ZSS 1: Ka Tecite Na hiding Uh hi

SINNA 1                                                                        June 30 - July 6

KA TECI TE NA HI DING UH HI 

_______________________________________________________ 

SABBATH NITAK

Tukal sinna ah simding: Acts. 1:6-8; Luke 24:25, Luke 24:44-48; Deut 19:15; acts. 1:9-26; Pro. 16:33.

LAI SIANGTHO BULPHUH: “Ahi hangin note tungah Kha Siangtho hong tun ciangin vangliatna na ngah ding uh a, Jerusalem, Judea gam, Samaria gam khempeuh le leimong dongah ka tecite na hi ding uh hi.” (Sawl. 1:8, ZIV).

Leitung ah Jesu in a nasep zo ta hi. Lei mong dongah nungzuite in lungdamna a thupuakna dingun vangliatna-na lamdang leh limte bawlna ding - a pia a makaih ding Kha Siangtho Pasian in sawlpah hi. Ama mihing pumpi tawh nungzui te kiangah Jesu tawntung thei lo hi. Leitung bup nasepna ah leimi a hong piang a pumpi tawh om theilo bek hilo in, vantung ah a kilaktohna hangin Kha Siangtho hong pai ding kisam hi.

Jesu thawhkik masiah hih thu te nungzuite in telsiam lo uh hi. A neihsa te uh nusia in Jesu nung a zuih lai un nungzuite in Jesu pen Rome te khutsung pan suah-tak pih in David kumpi gam a phut kik a tanglai Israel minthanna a pia kik ding gamvai suahtakna piapa dingin lamen uh hi. Tua lo dingin zui hetlo kha ding uh hi.

Hih thu hang mah in Sawltak I sunga Jesu in a nunung pen thuhilhna nei hi. Tua in Kha Siangtho hong paina ding thu ahi hi. Sawltak alian I sungah Jesu vankahna leh pawlpi masa te in Pentecost a ding a kipuah-phatna te uh hong gen hi.

SUNDAY                                                                                                                 July 1

ISREAL A NGEI BANGSAKKIK

Thukhun Lui sungah Messiah tawh kisai genkholh-na nam nih om hi. Khat in, a tawntung a uk ding kumpi Messiah hi a (Late 89:3,4, 35-37; Isa. 9:6, 7; Ezek. 37:25; Dan. 2:44; 7:13,14) a dang khat in amite mawhna hanga hong si ding Messiah ahi hi (Isa. 52:13; 53:12; Dan. 9:26). Hih genkholhna gen a kitukalh hi zenzen lo hi. Messiah nuntak nasepna khennih te agen uh hi a, hotkhiatna ding thuaksiatna leh kumpi ahihna ahi hi (Luke 17:24, 25; 24:25,26).

Kum zalom khatna hun lai Jews te Messiah lamet dan in langbai ahihna kimu hi. A hong pai ding kumpi Messiah ding lametna in gimna leh sihna a thuak Mes-siah telkhial sak hi. A tung lam in nungzuite in zong hih kumpi Messiah lametna na nei uh hi. Jesu pen Messiah hi cih um uh a (Matt. 16:16, 20) kumpi tokhom tung a tut ciangin a vei leh tak a tu ding cih peuh kinial thei zel uh hi (Mark 10:35-37, Luke 9:46). A thuaksiat zia dingte Jesu in hilhkhol den napi nungzuite in tel zolo uh hi. Tua hi a, Jesu a sih tak ciangin, lamdang sa in thaneem mahmah uh hi. Amau kam ngiat panin, “Israel te tankhia ding pa amah hi ding a ka lemet uh” (Luke 24:21, ZIV) ci uh hi.

Sawltak 1:6 sim in. Hih dotna kammal in a telloh zia uh hong bangci lah hiam? Sawltak 1:7 sungah Jesu in bangci dawnkik hiam?

_________________________________________________________________________

Jesu sihna in nungzui te lungkia lametna sisak ahih leh, a thawhkikna in kumpi Messiah hi cih lametna bangzah in a khangsak zen tam. A thawhkikna in kumpi gam phut taktak ding hi cih upna zong a hi thei thu mah ahi hi. Ahi zongin, Jesu in a dawnkikna ah a dotlian uh dawnglo in, zong nial tuanlo hi. Pasian geelna hunte Pasian bek in thei a mihing te theih ding hilo cih phawksak in tua thu tawh dawngkik hi.

Luke 24:25 sunga nungzuite buaina hiam? Lai Siangtho hilh bang ahilo eimau upnop khat peuh up ding banghang baih hiam? Tua bangte koi bangin pelh thei ding na hiam?

MONDAY                                                                                             July 2

NUNGZUITE NASEP DING

Sawltak 1:8 sim in. Hih Lai ah nungzuite bang hih dingin kisawl hiam?

_______________________________________________

Nungzuite sep ding thupi thu li hih lai ah kimu thei hi:

1.             Kha Siangtho silpiak. Pasian mite lak ah Kha Siang-tho gamtang tawntung hi. Ahi zongin, kamsangte gen na tungtawn in en leng, mailam hun ah Kha Siangtho kibuak hun om ding hi (Isa. 44:3; Joel 2:28,29). Jesu ngiat Kha Siangtho kinilh ahih manin Ama nuntakna ah Kha Siangtho in nasem den ahihna kimu thei hi (Luke 4:18-21), ahi zongin vantung ah Christ a kah masiah Kha Siangtho kipia taktak nailo hi (John 7:39; Acts. 2:33).

2      Teci pangte. Mit tawh mu bil a te teci kici hi. Jesu nasepna te nungzuite in mit tawh mu in bil tawh a za uh ahih manun teci diktak muanhuai ahi uh hi (Acts. 1:21, 22; 4:20; 1 John 1:1-3). Tu in a theihtel uh Jesu thu leitung bup ah a gen dingin kisawl hi.

3.            Nasep ding geelna. Nungzuite in Jerusalem ah teci hi masa ding a, tua pan in Judea gam, Samaria leh a tawpna ah lei mong dong teci ding hi uh hi. Jerusalem in Jews te biakna phualpi hi a, Jesu kimatna leh kikhailupna mun zong ahi hi. Judea leh Samaria te in Jesu nasepna mun te mah ahi hi. Ahi zongin, nungzuite amau kiim bek hilo in lei mong dongah teci dingin kisawl hi.

 4.       Nasep zia ding hilhna. Thukhun Lui hun lai ah Pasian kiang ah gamte hong pai ding ci hi (Isa. 2:1-5). Israel te in gamte kiang Pasian thu va puak ding cilo hi. Jonah thu pen a tuam khat hi bek hi. Tu in ahih leh sepzia ding kibang nawnlo hi. Jerusalem pen phualpi mah hi veve a, tua lai ah omcip aa zungkhak ding sangin gamnawl pen lei mong dong ah kithehthang dingin nungzuite kisawl hi.

Luke 24:44-48 sim in. Nungzuite tangko ding bang hiam?

___________________________________________________________________

A thawhkik zawh ni 40 sungin Jesu in Pasian gam tawh kisai nungzuite tampi hilh kha ding hi (Sawl. 1:3). Tua nangawn telloh tampi neih lai uh hi (Sawl. 1:6). A theihsa uh genkholna tampi te tu in Singlamteh leh Hanhawm pan hong pai khuavak hangin khuavak thak ngah uh a telsiam thei ta uh hi (Sawl. 3:17-19).

TUESDAY                                                                                          July 3

AMAH HONG PAI KIK DING HI

Sawltak 1:9-11 sim in. Jesu vankahna Luke in hong bang ci lah hiam? Vansawltak nihte in amau kiang a thugenna bang hangin thupi se hiam? (Deut 19:15).

____________________________________________________________________

Jesu vankahna thu Luke in hong tom gen mahmah hi. Olive mual tungah nungzuite thupha a piak laitak vantungah kila to hi (Luke 24:51). Mihing te mitmuh in vantung ah kila to hi. Jesu vankahna in a lamdang Pasian nasepna tampi te lak ah khat ahi hi. Luke in “vantung ah kila to” cih kammal zang hi. Thukhun Thak sungah hih mun bek ah hih kammal a kizat hangin Thukhun Lui Greek kam aa ki at ah (Septuagint) na ki zang zelzel hi. Aki zatna mun te ah Pasian nasepna vive in kizang a, tua in Pasian mahmah in Jesu sihna pan phong in vantung ah lato cihna hong lak hi (Acts. 2:24, 32; Rom. 6:4; 10:9).

Meii lak ah Jesu a kahtoh khit ciangin nungzuite kiangah puanpaak silh minih a om na thu Sawltak thubu bek ah kigen hi. Tua minih te silh puanpaak in vansawltak te ahihna hong telsak hi (Acts. 10:30, John 20:12). Amuh na pan un vantung ah a kilaaktoh bang teek mahin hong pai kik ding cih kamciam pia hi. Tua hang mah in, amau muhna ngiat ah Jesu van kahto ahi hi (Acts. 1:9).

Tua hi a, mitmuh a vankah tohna in meii tung tuang hong pai kik takpi ding ahihna kipsak hi. Vangliatna leh minthanna tawh meii tung tuang in vansawltak te tawh hong paikikna mit khempeuh in mu ding hi (Rev. 1:7, Luke 9:26, 2 Thess. 1:7). Van ah a kilaktohna sangin hong kumkikna nakpi takin thupi leh vanglian zaw ding hi.

Jesu nihvei na hong pai kik takpi ding hi cih upna leh tua kamciam koi bangin tel taktak thei ding i hiam? Hih thutak in eimau nuntakna ah koi bangin hong huzaap huai hiam?

WEDNESDAY                                                                                                       July 4

PENTECOST A DING KIGINGKHOL

Acts 1:7, 8 sunga a dawnna ah Jesu in hun tawh kisai kamciam pia lo hi. Ahi zongin, Kha Siangtho hong pai aa nungzui te in nasep a zawh khit ciangin Amah hong pai kik ding hi (Matt. 24:14). A hun ki theilo Jesu hong kumkikna ding kamciam in beina hun naita ahihna leh thalawp aa hanciam tak sephuai ahihna hong thei sak hi. Sawltak thubu ah hih thu i sinbeh to lai ding hi.

Acts 1:12-14 sim in. Inndei tungnung ah kua dang zong om a, Kha Siangtho hong pai theihna dingin koi bangin kiginna nei uh hiam?

_________________________________________________________________

Olive mual pan hong kilehkik uh ciangin Jerusalem ah inndei tungnung ah nungzuite kikaikhawm uh hi. Numei nungzuite pawlkhat, Jesu nu le a sanggamte zong nungzuite tawh om uh hi (Luke 8:1-3, 23:49, 24:1-12).

Jesu sanggamte (Mark 6:3) in Joseph leh Mary ta dang Jesu naute, ahikeileh, Mary a tenpih in Joseph meigong hi leh Joseph zi masa tawh a tate hi kha thei ding hi. Nungzuite in Jesu sanggamte hong omna thu lamdang sa uh hi. Ahang in, Jesu nuntak lai in amaute um zolo uh hi (Mark 3:21, John 7:5). Ahi zongin, a thawhkikna leh James tungah a kilatna in tampi kilamdangsak hi kha ding hi (1 Cor. 15:7). A nung ciangin James in pawlpi makaihna ah Peter za laihto hi (Acts. 12:17, 15:13, 21:18, Gal. 2:9, 12).

Tatsat lo a thungetna (Sawl. 1:14) leh kikhopna ah tatsat lo a Pasian min phatna tawh (Luke 24:53) mawhthumna, kisikkikna, leh mawhna te nawlkhinna hong nei thei uh hi. A thunget ki-ap na uh dawnna in Kha Siangtho hong pai a amaute lungsim kikhat uh a, Jesu hong kumkik pah ding bangin a lungsim vuah ngaihsun uh hi.

Ni sim in i nuntakna ah Kha Siangtho in na hong sep theihna ding in koi bangin kipuahpha thei ding hiam?

THURSDAY                                                                                       July 5

A SAWM-LE-NIH NA SAWLTAK PA

Thu-um mi 120 kiim a pha pawlpi masa te sep masak pen in Judas zalaih ding teelna ahi hi.

Acts 1:21-22 sim in. Judas zalaih ding pa bang teng tawh a kidim kul hiam? Banghang in tua thu te thupi se hiam?

_______________________________________________

Jesu thawhkikna thu a thei teci hih ding kisam hi (Acts. 4:33 tawh etkaak in). Thawhkikna in Jesu Messiah ahihna a laktel thubelh teci leh Christian upna ah a poimawh thu ahi hi. Jesu nasepna ah kihel a Ama nung azuite lak pan tel ding ahi hi. Paul in Jesu nasepna masa te amah ngiat in amuh loh hangin Damascus lampi ah Jesu thokik a nungta takpi cih amuh na in sawltak khat mah ahih na pulaak hi (1 Cor. 9:1). “A ngei bang lo naungek tawh ki bang aa suak” (1 Cor 9:2; Gal. 2:6-9). Thuneihna le thupai zia in Sawm-le-Nih leh Paul bek sawltakpi hi uh a (Sawl. 1:25, 26), ahi zongin, a dang lungdamna thupuak te ahih leh lungdam thu tangko, thupuak te ahi uh hi (Acts. 14:4, 14; Gal. 1:19).

Sawltak 1:23-26 sim in. Koi bangin Matthia kiteel

hiam?

_______________________________________________

Jesu thawhkikna thu a thei teci hih ding kisam hi (Acts. 4:33 tawh etkaak in). Thawhkikna in Jesu Messiah ahihna a laktel thubelh teci leh Christian upna ah a poimawh thu ahi hi. Jesu nasepna ah kihel a Ama nung azuite lak pan tel ding ahi hi. Paul in Jesu nasepna masa te amah ngiat in amuh loh hangin Damascus lampi ah Jesu thokik a nungta takpi cih amuh na in sawltak khat mah ahih na pulaak hi (1 Cor. 9:1) . “A ngei bang lo naungek tawh ki bang aa suak” (1 Cor. 15:8) ahih hangin, sawltak dangte sangin neu zaw tuanlo ahihna Paul in gen hi (1 Cor. 9:2, Gal. 2:6-9). Thuneihna le thupai zia in Sawm-le-Nih leh Paul bek sawltakpi hi uh a (Acts. 1:25, 26), ahi zongin, a dang lungdamna thupuak te ahih leh lungdam thu tangko, thupuak te ahi uh hi (Acts. 14:4, 14; Gal.1:19).

Sawltak 1:23-26 sim in. Koi bangin Matthias kiteel

hiam?

_______________________________________________

Matthias a tel dan uh lamdang sa kha ding hi teh, ahi zongin, ai-lawn (ai-san) na tawh thu khensatna pen nidang pek in na kizang ngei khin zo hi (Lev. 16:5-10, Gam. 26:55). Tua ban ah, hih kiteelna pen a ki theilo mi hilo in siamna, theihna leh kipiakna kibang nih kikal teelna ahi hi. Thu-um teng in a teel pen pen uh Pasian deihna hi ding ci in Pasian kiang thungen uh hi (Pro. 16:33 etkaak in). Pentecost khit ciangin Kha Siangtho makaihna tawh kalsuan uh ahih manun ai-lawn a khensat ding kisam nawnlo hi (Acts. 5:3, 11:15-18, 13:2, 16:6-9).

Mi khat in na kiangah, “Ka nuntakna ah Pasian deihna koi bangin tel thei ding k ka hiam” hong ci leh, koi bangin na dawng diam? Banghang hiam?

FRIDAY                                                                                                July 6

NGAIHSUT BEH DING: “Pentecost leh Kumkikna kikal hun a sawt aa, a tom zongin Kha Siangtho makaihna tawh leitung bup ah pawlpi nasepna tawh kidim ding hi. Christ nungzuite in Ama hong paimasak lai in mihingte a ding bang hong sepsak aa, hong pai kikna a dingin kisikkik a upna tawh koi bangin kiging ding cih hilh ding ahi hi. Lei mong dong leh hun bei dongin amaute teci ding ahi uh hi (Sawl. 1:8) … Hih gel a kipicin madong eite in tawlnga lo in sep ding ahi hi.” – John R. W. Stott, The Message of Acts: The Spirit, the Church, & the World (Downers Grove: InterVarsity, 1990), laimai, 44.

“Nungzuite tungah Honpa sawlna in thu -um khempeuh ading zong ahi hi. Hun bei dong a om ding thu-um mi khempeuh tungah sawlna ahi hi. Kha gup ding nasep in sia te bek sep ding hi ci a ngaihsutna in nakpitak a khialhna hi. Lungdamna thu a sang khempeuh tungah sep ding a hong kipia ahi hi. Christ nuntakna a sang peuhmah a mihing pih te honkhiat nasep a sem dingin sathau kinilh (ordained) ahi uh hi. Tua thu hang mah in pawlpi kiphut hi a, tua bang a sem a ki- ap mite Christ tawh nasem khawm te ahi uh hi.” – Ellen G. White, The Desire of Ages, laimai, 822.

KIKUP DING DOTNATE:

1. Sawltak 1:7 in Mark 13:32 sunga, “Ani ahi zongin, a hun ahi zongin kua mah in a thi kei hi, vantung a vansawltakte nangawn in a theikei uh in a thei hi” cih thu hong phawk sak in. Ellen G. White in, “Hun tawh kisai in Pasian mite Pasian mite tungah thuhilhna om kik nawnlo ding hi. Kha Siangtho kibuak hun ding a hi a, Christ kumkik hun ding ahi zongin eite theih ding kisam lo hi.” Selected Message, vol. 1, laimai, 188. Bang ci lai hiam cih leh, “Hun ahi zongin, ni ahi zongin, Christ hong kilat ding kum a tangko mi peuhmah, Pasian in tangko ding aa a piak ahilo hakkol amah a kisuan tawm ahi hi.” – Advent Review and Sabbath Herald, Sept. 12, 1893. Hih tawh kituak thu tuni in bang om hiam?

2.    Mi khat in, “Pasian in sitni sangin teci tam kisam zaw” ci ngei hi. Hih thu na bangci ngaih sut hiam?

3.  Pawlpi misa te hun lai in thungetna koici thupi seh uh hiam? Nuntakna ah a thupi khensatna i neih ding ciang thu i nget pen a kituak kha mawk hiam? Na nuntakna ah thungetna bangzah in thupi hiam?