Sih Kitelcianna nanei nai hiam?

 8.       Sih Kitelcianna nanei nai hiam?

Roger Pech, 52 

Mexico

May 22

 

Mexico gam Villahermosa khuapi a, lupna 40 eipawl zato ah, cinate thungetsakin Chaplain Roger nisimin vapaiden  hi.

Nikhat, zunkhum nei, kum 80 gual, hong lumthak José kiangah Chaplain Roger hongpaikha hi. Tuapa gim mahmah hi. Chaplain Roger in José thu pawlkhat theingei hi. Tua putek pen a beisa kum 20 sungbang eipawl ahi a tapa tawh a omden  hi a, tuapa zong a pa’ lupna gei ah ding hi. A tunu inzong tua zato ah siamah   sem hi.

        Effort kibawlna ah zong, Lai Siangtho sinna, tua putekpa’n a nei ngeikhin ahi hi. Eipawl upna thei napi, a lungtang Jesu piak dingin khensat ngei mahmah lo hi. Chaplain Roger in kamkhumtak le kician takin hopih  hi.

“A si dingin na kigingkhol zo hiam? Na mawhna hong ki maisak khinzo hiam?  Vantunggam tung dingin na kiging khinzo  hiam?” ci’n dong hi.  “A si    tading kahihna kithei mah ing. Ahizongin ka kiging naikei hi. Ka mawhnate hong kimaisak  in ka um naikei hi” José in ci  hi.

        Tua khit ciangin a tapa le a tunu’ kiangah, SDA zato ah a puak manun lungdam a ko hi. Tua banah taksa le kha damna a piakmanin Pasian’ tungah zong lungdam a ko hi. “Na innkuanpihte’ tungah hoihtakin hong kep manun lungdam na kohtheih pen hoih mahmah hi. Na innkuan tungah lungdam takpi in, Pasian in hong kep manin na lungdam takpi leh, banghangin na lungtang Jesu na piakding khensat theilo nahi hiam?” Chaplain Roger in ci hi.

Khrisian pawlpidang khatah a nuntak sung khempeuh a om ahihna José in  gen hi. “SDAte’ effort bawlna ah ka tunu tawh paikhin kahih manin adang sepbeh  ding a om nawn loin ka ngaihsun hi” ci hi. Tua ciangin Chaplain Roger in José’ mittang en gige hi. “A si dingin kigingkhol nai loin, na mawhna hong kimaisaklam  thei nailo nahihleh, Effort paibek hiloin na sepding omlai ding hi. Na kisaplai pen Jesu na nuntakna na ap nailohpen ahi hi” ci  hi.

José inzong hong ngaihsun dedu hi. Tawmvei khit ciangin, “Ka kisap taktak tua hikhathei mah inteh” ci hi. “Ka pa’n bel Pasian thei ta. Lai Siangtho zong tamveipi sin ngei khin in, Effort zong tamveipi ngai khin hi. A kisap pen khensatna neih ding bek hi” ci-in a tapa, José Jr. in gen  hi.

        “Tu laitak pen khensat hun dingin a hoihpen hi. Hun hoih ngahkik nawnlo khathei ding hi teh. Na khensat nak leh kei mahmah in kong tuiphum ding hi” Chaplain Roger in ci hi. Tua nitakin José in tui kiphumna tawh Jesu ki-ap dingin khensat ta hi. Tui kiphum zawhna ding thatang Pasian in a guat nadingin Chaplain Roger in thu ngetsak hi.

Azing ciangin Chaplain Roger, José khansungah va hawh hi. Tampitak na nuamtuam khin a, tui kiphum nuam laisam hi. Roger in zong tuiphum letmat tungah    a kisamteng a gelh kawmin, a kam mahmah tawh a upna a kiciam nadingin José a sawl hi. “Ka um taktak hi” José in ci  hi.

Zato pan a tuahkhit kaalkhat khit ciangin a ki tuiphum hi. A ki tuiphum ni in José lungdam mahmah hi. Chaplain Roger’ a nohset kawmin, “Ka kamciam ka tangtun hi” ci hi. Tua khita kipan Sabbath simin José citak takin kikhawm den hi. Tuazawh kum 3 khit, kum 83 a phak kum, 2019 in a sita  hi.

Chaplain Roger in zato lum cinate Jesu’ itna sungah a piangthak amuhte lakah José pen khat ahi hi. Ahizongin José tawh a ki thuah bangin adangte a kithuahpih om lo hi. José in Pasian thei khin pipi in a tuaci omlam a theih ciangin vei phadiak hi. Chaplain Roger in Ellen White’ gelh “The Ministry of Healing” p. 143 sunga, “Khris’ zatdan” zui in mite’ kiang vapha  hi.

        Chaplain Roger in, “Zato chaplainte bek cinate tawh kithuah hi lo hi. Leitung buppi pen mawhna’ natsak cinate tawh kidim khin hi. Sep masak penpen dingin a hoihpen in, amaute’ gen thute lainat takin ngaihsak ding ahi hi” ci   hi.

        “Cinate in a sunga a puak vangikpi khatvei hong suahkhiat nak uh leh amaute in i sawlnate hong zuih nadingun baih mahmah pah hi. Tua khit ciangin Jesu’ thu na gen thei ding hi” ci hi.

        Tu kuata sabat 13na i mission sumpi khenkhat tawh Mexico, Villahermosa a, Southeast Hospital’ adingin inn khat i lampih ding hi. Chaplain Roger le a pawlte mi 7te kipiak khiat nasepna ah i sumpite tawh nong panpih manun lungdam mahmah hi.

 

 By Andrew McChesney