Zo Phualva Vol 08, Issue 10: Why Sin Was Permitted? (Part 3)

Banghangin Mawhna Om Kiphal Hiam? (part 3)

---

A manlaang thei penin Pa kiang pan hong pai khia a, vantungmite zongh amah banga a lungkim loh theih nadingun na hong seem hi. Pasian a zahtaak mahmah bangin a ngimna thukpi seelsimin hong vaak kawikawi hi. A masa-in Pasian kumpigam ki-ukna ahi Pasian thukhaam pen a kimuanmawh nadingin hong geen hi. Leitungmite’n bel thukhaam kisam kha mah ding uh hi. Ahih hangin a pil, amau pilna tawh a gamtang thei vantungmite’n Pasian deihloh seem het lo ding uh hi. Amau ngaihsutnate uh siangtho ahih manin Pasian mah bangin khial thei het lo ding uh hi ci hi. Pasian Tapa in pa tawh kizakima a om vial pen Lucifer kihuatna leh kigawtna hi a, thumaan het lo hi ci hi. Lucifer zongh a kizahtaakhuai leh a kipahtawi huai khat mah hi ci hi. Tua hi a, Lucifer pen a saangpen munah om thei leh vantungmi khempeuhin suahtaakna ngah ding uh hi. Tu mahmah in zongh amaute suakta lo uh hi: bang hanghiam cih leh amaute UKPA deihna bangin a om uh kuula, a biak a paai uh kul hi ci hi. Hih bang kheemna teng tawh a kheem takciangin vantungmi tampitak in na saang pah uh hi.Khrist dinmun bel kibang gige lai hi. Lucifer in Khrist a hazaat mana a hilo lamah geena, Khrist tawh kizakima a kigeenna in Khrist dinmun pen a maan mah ahih lam tellah zaw hi. Vantungmite tampitak in Lucifer kheemna ah mittaw in om uh hi.

Vantungmite’ ukpipa a hihna zanghin siamna thuuk mahmah tawh vantungmite’n zongh Pasian a muanlah nadingun guuk sep sim hi. Pasian’ ngimnate leh vaihawmnate a hih lo lamin hei khia a, vantungmite uploh ding leh lungkimloh nadingin bawl hi. Kam khum nono leh aw zol nono tawh vantungmite kiangah thu muam niloh hi. Amah pen Pasian tungah a thumaan den mah bangin kigeena, tua laitak mahin Pasian kumpigam kip nadingin ki-uknate leh thukhaamte kheek kuul hi ci hi. Pasian thukhaam langpang sa-in naseema, ama lungkimlohna pen vantungmite leh vantung ki-ukna a lemtuah bang danin kilangh sak hi. A simtham takin kikhenna leh kilangpanna khaici a tuhtuh hi napi, a siamna thuuk mahmah tawh amah pen vantungah kilemna leh lungnopna, muanna a om den nadinga hanciam mahmah bangin kidawk sak hi.

Lungkimlohna pen hong kipan khia ta hi. A kilangtangin kikhenna a om loh hangin, vantungmite lakah pawl kikhen nading lungsim hong om ta hi. Pawlkhatte in Lucifer lamah pangin Pasian Kumpigam ki-ukna maanlo hi ci uh hi. A tuungin vantung ii ki-uknate hoihsa in lungkim mahmah uh hinapi, Pasian ngimna leh vaihawmnate a theihpih loh manun, tu-in Lucifer zuau kheemna um in, hong lungkim nawn lo mawk uh hi. Khrist a liatsakna thu thei loin lungkim nawn lo uh hi. Hih a lungkim lo vantungmite in Lucifer panpih uh a, Lucifer pen Khrist tawh a kizakim mah ding hi cih pih uh hi. Ahih hangin, Pasian lama kip vantungmite’n Lucifer pen a kikheel kik nadingin geenpih uh hi. Pasian deihna ah ki-ap zaw in ci uh hi. Khrist ahih leh Pasian Tapa hi a, vantungmite kibawl ma pek a kipan Pa tawh pumkhat ahi sa hi. Pa taklamah ding dena, a zaliatna pen Ama nuaia om khempeuhte adingin thupha hi. Tuni ciang dong kuamah in Amah nial ngei nai lo hi. Vantung ii kilemma pen khatvei zongh nawngkaai ngei nai lo ahih manin, tu-in nawngkaina, kikhenna om sak kul se ding hiam ci uh hi. A dik vantungmite’n a lungkimlo a vantungmi pihte kianguah, Pasian langpang se dah un, Na langpan uh leh kisiacip lel ding hi uh teh. Hong kihei kik unla, Pasian kiangah thumaanna tawh hong ki-ap kik zaw un ci-in thuum uh hi. Pasian in angeina mah bangin, migiitna lianpi tawh Lucifer pen thuak tentan lai hi. Vantungah lungkimlohna leh muhdahna cih bang peuhmah kithei kha ngei nai lo hi. Hih thu in thu thak, a lamdang, a kithei zo lo, a kituat thei lo thu ahi hi.Lucifer nangawn in ama ngaihsutna bang a sepkhiat ding hong lau giauguau saam hi. Ahih hangin khawl tuan lo mawk hi. Pasian itna leh hehpihna bek tawh amah khial zaw ahih lam kihilh thei bek hi. Lucifer in zongh amah khial zaw ahihlam kithei hi. Amah in “Topa in a lampi khempeuhah thumaanin, a nasepna khempeuh ah siangtho hi,” cih a thei hi. Ps. 145:17. Pasian thukhunte in dikin, vantungmite maiah a hi banga a geen ding hi cih mu hi. Hih a muh leh a theih thu bangin om hileh amah leh vantungmi tampi gumkhia zo mah ding hi ven. Ahih hangin Pasian tunga a kipiak ding pen ut lo hi.

Vantungmite laka lian pen ahihna dinmun a nusiat khit hangin, Pasian lamah kihei kik henla, PiangsakPa pilna thei in, ama dinmun tawh lungkim lel hi leh, a dinmun ngei mah ah kikoih kik ding ahi hi. Tu-in, thu khensat hun hong tung ta hi. Pasian kiangah ki-ap ding maw? Ahih kei leh, a kilang tangin langpanna kipan khia ding maw cih thu ahi hi. Pasian kiangah ki-ap kik dektak hi. Ahih hangin a kiphatsakna in aki-apkik loh nadingin dal hi. Lucifer in khial ingh ci a kipulaaka, ama ngaihsutnate khial hi ci-a, a kosiat kumpigam kiangah a ki-ap kik ding pen haksa sa mahmah hi. 

Nahtang(Banana)

Nahtang sunga om atuiniak(pectin) in I sisan lak aa alauhuai thau(cholesterol) kiam sak hi. Nahtang leh apple agihna kikim tuak ah hileh nahtang ah pectin tamzaw hi. Apple medium size khat leh nahtang medium size khat ah pectin omzah kikim hi. Nahtang neu nih ah sodium ki hello phial zah in tawm aa, vitamin C zong ahoih khom a tamlualo ciang kihel hi. Vitamin A leuleu ciang in mikhat in nisim aa I kisap zah I 1/5 bang kihel hi.

Nahtang khat ah calorie 100 bang om aa, thau pen a omlo phialin potassium tam mahmah hi. Potassium in lungtang kisaai (blood pressure) kiamsak hi. Nahtang pen kal(kidney) a suang om sak ding nahoihlo te do nading a, ahoih mahmah khat ahi hi. 

Nahtang pen sungpai leh sungkhak tea ding in ahoih mahmah khat ahi hi. Nahtang hawng I asung lam(inner surface of the skin) pen meikatna leh tuisa kibuak khakna te ah nuhleng hoih hi.

Buukkhuhza

1. Lime/Lemon tui/juice - 1cup

2. Lothaang kang - 3zingh(cloves)

3. Ukalit thau - 3taak(drops)

4. Khuaizuu - 2sikkeu(Tbs)

5. Lengthei(pineapple) - 1pum

Hih teng hel in nikhat in 3vei ta dawn den ding, khat vei dawn aa 2-3 Tbs ta dawn ding.

Theihding.

Bukkhuh khaksawh om te (wet cough) aih leh pineapple(lengthei) zang inla khaksawh omlo bukkhuh aih leh khuaizuu zang in. 

Zo Phualva Thupuak-Volume 08, Issue 10 by DavidLian on Scribd