Barnabas Taangthu (Part 1)

 Barnabas Taangthu (Part 1)

        Hellenic Jewish ahi a Nu leh Pa te'n amah pen Joseph ci uh hi. (Joseph, Ioses, Joses) cih bangin a min kigelh hi. Lungdamna thu hangin aneih khempeuh zuakkhia-in Jerusalem aa-om nungzuipite khutah vapia hi. Tua ni a kipan kamsangpa tapa cihna ahi barnabya min kipia ahi hi. (Acts 4:36)

  Laisiangthak Sunga Barnabas: Barnabas pen Christian pancil mimasa lakah kihel hi, ci'n Sawltak laisiangtho leh Paul laikhakte sungah kiciamteh hi. Barnabas pen Antioch pawlpi keem sia masapen ahi hi. (Acts 13:1) Israel suan Levite siampinam ahi hi.  Jewish biakinn ah Rabbi kici thuhilh sia seem hi. Cyprus gamah khangkhia hi. inn leh lo leitang nei hi. (Acts 4:36-37) Tua khempeuh zuakin Jerusalem aa-om nungzuite khutah pia hi. 

  Paul hong kikhel ciangin Jerusalem hong pai a, Barnabas in samin nungzuite tawh kimusak  hi. (Acts 9:27). Easton genna ah , Paul leh Barnabas pen Rabbi Gamaliel  sangah Laisiangtho sinkhawm uh hihtuak hi. Christian sung tungtuak uh a, naseem khawm uh hi. Antioch khuapi ah mitampi Christian suaksak hi. Cyprus gamsung pawlpi phutpa-in kiciamteh hi.

  Antioch khuapi-ah Lungdamnathu lawhcing mahmahin khangto hi. Jerusalem phualpi panin pawlpi keem dingin  Barnabas kipaisak hi. Tarsus khua dongah gamthak phulin hong hi. Tua munah Paul leh Barnabas kithuahin naseem khawm uh hi. Mizawng huh nading kipiakkhiatna sumpi puakin anih un Jerusalem paikhawm uh hi. Acts11:25,26. [ AD44 ]

  Jerusalem pai mission naseem a paikik ciangin John Mark tonpih uh hi. Asia Minor teng nawk ding a kipaisak ahi hi. Cyprus ah lut uh hi. Pamphylia, Pisidia, Lycaonia khua teng bansotin nawk uh hi [Acts 13:14.] Sergius Paulus tawh lungdamnathu kinialna hangin Barnabas sangin Paul kipahtawi zaw hi. [Acts13:9] Saul tangin Paul kinakzat zaw tetek hi. "Barnabas leh Saul" kici nawnlo-in (11:30, 12:25; 13:2.) tu-in "Paul leh Barnabas" kici zawta hi. (13:43, 46,50; 14:20; 15:2, 22, 35) Barnabas pen (14:14 leh 15:12,25) sung bekah a masa in kikoih hi.

  Barnabas pen Jerusalem Council lam tawh kibulzop zaw hi. Paul pen missionary thuhilh siapi ahi hi. (13:16;14:8-9,19-20). Paul thugen siam ahihmanin, Hermes pasian min pia uh a, Barnabas pen Zeus pasian min  pia uh hi. (14:12). Jerusalem hong pai ciangin Gentile thu-umte tampite pen Nungzui Jews Christian te in Christian sungah a san nadingin kum uh hi. Gentile mite vunaat kullo-in a san nading leh gawlmek sa leh dawibiakna sa nelo dingin thupia hi (Acts15; Galatian 2). Tua thu khempeuh zumpi ngak James, Peter, John kiangah report pia-in khensatna honkhat hong khahkhia uh hi.

Tua khit ciangin Antioch lam zuankikin tawlpi khat om uh hi. Mission munthak phu dingin pai sawm a, Barnabas tawh kithuah nuamin Paul in gen hi. (15:36). Barnabas in John Mark zong tonpih nuam hi. Abeisa hunin John Mark in taisan ngei ahihmanin Paul in deihlo hi. (15:37-38). Tua thu hangin Paul leh Barnabas kikhen lawh uh hi. Paul in Silas tonpih a Syria leh Cilicia lam ah pai uh hi, Barnabas leh John Mark kikhawlin Cyprus lam manawh hi. (15:36-41). Pawlkhatte cih bangin John Mark pen Barnabas  sanggam hilo hi. Mi zawngkhalte pantahin khoi nopna lungsim nei hizaw hi.

Antioch pen Rome Empire khuapi lian thumna hi a, Syria gamkuam(province) ahi, tuhun Antakya, Turkey gamtengah khuapi lianpen ahi hi. Thu-umte Christian min a puak masakna mun pen Antioch pan ahi hi. Lungdamna thu puakin Peter a paina mun ahi hi. Sumzuak mihaute omna gam ahih manin, Jerusalem kialpi lai-in nakpi takin Christian te support zo uh hi.

  Council of Jerusalem: Barnabas pen Council of Jerusalem sungah kihel hi. Gentile minamte sanding kilawm hiam kilawmlo hiam, cih tawh kisai-in Israel Jews Christian te buaipih mahmah khat ahi hi. Paul leh Barnabas te in vunaat kullo-in san dingin thusung uh hi.

  Martyrdom: A nuntakna piangam Christian galhang misiangtho lakah Barnabas zong kihel hi. Ama tetipanna tungtawnin mipi kilok a, Jews minamte omna biakinn khempeuhah Zeisu in Messiah hi, cihthu bek kigen hi. Jews minamte in kaikhia in, bawlsia a suangtawh denglumin that uh hi. A lawmpa John Mark in a luangphamin gui hi. Tua pen AD-61 kum pawl ahi hi. Taangthu sungah Barnabas tampi a om hangin, Gospel tawh kisai nungzuipite tawh kikhawl Barnabas hikhin lo uh hi.

? Pr Thang Siangh   

             A Lawhcing Christian Suah Theih Na’ng

1.  Suakta Takin Topa tawh Hun Zang In. Ih neutung pana ih khankhiat pih ahih mah bangin nisim in Pasian kammal pen minute 15 sung sim in, minute 5 sung thungetna in zang ding hi hang. Ahi zongin, Pasian hopihna leh Khasiangtho lawnna ih ngah ciangin tua sanginba tamzaw, Topa tawh na zangkhawm in. Hun kin lua hi lo in, suakta takin zangh in.

2.  Tawlngak Hun nei in.  Piangsakpa Pasian in ni guk sung hih leitung a bawlkhit ciangin, a ni sagih ni in tawlnga-in thupha pia hi. (Pian. 2:2-3). Ahi zongin a tawl man leha gim man hilo (Isa. 40:28) in, ei adingin tawlngak hun neih ding hong hilhkhol ahi hi. Ih nasepna pan gim in ih tawl luat ciangin, tawlngak hun zangh kei leng, ih lungsim zing in, bing cip hi. Tua hi a, Recreation ci-in thaksuak sak hun neih ding kisam hi.

3.  Lungdam Thei In.  Canadian laigleh siam Ann Voskamp in a laibu One Thousand Gifts a cih sungah, “Eucharisteo-lungdamkohna-pen nalamdang mai-ah om den hi,” ci-in gelh hi. Phatna La 118:24 ah, “Tuni pen Topa bawlsa ni hi a, Tuni in eite lungdam in ih kipak ding hi,” ci-in na gen hi. (ZSV)

4.  Pasian Mitsuan In. Ih lungsim ngaihsutna-te  tunglam koihto in, ih Laisiangthobute nisim in lem ni. Isaiah 40:31 ah, “Ahih hangin Topa a muang mite a tha uh dimkik ding a, muvanlai bangin kha tawh leengto-in, amaute tai napi-un tawllo ding uh a, amaute lam pai napi-un gimlo ding uh hi” ci hi. Thanem kisa in, huhna kisam ih hihlam kiphawk in Topa tung huhna ih nget ciangin gualzawhna kingah ding hi. Ei kitel masa in, ih van gikte Zeisu suanin, Ama sungah tawldamna (Matt. 11:28) zong in.

5. Nang Deihnba Nial In. Christian diktak nunna ah leitung leh ci-le-sa deihna-te nial kul hi. Galatians 5:19-26 sungah Paul in pumpi deihna nusia a,  Khasiangtho deihna zuih theih nading genkak hi. Matt. 16:24 sungah Ama nung a ui nuamte in a singlamteh uh pua dingin hong vaikhak hi.

6.   Na Nuntakna Uk In. Topa nasem bangin kingaihsun in na sep peuhpeuh uh lungsim takpi tawh sem un” ci-in Col. 3:23 ah hong gen hi. Ih sepna peuhah a hoihpen a sep ding hong hilh hi. Thu lian ahi a thu neu ahi zongin, ih pute lungkimsak ding Laisiang-tho deihna ahi hi. Ih nisim nuntak zia. Ih hun zat zia, ih sum zat zia.. te khempeuh eimah in ih uk ding hi. Pumpi ukna nialzawhna in Khasiangtho gah ahi hi. (Gal. 5:22,23).

7.  Piakhia In: Pasian leh Mite Tungah. Topa hong piak thupha ahi sum, hanta leh siamna te pen Ama adding leh mite adingin hopsawn ding kisam hji. Ei bek in buplak in, humcip lehang, kiamsukna piang ding hi. Paunak in, “Hawmsem nungta, nebum puuksi” na ci hi. Sawl. 20:35 in piakkhiatna ah thupha om zaw hong ci hi.

 CIDAM NADING TUI NAM LI

Kawlte in “Tui phattuamna nam sawm” cih nei uh hi. Tua mah bangin cidam nading a thupi tui nam li  hi.

1. Citui: Zingsang tho baihin citui dawn in. Zingsang i thawh ciangin zan hun sung i khua-ul luangin zun ih thak ciangin pumpi sungah tui kiam thei hi. I si zong hong man zawdeuh hi. I sung zong hong khak thei sak hi. Pumpi sungah tui atawm ciangin sikhang natna neite leh lungtang natna neite adingin lauhuai hi. Tua ahih ciangin zingsang ih thawh khit bangmah ih nek ma-in ci tawm kihel tuilum haikhat dawn le’ng, pumpi a, akiam tuite dim kik ban-ah dangtak zong kamsak in, gilpi gilzang, gawi sung a aniin teng paikhia sak hi.

2. Tuisa: Ha nawt ciangin tuivot leh tuisa tawh nawt in. Tuivot ahih keileh asa lua liang tui tawh hanawt kha le’ng ha kisia hi. A zawdeuh in akum tamte’ ha hoih nonlo te siasak zaw hi. Tuisa (ahoihbek) tawh ha nawt le’ng ha susia lo in to sak hi.

3. Tuivot: Mai na phiat ciangin tuivot tawh phiat in. Mi atam zawte in khuakhal ciangin tuivot tawh mai aphiat uh hangin phalbi ciangin tuivot tawh mai phiat ngam lo hi. Phalbi avot laitakin kuang sungah tui koih in, tua tuivot sungah na mai minit lang sung diahsuk in. Tua khit teh mai-nul tawh na mai nul in. Na mai hong lum in sipai dan hoihin, na na hong vak ding hi. Tuivot tawh maiphiatna in mai amel asa hoih sak hi. Avot dan zong thuak zo sak hi.

4. Tuilum: Nitak lup ma-in tuilum tawh na khe-te sil in. A salua zang kei in. Khe sil ciangin tuilum sungah khete minit sawm bang diah inla tua khit mainul  tawh nulin khut taklam tawh khepeek vei lam 100vei meek in. Tua khit teh veilam khut tawh taklam khe peek 100vei meek in. Khe peek tegel hong lum in thagui nat, khe-hikte hong dam ding hi.    

? Niang Hen Cing, Zonu Tongluan Vol3- Issue31.

 

THU ZAKSAKNA

♦ Pawllutna Vai: Pawl lutna ah kihelna tawh maa pang khawm ni. Malaysia om sung teng ding:- khatguak: Rm 20; Nupa/Innkuan: Rm 50.

♦ Gen Vai: Malaysia om sungin sihna khat ih tuah leh ih luang hong pham dingin Genvai kipawlna ahi Ciimnuai Donghu Kipawlna(CDK) leh Zomi Social-welfare of Malaysia (ZSM) ah kipawl tek ni. Mi 1, Kum 1= RM20.

♦ Christ’s Object Lessons Kingahta: Mrs White gelh COL (Christ Zat Muhtheih Thuhilhnate) Zolai-in kingah ta hi. Bu khat Rm 15/- in kilei thei hi.

♦ Pasian Ang Zuan Khualzinna Kingah Lai: Evangelist S. Jospeh Kidder gelh Journey to the Heart of of God (Pasian Ang Zuan Khualzinna) Zolai pen kingah thei lai hi. A bei ding hita hi. A deihte in hong zasak un. Bu khat RM 20/-

♦ Biakinn Kikhhop: Tu sungteng natna ngah hong khangin, MCO 3.0 hong koih kik uh ahih manin biakinn kikhop pen khawl phot ni. Kumpi thusuah ngak to in, a lem kik masiah Zoom pan kikhawm ni. Zoom ID: 811 6984 3593 Passcode: klac ah Sabbath ni 11:00am pan kikhop om hi. Neumei kikhop zong Friday ni 8:00pm in hih atunga Zoom pan kikhopna om hi.

 

  

 

Zo Phualva Thupuak- Vol 10, Issue 02 by DavidLian on Scribd