FSS ZIRLAI 11: PATHIAN HMINSINNAK LE SAHRANG HMINSINNAK

ZIRLAI 11                                                              June 9-15

PATHIAN HMINSINNAK LE SAHRANG HMINSINNAK

---

SABAT TLAI LAM:                                                       June 9

TUZARH SIAR DING: Sem. 17:9-11; Suah. 31:13,17; Thup. 13:17; Efe. 1:13,14; Heb. 4:9,10.

BIBLE CANG KEN: “Bawipa ziangtin kim tithei Pathian, na thil tuahmi hi ziangtluk mangbangza so an si. Miphun hmuahhmuah ih siangpahrang na lamzin cu a dingmi le a dik mi an si” (Thup. 15:3).

MOSI hla le tuufa hla cu tuzarh ih Bible cangken ihsin a hram kan thok ding. Hlasaktupawl cu sahrang le a milem tlunah siseh, a number ai-awhtu tlunah siseh,  nehnak ngahtu an si. Van ih thlalang tifinriat kapah an ding (Thup. 15:2). Khatawk mipi lakah ziangtin so kan tel thei ve ding.

Hminsinnak pakhat an rel theu mi cu ni neta ih Pathian zumtu ngaingaipawl ih vancungmi pathum thucah kha an phuang ding. Kha mi kha sahrang hminsinnak kalhih ralrin peknak a si. Bible sung hmuahhmuah ah hivek ih a thupi mi ralrin peknak a um lo. Himi hminsinnak pomdan tampi a um ih, kum tampi an buaipi mi a si. Daan kalh (buar) tu ih calah hminsinnak, tangka suahnak card number (or) mi pakhatih nunnak le a ziaza thinlung putpawl automatic ih theih theinak ti vekpawl an si. (or) (Somebiometric Identification).

A buai zetmi Babulon ih pomdan a karh vivonak kha mangbang ding a um lo. A hmin sullam ah “buainak” (Confusion) ti a si. Vancungmi pathum thucah kha hmual nei zetih tlangaupi theinak dingah Pathian kawhhran a tanglai mipawl in fiangten kan theih a tul. Tuzarh ahcun sahrang hminsinnak ziangtinso kan phial thei ding ih, Pathian hminsinnak ziangtin so kan ngah thei ding timi thate ih theihthiam kan tum ding.

THAWHSAL NI                                                          June 10

PATHIAN HMINSINNAK A MIPAWL THLEIDANNAK

Pathian minungpawl lenglam hminsinnak langtertu thlung hlun sanah phun hnih in a um. (1) Vunzim tannak hi mi hi a hmaisabik an hnenih pekmi a si. (Sem. 17:9-11; Suah. 31:13,17).

Pathian in Abraham le a cithlahpawl hnenah an rundamnak thukam hminsinnak ah vunzim tan a fial. Mipapawl an suahthlak ihsin a niriatnak ah vunzim tan ding a si (Pui. 12:3). Hihi sakhuanak nunphung a poimawhzia langtertu a si. Vunzim tan hi a thupi zetmi thinlung tuahtharnak khihhmuhtu a si (Danp. 30:6). Judah mi sinak ah a lenglam ih serh tannak kha taksa parih tuahmi a si ih, Judah mi ngaingai a si lo. Sunglam ihsin serh tanmi kha Judah mi ngaingai a si. Judah mi ngaingai pawlin thinlung sung vunzim tannak an ngah. Daan ih phur ruangih tuahmi a si lo, Pathian thlarau ih tuahmi sawn a si. Cupawl in milai thangthatnak si loin Pathian thangthatnak ngahtu an si (Rom 2:28,29).

1 Korin 7:19; Gal. 5:6 le Gal. 6:15 ih kan hmuh vekin thlung thar ah vunzim tannak hi Baptisma conak in thleng a si. A hmuhsak mi cu “Sersiam thar” sualah mi thi, an si ih nunthar nei dingih thimi an si (Rom 6:3,4).

Hiruangah Paul in vunzim tan hi a thupi nawn lo, duhdawtnak ih hnatuantu zumnak thawngin a si a ti (Gal. 5:6). Cui nun cu Pathian thukhaam a sunloih ih a nunpi a si.

Lenglam ih a langmi kha ziangso a si? Pathian in amah zumtupawl kha ziangah so hminsinnak ah cucu a pek (Suah. 31:13,17; Ezek. 20:12,20).

Sabat hi sersiamnak thei kirsal dingih hminsinnak a si (Sem. 2:2,3). Vunzim tannak kha Abraham hnenih hramthokmi a si. Jesuh in “Sabat cu minung hrangih tuahmi a si” a ti tikah Semtirnak thu a sawh duhmi a si (Mark 2:27,28). Himi in Pathian ta kan sinak a langter. A kutih sersiam mi kan si ruangah amah ih thiamco mi le thianghlimter mi rundam kan sinak in a neih mi kan si. Paul in vunzim tannak hi thupitnak a nein awn lo tiah a ti. Sabat ni ulhnak a tel mi thukhaam thlunnak hi a tlaitluan in a poimawh zet a si tiah a sim (Heb. 4:9).

Thinlung vunzim tan zo mi na si maw, si lo, na thinlung sungah ziangtin so theihawknak na neih?

TLAWNGKAI NIKHAT                                               June 11

SAHRANG LE BIAKNAK FEHSUAL

A tangih Bible cangpawl in sahrang hminsinnak hnon a thupitnak ziangso in zirh? (Thup. 13:17; Thup. 14:9,10; Thup. 16:2).

Pathian thinlung ih hremnak sabit zu hran, a netabik hremnak phun 7 ih thil thleng dingmi a tuartupawl kha kat le mei tili sungih hlon dingmi an si. Sahrang hminsinnak tlansan ih thlalang tifinriat kapah Pathian le tuufa thiangthat ih nehnak hla saknak thawn thim ahcun an thlau-aw tuk.

Zohman ih neih duh lo mi hminsinnak ziangso a si? A tlunih Bible cangpawl hi biaknak fehsual thawn an pehzomawknak a langfiangter. Zirlai hmun tampi ah kan zir zo vekin Dan. 7 ih a palinak sahrang a netnak lamih a

hung suakmi kha Thuphuan 13 ah fiang zetin a langter. Amah in can thennak le thukhaam daan thu thleng a tum ding (Dan. 7:25). Dan thu thleng a tum mi pakhat cu sabat zarh ni a si ih, thukham (10) sungih a palinak a si. “Cuih ni cu Pathian in lei le van le tifinriat le a sungih a ummi hmuahhmuah niruk sungah a sersiam ih, a ni sarihnak ah a cawl” timi sersiamtu Pathian a sinak langtertu a si (Suah. 20:11).

Vancungmi pakhatnak thu phuanmi in sahrang ih thuneihnak thawn thleng a tummi kha thukhaam (10) sungih sersiamtu Pathian biaknak kha a sawh duh. Thuphuan 12 le 14 ah Biaknak thu cang sarih lai a lang. Thuphuan 14:7 cun a dik mi biaknak lawng a tarlang ih, a dang cang 6 pawl cun sahrang milem biakih feh sualnak a langter (Thup. 13:4,12,15; Thup. 14:9,11). Vancungmi pathumnak ih thucah in biaknak fehsualpawl ih ngah dingmi covo kha a sim. Pathian dik betupawl kha hitin an sim. “Pathian ih mi thianghlim, Jesuh hrang rintlak zetih nung Pathian thukham thluntupawl in thinsau ih tuar theinak an neih mi an langter ding (Thup. 14:12).

Himi thucah pathum phuan mi in minung hmuahhmuah buur hnih ah a then. Sersiamtu Pathian biaknak ni sarih ni zarh sabat hmangih thukhaam thluntupawl le sahrang le a lem betupawl tiin a then. Fehsual biaknak hnakin sersiamtu Pathian biakih thukhaam ih ummi vekin sabat ni zarh hman hi hril ding in pek mi a si.

Pathian biak timi le rinum timi karlak kha an zomawknak ruat aw. Biaknak ih tuahdan a langmi le Pathian dik biaknak ih rinumnak a lang.

TLAWNGKAI NIHNIH                                               June 12

PATHIAN TACIK (OR) HMINSINNAK

Hminsinnak hi hmin senthut thawn a bangaw. Thusak ding lai a thupi zet ti theihnak ih hmanmi a si. HLanlai ah thil neitu langternak ih nemhngetnak dingah hminsinnak kha tlak lei (ciar bek) or khuai hnun parah an nem kai theu.

Pathian hminsinnak (Tacik) hi ziangso a si? Ziangtik ah a pekih ziangvek in so a pek (Efe. 1:13,14; Efe. 4:30; 2 Tim. 2:19; Thup. 7:1-4; Thup. 14:11).

Pathian hminsinnak hi amai ta hminsinnak le a mipawl a humhimnak dingah a si. Paul in pianthrnak le thiang thlarau laksawng ngahnak thawn pehaw in hminsinnak tacik thu a sim. A sim duhmi cu zumtupawl hmuahhmuah Jesui rat tikah rundamnak famkim an co ding mi ah hnangam dingah a si.

Thuphuan cabu in Jesui ratsal hlan teah hminsinnak tacik khen dingin a sim. Cui hminsinnak tacik kha ruah neta a surih thiang thlarau kha minung 144000 hnenih pek dingah a sim. Pathian hmin an calah khensak an si ding. Zumtui nunah Pathian ziaza langtertu dingah thiang thlarau a cangvai.

Pathian hminsinnak le sahrang hminsinnak an danglamnak zohthim aw. A umdan le hminsinnak hmun a bangawk lonak ziangtin so a um? (Thup. 7:3; Thup. 14:9).

Pathian hminsinnak kha rinum zetih Pathian betupawl pek a si. Sahrang khalin amah betupawl hnenah hminsinnak a pek ve. Cal ah Pathian hminsinnak khen timi kha thinlung sungih duhhrilnak tuah ih Pathian simmi vekih nun hmangtu langternak a si. Hminsinnak dangpawl kha an kut a si lole an calah tiih nganmi a si.

Hi mi in sahrang biakdan mipi lakah phun hnih a langter. An zumnak ih pomnak duhhrilnak an nei ih Pathian ngaingai kan be ko tiih ruatawtu le anmai lungkimnak um lo hremnak tih ruangah an thu suahmi thlunnak a si. Cui can ah lei thei lo le zuar thei lo in khap a si ding ugm that khal an that ngaingai ding a si.

Leitlun minung thawn lungrual tlangnak tuah, mah le mah rinsanawknak an nei lo, taksa duhnak an thlun ih sahrang hminsinnak ngah dingah an tiaraw. Pathian hmaiah tangdor ih a umtu rundam an sinak an theih fiangawk ruangah Pathian thutak kha zawnlungten a thluntu an nun thianhlimnak pekmi an si. Hipawl in an calah Pathian hminsinnak khen dingah van lam thlarau tuahthatnak cotu an si. E.G White, Testimonies for the Church. Vol. 5. Pp. 216.

TLAWNGKAI NITHUM                                              June 13

SAHRANG HMINSINNAK

Himi hminsinnak hi ziangah kan hrial a tul? Kan zir zo mi ah Dan. 7 ih sahrang palinak hnu ih thuneitu cawisang a sinak kha Thuphuan 13 ah Tidai sungih a hung suakmi sahrang in a langter. Amah in can le thukhaam thleng a tum ding (Dan. 7:25). Sabat thleng a tumnak thu pakhat a si. Cuih thu in lei le van tifinriat le a sungih ummi hmuahhmuah Pathian in a tuah ih, ni sarih ni ah a cawl timi (Suah. 20:11) ah a langter.

Vancung mi pakhatnak ih thucah in ca siartu hnenah cui thukhaam a langtersal. Sersiamtu Pathian kan biaknak fiangte ih a langtertu kha sahrang pain thleng a tummi a si. Sahrang le a lem betupawl hrangah an ton dingmi a sim theh hnu ah (Thup. 14:9). Pathian rinsantupawl ih rinumnak an langternak Thuphuan 14:12 ah a um.

Thuphuan 14:12 siar aw. Ni neta ih thil um ding mi ah Sabat hi a thupibik ah a cang ding. Pathian ih rinumtupawl hrangih theihthiam thei dingin ziangtin so a langter.

Pathian fapawl Pathian thu thluntu le Jesuh hrangih rintlak ih a nungtupawl in hi bangtuk canah thin sauin tuar theinak an langter a tul a si (Thup. 14:12). Thukhaam ih kan hmuhmi a palinak sabat in sersiamtu Pathian lawng biaktlak a si ti a langter. Sahrang hminsinnak kha a phunphun ih langter mi a si. Cupawl cu Sunday ni ih Pathian biaknak thawn a pehzomaw. Bible sungih a um lomi Sabat lem (ni zarh ni deu) an tuah mi a si. Thukhaam a palinak hmang thei lo dingih dokalhnak a si.

Khrihfapawl in Sunday ni ah Pathian an biaknak hi sahrang hminsinnak an ngahnak a si lo sawm? Thuphuan 13:15 thu vekin himi biaknak a thlun lotupawl cu sahrang in a that ding. Himi hi thih le nun karlak thu a si ih, a tumtah mi a thlen hlan, a netabik hniksaknak a thlen hlan tiang sahrang hminsinnak pek a si lo ding. Curuangah zohman in sahrang hminsinnak a ngah lo ding.

Pathian thukhaam, Jesui zumnak a langter mi hi a tuah a poimawh zetmi KHrihfa dik sinak ziangso a sim duh?

TLAWNGKAI NILI                                                     June 14

HMINSINNAK TACIK SABAT

San thuanthu hmuahhmuah ah ni sarih ni Sabat hi Pathian zumtupawl hminsinnak a si ti kan hmu zo. A hramthok Adam le Eve san ihsin Israel san tiang a

pehcihaw vivo. Thlung Thar Kawhhran ah Jesuh le a tirhthlahpawl khalin an ul ringring ti kan hmu. Ni neta ih Pathian zumtu “Pathian thukhaam thlun ih Jesui zumnak a neitupawl” hrangah hminsinnak a si (Thup. 14:12).

Sabat hi ziangah so a poimawh? Khrihfa hrangah ziangso a tumtah mi a si (Suah. 20:8-11; Heb. 4:9,10).

Thukhaam ih a thupitnak kha Sabat ah a um. Sersiamtu in a thuneihnak hminsinnak ah pekmi a si. Hi zawnah a hmin a sal ih, “Bawipa na Pathian” tiah a ti. A thuneihnak ram a langter ih, “lei le van tifinriat le a sungih a ummi hmuahhmuah” parah thuneitu a si. A thuneihnak hrampi a langter ih, “Ni ruk sungah van le lei a tuah ih … ni sarih ni ah a cawl” (Seem. 2:2,3).

Thlung Thar ih a langmi cu Pathian in thil zangkim hi Jesui thawngin a tuah (John 1:1-3; Col. 1:16; Heb. 1:1,2). Jesuh in leilungpi hi ni ruk sungah a tuahih ni sarih ni ah a cawl. Tlawngkai ni nga tlailam ah an khainak Cross par ihsin “Kat heh zo” tiih a au suak mi in himi thu hi a thupibik in a tarlang a si (John 19:30 NKJV). Sersiam mi a theh veten Sabat ni ah a colh vekin rundam kan sinak dingah kan aiawh thihnak tuarin raitluan thawiawknak a tuah theh hnu ah, thlankhur sungah Sabat colh ni a hmang. Curuangah Sabat ni thlawsuahnak kha “sersiamnak ah a voikhatnak le cross ah khan a voi hnihnak thlawsuah a pek ih, thlawsuah thuah hnih a peknak a si. Curuangah Hebru cabu sungih nganmi vekin “Pathian a hnatuannak in a colh vekin an hnatuannak in a cawl ve ding” (Heb. 4:10 NKJV). Curuangah Khrihfapawl in sersiamtu Pathian betu kan si ti langternak ah Sabat ni ah kan cawl ding a si. Sabat zarh ni kan hmannak in kan rundamnak hrangah tuah theimi kan neih lonak fiangten a langter. Curuangah Bawi Khrih kha kan zumnak hramthoktu le famkimtertu hna a tuan theinak a si (Heb. 12:2).

Sabat ni ah hnatuan kan colh ruangih hminsintlak na nei ahcun Sunday ni hmannak in ziangso a langter ve? Babulon ih mizia thawn ziang vekin so an bangawk?

TLAWNGKAI NINGA                                                  June 15

RUAH BET DING: Pathian zumtupawl cu an calah hminsin an si. Thutak sungih an um ruangah hminsinnak tacik dang hmuh ding a um lo. Pathian sumtupawl cu ni neta ih a thleng dingmi hrikthlaknak hrangah an sia, tha thleidannak le thlarau ih tacik khensak mi an si ruangah an tluk maimai thei lo. Pathian thuthennak kha a thok zo ruangah leitlun ih thil thleng mipawl ruangin thil umzia kan thei thei a si. E.G White, The Faith I Live By, Pp. 285.

Thu elawknak le do-awknak ih a tumtah mi thu cu Sabat thu a si ih, rinum le um lo hniksaknak bik a si. A netnak ih hniksaknak kha minung thil tuahmi parah ret a si. Pathian riantu le rian lotu thleidannak a si. Ram dan thawn zarh ni dik lo hmannak a ummi kan thlun ahcun, thukhaam (10) sungih a palinak kalhin Pathian ralpa ih thuneihnak kha langhngan in a pomnak a langter. Pathian thukhaam zawnlung ih thlunnak kha ni zarh dik Sabat hmannak a si ih, sersiamtu hnenih rinumnak kan langter mi a si. Leitlun thuneihnak le hminsinnak pomtu cun sahrang hminsinnak an nei ding. A dangpawl cu Pathian thuneihnak an rinsan sawn ruangah Pathian hminsin mipawl an si.

REL TLANG DING:

1.    Thuelawk buainak um lo dingin Pathian hminsinnakle sahrang hminsinnak midang hnenah ziangtin so kan sim thei ding? Sahrang hminsinnak a dik ciahin midang ih an theih theinak dingah ziangvek in so kan sim ding?

2.      Thlarau thianghlim tacik khen le Sabat ziangvek inso pehzomawknak a neih?

3.      A tlunih tacik khen mi pomdan vekin thutak sungihrinumnak ah thluak fimnak le thlarau lam thu ziangtin so kan langter ding? A sullam the ziangso a si?

4.      Babulon umdan a thatnak le that lonak rel tlang uh.Pathian uknak thawn an danglamawknak ziangvek so a si? Ziangah so kan kawhhran sungah Babulon rim a nam theu? Pathian uknak rim mi pakhat ah a nam ve theinak dingah Khrihfa ziaza ziangtin so kan hawl dingih zir ding ziangtin so kan theih ding?