ZSS SINNA 3 PAWLPI MASA HUN LAI NUNTAKZIA

SINNA 3

PAWLPI MASA HUN LAI NUNTAKZIA                             

    July 14 - 20

Sabbath Nitak

Tukal sung sim dingte: Acts 2:42-46; Acts 4:34, 35; Acts 3:1-26; Acts 4:1-18; Acts 5:1-11; Acts 5:34, 39.

LAI SIANGTHO BULPHUH: “Nisim in biakinnpi huangte sungah a kithuah khawm ngitnget uh hi. Amaute innah anlum balkham in lungdamna le itna lungsimtak tawh nekhawm uh a, Pasian phat in mi khempeuh in angvanna nuam a sa uh hi. Topa in nisimin amau pawl sungah a kihonkhia mi a kibehlapsak hi.” (Sawltak 2:46, 47, ZIV).

Pawlpi masa te deihkinna in lian mahmah hi. Messiah kumpi gam hong tun ding bang hun cih Jesu in a genlohna in (Acts 1:6-8) na khempeuh sawltakte nasep kizawhna leh Kha Siangtho hong paina tungah kinga hi ci in tel uh hi. Tua hi a, thu-um masa te in Pentecost hong tun ciangin Kha Siangtho ngah khin ta uh ahih manin leitung bup ah lungdamna thu kitangko khin aa na khempeuh a tangtung khin ta in ngaihsun uh hi. Jerusalem pan paikhia in tangko hilo in leitung a mi khempeuh Jerusalem ah hong pai in ngaihsun uh hi (Acts 2:5-11).

Neihsa vante amau a dingbek in ngaihsun nawnlo uh hi. Hun tomno bek nei lai cih kingaihsun uh ahih manin a neihsa te uh zuak in amau mahmah kipum-ap in Jesu a ding teci hi ciat uh hi. Ahi zongin Jerusalem bek ah hi lai hi. Nate neikhopna tawh mizawng te panpihna lawhcing mahmah hi napi a sawtlo in buaina hong om a, Pasian in pawlpi kipumkhatna a kizopna dingin na hong sep kulta hi.

Hih hun in kilangneihna hong khang pian ta hi. Hih bang teng hi mah ta leh, a upna uh kilok lo in kip mahmah hi.

SUNDAY July 15

THUHILHNA LEH KITHUAHKHOPNA

Pentecost khit ciangin, Luke in Jerusalem a pawlpi nunzia sungthu a huam in hong gen hi. “Sawltakpite thuhilhna le amau tawh kithuahna, anlum balkhapna le thugetna te ah amau le amau a va kipumpiak uh hi” (Acts 2:42). Thuhilhna leh kithuahkhopna nei uh cih kimu hi. Aneu 46 ah thuhilhna in biakinnpi huang ah nei uh a, kithuahkhopna ahih leh a innte vuah nei uh hi.

Biakinnpi huang pen Rabbi te thuhilhna a ki zang innlim te in umcih hi. Kha Siangtho silpiak in tanglo a thungaihsutna ah tunlo in lunglut tak aa thu thuk sinna ah makaih cih thu thu-um te in sawltakpi te thuhilhna te a ngaihna pan un kimu thei hi. Amaute thuhilhna te na lamdang le limte tawh zong teci a pang uh hi (Acts 2:43).

Kha lam kithuahkhopna in Christian masa te biakna hahkatna thu hong langsak hi. Thu-um mite biakinn bek ah hilo amau innte vuah zong a tawntung in kithuahkhawm den uh hi. Anne khawm, Topa’ nitak an (nekkhawm anlum balkham) khawm uh a, thungen khawm

uh hi(Acts. 2:42, 46). Tua bang a nisim a sepkhopna un Messiah kumpi gam hong tun ciangin Amah tawh kithawhkhawm ding cih Jesu hong paikik baih na ding lametna kilangsak hi (Matt. 26: 29.

Amau inn ah kithuah khawm aa omna in thu-um masate nuntakna ah a thupi mahmah khat a hi hi. Nisim in biakinn ah pai uh a (Acts 3:1) Sabbath ni in a Jews pih te tawh thuhilhna inn (synagogue) ah pai uh hi. Ahi zongin, a tuam diak biakpiakna te amau inn ah nei uh hi.

Acts 2:44, 45; 4:34, 35 te sim in. Pawlpi masate kithuahkhopna ah a thupi nundan bang ki mu hiam?

Beina hun hong nai ta cih um uh ahih manun amau neih le lam vante thupi ngaihsut nawnlo uh i.A neihsa te uh neihkhopna in mannei ding cih ngaihsun uh hi. Messiah kumpi gam ah Messiah in a kisap bang uh sik ding ahih manin zing ciang a ding lung himawh lo uh hi (Luke 22:29, 30). Hih bang kihawm a neihkhopna in kipumkhatna kipsak a, tua ban ah ahoih pen etteh ding Christian citpiaknahong suak hi.

Pasian hong piak neihsa te bangzah phaltak leh citpiak in na zang hiam?

MONDAY July 16

KHEBAI MIPA DAMSAKNA

Acts 3:1 sungah, Peter leh John te nai thum thunget hun in biakinn ah pai uh hi. Hih in pawlpi masa te in amau upna ah a Jews gamtat ngeina te uh a thupi ngaihsut na kilangsak hi. Amaute biakinn ah thuhilh dinga pai bek hilo in, Peter leh John in Jew mi ahihna tawh kizui in Jews te biakna ngeina te zong hih hun ciangciang kiptak zui lai uh uh (Acts 20:16, 21:17-26). Tua lai ah lungdamna thu gen theihna ding hunpha a neisak na lamdang lianpi khat hong bawl uh hi (Acts. 3:1-10).

Acts 3:12-26 sim in. Peter in a thugenna ah bang thute bulphuh deuh hiam?

__________________________________________________________________

Pawlpi masa te thuhilhna ah thubul pi nga kimu thei hi. Tua te in Jesu pen a thuaksia Messiah (Acts. 3:18); Pasian in Amah thokik sak (Acts 3:15); vantung ah Jesu kitawisang (Acts 3:13); Amah hong paikik ding (Acts 3:20); leh mawhmaina ngahna dingin kisikkikna kisam pelmawh (Acts 3:19) cih thu te ahi hi.

Kiim le paam omzia a ki batloh hangin eite gen thupuak zong hi thu mah a hi hi. Sawltak te zong Jew kiim le paam pan khangkhia in tua sungmah ah kibual ahih manun biakna bulkhel cih bang hilo in thuciam lui pan in a thak ah nungta cih ahi hi. Pasian mite in Messiah um in Amah saanna pan hong piang pianthak nuntakna neih ding simloh kibang khin lel hi.

Jesu eite mawhna dingin hong si a, sihna pan thokik in, Amah hong pai kik ding hi cih thu mah a gengen i hi hi. Tua hi a Jesu sung bek ah hotkhiatna om hi. Kilaakna (Mangmuhna) 14 sunga vansawltak thumte thupuak ah zong Jesu kikhai lum, Jesu thokik, leh Jesu hong paikikna thu laigil tangko tawntung ding ahi hi.

“Christian a kici khempeuh lak ah, Seventh-day Adventist te in leitung mite mai ah Christ a lamsang masa pen te i hih ding kisam hi. Vansawltak thumna tangko na in Sabbath thutak pulaak ding hong sawl hi. Tua vansawltak thum thupuak ah kihel thutak dangte mah bangin hih Sabbath thutak zong i pulaak ding kisam a, ahi zongin thupuak laigil ahi Jesu Christ i nusiat loh ding kisam hi. Christ singlamteh ah hehpihna leh thutak kituahkhawm a, dikna leh kilemna kinam tuah hi. Calvary mitsuan dingin mawhnei mi makaih ding kisam a, naupangno bang upna tawh Honpa hoihna muanga, Ama dikna saangin, a hehpihna up ding ahi hi.” – Ellen G. White, Gospel Workers, laimai, 156, 157.

TUESDAY July 17

LANGPANNA HONG KHANNA

Pawlpi gualzawhna in a sawtlo in Jerusalem Makai te langpanna hong kuantawh hi. Jerusalem biakinnpi pen a tamzaw Sadducees ahi siampi lianpa leh a pawlte in uk uh hi. Pharisees leh Sadducees vive kikupna ahi Sanhedrin council ah Siampi lianpa Makai hi lai hi. Sadducees te in phawhkikna thu umlo uh ahih manin Peter leh John te in Jesu thawhkikna a gen uh ciangin amaute lungzing mahmah uh hi. Biakinn cingte in amaute man uh aa,a zing ciang thusitna thuak dingin thong sungah koih uh hi (Actsl. 4:1-7).

Acts 4:1-18 sim in. Bang vngliatna le thuneihna tawh amaute in hih thu te bawl hiam cih a dot uh ciangin Peter in bangci dawn hiam? Peter dawnna ah bangthu in amaute lauthawng sak hiam?

Jew makai te in sawltakte thuneihna tawh to bawl uh hi.Ahi zongin, Peter in Jesu min tawh na lamdang bawl bek hilo in hotkhiatna in Ama kiang bek pan hong pai ahihna zong gen lai hi. Sawltak te in Jew ki-ukna sangpen mai ah thusit thuak ahih uh hangin, amaute in a sangzaw thuneihna sunga om uh a hi hi. Amaute mi mawkmawk, pilna sangkah lo Galilee mi ngabeng te hi lel uh ahih manun tua lai a omte in amau hangsanna leh a thugen siamna uh amuh uh ciangin lamdangsa uh hi.Hih makaite in a phawkkhak loh uh hangin Jesu   genkholh bangin Kha Siangtho in sawltak te ompih hi (Matt. 10:16-20).

Mi khempeuh muh in a kidamsakpa amau tawh om ahih manin na lamdang nial theilo uh a, sawltakte in thu a hilh nawnlohna dingin amaute in thupia uh hi. Amau nasep minthanna leh a thupuak uh Jew makaite in lau uh hi. A thu te diktak kantello uh ahih aman un, lunggulhna leh deihsehkholhna in amau gamtatna ukzaw hi.

Peter kammal nunungte in sawltak thubu sunga kammal manpha te ahi hi: “no le no kingaihsun dih un, Pasian mitmuhna ah Pasian thu sangin no thu kong man ding uh, koi maanzaw ding a hi hiam? Ahang in, ka muhsa uh le ka zaksa uh thu gen lo in ka om thei kei uh hi” (Acts 4:19-20, ZIV).

A sang a niam hi ta leh, thuneihna lunggulh luatna in bangzah lauhuaina tun thei cih thu ngaihsun in. Nasem dingin Christian te hong kisam ahih mah bangin, thuneihna ding zolna pan banghangin kikep huai hiam?

WEDNESDAY July 18

ANANIAS LEH SAPPHIRA

Pawlpi masa hun a neihsa khempeuh gawmkhopnain hihloh phamawh thu hilo hi. Pawlmi lutna dingin a kul zong hilo hi. Himah ta leh, amau citpiak tawmna in thu-um mite a thalawpsak etteh huai pawlkhat om hi. Tua lak ah khat in Barnabas ahi hi (Acts. 4:36, 37). Sawltak thubu sungah ama nasepna thupi om lai hi.

Ahi zongin, a pua lam panin do na a om ma lai in a sunglam pan in pawlpi kipumkhatna a susia thei a hoihlo lam etteh ding pawlkhat na om zo hi.

Sawltak 5: 1-11 sim in. Hih tangthu ah bang hilhlak lak ding om hiam?

________________________________________________________________

Luke in a thu kicing in hong genloh hangin, hih lai a buaina bulpi pen in Ananais leh Sapphira te in sum kemsim nuam lua hilo zaw in thu-um mite lak ah kikhemna om ahihna hong tellak ahihna kimu hi.Amau mawhna in ngaihsun khollo a sepna hilo in kidawmtak a geel diudeu kholhna pan aa sepna ahi “Topa Kha Siangtho ze-etna” ahi hi (Acts 5:9). Amau neihsa te zuak in a sum pawlpi piak ding amaute kuamah in kun lo hi. Amaute in amau hamphatna ding bek ngaihsun uh a, tua bang a piakkhiatna uh tawh thu-um sanggam te lak ah citpiakna minphatna a ngahna ding un a hanciam uh hi kha ding hi.

Pasian in nasia takin gawtbawl ahihna hih thu in hong telsak hi. Jesu hong paikik baih ding upna hang tawh a neihsa te kineipawl a hih uh hangin, Ananais leh Sapphira te gamtatzia in Pasian tungah cihtak ding a thupi-na neusehna hong suak a, thu-um mite lak ah huzaap hoihlo hong piang hi. Ananais leh Sapphira te a kisikkik na ding uh hun kipiakna thu kigenlo na in a tangthu hong tomgenna hang zong hi thei hi.

A thu tawpna ah, a pat pan a tawp dong amau te mawhna gamta uh hi. Mawhna daan a piak pahpah loh hangin Pasian in mawhna thupi ngaihsut hi (Ezek. 18:20, Rom. 6:23). Mawhna thaman a piak pahpah lohna in Pasian hehpihna tawh kidim ahihna hong phawksak tawntung hi (2 Pet. 3:9).

Hih pawlpi mi masa nihte bangin hehpihna ciangtanna dong i sep (mawhna bawl) teitei loh ding banghangin kidop huai hiam?

THURSDAY July 19

A NIHVEINA KIMAN

Mawhna tungah Pasian thukhenna dingin sawltak te kizang thei ahih leh mawhnei te tungah Pasian hehpihna a puak dingin zong kizang thei hi. Damsakna tawh nasepna (Acts 5:12-16) vangliatna in a kimu theilo Pasian Kha Siangtho in amau tungah nasem ahihna teci ahi hi. Peter liim a om te na ngawn in damna ngah hi ci in um uh hi. Lungdamna thubute sunga zong tua tawh kibangin Jesu puanmongtep a lawngkha numei in damna ngahna thu om hi (Luke 8:43, 44). Peter lim ah omte dam cih thu Luke in hong genlo a, ahi zongin mite in tua bangin um uh hi. Tua bang thuciin upna te a om lak nangawn ah, Pasian in a hehpihna hawmkhia veve hi.

Tua bangin sawltak te Kha tawh kidim in lim le nalamdang tampi bawl semsem le uh, biakna makaite hazaatna tawh kidim semsem uh hi. Tua hangin sawltak te a nihveina hong man uh hi (Acts 5:17, 18). Lamdang tak aa a suahtak khit uh (Acts 5:19-24) Peter in hangsan  tak in “mite thu sangin Pasian thu mang zaw ding” (Acts 5:29) a cih khit ciangin, thunei te pawlkhat in amaute nasepna in Pasian ompihna tawh sem a hih khak ding ngaihsun pan uh hi.

Acts 5:34-39 sim in. Sanhedrin te in sawltakte a thah lohna dingun koi bangin Gamaliel in zol hiam?

Sadducces te in Sanhedrin uk zaw uh hi, ahangin Pharisees te mi tawmzaw hi. Gamaliel pen Pharisee hi a thukham tawh kisai doctor khat hi. Jew te lak ah a kipimuh mahmah khat hi a “Rabbi” ka siapa cih sangin “Rabban” eite siapa ci in a kisam ahi hi. Paul zong ama nungzui (sangnaupang) khat ahi hi (Acts 22:3).

Gamaliel in tua ma hun sawt nailo thupiang langpanna nih te thu gen hi. Nungzui zong pawl khat nei in buaina tampi piangsak a, makaite a kithah ciangin a nungzui te a kithehthang na thu gen hi. Christian hong khanzia zong mihing phuat tawm ahih leh bel pak lel ding hi cih thu a hilh a hi hi. Tua hilo in, sawltak te cih bangin Pasian nasepna ahih leh koi bangin kho zo mawk ding hiam? Gamaliel ngaihsut piakna sang uh ahih manin sawltak te a sat khit uh ciangin Jesu min tawh thu a hilh nawnloh na ding un thupia uh hi.

Ngaihsut piakna hoih in bang zah in thupi leh kisam ahihna hih tangthu in hong bangci hong hilh hiam? Eite zaknoploh thu hong kigen phial ta zongin, banghangin ngaihsut piakna ngen a mantheih kisin ding thupi hiam?

FRIDAY July 20

NGAIHSUT BEH DING: “Topa in ama innkuan, leh neihsa te a kemzeek dingin muanna tawp a hong ap neihsakemzeek te i hi hi. Eite tungah hong ap in vantung ah amah kahto khin a, a hong pai kik ding vil leh ngak dingin hong lamen hi. Eite hong piak vaipuak tungah muanhuai in om ni, tua hi kei leh i ihmut laitak Amah hong pai kha ding hi.” – Ellen G. White, Testimonies for the Church, vol. 8, laimai, 37.

“Pasian nasep na ding in a kiciamna leh kipiakkhiatna te lipkhaphuai zia mite in a theih dinguh kisam hi. Mihing khat le khat kikal a kiciam thukimna tawh kibanglo hi. Pasian tawh kiciamna ahih manin a thupi lo siangtho lo deuh hiam? Thazawh thu tawh kisawl theilo ahih manin tua thuciam Christian te in awlmawhlo in om ding i hiam? Pasian tungah kiciamna zah in sep teitei akul na dang khat zong omlo hi.” – Ellen G. White Comments, The SDA Bible Commentary, vol. 6, 1056.

KIKUP DING DONATE:

1. Na dang tampi te lak ah Jesu in nungzuite tungah Ama hong pai kikna ding lametna leh leitung bup tuam nasepna ding vaikhak na nei hi. Hih thu nihte in leitung bup ah lungdam thu puak ding nasepna koi bangin hong huzaap hiam?

2. Mikhat in, “Tuni mahmah in Jesu hong pai ding bangin kiging in, tu zawh kum za bang ciang hong pai pan ding bangin Pasian nasep zom toto ni” ci ngei hi. Eite nuntakna leh nasepna ah hih thu koi bangin nuntakpih thei ding i hiam?

3. Eite thugenna te ah Jesu nuntakna, sihna, thawhkikna, leh hong paikikna ding thu in a laigil ahih den ding banghangin thupi hiam? A dang khat in ngaihsun leng, hih thu teng kihello in eite thugen khatpeuh in bang kiman na nei hiam?

4. Midang te lungsim hoihna le siatna thu a theihhak zia Ananais leh Sapphira te tangthu in

bang hong hilh hiam?

5. Tulai Gamaliel bang mi na theih a om hiam? Ahi kei leh, nang mahmah midang te a dingin Gamiliel mun ah na om hiam? Ngaihsut hoih piakna (acian piakna) leh ngaihsut hoih laakna (ngahna) in bangzah in thupi hiam? Hih thu te pan bang hilhlak om hiam?

Oo00oo