VANTUNGMI KHATNA THUPUAK

A THULUANZIA LEH ATHU TAANGKONA HUN

Leitungah Zeisu nih veina ong paikik maa-in vantungmi thumte in leitung ading atawpna patau hilhkholhna ataangkokhiatna Mangmuh 14 sungah kimuthei hi. Mihingte in Sapi (ganhing) leh PASIAN koi zaw bia ding cih deihteel theihna aneih uh ong kul ding hi. Mang. 14:6-12 "Tua ciangin leitungah ateeng mi namkim, pau namkim azang mite tungah atawntungin lungdam nading thugen ding anei vantungmi khatnavankim lai-ah aleeng kamu hi. Amah nakpi takin kiko-a, "Amah in mihingte thu akhen ding hun hong tungta ahih manin Pasian kihta unla, Amah phat un. Van leh lei, tuinak leh tuipite Abawlpa bia ta un,"aci hi.

Tua ciangin vantungmi anihna in hong zui-a, "Alian Babilon khuapi kiata hi, kiata hi! Amah in ahuk alanna lenggahzu, mi khempeuh tungah pia-in akhamsak hi," aci hi.

Tua ciangin, vantungmi athumna in amasa te gel hong zui leuleu in nakpi takin, "tua ganhing leh alim bia-in ataltang ahih kei leh akhut tungah ciamtehna angah mi peuhmah in, Pasian' Lenggahzu zong adawn ding uh hi. Pasian in Amaa hehna ahi lenggahzu khauh pen Amah hehna hai sungah adim takin sung khinzo ta hi. Tua bang mite pen asiangtho vantungmite leh Tuuno mai-ah meikuang leh kaat khu tawh gimna kipia ding hi. Amaute akibawlsiatna mei, khu tawntung-a, ganhing leh alim bia-in, amin kigelhna anei mi peuh mah in asun azan-in, tatsat lo-in gimna thuak paisuak uh hi," aci hi.

Pasian thukhaam (thupiakna) zui-in Zeisu tungah acitak Pasian' mite adingin thuakzawhna kisam hi.

1. VANTUNGMI KHATNA' THUPUAK

Vantungmi khatna' ii thupuak (taangkona) sunga thute i en ding hi. Lai siangtho sungah thukhenna tawh kisai nam thum kigen hi: Thusittelna, kantelna lamsang (tawh kisai) thukhenna, hih thukhenna pen nih veina ong paikik maa-a aom thukhenna ahi hi; tua ciangin, abeimang amawhbaang leitung leh agamtatsia vantungmite Khazih leh misiangthote in thukhenna aneihna uh kum tul khat khit nih veina paikik khit leh migilote sihna thukhenna neihna ong om dinga abeina ong tung ding hi. Zeisu ong pai ma-in vantungah thukihenna om dinga tua thukhenna ah kua te thawhkikna masa ah kihel dinga, Amah ong pai ciangin mitphiatkaal leh atawpna gualzawhna peengkuul akitum ciang kua teng laktohna (gupna ngah ding ) ngah ding cih te thukhenna ahi hi. Hi bang thukhenna nasep Zeisu nih veina ong pai maa-in aom loh phamawh hi bang hang hiam cih leh misiangthote akitawhkik sak hun kikaal leh Topa ong paikikmaa hun kikaal-in tua bang nasep hun om man lo ding hi. Kum tul khat man hun sungin Khazih leh misiangthote in migilote' gamtatna, nasep khempeuh sittelna ong neih khit uh ciangin sihdan piakna thukhenna ong tung ding hi. (Mang. 20:3,4; I Cor. 6:1-3). Hih thusittelna lamsang (tawh kisai) thukhenna pen vangtungmi khatna' thupuak (taangkona) tungtawnin leitungbup ah hi thu kitaangko hi.

Daniel thubu sunga thukhenna tawh kisai genkholhna muhzia, apaizia te phawk ciatni, "Ka et laitak-in kumpi tokhomte ahong kikhoih hi. Anungta tawntungmipa tua tokhomte khat tungah atu hi. A puante vuk bangin ngo-a, asamte tuumul hoih tawh akibang hi. Atokhom pen meikuang leengpei tungah kinga-in meikuang zuazua-a, tua sung panin meikuang ahong lengkhia niloh hi. Amaa nasem ding mihing tulza tampi om-a, Amai-ah mihing tulza sawm tampi a ding uh hi. Thukhen nading hun kipan-a, laibute akihong hi." Daniel 7:9, 10.

Sawltakte' tangthu thubu sungah zong ni khat ni ciangin leitung thukhenna akineih ding thu i simngei khin ding hi, "Amah in leitung mi khempeuh thu aman takin Amaa teel mipa ahong khensak nadingin asehkhol khin zo hi. Tua angaihsutna aman taktak hi, ci-in mi khempeuh tungah ahong lah nading in sihna panin ateel mipa ahingkik sak zo hi," ci-in thu ahilh hi," Sawl. 17: 31.

Hih vantungmi khatna' taangkona thute i simtak ciangin hih thu pen bang zahin thupitak, zaitakin kitangko khia cih thu i mu thei ding hi, “Leitungah ateeng mi khempeuh, pau namkim, mi namkim khempeuh" cih bangin ahuam, ahuzaapkim, zaitakin ataangkona kimu thei hi. Hih leitungah ateeng mi khempeuh kiangah, "Pasian kihta unla, Amah phat un" ci-in sawlna, sapna kitangko khia hi. Hih thu pen kisemkhia, kizo ta ding hi bang hang hiam cih leh ong pai ding hun akigenkhol ahih man ahi hi, "Amaa thukhenna ni ding hong tung ta hi" ci hi. Kua biaktakcing hihna thu ei leitung mihingte kiangah ong kitangko khin hi, "Vantung leh leitung Abawlpa" biak dingin hong sawl hi.

Eden huan sungah (Pian. 3:15) amasa pen lungdamna thupuak (Rom. 1:16,17; Gal. 1:8) kitangko khia hi, tua pen Abraham tungah kipulaak khia hi (Gal. 3:8) tua banah Israel mite kiangah zong kigen hi (Heb. 4:1,2) tua thu mah athak in khang sawnte kiangah kigen suksuk hi. Hih akisia leitung khang tangthu leh mi khempeuh adingin hih lungdamna thupuak pen ahun zui-in khangto semsem in akisapna zui-in kigen sawn suksuk hi.

Tuiphum John in amaa thu taangkona sungah Pasian' Vantung gam ong naita ahihna thu pulaak hi (Matt. 3:1,2) amasa Zeisu ong pai nading vai lam-etna thu lamsang (tawh kisai) kiginkholh nading thu zong hilh hi (John 1:22,23). Topa Zeisu mahmah in zong lungdamna thupuak ataangkona sungah, hun lamsang (tawh kisai) genkholhna atangtung ding thu tangko khia-a (Kaal 69 ahih kei leh kum 483- Dan. 9:25 sungah kimu thei) mihingte kisikkikna lampi atot theih nading zong taangkokhia-a, ong paiding akigenkhol Messiah (Mark 1:14, 15) thu lamsang (tawh kisai) zong tua genkholhna sungah kipulaak hi. Tua ahih manin thukhenna hun ong tungta ahih mah bangin Zeisu nih veina ong paikik ding hun zong naita hi, tua ahih mah bangin hih ong pai kik ding thu genkholhnate leitungbup-ah gupna bucing taangkona tawh kithuahkhawm-in hih ong tung ding athupi mahmah hun ading kigingsa-in om theih nang kitangko kawikawi ta hi.

Sittelna thukhenna thu tawh kisai ahih kei leh biakbuuk siansuahna tawh kisai genkholhna thu tawh hilhcianna zong om hi. "Zingsang leh nitak biakpiakna tul nih leh za thum vei acin' khit ciangin biakinnpi kipuahkik ding hi." Dan. 8:14. Hih ni 2300 ahih kei leh genkholhna kumte pen 1844 kum ciangin abeina hita hi. Hih kaal 70 genkholhna ahih kei leh kum 490 genkholhna leh ni 2300 genkholhna ahih kei leh kum 2300 genkholhna pen kumpi Artexerxes in Jerusalem puahphatkik ding thu apiak B.C 457 kum ciangin kipan pah hi. Ni 2300 ahih kei leh kum 2300 genkholhna (Mark 1:14,15) sunga amasa ong pai ding thu lamsang (tawh kisai) apiang ding thu genkholhnate atangtunna thu Topa Zeisu' thugenna sungte-ah kibulphuh in kimu thei hi. Hih genkholhna hun pen Topa Zeisu anih veina ong paikik maa-a aom sittelna thukhenna hun sung agennuam ahih banah thukhenna ong tungta ahihna leh Piangsakpa mah biak tawntung ding ahihna thu taangkona zong hi pah hi. Hih genkholhna thu tawh kisai te leitung tangthu thupiangte in adeihna telcian takin lakkhia-a, kum 1844 ciangin genkholhna abei hun ahihna thu akipan lungdamna thu leitung mun tuamtuam ah kipulaak khia hi. Hih thu pen Zeisu nih veina ong paikik nading thu taangkona ahih banah leitung mun khempeuh ah zong tu-in kitaangko zihziah ta hi.

PIANGSAKPA BIAK DING SAPNA

Vantungmi khatna' taangkona sungah hih leitung Abawlpa biak ding ahihna kimu khia hi. Tua mah bangin Piangsakpa biak ding ahihna lai siangtho mun tuamtuam ah kimu thei lai hi: Jer. 10:11,12; Late 95:3,6; Mang. 4:10-11 sung banah athupi phadeuh in Pai. 20:8-11 "Sabbath ni asiangtho-a zatding phawk un. Niguk sung nomau' na semin na nasep ding khempeuh uh na hih ding uh hi. Ahi zongin, ani Sagih ni in Topa note' Pasian Sabbath ni ahi hi. Tua ni in note in na tapate, na tanute, na nasempate, na nasemnute, na ganhing uh ahi-a, peemta te ahi zongin, na bangmah na sem sak kei ding uh hi. Bang hang hiam cih leh aniguk sung tengin Topa in van leh lei, tuipi leh tua te sunga om khempeuh bawl-a, ani Sagih ni tawlnga hi. Tua ahih ciangin Topa in Sabbath ni thupha pia-in siangtho sak hi." Hih thukhenna sunga thupuakin ei mihing khempeuh Sabbath ni Abawl, na khempeuh Apiangsakpa biak ding ahihna ong pulaak hi. Gupkhiatna thu sungah, Sabbath thu zong akihelna phawk ding thupi hi, "Topa ahi Keimah in amaute pen misiangtho-in Kabawlna thu aphawkna dingun kote' kikaalah thukimna liimin Sabbath tan' ding thu Kapia hi." Ezek. 20:12.

MI KHEMPEUH ADING CIANGTANNA

Kuate thukhenna thuak ding cih thu eite kiangah ong kigenhi, "Bang hang hiam cih leh Khazih mai-ah thusitna athuak dingin eite khempeuh akilak ding ihi-a, leitung i pumpi-in i om lai-in i gamtatna tawh kizui-in eite tawh akituak ciatin asia ahi-a, apha ahi zongin, khat apuk-a leh amawhnei mah ahi h. Nu leh pa mawhna bawl kei un" cih thukhaam om-a, "That kei un" cih thukham zong aom hi. "ahi zongin, nang in nu leh pa mawhna bawllo napi-in nuntakna thahnakhat na neih leh thukhaam apalsat mah na hi veve ding hi. Tua ahih mah bangin ka gen bangin gamta un bang hang hiam cih leh Suahtakna apia thukhaam tawh note thukhenna ong kipia ding hi." James 2:1-12.

Ei mihingte ii sep ding thu khempeuh eite tungah ong kigen khin hi, "Hih thute khempeuh ban-ah gen ding thu khat bek om hi. Mihing hong kipian'sakna, athubulpi pen in : Pasian zahtakna, leh athukhaamte (athupiakte) man'na (zuihna) ahi hi. Apha hita leh asia hita leh, asiamtham-a i hih simte nangawn, i hihna khempeuh ah, Pasian in thu ong khen ding hi." Thuhilhna 12:13,14.

Lawmte aw, thukhaam sawm i zuihna tawh kituak in i kizopna te ban-ah i sungah i neih khuavak tungtawn in eite thukhenna ong kinei ding hi. I lungtang sungah Zeisu ong lut-in i nuntakna sungah Amah ong nuntak ciangin thumang theihna, thuzuih zawhna i ngah zo ding hi.

Ref: Vantungmi Khatna Taangkona