ZSS SINNA 7: PAUL NASEP KHUALZIN MASAKNA

SINNA 7   August 11 – 17

PAUL NASEP KHUALZIN MASAKNA      

---

    

SABBATH NITAK

Tukal sung sim dingte: Sawl. 13; 2 Cor. 4:7-10; Rom. 3:19; Sawl. 14:1-26; Rom. 9-11.

LAI SIANGTHO BULPHUH: “Tua ahih manin ka sangamte aw, Jesu tungtawn in mawhnate maisakna thu note tungah kitangko ahi lam na theih ding uh ak deih hi. Moses thukham pana dik na tan theih lohnate khempeuh uh, ama tungtawn in a um peuhmah in dik tang ta hi.” (Sawltak 13:38, 39, ZIV).

Akician mahmah thu khat in, lungdamna thu pen Jew te a ding bek hilo Gentile te aa ding zong ahi hi. Hih thutak Jew Christian masa te in teltak in thei pah hetlo mawk uh hi.

Antioch khua ah Gentile te a honpi in Christian hong suak uh hi. Antioch khua ah a masa pen Gentile pawlpi kiphut hi. Tua lai ah Jew thu-um pawlkhat bel om hi (Gal. 2:11-13). Pawlpi phut masa te lungdamna thu ah a lawp mahmah na uh leh Barnasbas leh Paul te hong tunna panin tha a ngah mahmah na uh tawh pawlpi manglang tak in hong khang hi. Judea gam pua ah a thupi Christian phualpi masa pen hong suak hi. A taktak in, Jerusalem a pawlpi sangin a thupi zawkna tampi om hi.

Jerusalem in sawltak te omna phualpi hi a, Antioch in Christian nasepna kipatna phualpi hong suak hi. Tua lai a pawlpi mite panpihna tawh, Paul nasep khualzinna thum te Antioch pan vive ahi hi. Amau te kipumpiakna hangin Christian biakna in Jesu deihdan ahi “gam khem-peuh, minam, pau leh mi khempeuh tungah kipuak lung-damna thu ahi leitungbup tuam biakna hong suak thei hi.” (Mang. 14:6).

SUNDAY                                                                                               August 12

SALAMIS LEH PAPHOS

Sawltak 13 ah, Luke in a lian nih (Sawl. 13, 14) huam ahi, Paul nasep khualzinna hong gen nuam ahih manin Antioch thu hong gen kik hi. Hih mun pan in Sawltak thubu tawp dong Paul leh Gentile te lak ah a nasepna vive laigil in Luke in gelh hi.

Hih in pawlpi khat in lunggulhna leh kidawmtak aa a geel missionary khualzinna masa ahi hi. Luke in hih hanciamna in thu-um mite geeltawm hilo in Pasian kiang pan hong pai hanciamna hi cih hong pulaak hi. Gennop bulpi in, phalna tawh Pasian zat theih in eimau mah i ki-ap ciang bek in Pasian in hong zang thei ahihna thu ahi hi.

Sawltak 13:1 -12 sim in. Cyprus ah Paul leh Barnabas te nasepna ah Luke in hong theihsaknop bulpi bang hiam?

________________________________________________________________

Nasem ding a kuankhiat ma uh thungetna leh antangna tawh ki-ap masa uh hi. Amau te lu tungah khut ngakna in, a sep dinguh nate ah siangtho ki-apna ahih kei leh Pasian hehpihna sunga ki-apna (Sawl. 14:26) ahi hi.

Cyprus tuikulh pen Antioch pan in a gamla lua lo Mediterranean tuipi nisuahna saklam kiu ah om hi. Barnabas pen Cyprus pan ahih na hang bek hilo in, hih mun ah lungdamna thu na tungkhin ta ahih manin nasep kipatna ding munhoih khat ahi hi. Ahi zongin, sep ding tampi om lai hi.

Cyprus a tun uh ciangin, John Mark (Barnabas tanau) in zong Barnabas leh Paul tawh Salamis synagogue ah thuhilh uh hi (Sawl. 15:39, Col. 4:10). Gentile te kiang thu a genma in synagogue ah thuhilh pen Paul ngeina ahi hi. Jesu pen Israel te Messiah ahih manin Jew te kiang lungdamna thu gen masak ding a kilawm mah ahi hi.

Samalis pan in nitumna lam zuak uh a Paphos khuapi a tun dong uh tuikhulh khempeuh ah thuhilh in pai kawikawi uh hi. Tua lai ah Jew mi dawi-ai tawi kamsang zuau Elymas zong a kici Bar -Jesus leh gam- uk Sergius Paulus thu hong gen hi. Tua lai ah a langdo khat leh a zahtakhuai Gentile khat in muanhuaitak a lungdamna thu a sanna kimu thei hi. Sawltak 13:12 sunga akammal in kikhelna a gennuam ahi hi.

Hih lai ah Gentile pa in thutak sangin anialpa pen Jew mi ahihna thu ngaihsun in. Hih thu in thu-um vetlo mite sangin Christian biakna dang te in “tulai thutak” a san dinguh haksa zaw thei hihna i tel ding hong bangci hilh hiam?

MONDAY                                                                           August 13

PISIDIAN ANTIOCH: KHEN KHATNA

Cyprus pan in Pamphylia gama Perga (tulai Turkey tuipi gei) lam manawh in Paul le a pawlte pai uh hi. Pisidian Antioch a pai ma un Luke in a phawkhuai thunih hong gen hi. Paul in a makai ahihna (tua ma in Barnabas min kigelh masa zaw den) leh Luke in Paul i Jew min (Saul) hong zang nawnlo in “Paul” cih hong zang ta hi (Sawl. 13:9).

Sawltak 13:13 ah John Mark Jerusalem ah a kilehkikna hong gen hi. John Mark in bang hangin nusia cih hih lai ah hong kigen lo hi. Ellen G. White in a gelhna ah, amai ah a tuah ding uh haksatna te launa leh lungkiatna tawh, “Mark in hangsanna bei in, lauthawng ahih manin paisuak ding nial in Jerusalem ah ciahkik hi.” – The Acts of the Apostles, laimai, 170. Pasian in baih ding hi ci-in hong kamciam lo hi. Alang ah, Jesu a ding nasepna ah thuaksiatna tampi tuak in baihlo ding cih Paul in a kipatcil pan a theihsa ahi hi (Sawl. 9:16). Ahi zongin, Pasian vangliatna tungah ki -ngak ding kisin aa, tua sungah thahatna mu hi (2 Cor. 4:7-10).

Sawltak 13:38 sim in. Antioch synagogue ah Paul thupuak i laigil in bang hiam?

_________________________________________________________________

Sawltak 13:16-41 ah Thukhun Thak sunga Paul thuhilhna masa pen kiciamteh hi. Paul thugen masak na pen hilo aa, a kigelh sangin tampi gen zaw ding cih theihsa ahi hi.

A thuhilhna khenthum in kikhen thei hi. Israel te Pasian teeltuam ahihna leh David kumpi gui tawh a thugen pan hi (Sawl. 17:17-23). Hih in Jew mite tawh kizopna ding ngimna tawh a gen ahi hi. Tua khit ciangin, Israel te hotkhiatna ding kamciam in David suan Jesu tungah picing ahihna gen leuleu hi (Sawl. 13:24-37). A tawpna ah, Jesu tungtawn a kipia hotkhiatna nialkhak ding vauhilhna tawh thukhup hi (Sawl. 13:38-41).

A thuhilhna bulpi pen aneu 38 leh 39 ah kimu thei a, Paul thupuak laigil pipen ahi diktanna thu ahi hi. Mawhmaisakna leh diktanna in Jesu tungtawn bek in kingah a Moses thukham tungtawn in kingah lo hi. Hih kammal in thukham nawlkhinna genlo hi. Jew te lamet ahi diktanna (Rom. 10:1-4) thu apiak theihlohna thu a genna ahi hi. Tua bang hih theihna pen Jesu tung bek ah om hi (Gal. 2:16).

Jesu tung pan bek in hotkhiatna kingah cih a deihna bang hiam? Thukham in dik hong tangsak theilo cih thu leh Psian thukham te kepkul (zuihkul) lai cih koi bangin gawmtuah (hualkhawm) thei ding na hiam?

TUESDAY                                                                         August 14

PISIDIAN ANTIOCH: KHEN NIHNA

Sawltak 13:38, 39 in upna guipi thupi mahmah khat ahi thukham in dik hong tangsak theilo ahihna hong gen hi. Thukham bei nailo hi mah leh, thukham in a zui te tungah thumanna (thumangna) kicing gahkhia zolo ahih manin diktansakna tun zolo hi (Sawl. 15:10, Rom. 8:3). Azenzen in, thukham in thumanna kicing gahkhia zo mah leh zong, tua thumanna kicing in mawhna thoihdam theilo hi (Rom. 3:19, Gal. 3:10, 11). Tua thu hangin, diktanna pen tawmcik nangawn eite thalawh theih hilo hi. Jesu thoihdam biakna upna tawh sanna pan in eite in a ngah thei bek i hi hi (Rom. 3;28, Gal. 2:16). Eite ngah ding a kilawmlo (ei tawh kituaklo) letsong ahi hi. Christian nuntakna ah a thupi mahmah khat ahi phial zongin, hih thumanna in hotkhiatna hong pia lo hi.

Sawltak 13:42-49 sim in. Synagogue a kikhawm te in Paul thupuak koi bangin sang uh hiam?

__________________________________________________________________

Paul in vauhilhna tawh khuahtak in a thugen a khup hangin synagogue (kikhopna inn) a om mi a tamzaw te in deih in lungkim mahmah uh hi. Ahi zongin, a maikal Sabbath ni ciangin nate hong kilamdang hi. Tua lai a lungdamna thu anial Jew te pen ikhopna inn makai te hi kha ding hi. Tua mite in Paul a hazatna uh Luke in ciantak in hong gen hi.

Tanglai in Judaism biakna ah pasian khat bek upna, nuntak khuasak zia, leh Sabbath thu te in Jew ahilo midang te lunglutsak mahah a, tua thu te hangin mi tampi in Jew upna sangin biakna sungah lut uh hi. Ahi zongin, vun-atna in hiamgam vai leh kihhuai vai sa uh ahih manin a khaktan pi khat ahi hi. Tua thu hangin, Gentile tampi te in Judaism biakna ah lut taktak lo in Pasian bia ding bek in kikhopna inn ah pai uh hi. Tua bang mite Pasian kihta te kici hi. Tua bang mite in Paul thuhilhna midang te kiang na gen sawn uh ahi man in mi tampi hong pai uh hi. Hotkhiatna ngahna dingin Judaism biakna suah masak kullo cih thu hangin mi tampi te lunglut uh hi.

Jew biakna makai te hazatna hih thu in hong tellah hi. Lungdamna thu anialna uh hangin Pasian hotkhiatna panin amau le amau kinawlkhin bek hilo in hih lungdamna thu lungdam tak aa asang Gentile te tungah Paul leh Barnabas te nasepna akhah khong, akoih khong tawh kibang uh hi.

WEDNESDAY                                                                                     August 15

ICONIUM

Jew makaite tawsawn na hang tawh Antioch khua thunei te in Paul leh Barnabas langah mipi te toksuah uh a, khua sungpan in hawlkhia uh hi (Sawl. 13:50). Ahi zongi, sawtakte ahih leh lungnopna leh Kha Siangtho tawh kidim uh hi (Sawl. 13:52). Tua pan in Iconium khua lam a manawh uh hi.

Sawltak 14:1-7 sim in. Iconium ah Paul le Barnabas te nasepna hangin bang thupiang hiam?

________________________________________________________________

Iconium ah zong, Paul leh Barnabas te in Gentile te kiang thu a hilh ma un Jew te kiangah thu gen masa uh hi. Antioch a Paul thuhilhna in a nasepna ah Jew te amasak detna a hang hong lak hi. Tua in Israel te teltuam ahihna leh teltuam tawh kisai khempeuh Israel te-a ahihna (Rom. 3:2, 9:4-5), leh David khanggui pan hong piang ding Pasian kamciam Honpa thu a tangtunna ahi hi. Jew te tampi in anial hangin pawlkhat hong kikhelna hangin Paul lamet bei tuan lo hi.

Rom. 9-11 sungah, “Israel pan-a piangte khempeuh Israel ahi kei uh” ci in Paul in siangtak hong gen hi (Rom. 9:6). Jew te pawlkhat in a up theihna uh zong Pasian hehpihna hang bek ahi hi. Pasian in a mi te nial nailo a, ahi zongin “tuhun laitak in hehpihna hanga teelsa a baanglai te” om hi (Rom. 11:5). Ni khat ni ciangin Jew te tampi in Jesu upna sang ding cih a up hangin Paul in Gentile te lak ah thuhilh zom hi.

“Rom. 9-11 sunga Paul kuppihna thute in Sawltak thubu sunga Pasian nasep zia geelna te hong lak iin khangtawn Christian te in thu-umlo Jew te tungah teci panna ding i thupi na hong lak hi.” – David G. Peterson, The Acts of the Apostles (Grand Rapids: Eerdmans, 2009), laimai, 401.

Antioch tawh thupian zia kilamdang lua khollo hi. Jew leh Gentile te in amasa in sang thei mahmah uh a, ahi zongin thu-umlo Jew te in Gentile te tawsawn uh a, a sanggam te langpang dingin a lungsim uh hih siatsak uh a mite lak ah ki pawlkhenna piangsak uh hi. A langpang te in Paul leh Barnabas suang tawh denlup dingin geel uh ahih manin Paul leh Barnabas te in khua dang ah pai in nasep zop ding khensat uh hi.

Lungdama thu zakna bek hilo in, Jesu min tawh thugen te a nuntakpih ding uh Jew mite in amuh ding uh kisam hi. Jew meltheih khawng na neih leh, amau tungah koi bang teci na suak hiam?

THURSDAY                                                                                         August 16

LYSTRA LEH DERBE

Paul leh Barnabas te Iconium pan nitumna khanglam tai 18 kiim a kigamla Lystra ah hong tung uh hi. Tua lai ah tawlkhat sung aom uh hangin Luke in a suah tung a kipan lampai ngeilo khe poi khat damsakna thu khat bek hong gen hi.

Sawltak 14:5-19 sim in. Paul tungah a sepna uh in hih mite in bangmah theilo pilna neilo uh ahihna bang hong lak hiam?

_________________________________________________________________

A na lamdang bawl uh thupi sa lua uh ahih manun, mipi te in Pau leh Barnabas pen pasiante sa uh hi. Barnabas pen Greekte pasian lian pen Zeus ci uh a, Paul pen Zeus nasem leh thu a gensak Hermes ci uh hi. A taktak in, mipi te in biakna a pia nuam uh a hi hi. Latin lampau (kabia at) at Ovid (43 B.C. – A.D. 17/18) in hih mun kiim ah (Phrygia mualkiim) hih pasian nihte mihing bangin hong pai in mite lak ah khawlna ding mun zong in a omna na gelh ngei hi. Tua tangthu sungah, midang te in hehpihna neilo in na thusim selo uh a, ahi zongin a kiniamkhiat kumham khin nupa khat in thukhual tak in zin na do uh hi. Hih leng na te tungah amau thukhualna leh zindona hangin tua nupa te inn pen biakinn in hong kilaih a, amau pen siampite suak in a khua uh ahih leh kisusia cip hi (Metamorphoses 611-724).

Hih mun kiim ah hih bang tangthu na om ngei ahih manin, Paul nalamdang bawl na hangin mipi te bawlsawmna in a lamdang thu hilo hi. Mipi te in Paul leh Barnabas te, damna pasian Asclepius bang pasian hilo in, tua pasian nihte dingin a ngaihsutna uh tua tangthu in hong telsiam sak hi. Ahi zongin, Paul leh Barnabas te in amau biak khialhna thu khamzo sam uh hi. A tawpna ah, Antioch leh Iconium pan in langpang te pawlkhat hong pai in Paul suang tawh deng uh a, a sisa in ngaihsun uh ahih manin khuapua ah talkaih khia uh hi.

Sawltak 14:20-26 sim in. Koi lai ah Paul leh Barnabas te khualzinna uh tawp hiam? Akileh kik lam un amau te in bang hih uh hiam?

_________________________________________________________________

Paul in, “Pasian gam i lutna dingin haksatna tampi i thuak ding mah hi” (Sawl. 14:22, ZIV) ci hi. Tua in bang a khiatna hiam? Tua a gen thu koi bangin thuak ngei na hiam? A thupi pen in, bangci bang haksatna te na thuak zongin koi bangin upna khang semsem thei ding cih koici sin theih ding na hiam?

FRIDAY                                                                             August 17

NGAIHSUT BEH DING: “Jesu leitungah a nuntak sungin amau kituamsehna panin Jew te sapkhiat ding hanciam hi. Galkap zakhat ukpa leh Phoenicia numei nu kikhelna te in Israel lo midang te lak ah a nasepna hong lak hi. Lungdamna leh upna khuavak hangin Pasian pahtawina tawh lungdamna thu a sang Gentile te lak ah tawlnga lo a thalawp tak sep ding uh hong tung ta hi. Jew te uplohna leh siatngaihsutna te in Pasian ngimna siasak tuanlo a, Olive kunglui tungah Israel thak hong mengkhia hi. Kikhopna inn te ah sawltak te lut a kiphalloh hangin amaute zat dingin aituam innte kizang phal a, Gentile te mipi kimuhkhopna munte Pasian kammal hilhna dingin kizang phal hi.” – Ellen G. White, Sketches From the Life of Paul, laimai, 51.

“Amau nasepna khempeuh ah Paul leh Barnabas te in kha hotkhiatna dingin kipumpiakna leh muanhuaina ahi Jesu etteh in zuih ding hanciam tawntung uh hi. Lawpmahmahna leh tawllo hetlo uh aa pumpi deihna leh nopsakna zuilo in thunget tawntungna tawh tawlnga lo in thutak khaici tuh den uh hi. Tua khaici tuhna tawh sawltak te in lungdamna thu ading a dingtang mite a dingin a kigen ngeilo a manpha thute hilh den uh hi. Tua bang Pasian zahtakna leh lungsim takpi tawh nasepna in nungzui thak te tungah a tawntung akip ding lungdamna thu i manphatna a lungsim sungah vawh hi.” – Ellen G. White, The Acts of the Apostles, laimai, 186.

KIKUP DING DOTNATE:

1.                   Haksatna a tuah ciangin a ciahkik John Mark thu ngaihsun beh in. Paul leh Barnabas in John Mark hangin kinial in a omna thu kimu thei hi. Barnabas in zangkik nuam aa ahi zongin Paul in kizuisak nuam nawnlo (Sawl. 15:37). Kum pawlkhat khit ciangin, Paul lai at na ah, “Mark hong zawn inla hong tonpih in, banghang hiam cih leh ka nasepna ah amah ka phattuam pih mahmah hi” (2 Tim. 4:11) ci hi. Hih lai ah sep ding vaipuak khat peuh ah a muanhuailo te tawh kisai bang hilhlak om hiam??

2.    Lystra khua a mite in pasian a sakna uh ah Paul leh Barnabas te dawnkikna ngaihsun in (Sawl. 14:14-18). Pasian hong sepsak khat peuh eima sepna banga minphatna i laknop khak hun ciang koi bangin gamta ding i hiam?

3.    Sawltak 14:21-23 sim in. Paul leh Barnabas hong lah bangin mimal ahi a pawlpi in ahi zongin thu-um thak te koi bangin phungvuh in thakauhsak thei ding i hiam?

4.    Biakna makai te in Paul a langdo mah bangun eite in zong mihing bawl ngeina leh pupa thuciin upna te thutak (thumaan) saanna dingin hong khaktan i suahsak khak loh ding koi bangin kidawm thei ding i hiam?