ZSS LESSON 12: BABYLON LEH ARMAGEDDON

LESSON 12                                             June 16 – June 22

BABYLON LEH ARMAGEDDON

NIPI NITAK

TUKAL SUNG SIM DINGTE: Rev. 14:8; 16:19; Isa. 52:9; Rev. 18:1-10; 16:12-16; 1 Kings. 18:1-40; 1 Cor. 15:1-2.

LAI SIANGTHO BULPHUH: “A taltang ah: THUTHUK ALIAN BABYLON NUEI KIZUAKTE LE LEITUNG KIHHUAINATE’ NU ci-in min kigelh hi” (Mang. 17:5, ZIV).

I theihsa mah bangin Mangmuhna thubu in Thukhun Lui kammal le limte tawh kidim hi. Enpak leng, Babylon cih min Mangmuhna sungah guk vei om hi. Ahi zongin, hih in tanglai Nebuchadnezzar gam a gen nuam hilo hi. John in thutak hilhtel na dingin Thukhun Lui lim hong zang hi zaw hi. Hun nunung ciangin gamvai le biakna vai ah vanglian thahat in Pasian mite a bawlsia ding Babylon thu a gen ahi hi.

Tua mah bangin, Armageddon cih kammal zong Mangmuhna sungbek ah a kigelh hangin tanglai Israel gam ah mual khat ahi Megiddo cih kammal pan hong pai ahi hi. Armageddon thu upmawh sansatna tampi om a, mi tampi in leitung beikuan ciangin Megiddo mun ah galkap honpi tawh kidona lianpi dingin ummawh uh hi.

Tukal sung Babylon le Armageddon thu Lai Siangtho in hong bangci hilh hiam cih i sin ding hi.

SUNDAY                                                                    June 17

NUMEI HEHNA LENGGAHZU

Rev. 14:8; 16:19; 17:5; 18:2, 10, 21 sunga Babylon thu 6 vei ki-te sim in. Thukhun Lui ah Babylon tangthu in hun nunung thupiangte ah Babylon thu hong bangci hilh hiam?

Lai Siangtho pen khuapi nih ahi Jerusalem le Babylon thu hi kici hi. Jerusalem in Pasian mite khua, kamciamna khua hi a (Ps. 102:21; Isa. 52:9; 65:19; Rev. 3:12) Babylon in nenniamna, ngongtatna, biakna khial, le Pasian langdona khua ahi hi.

Babel tausang thu ngaihsun in (Gen. 11:9). Hebru kam in Babel cih kammal leh Babylon kammal ki bang hi. 1 Peter 5:13 ah, Peter in thu-umte “Babylon” pan hopihna lai khak hi. Tua Babylon in tangtawng a siakhin tu laitak Iraq gam a om khuapi lui a gen hilo a, pawlpi bawlsia ding Rome a gen nuam ahi hi. Mangmuhna thubu in hong lah Rome nasep zia ding panlaak panin Rome in Babylon hi kici thei hi.

Rev. 14:8 le 18:3 sim in. Hih munte ah leitung le Pasian mite tungah Babylon siattutna hong bangci lak hiam?

Babylon vangliatzia Mangmuhna in siangtak in hong lak a, lampi tuamtuam tawh leitungbup siahuaisak hi. “a angkawmnate a haisakna lenggahzu” cih kammal in thuhilhna khial, upna khial, le a siahuai gamtatna te pan hong piang thu a gen ahi hi (Rev. 14:8). Babylon in gam khempeuh ah siatna a kizelsak hi (Rev. 18:3). Tua hi in, mite a kidop mahmah kei uh leh siatna sungah tung ding uh hi.

Tulai leitung nekguukna, lungbuaina, le nenniam nate en in. Tuate in Jesu le a kammal ah zungkip ding a thupi na bang hong hilh hiam?

MONDAY                                                                   June 18

BABYLON PUUKKHIN

Bangzah takin a huzaap lian in leitungbup zel mah ta leh, Babylon a puk hun hong tung ding cih Mangmuhna thubu in hong hilh hi.

Revelation 18:1-10 sim in. Hih munte in “a lian Babylon” thu bang hong hilh hiam?

Mang. 14:8 sunga vansawltak nihna thupuak ahi Babylon puukna thu Mang. 18:2ah kidawk kik hi. Bangzah tak in siasuak cih a lahna ahi hi. “Lai Siangtho in Topa hong pai ma in Satan in ‘na lamdang, lim le a lamdang khemnate, a mangthang dingte gitlohna namkim tawh khem ding’ leh amaute in ‘a kihotkhiat theihna ding uh thutak nial ding’ uh aa lampialna a piangsak a lian mengna thu um ding uh hi” 2 Thess. 2:9-11. Hih thu hong tunma, pawlpi le leitung hong kipawl taktak masia Babylon puk nailo ding hi. Kikhelna damdam in hong om ding a, Rev. 14:8 kimtak in hong tangtung haklo ding hi.” – Ellen G. White, The Great Controversy, pp. 389, 390.

A kicingin tangtung khin maw tangtung nailo cih Pasian bek in thei hi. Ahi zongin, ni khat ni ciangin a lian ama gitlohna hangin khalam Babylon in Pasian mai ah thukhenna thuak ding cih thu i thei hi. “Ahang in, a mawhnate van ban in kiciang a, Pasian in a gamtat khialhna te ciamteh zo hi” (Rev. 18:5). Hih kammal in Thukhun Lai tanglai Babylon thu (Jer. 51:9) hong kilangsak a, thukhenna hun hong tung pelmawh ding ahihna hong lak hi.

Hih thukhenna hong tun ding a lamdang thu hilo hi. Tanglai Babylon in zong thukhenna thuakzo hi (Daniel 5). Babylon mah bangin mi khempeuh in a sepna bangun thukhenna thuak ngeingei ding ih Lai Siangtho in siangtak hong gen zo hi. Christian te ading a lungdamhuai thu in, eite adingin thukhenna ah hong thumsak ding Palai i nei hi (1 John 2:1; Dan. 7:22). Tua hi kei leh Babylon tawh i thuak ding kilamdang khollo ding hi.

Tu laitak gawtna daan thuaklo bang a i muh thumaanlohna le siatna te in a nunung Pasian thukhenna thaman piakna thuak ngeingei ding cih thu in bang hehnepna hong pia hiam?

TUESDAY                                                                  June 19

ARMAGEDDON

Mi tampi in Mangmuhna thubu a telkim loh hangin, Armageddon cih kammal minthang bilbel hi (Rev. 16:16). Leitung vai ah zong mite in hih Armageddon pen a tawpna gimthuakna in ngaihsun ciat uh hi. Aksi leng gol khat in leitung a suksiatna “Armageddon” cih Hollywood in video khat in bawl hi. Leitung mi khempeuh ngaihsutna ah leitung bei ding thu om ciat veve hi. Christian tampi te in Armageddon cih pen leitung bei kuan ciangin nisuahna laizang gam (Middle East) teng ah gal kidona lianpi dingin um uh hi. Pawl khat bangin Asia gam pan galkap 200,000,000 (200 million) in Israel gam saklam ah galdona pi dingin um uh hi. Pawlkhat leuleu in, Megiddo cih mun ah a nunung pen leitung galpi hi ding in um uh hi.

Bangbang hi leh, Lai Siangtho in tua bangin hong hilh lo hi. Armageddon in gam khat le khat kidona mawk hilo in, khuavannuai kidona ah a tawpna kidona pi ahi hi. Gamvai le sum lei sum zuakna gal hilo in biakna buaina thu ahi hi.

Rev. 16:12-16 sim in. Hih mun bek panin Armaggeddon in bang hi i ci hiam?

Amsa in, hih kammal in limcing a kizang ahihna kimu thei hi. Gulpi kamsung pan uiphuk tawh kibang kha hong pusuak khia cih in kamsang khial kam pan leh sapi kampan pusuak cihna hi (Mangmuhna 13 a kamsang zuau in lei pan pusuak sapi a gen nuam hi). Kidona lianpi in “dawite kha”in “Pasian ni lianni” (Rev. 16:14) in galdo dingin kuan khia hi. Armageddon in Christ galkapte le Satan galkapte kikal leitung bup kidona buaina ahi hi.Tu lai Iraq gam aa om Megiddo mun ah kido gal hi peuhmah lo hi.

Revelation 16:15 sim in. Hih thupiangte kawmkal ah Ama dikna tawh kituam theihna ding le hong pai ding kamciam tawh Jesu in tha hongpiakna in bangzah takin lungdam huai hiam? Hih thu in i galdo in kha gal ahihna hong bangci telsak hiam?

WEDNESDAY                                                            June 20

ARMAGEDDON LEH CARMEL MUAL: KHEN KHATNA

Hih a lian Armageddon gal in bang hiam? Amasa in, a min in “Megiddo mual” khiatna hi leh kilawm hi. Ahi zongin, Megiddo mun kiim ah Carmel mual lo mualdang omlo a, Lai Siangtho siamte in Megiddo mual pen Carmel mual ahihna mu uh hi.

Carmel mual tunga Elijah le Baal kamsang khialte tangthu in Mangmuhna 13 sung a thu limla ahihna Lai Siangtho sinte in tel mahmah uh hi. Zanni a i muhsa bangin, Rev. 16:13 a gulpi, sapi, le kamsang zuaute in Sinna 9 a i sinsa ahi Mang. 13 sunga kineihtawm thumgawm khat (thumgawm pasian tuh) kawk hi.

Mangmuhna 13 sunga a nihna sapi in na lamdangte bawl a, mi khempeuh muh in vantung pan mei nangawn kiasa hi (Rev. 13:13). Hih thu lian in Pasian le Satan, a maan Pasian biate le sapi lim a biate kilangneihna ah tun ding hi (Rev. 13:14).

1 Kings 18:1-18 sim in. Mangmuhna thubu sunga kimu a nunung thupiang dingte thu hih tangthu a bang kimu thei hiam?

Hih mun ah kidona lianpi thu siangtak in kimu thei hi. Elijah in aneu 18 ah siangtak in gen a, mite in Psian thukham nusia in pasian khialte bia in zui uh hi. Siatna, gitlohna bang lim bang mel tawh hong pai ta leh hih thu mah buaina pi hilo hiam? Eite in “vantung le leitung, tuipi le tuinakte a Bawlpa” bia maw (Rev. 14:7), ahikeh midang nadang te bia i hiam? Mangmuhna 13 a thupiang en lehang, mite in Topa bialo in sapi le a lim a biakna uh kimu thei hi. Kaingawi cih bang om theilo hi. Psian lam i om kei nak leh Satan lam om i hi pah hi. Carmel mual a thupiang bangin Armageddon kidona ah zong i dinna panlaak hong kitel mahmah ding ahihna kimu thei hi.

THURSDAY                                                               June 21

ARMAGEDDON LEH CARMEL MUAL: KHEN NIHNA

1 Kings 18:18-40 sim in. Bang thu piang a, koi bangin tawp hiam? Hih tangthu in hun bei kuan kidona lianpi koi ci tawpding cih hong bangci hilh hiam?

Carmel mual a kidona in Pasian kamsang Elijah le Baal kamsang 450 te kidona hi. (Siatna in hoihna a vulhnelh zia ngaihsun in). Vantung le leitung a Bawlpa ahi Pasian maan kua hi a, leitung khempeuh a khem gulpi ahi Baal kua hiam cih sittelna ahi hi (Rev. 12:9).

Baal siampite in a biakna tung vuah mei a khiat theihna dingin Baal kiangah thungen uh hi. “nakpi takin kiko un”, “ihmu hi kha ding hi” ci in Elijah in selnoh hi (1 Kings 18:27, ZIV). Siampite amau mahmah kinasak tawm uh hi. Siluan dongin amau le amau tem tawh kikuikeek uh hi. Nitak biakpiak hun ciangin gim le tawl in lungkia ta uh hi.

Elijah biakna tau tui thumvei buak kawt uh a, hawkguam ah tui kivung hi. Elijah in Pasian tungah tampi ngen selo in tomno cik khat thungetna nei hi. Thakhat thu in Pasian in mei khiatsuk a biakna tau suang le a nuai a lei nangawn kangtum hi. Baal tawh ki lamdang Pasian maan i vangliatna in siangtak in kimu ta hi.

Revelation 16:13; 19:20, 21 sim in. Hih munte baal kamsang khialte thuakna tawh saikaak in. Bang thu na mu hiam?

Armageddon thu telloh tampi a om phial zongin, Armageddon ngah ahi: Pasian galte a kisuksiatna le Pasian le Ama mi siangtho te diktanna thu i tel hi.

1 Cor. 15:1, 2 sim in. A thu lian in Armageddon thu agenloh hang, Paul in bng thu hong gen a, mailam thupiangte ading in bang hagnin hih thu phawk ding thupi hiam? Rev. 16:15 zong sim in. Hih mun tegel in bang hong hilh khawm uh hiam?

FRIDAY                                                                     June 22

NGAIHSUT BEH DING:”Armageddon galdona thu in mimal thutak teelna ah a deih huailo piansak nate leh thupiangte hong pian ding thu hong gen hi. “Ngai in, guta bangin kong pai hi. Amah guaktang le zumhuai takin pholak aa a omloh theihna dingin hak gige sa in puansilh a ompa thupha ngah ahi hi” (Rev. 16:15, ZIV). Armageddon thu a genna laitak hih thu hong genna ahang in Jesu hong paikikna le hunbei kuan a ding mimal kiginkholhna a thupi zia Thukhun Thak kammal te hong pulaak kik ahi hi.

“Rev. 17:14 sungah, ‘Amau te in Tuuno va do ding uh hi. Ahi hangin, kumpite Kumpipa le tote’ Topa tua Tuuno in amaute zo dinga, asapsa a teelsa le a muanhuai ama nungzuite tawh omkhawm ding uh hi.’ Hih a lian gal sunga galkap honkhat te (Pasian mite) in galvante zangin midangte suksiat ding sawm hi zaw lo in, Pasian sapna le teelna ah muanhuai sawm zaw uh hi.Tu lai a gam khat le khat kidona tawh a kilamdanna in hih thu ahi hi. Ka gensa mah bangin, Armageddon galdona in lungsim kidona ahi hi. HIh in lungtang a ding kidona hi a, a kigo Tuuno tungah cihtak ding sapna galdona ahi hi(Rev. 5:9, 10, 12; 13:8).” – Jon Paulien, Armageddon at the Door (Hagerstown, Md.: Autumn House Publishing, a division of Review and Herald Publishing Association, 2008), p. 193.

KIKUP DING DOTNATE:

1.    A taktak mun lian (literal place) ah Mangmuhnathubu in a gen thupiang dingte piang ding ci aa a um khat bangci huh theih ding na hiam?

2.    Babylon huzaap in leitungbup zel ding cih i mukhin hi. Babylon hilh thu te bang hi a, tua thuhilhna te koi bangin khensiam in peel thei ding i hiam?

3    Monday sinna a Ellen G. White gelh, “pawlpi leleitung a kipawl taktak masiah Babylon puuk nailo ding” cih thu ah “pawlpi le leitung kipawl” cih thu ngaihsun in. Eite a ding a vanglian vauhilhna bang om hiam?