mel kilamdanna, Gethsemane leh singlamteh ah amah om hi). Mitmuh teci ahih manin, tua thu gen dingin kilawm mahmah lel hi.

          Kidop ding khatah, amah kibulphuh zawlo a; Zeisu in nungzuite ading a sepsak amauteng leh Pasian tawh kikholhna hoih a neihtheih nading ahi hi. Zeisu in, Topa tawh kikholhna kip i neihtheih nadingin lampi hong honsak khinzo hi. Tua kikholhna kip in lungdamna hong omsak hi. John in, a gen Zeisu’ tangthu pen thumaan thutak ahihlam theisak nuamlai hi (amah’n lawng, mu, sin in za-ngiat hi). Tua ahih manin amaute’n zong, hong it a, a Tapa sihlawh liangin hong kipia Pasian tawh lungdamin kikholhna sungah lutsak nuam mahmah hi.

          Thu khat panin, John in ama’ theih teci a pang ahi hi. Nang leh Zeisu na kikholhna teci pan ding na nei hiam? Mi khat in Topa sungah a lungdam theih nadingin, John genbang in, nang, bang genthei ding na hiam?

 

Monday                                                           June 21

Mawh Baanglo

           “Tu in Khazih Zeisu tawh kipawl in, a nungta mite pen mawhna thukhenna tawh kipelh uh hi.” Rom. 8:1.

          Nungakno khat khasiathuai takin kithat napi, a that pen kithei zolo hi. Palikpa in, thaang khat hong kam a, microphone neucik khat tuanu’ hanah va koih hi. Kha tampi khit, nitak khat, tangvalno khat tua hanah hong pai-in kapkawmin tua nungakno kiangah mawhmaina ngen hi. Palikpa zong, tua pa kammal mahtawh mithah mawhna ngawh theipah lian hi.

          Tua tangvalpa hanah pai dingin kuan sawl hiam? Mawhna lo, bangdang hiding?

          Tua mahbangin eite’n zong, i sepkhiat khat pen, tua tangvalno mahbangin siahuai lualo dingin ngaihsun thei hi hang. Mawhnei vive hi hang, i maizum mahmah dingte, bawlhuai i sakloh pipi mah kibawl tantan hi.

          Zeisu’ sisan leh thuciam thak adingin lungdam unla, kuamah mawhna zumna sungah ki omcip zolo hi. Tuni Lai Siangtho mun mahbangin eite lang khatah thukhenna om nawnlo hi. Thukhen Mangpipa in mawhnei hong ci nawnlo a, mawhbaang kisakloh theih nadingin hong koih hi.

          Hih munte in Rom. 8:1 tel phat nading bang hong huh thei hiam? John 5:24;  Rom. 3:24, 25; 2 Cor. 5:21.

          Thuciamna sungah kikholhkhopna kamciamte lakpan khatin, mawhna vangikpi nuaiah ki omom nawnlo pah hi. Thuciamna sisan hangin, ei – Pasian tawh kikholh ding a teelte in, upna, kisikna, thumanna lam i teelzawk ciangin, vangikteng hong zaangpah hi. Satan in eite pen migilo, misia, mawhnei a Pasian’ maiah santaaklo ci in i bil pan hong huau ciangin, Zeisu in gam lakah, Satan tawh a kimaituah laibang hipah hi. Lai Siangtho sungpan a hoihpen munin Rom. 8:1 ahi hi. Tua pen mawhna in eite pumpi hong sukha zolo cihnopna zong hituanlo a, thuciamna sungah Topa tawh kizopna kip i neih manin, mawhna hangin thukhenna nuaiah om nawnlo cihna ahi hi. Zeisu in eima leibaa hong piaksak a, Pasian’ maiah Ama’ sisan suangin hong dinsak in, eima mawhna mun ah, Ama’ dikna hong pulaksak hi.

          Na mawhna ombangbang hong kimaisakna in, nangma nuntakna sungah bang ki lamdanna piangsak hiam? Tua in nang tungah hongmawh midangte tungah na gamtatzia ding bang hong hilh hiam? Tua mite tawh na kikholhna bangzah hong huzaap zo hiam?

 

Tuesday                                                        June 22

Thuciam Thak leh Lungtang Thak

          “Na upna hangun note lungsim sungah Khazih hong tengin, itna thu ah zungthuk kha in bulkip na neihtheih na’ngun thu ka ngen hi. Tua hileh note in Pasian’ mi ahi midangte khempeuh tawh Khazih hong itna bangzah takin sau in zai a, bangzah takin thukin sang ahihiam cih na thei khawm ding uhhi.  Note in Khazih hong itna thei in, Pasian thu a cingin na theih nadingun,” (Eph. 3:17–19).

          Tu quarter sinna masate sung pan, thuciam thak pen Topa in i lungtang sungah a thukham hong koihna (Jer. 31:31–33) ahi hi. A thukham bek hi lo, tuni sinna teng mahmah ah, Khazih in hong hihsak vive hi a, Amah leh a thukham in kizomkip hi. Khazih thukham in i lungsim sungah a om ciangin, Khazih zong i lungsim sungah hong teng a, tua ciangin thuciamna hangin hamphatna dangkhat ngahbeh leuleu hang a- tua pen lungtang thak ahi hi.

          Banghangin lungtang thak i kisam hiam? Lungtang thak aneite bang kikhel uh hiam?  

          Tuni Lai Siangtho mun simkik in. Paul in itna bulphuh in thugen a, “zungthuk kha in bulkip nei ding” hong ci hi. Hih kammalte in kipkhona leh itna sungah om tawntung ding hong ci hi. I upna in Pasian itna leh midangte itna sungah a zungkhak keileh a mawkna ahi hi (Mate 22:37–39, 1Corinth 13). Tua itna in awngthawlpi sungpan hong luangkhia hi lohi. Zeisu tungtawnin i ngah khak Pasian’ itna a lengkik sak ihi bek hi. Tua panin i nundan hong kikhel a, lungtang zong kikhel in, mithak, ngaihsutna thak, lunggulhna thak leh ngiimna thak hong neisak hi. I lungtang hong khelsak a, midang hong itsakna pen, Pasian’ hong itna a lengkiksak bek i hi hi. Paul in “Pasian’ hoihna tawh kidim” a cih mahbangin a vekpi ahikei phial zongin alanglang beek acihnopna ahi hi.

          1 John 4:16 simin. Ephet 3:17–19sunga Paul laikhak tawh koici kizop ding hiam?

          Tuni Lai Siangtho munte simpha in. Nang tungah tua kamciamte a picin theih na’ngin bang na hihkul hiam? “Pasian’ hoihna tawh kidim” theih nading bangteng kikhel ding na hiam (Eph. 3:19)? Na kikhel dingteng gualpha in. Nangma ading leh a piantheihleh na khanpihte ading zong gualun. Khat leh khat koibangin kihuh ding na vua leh?

 

Wednesday                                                     June 23

Thuciam Thak leh Tawntung Nuntakna 

          “Keimah in thawhkikna leh nuntakna ka hi hi; Kei hong ummi peuhmah a sih hangin nungta ding hi.” John 11:25, 26.

          Tawntung nuntakna in hun nih nei hi. Tu laitak hunin thu-um mite’n tua tawntung nunna ciamkha uh a (John 10:10), tua sungah leitung nuntak sung mahmah adingin kamciam tampi takmah hong pia hi.

          Mailam hun a bel tawntung nuntak hun hi a, pumpi mahmah tawh thawhkikna (John 5:28, 29; John 6:39). Mailam hun ading hipan mah taleh, na khempeuh in manphatna a neisak amah hi a, Christian khempeuh in a lam-etuh ahi hi.          Tuni Lai Siangtho mun simkik in. Zeisu in bang ci hiam? Tawntung nunna koiah om maw? Amah a ummite siphial mahleh nungta ding cih kammal na koici tel hiam? Mangmuhna 2:11; 20:6, 14; 21:8.

          Eite, si mah taleng, Zeisu in, hih sihna pen ihmutna hi cibek a, thu-ummite tawmvei sung a tawlngakpakna hibek a, thawhkikni ciangin khanglo kikding hi. Khazih hong paikik ciangin, Ama’ sung a simite sihtheihlohna silhin thokik ding a, a nungta laite mitphiatkal in sihtheihlohna kisilhsak ding uhhi. Khazih neihsa ahi asite leh anungta laite khempeuh in, a kibang thawhkikna pumpi nei ciat ding uhhi. Pasian’ mite tawntung nunna in tualai pan kipan ding hi. Eite in hanah a beisuak ding i hikei a, a bei theilo nuntakna tawh nuntakna thak i ngah ding uhhi.

          “Khazih in ei tawh pum khat i suaktheih nadingin sakhat hongsuak phot hi. Tua pumkhatna in eite han pan hong paikhiasak ding a, Khazih thahatna lelbek hi lo in, upna hangin, Ama’ nunna in eite nunna hongsuak hi. Khazih pen Ama’ dinmun taktak mu in, a lungtang sungah a sang mite in, tawntung nuntakna a nei uhhi. Khazih in Kha tawh eite sungah hong teng a; upna tungtawnin lungtang sungah a sangte in, tawntung nunna kipatna ahi hi”—EGWhite, The Desire of Ages, p. 388.

          Tawntung nunna pen koibangin nopsaklawh thei ding nahi hiam? Thukhat pan, tua kamciamin nang bang hong sepsak hiam? Tawntung nunna kamciam in na nisim nunna sungah bang hamphatna om cih gelhsuk dihin. Hih lametna leh kamciamna pen, a it mahmah a si misi nei khat kiangah koibangin hawmsawn thei ding na hi hiam?

 

Thursday                                                      June 24

Thuciam Thak leh Sawlna 

          “Note pai unla, midang khempeuh Keima nungzui suak sakin, Pa’ min, Tapa’ min, Khasiangtho’ min tawh tui sungah na phum un. Note tungah ka hong gen thute khempeuh a zuih nadingun na hilh un. Hun bei dongin note tawh ka hong omkhawm ding hi.” Mate 28:19, 20.

          Africa khanglam pan laikungpu Laurens Van Der Post in, leitung khempeuh ah mihingte pen, “A mawkna vangikpite” adingin nasep hahkat ngeingai uhhi cihi. Mihingte in nuntakna a khongin ngah ahih lamuh thei napi in, bangci hih ding cih thei mello uh a, hong piakkhong a deihna bulpi zong thei mello uhhi. Tua thu in, mikhat kiangah laibu tuamtuam tawh akidim laibusaal khat kipia a, laisim nuamlote bek kipaisak in, laibu teng pen mei-tawhna peuh in a zang tawh kibang hi. Na manpha pipi tua bang a phengzatna in bangzahin siahuai hiam!

          Thuciam thak Christiante adingin, hahkat ngeingai a kul hihetlo hi. Amaute bang hi lo in, a kikhailum a thokik Honpa, mi khempeuhin tawntung nunna a neihtheih na’ngin, amau mawhna hangin a sipa lungdam thu atheite in lungdamna nei uhhi. Mate 28:19, 20 sunga kiciantakin hong sapna ngaihsun leng; thu-ummi peuhmah in sawlna (mission) leh nuntak sungteng sepding ahi Zeisu Khazih lungdamna thu leitung khempeuhah puak ding thupiak anei uhhi. Hamphat dan! Leitungah i sepleh bawl khempeuh a tamzaw hih leitungtawh beikhawm lel ding hi. Ahih hang, mi tungah i lungdam thu tangkote in a tawntungin kipkho ding hi.       

          Tuni Lai Siangtho munte sungpan zongin. Zeisu in, mi khempeuh mapangin sep ding bang hong vaikhak hiam? Khazih in hong thupiakna i sepzawh nadingin bang thahatna hong piakding hong kamciam hiam?

……………………………………………………………………………………………………………………………………………………………………

          Thuciam thak Christiante ading thu kician sawlna khat Topa in hong pia hi. Kuakua i hi a, koibang nunna i nei, bangzah ciangtanh i hiphial zongin mun khat teitei mapang thei hi hang. Na khatpeuh nasem khin hiam? Nasepbeh theilai ding hiam? Na khan bupun koibangin nalianzaw tawh mapang thei ding cih kikum un. 

 

Friday                                                                     June 25

 

Ngaihsutbeh ding: EGWhite, The Great Controversy sungpan “God’s People Delivered,” pp. 635–645;  Steps to Christ sungpan “Rejoicing in the Lord,” pp. 115–126, simin.

            “Pasian’ Tapa Siangthopa in, a thuak dingin ama’ mawhna leh dahna bangmah neilo a: mite’ dahnateng a thuaksak hibek hi; tua mawhna khempeuh ama’ tungah kisuan mikmek hi. Pasian’ hong lainatna tungtawnin mihing tawh hong kizom a, mihingte aiawh in mawhnei bangin thuakding hong kipia hi. Eite’ mawhna hangin akihong kuam thukpi ensuk in, mihing leh Pasian kikal ahalsak tua kuamthuk kantan in lei hong dawhsak hi”—Ellen G. White, Bible Echo and Signs of the Times, Aug. 1, 1892.  

            “Sanggam aw, na hih bangin mawhneipi mahin hong pai in. Na mawhna vangik Zeisu suan inla, upna tawh Ama’ hoihna muangin. Hong hehpih lai-in hong pai in; na mawhna pulak inla, lungsim kitamin hong pai lecin, Pasian in hong maisak ding hi. Hun dang zongzong ke’n. Tu in hehpihna tawh hong sapna aw ngai inla, sihna pan thokhia dingin Khazih in khuavak hong pia nuam hi. Hun i neih khempeuh muh nailoh mailam leitung thak tawh kizom hi. Hong hehpihna hong piak lai-in kiphatsakna leh uplohna tawh nial nawnkei in. Tua bangin na nial leh ‘anlak hun khengta, khuakhal hun lah beita, eite’n lah gupngah khalo’ ci in na tau ngaungau kha ding hi”—Ellen G. White, Testimonies for the Church, vol. 5, p. 353.

 

Kikup ding Dotnate:

1. “Eite khempeuh vannuai tawh i kizom gige hi,” ci in Francisco José Moreno in gelh hi: “pilna zong i neikei a, thahatna zong i neikei hi; lungmuanna omlo hi. Launa bek i thalawh hi” ci hi.—Between Faith and Reason: Basic Fear and the Human Condition (New York: Harper & Row, Publishers, 1977), p. 7. Ephet3:17–19 tawh saikak in. Aki lamdanna uh kikum dihun.
2. Zeisu a ummite Pasian in lungdamna hong kamciam hi. Lungdamna leh lungnopna a kibang hiam? I lung nuam tawntung ding maw? Ahih keileh, Christian nuntakna ah bang kisam ahia? Zeisu’ nuntakzia in hih dotnate na dawntheih nading koibangin hong huh thei ding hiam?
3. (Eph. 3:19) Sunga “Pasian’ thu a cingin thei” cih pen kikum kik un. Bang acih nopna hiam? Eima nunna ah ki phukha thei ding maw?

 

THUKHUPNA: Thuciamna cihpen theology peuh himawkmawk lo hi; Khazih in eite hong hotkhiat nadingin, hong kizop-pihna, tuhun leh hong paikik niciangin, a lamdangin hong hamphat sak nading cihte ahi hi.