HSS ZIRLAI 13-NA: KAN LALPA ISUA LO KAL LEHNA CHU

ZIRLAI 13-NA                                                          JUNE 23-29, 2018

KAN LALPA ISUA LO KAL LEHNA CHU

CHÂNGVAWN: “Kâwl khawchhak lam atangin a rawn phê chhuak a, khawthlang lam thleng pawhin a êng thîn; chutiang chu Mihring Fapa lo kal lehna pawh a ni ang” (Matthaia 24:27).

SABBATH CHAWHNÛ                                                                        JUNE 23

CHHIAR TÛRTE: Isaia 13:6, 9; Matthaia 24:30, 31; Daniela 2:34, 35; 2 Timothea 4:6–8; 2 Thesalonika 1:7–10.

HLA phuah thiam T.S. Eliot-a chuan hetiang hian hla chhammi pakhat a phuah chu bul a tan a:  “Ka bultannaah hian ka tâwpna chu a awm a ni” tiin. A tâwi hlê nâ a, a tawngkam hman hian thutak ropui deuh mai a keng tlat. Ni e, bultannaah hian tâwpna a awm thîn rêng a. Chutiang a nihzia chu kan kohhran hmingah pawh hian a lang reng mai. “Seventh-day Adventist” tih hian Bible zirtîrna bulpui pahnih a pho lang a: “Seventh-day” tih chuan Thu Sâwm Pêka Sabbath, leia nunna awm zawng zawngte hi ni ruk chhûnga siam an ni tih hriat rengna nî chu a entîr a; tin, “Adventist” tih hian Isua lo kal lehna chu kâwk ve thungin, chumi hunah chuan Pathian Lehkha Thûa beiseina leh thutiam awm zawng zawngte hi, chatuana nunna thutiam pawh telin, a lo thleng famkim tawh dâwn a ni tih a entîr. Khawvêl siam (kan bultanna) leh Isua lo kal lehna (kan tâwpna, sual nêna inchiah renga kan awmna a tâwp hun tûr) hi a hun thû-ah inhlat delh delh viau mah sela, a 145

inzawm tlat a ni tih kan hre tûr a ni. Min siamtu Pathian (Johana 1:1–3) tho hi kan hnênah a lo kîr leh dâwn a, “tâwtawrâwt hnuhnung ber chu a lo rîk hunah chuan mit khap kâr lohah” (1 Korin 15:52) kan tlanna famkim chu a rawn thlentîr ang. Chutiang chuan, kan bultannaah ngei hian kan tâwpna chu kan hmu dâwn a ni.

Tûn kârah hian tâwpna huna thil thleng zawng zawngte tâwpna chungchâng kan sawi dâwn a, chu tâwpna chu eng dang ni lovin kan LALPA Isua lo kal lehna a ni.

SUNDAY                                                                                              JUNE 24

LALPA NÎ CHU

Isua lo kal lehna hi Thuthlung Thar zirtîrna chauh ni bîkah kan ngâi a ni maithei e; mahse chu chu a dik lo. Isua lo kal lehna chûngchâng thu puan chhuaha awm hi a lo kal hmasak hnû, a thih hnû, a thawhleh hnû leh vâna a chhoh leh hnû-ah chauh a famkimin kan hre thei a. Nimahsela, Thuthlung Thar bûten an sawi thil dangte ang bawkin, hê thu pawimawh tak pawh hi Thuthlung Hlui bûte chuan a lo thlen hmâ daihin a lo thâwt lâwknate leh a hlimthlâte chu an lo puang chhuak tawh a ni. Chutiang chuan, Thuthlung Thar bû ziaktûten Isua lo kal lehna thû an sawi hian thutak thar an rawn puang chhuak ni lovin, Bible-a thutak puan chhuaha awm tawh sa chu an rawn sawifiah a, an rawn tiropui zual ta a ni zâwk a. Isua lo kal lehna thutiam hlutzia hi khenbeha awm tawh leh tholeh ta Chhandamtu zârah chauh kan hrethiam thei a ni.

Hêng chângte hi chhiar la. Isua lo kal lehna chungchâng eng nge min hrilh hlawm le? Isaia 13:6, 9; Zakaria 14:9; Daniela 12:1.

Boral tûrte tân chuan “LALPA Nî” chu chhiatna leh lungngaihna leh buaina nî a ni dâwn a ni tih a chiang a.

H-10

146

Mahse chu nî vêk chu Pathian mi, “Nunna Bûa an hming chuangte” tân erawh chuan chhanchhuahna nî a ni vê thung ang (Filipi 4:3; Thupuan 3:5; 13:8). “LALPA Nî” chu mi sualte chunga rorêlna nî leh Pathian mi rinawmte vênhima lâwmman pêk a nihna tûr nî a nih thû hi Thuthlung Hlui lamah pawh kan hmû a. Entîr nân, mi thenkhat chuan “LALPA thinurna râpthlâk tak” chu an hmachhawn lâiin, “felna zawng” tûr leh  “inngâitlâwm taka awm” tûra koh thu ngaithlatûte erawh chu “LALPA thinrimna nî-ah chuan thuhrûkin an awm dâwn thung a ni” (Zefania 2:1–3).

Matthaia 24:30, 31 chhiar la. Hêng châng pahnihte hian Isua lo kal leh huna boralte leh chhandamte chan inang lo lutuk tûr a sawi dân chu eng nge ni?

Ni hnuhnunga thil thleng tûra sawite a lo thlen chhoh mêk lâi hian khawi lamah zâwk nge kan tan tih chu a rawn lang chiang chho zêl dâwn a. Tûnah hian tanna tûr dik lamah kan tan ngei theihna tûrin eng duhthlannate nge kan siam theih le?

THAWHTANNΠ                                                                                   JUNE 25

DANIELA LEH ISUA LO KAL LEHNA CHU

Isua hunlâia Juda mi tam takte khân Messia chu Romhote paih thlâ a, Israel-te chu hnam zawng zawng zînga thiltithei bera siam tûr niin beisei mah se, chutiang chu Isua lo kal hmasakna emaw, lo kal lehna emaw pawhin a tum a ni lo. Chutiang chu ni lovin, Pathian chuan a mîte tân hian suala tlu hnû khawvêl hlui tawh tak chei that leh mai âia ropui daih a lo ruahman zâwk a ni.

147     148

Daniela 2-in khawvêl thar chu khawvêl hlui zâwk atanga lo chhuak ni lovin, a thar hlaka siam khawvêl a nih thu chiang taka a sawi ang hian Thuthlung Hlui bû khawiah mah sawi a ni lêm lo niin a lang. Daniela 2-ah hian khawvêla lalram ropui tak tak palî—Babulon, MedoPersia, Grik leh Rome-te an lo din chhuaha an tlûk leh tâk thû leh, Rome lalram phei chu tûnlâi Europe ram hrang hrang ni taa a lo inthen darh tâk thû kan hmû a. Amaherawhchu, Nebukadnezzaran a mumanga milim a hmuh (lalram ropui tak tak palî-te lo indin chhâwk chhoh dân entîrtu) kha mak tak maiin a tlu a, kha khân he khawvêl leh kan LALPA Isua Krista lo kal leh hnua lo ding tûr khawvêl thar chu inzawmna eng mah nei lo an nihzia a entîr a ni.

Daniela 2:34, 35, 44, 45-te hi chhiar la. Hêng chângte hian hê khawvêl chunga thil thleng tûr leh khawvêl thar nihphung eng nge min hrilh le?

Hêng chângten Isua lo kal leh huna thil thleng tûr a sawite hi hriatthiam a harsat deuh hlekna li a awm a. Luka 20:17, 18-ah chuan hê khawvêla a chhe bâng la awm zawng zawngte râwt dip tûr lungpui chu amah Isua hi niin a insawi a. Daniela 2:35 thu hi Aramik tawnga a inziah dân tak chuan rangkachak te, tangkarua te, hlum te, thîr te leh dâr an zavâia a keh sawm vek hnû chuan “nipui lâia hruih zâwla buhsî ang mai an lo ni ta a, tin, thlîin anmahni chu a lên bo va, an awmna hmun pawh hriat theih a ni ta lo hial” tih a ni. Chumi awmzia chu, Isua lo kal leh hnû chuan he khawvêla thil eng mah hi awm zui zêl tûr a awm dâwn lo tihna a ni.

Chutih lâiin, hê khawvêla sûlhnu hlui awm zawng zawngte tiboral vektu lung erawh chu “tlâng lian takah lo changin, lei pum pui hi a luah khat ta vek a.” Hê lalram, Isua lo kal lehna avânga lo ding chhuak ta hi chu a “tlu chhe vê ngâi tawh lo vang a,” “kumkhua-in a ding reng tawh dâwn a ni” (Daniela 2:44).

Hê leia lo piang vê tawh mihring zawng zawngte hi tâwpna chi hniha a khawi emaw zâwk zâwk hian a lo nghâk vek a. Isua nên chatuanin kan awm dâwn nge, hê khawvêl hluia thil tlâktlâi lo tak takte nên hian lo lang leh tawh ngâi miah lo tûrin kan ral hlen vang vang tawh zâwk dâwn le? A khawi emaw zâwk zâwk hian min lo nghâk reng a ni.

THAWHLEHNΠ                                                                                    JUNE 26

NAKÎNA KAN CHAN TÛR CHU THLÎRIN

Tita 2:13 chhiar la.  Beiseina ropui tak kan neih chu eng nge ni a, eng vânga nei nge kan nih le?

College-a zirtîrtu pakhat chuan kan chênna khawvêl leh vâna thil awmte lo awm tan dân nia a hriat chu sawi fiahin, kum tlûklehdingâwn 12 vêl kal taah khân “thil eng mah lo atang hian thil hlâwm tê reuh tê, sakhat tha êm êm mai hi a rawn pawk chhuak nawlh mai a, chu chu puak kehin, chumi puak keh atang chuan kan chênna khawvêl leh vâna thil awmte hi a lo awm ta a ni” a ti a. Eng tin nge he “thil hlâwm tê tak tê, muk tha êm êm mai hi” eng mah lo atangin a lo pawk chhuah nawlh theih mai tih erawh chu a sawi fiah lêm hlei lo va. Ni tûra a rin dân a sawi ve tawp mai a ni ber.

Aw le, a thuhmahruai lama kan sawi tâk ang khân kan lo awm tannaah hian kan tâwpna pawh kan hmu nghâl bawk a. Chuvâng chu a nia, he zirtîrtupa’n a sawi dân ang hi chuan kan tâwpna tûr chu thil lâwmawm tak a nih a beisei awm loh rêng a ni. “Thil hlâwm tê tak tê” atanga lo insiam chhuak lei leh vân leh a chhûnga thil awmte hi, mihringte nên lam hian eng tikah emaw chuan a la boral ngê ngê dâwn a ni.

A lehlamah, Bible-in kan lo awm tanna a sawi dân hi chu zirtîrtupâ ngaihdân i khân a âwihawm zâwk daih 149

pawh ni mai lovin, beiseina pawh min siamsak zâwk bawk. Thil engkim siamtu Pathian hnênah chuan lâwmthû awm rawh se, a chhan pawh hma lam hun êng tak min siamsak sî a. Chu kan thil beisei chu Isua lo kal lehna thutiamah a

innghat a ni.

2 Timothea 4:6–8 chhiar la. Paula hian eng chungchâng nge a sawi a, engah nge a beiseina chu a nghah?

Paula hi tihhlum mai tûr ni mah sela, chhandamna chu a chang ngei dâwn a ni tih a hriat bâkah, “a lo lanna” (2 Timothea 4:8) tia a sawi Isua lo kal leh beiseina chu a nei nghet êm êm a. “Felna lallukhum” chuan a lo nghâk reng tawh a; mahse chu chu amâ felna avâng a ni lovin (1 Timothea 1:15) Isua felna avâng zâwka chang tûr a ni a, chutah chuan Isua lo kal lehna thutiam beiseina a neih pawh chu a innghat a. A chunga thil lo thleng mai tûr chu eng pawh lo ni se (tihhlum a nih hun tûr nghkin tân inah a awm mêk a ni a), nakina a chan tûr chu a tha hlê a ni tih erawh a hria a. Chuvâng chuan a thil tawn mêkte ringawt ngaihtuah lovin, thil lian zâwk leh zâu zâwk a thlîr thei ta rêng a ni.

I chunga thil lo thleng mêkte kha chu eng pawh lo ni se, eng tin nge Paulan beiseina a neih ang hi i lo neih ve theih ang? Eng tin nge zâu zâwka i thlîrin chumi zârah chuan beiseina kan lo neih theih ang le?

NILÂINΠ                                                                                             JUNE 27

VÂN CHHÛM ZÎNGAH

Isua lo ka lehna hi Bible zirtîrna laipui leh pawimawh êm êm mai a ni chung hian, Kristiante zîngah ngei pawh mi tam tak chuan hê thil hi a taka lo thleng tûr 150

niin an ngâi lo va, Isua chu amah ngei lo kîr leh tûr niin an ring lo tlat mai. Entîr nân, mi thenkhat chuan Isua lo kal lehna chu he leia amah Isua ngei a lo kal leh hunah ni lovin, leia a kohhhran hnêna a Thlarau a lo lan chhuah hian a lo thleng thîn zâwk niin an sawi a. Tawngkam danga sawi chuan, Krista lo kal lehna chu Pathian mîte nuna Kristian sâkhaw zirtîrna dân puan chhuaha a awm hian a lo thleng a ni zâwk an tihna a ni.

Hê zirtîrna hi zirtîrna dik a ni lo hlauh a, a lâwmawm hlê. Zirtîrna dik tak lo ni ta se chuan khuarei daih tûr beiseina kan nei thei dâwn miah lo a ni.

Hêng Isua lo kal lehna chungchâng inziahna chângte hi chhiar la. Krista lo kal leh dân tûr chungchâng chu eng tin nge an sawi hlawm?

Matthaia 24:30______________________________

Matthaia 26:64______________________________

1      Thesalonika 4:16___________________________

2      Thesalonika 1:7–10__________________________ Thupuan 1:7_________________________________

151     152

“Vân khi a chânga inhawng, a chânga inkhâr leh thîn angin a lang a. Tlângte chu thlî-in rairuang a chhêma a awm ang mai hian a nghîng lâwp lâwp a, lungpui lian tak takte chu a keh darh chum chum bawk. Nasa takin thlî a thaw vûk vûk a. Tuipui pawh a thinur ta emaw tih tûrin râpthlâk takin a fâwn vêl a. Chhiatna thlen tûra lo thawk thlipui rî chu ramhuaite âurâwl ni âwm takin a chiau vawng vawng mai a. Lei pum pui chu tuipui fâwn ang mai hian a so bulh bulh a. A chunglâng chin phei chu a kehchhe vek dâwn emaw tih khawpin a awm a. A nghahchhante chu pheh sawnin a awm ta daih emaw tih tûr hial a ni. Tlâng dung zawng zawngte chu a pil zo va. Mihringte luah thliarkârte pawh a bo ta daih bawk. Tuifinriat tui thinrimte chuan suahsualna chu a lem zawh tawh avângin lawng chawlh hmunte pawh Sodom ang mai an lo chang ta a. Pathian “thinur nasatna uain no chu a hnêna pêk tûrin” Babulon ropui chu a hmâah hriat rengin a awm ta a.’”— Ellen G. White, The Great Controversy (Indona Ropui), pp. 636, 637.

Isua lo kal lehna chu a ropui dâwn khawp mai a, hê khawvêl hi chu a tiboral vek ang. Chumi chu a lo thlen hunah chuan mi zawng zawngin an hre vek dâwn a. A lo kal hmasaka thil min tihsak tawh kha a lo kal lehna hian a rawn tifamkim ang.

Isua lo kal lehna chu a taka lo thleng tûr a ni tih hre chunga nun hman hian eng tin nge kan nun dânah nghawng a neih le? Kan nuna thil pawimawhte hre reng thei tûin eng tin nge min tanpui sawi rawh.

NINGÂNΠ                                                                                            JUNE 28

Minungte leh mitthîte chu

Isuan thlân atanga a thianpa Lazara kaihthawh hmâ khân hê thû, “Kei hi thawhlehna leh nunna chu ka ni; tû pawh mi ring chu lo thi mah sela a nung leh ang” (Johana 11:25) tih hi a sawi a. Nimahsela, chutiang thu mak tak chu âwih mai tûra hrilh ta chuang lo chuan, a ruang pawh uih tan hun tawh khawpa a thihna rei tawh, Lazara chu a kâitho ta zâwk a ni (Johana 11:39).

Ni e, Isua ringtûte pawh an thi vê tho va. Amaherawhchu, Isuan a lo sawi tawh ang khân, lo thi pawh ni se, an lo la nung leh dâwn a ni.  Hei hi thihna ata thawhlehna chu a ni a. Hei hi kan beiseina zawng zawngte a thlen famkim theihna tûra Isua lo kal lehna pawimawh êm êm chhan pawh a ni bawk.

Hêng chângte hi chhiar la, Kristaa thi tawhte kha Isua lo kal leh hunah eng tin nge an awm dâwn le? Rome 6:5; 1 Korin 15:42–44, 53–55; 1 Thesalonika 4:16.

Isua lo kal lehna beiseina ropui tak chu amah Isua ngeiin a lo chan tawh thawhlehna kha niin, chu beiseina chu amah zuitu rinawm zawng zawngte chuan an la chang ve vek dâwn a. A thawhlehnaah khân beiseina neiin, anmahni pawh an la tho ve leh ngei dâwn a ni tih an ring a ni.

Isua lo kal leh huna nungdama lo la awmte chungah eng nge thleng ang? Filipi 3:21, 1 Thesalonika 4:17.

Isua lo kal leh huna mi rinawm nung dama lo la awmte chuan anmahni taksa a la pu zui zêl ang a; mahse a nihphung pângngâi chu a ni tawh lo vang. Tholeh tâten an neih ang tawih thei tawh lo taksa chu nei ve tûrin mak tak maiin siam danglam an ni dâwn a ni. “Mi fel nungdama lo la awmte chu ‘rei lo te chhûngin, mit khap kâr lovah’ tihdanglam an ni ang a. Pathian âw-ah chuan tihropuiin an awm ang; tichuan thi thei tawh lo tûra siam niin, thlân atanga lo tholeh mi thianghlimte nên chuan boruakah an LALPA hmuak tûrin hruai chhoh an ni dâwn a ni.”—Ellen G. White, The Great Controversy (Indona Ropui), p. 645.

Chatuana nunna chân phah hialna tûr pawh ni sela, i thlah phal miah chuan loh tûr khawvêl thilte chu eng nge ni?  Chûngte chu lehkhapuanah ziak chhuak ang che.

ZIRTÂWPNΠ                                                                                        JUNE 29

153     154

NGAIHTUAH TÛR: Isua lo kal lehna hi suala tlu tawh hê khawvêla mihringte sualna leh tawrhna chanchin târlangtu thawnthu lungchhiatthlâk tak tlângkawmna emaw, thubelh emaw a ni lo. Chuti ahnehin, Isua lo ka lehna hi Kristian thurinin a vâwrtâwp a thlenna, a thil beisei ropui tak chu a ni zâwk. Hei hi awm ta lo se, eng tin nge ni ang? Mihringte thawnthu hi a kal chho mawp mawp mai ang a, thil hrehawm leh lungchhiatthlâk tak tak kan tawng chho zêl ang a, a tâwpah kan thi leh ngê ngê zêl mai dâwn sî a.

Krista lo kal lehnain beiseina mi siamsak hi awm lo ni ta se chuan, mihring nun hi chu, William Shakespearean a lo sawi angin, “mi mâwl pakhatin a phuah thawnthu, eng mah awmze nei miah lo thil rî leh thinurna mai a ni ang.” Mahse he beiseina hi kan nei a, a chhan pawh Pathian Thû hian a rintlâkzia vawi eng maw zât min hrilh nawn vâng a ni.  Hê beiseina hi Isuan ama nunna ngei hmanga min tlan tawh avânga nei kan ni a (Marka 10:45), Isua chu a tlan tawhte lam tûrin a lo kal leh ngei dâwn.

Vâna arsîte khian Isua lo kal leh tûr thu min hrilh lo va. Thingzâra fû sava hrâmte hian an puang hek lo. Hêngte hian thil thâ leh thil beiseiawm tak takte chu an tilang a ni mai thei e. Nimahsela, eng tik nî emaw a Isua a lo kal leh hun chuan “tâwtawrâwt chu a lo ri dâwn a, chutichuan mitthîte chu tawih thei tawh lo tûrin kaihthawh an ni ang a, keini pawh tihdanglam kan ni tawh ang” (1 Korin 15:52) tih thu hi min hrilh lo. Eng tik nî-ah emaw chuan vân lam kan thlîr chho vang a, “Mihring Fapa hi Thiltihtheihna dinglama a, vân chhûmte nêna lo kal chu” (Marka 14:62) kan la hmuh tûr thu pawh min hrilh bawk hek lo. Hêng thilte hi Pathian Thûah hian min hrilh tawh avânga hria kan ni a, thu-in thu min tiam chu kan ring bawk a ni.

SAWI HO TÛRTE:

u Isua lo kal lehna hi mi thenkhatten an rin dân ang, Krista zuitûte nuna Kristian thurin a famkima a lo

lan chhuahna bâk hi chu eng mah tak tak ni lo ni ta se eng nge awmzia awm ang? A tâwpah a lo lan chhuah dân chu a makin a ropui viau pawh a ni maithei e, mahse beiseina engmah nei lo tûrin min hnutchhiah dâwn sî a ni.

v  Eng vângin nge tûnlâia ngaihdân tlânglâwn tak, lei leh vânte hi eng mah lo atanga lo piang chhuak a ni tih thû hi ngaihdân âtthlâk tak a nih le? Chutiang ngaihdân chu eng vânga vawrh chhuak nge maw an nih a, eng vângin nge a âwih tâwk an lo awm ve leh zêl theih? Eng vângin nge chatuan ata awm reng, thil zawng zawngte siamtu Pathian chu a awm a ni tih rinna hi lei leh vânte lo pian dân sawifiahna âwihawm leh âwm ang zâwk a nih le? 

w Chatuana nunna chân phah hial tlâk khawpa thil pawimawh nia i hriat, i dam chhûng zawng chu la neih chhunzawm zêl i duh thilte kha in class-ah sawi chhuak theuh ula. Chûng thilte atang chuan eng nge zir chhuah theih in neih sawi ho ang che u. hutiang sawi tûr nei ve miah lote an awm a nih chuan kan nuna eng thil mah hi chhandamna chan loh phah khawpna tûra hlu a awm lo a ni tih eng tin nge kan lo hriat theih ang le?