ZSS LESSON 8: PIANGSAKPA BIA UN

LESSON 8                                                                          May 19 – May 25

PIANGSAKPA BIA UN

NIPI NITAK

TUKAL SUNG SIM DANGTE: Rev. 14:6-7; Matt. 24:14; Gal. 3:22; Luke 23:32-43; Fen. 22: 12; Rev  14:8-12.

LAI SIANGTHO BULPHUH: “Tua khit cing vansawltak dang khat van kimlai a leng ka mu a amah in minam khempeuh tunga tangko ding tawntung lungdamna thu a nei hi” (Rev.14:6, ZIV).

Seventh-day Adventist Christian khat hihna tawh, “tulai thutak” cih i um hi (2 Pet. 1:12). Pasian in a kisam bangin khangsim in mihingte tungah thutak lak a, khuavak mu sak to semsem hi. Lungdamna thupuak masa ahi Gen. 3:15 sungah a puuksa mite adingin numei suan tungpan lametna hong pai ding cih hong gen hi.Abraham tunga kamciam in, “a vanglian minam suak taktak dinga, ama tungtawn in leitung aa minam khempeuh thupha kipia ding hi” (Gen. 18:18, ZIV) cih thu in lungdamna kamciam hong telmuh sak hi. A hong pai Jesu in, “Mihing Tapa in ama na midangte a semsa ding hong pai hilo in, midangte na a sem ding leh mi tampi tatna dingin ama nuntakna pia ing a hong pai hi” ci in a lianzaw in lungdamna thutak hong lak hi.

Tuni in eite in Rev. 14:6-12 sunga vansawltak thumte’ thupuak in “tulai thutak” hi a Chris hong paikik ma hun in a nungtate leh Christian te lametna picinna hi ci in i um hi.

Tu kal sungin vansawltak masa thupuak i sin ding hi.  Ahangin, hun beina buaipi sungah muanhuai tak din zawhna dingin a poimawh thutak kihel ahih man ahi hi.

SUNDAY                                                                                                May 20

MI KHEMPEUH TAWH KISAI LUNGDAMNA THU

Rev. 14:6 leh Matt. 24:14, 28 te sim in. Hih munte ah a kibang thupi bang kimu thei hiam? Pawlpi khat i mungtup a pualam vaphak na tecipanna in bangzah in thupi cih hih Lai Siangtho munte in hong bangci theihsak hiam?

Vansawltak masa thupuak in ni nunung a dingin a Lianpen Sawlna (Matt. 28:19) ahi hi. Hih in “tulai thutak hi taktak hi. Hih Lai Siangtho mun thumte in a pualam vaphakna ahi “gam khempeuh ah”, “gam, minam, pau, mi khempeuh tungah” thupuak tangko ding limgen mahmah hi. Kammal dangin, hih thupuak in mikhempeuh tawh kisai hi. Tua hi a hih thupuak mikhempeuh in a zak ding kisam hi.

Gal. 3:22 sim in. Leitungbup in lungdamna thu a zak ding kisapna hih Lai Siangtho mun in bang hong gen hiam?

Mawhna in mi khempeuh tawh kisai ahih na in eite hong sep ding hong kisapna zong mikhempeuh tawh a kisai na thu hong lak hi. Gam, minam, pau, mi khempeuh in Pasian thukham palsat khin a, Pasian khial khin uh hi. Eden huan a Adam puukna in mi khempeuh hong sukha aa, a peng kuamah ki omlo hi. Mawhna thaman mikim in i thuakkha ciat a, damsakna a om kei ngal leh, a lianpen thaman a hi tawntung sihna i thuak ding hi.

Tua damsakna hong kipia zo hi. Jesu nuntakna, sihna, thawhkikna, leh van biakbuuk ah a nasepna te in mawhna siansak na ding lampi khat bek a hi hi. Mi khempeuh in Jesu tung tawn a Pasian hong piak a lian lametna a theih ding uh kisam pha hi. Tua ahih manin Seventh-day Adventist te in leitungbup ah pai in hih lungdamna thu a za nailo te kiang hih thupuak i va gen ding ahi hi.

Banghangin midangte tungah lungdamna thu vapuakna in a puakte tungah kha thupha hisak hiam?Banghangin midang te vaphakna in Jesu. Hong paina ding kiginna hoihpen hi thei hiam?

MONDAY                                                                                              May 21

SINGLAMTEH TUNGA GUTAPA LEH A TAWNTUNG LUNGDAMNA THU

Rev. 14:6 sunga tangko ding thupuak in a tawntung lungdamna thu ahi hi. Lamet omlo leitung mite a dingin lametna thupuak ahi hi.

Luke 23:32-43 sim in. Hih tangthu ah mawhnei khempeuh a ding alian lametna ahi, a tawntung lungdamna thu bangci gen hiam?

Ellen G. White in gutapa thu a gelhna ah, a lungkhauh siatna bawlpa ahih loh hangin, Jesu mawhzon ding hanciamna a, singlamteh tungah a kikhai dong mawhna sungah thuk tum semsem hi. – Ellen G. White, The Desire of Ages, p. 749.

Ahi zongin ama tungah bng thu piang hiam? Singlamteh tungah a kikhai kawm in Jesu hong mutel thei ta a, “Topa aw, na gam sungah na lut ciangin kei hong phawk in” ci in kiko hi (Luke 23:42).

Jesu in bangci dawn hiam? Jesu in, “Lawm aw hong huh nuam mah hi veng, ahih hang mawhna sungah thuktum semsem kei le cin hoih ding hi ven,” a ci hiam? Jesu in nidang aa a thugente ahi, “thumaanna ah Pharisee te leh thukham siate aa na khupzawh kei leh vantung gam ah na lut peuhmah kei ding hi” a ci kik hiam? (Matt. 5:20). Jesu in gutapa khialhna luite a pholak kik hiam?

Tua bang hi peuhmah lo hi. Tua sangin, amah a zahpih thumanna ding bangmah sep theih a nei nawnlo khialhna dim gutapa en hi (Matt. 27:44). Mithak khat bangin mu ahih manin Jesu in, tu in kong gen in ah, khamuanna kong pia a, na mawhna khialhnate hong kimaisak ahih manin “kei tawh Paradise ah na om ding hi” ci hi (Luke 23:43).

Hih in vansawltak masa thupuak a tawntung lungdamna thu bul ahi hi. Hih thutak lo tawh, thukham thu, Sabbath thu leh misi te thu te in khiatna neilo hi. A tawntung lungdamna kihello in hih thuhilhnate ah bang hoihna om hiam?

Hih tangthu panin nang mahmah a ding bang lametna na ngah thei hiam?

TUESDAY                                                                                               May 22

PASIAN KIHTA UNLA AMA TUNGAH MINTHANNA PIA UN

A tawntung lungdamna thu leitungbup ah a tangko khit ciangin, vansawltak masa in tua thupuak a zai zia gen lai hi. Hih a tawntung lungdamna thu eite in i tangko ciangin tua thupuak sunga om thutak te zong gen ding kisam hi. Tulai thutak sungah Rev. 14:7 zong kihel hi.

Rev. 14:7 sim in. Pasian kihta in Amah minthanna pia cih in bang a deihna hiam? Koi bangin minthanna pia ding? Lungdamna thu ah koi bangin hih thu kibulh thei hiam?

Pasian kihtak ding leh minthanna piak ding thu te kizom uh hi. Lai siangtho cih bangin Pasian i kihtaak takpi leh minthanna piak ding hi pah hi. Khat le khat kizom uh hi.

Anuai a Lai Siangtho munte sim in. Pasian kihtakna in bang hiam cihthu leh Amah minthanna piakna tawh koi bangin kizom ci hong bangci lah hiam?

A tung a munte ah Pasian kihtakna in Ama thu manna tawh kizom a, Pasian thu i man ding ciang leh a dik nate I sep ciangin Amah minthanna a pia ihi hi. Pasian kihtakna in launa leh maizahna in a kigen hangin, tua sangin thuk zaw hi. Eite i puk khiin a, mimawh i hi hi. A si ding a kilawm te I hi hi. Amaute siatna gamtatna lehtua siatn gamtatna te hangin a thutang leh thumaan Pasian mai ah a kilawm a kituak dingin a tuak kha kua i om hiam?

Tua in Pasian zahtakna ahi hi. Tua kihtakna in mawhmaisakna dingin singlamteh phung hong tun a singlamteh hang hi kei leh sihna hong tun ding hi. Tua siatna panin hong siangsak thei Pasian vangliatna telmuh ding ngentna ahi hi (Matt. 10:28).

Na Pasian kihtakna koi bang hiam? Hih kihtakna thu in khalam leh upna thu ah ahoih zaw sem hihna dingin leh hong sawlte zuihna dingin bang kul hiam?

WEDNESDAY                                                                                       May 23

A THUKHENNA HUN HONG TUNGZO HI

Vansawltak masa thupuak sungah, Pasian kihtakna thu leh Amah minthanna piakna in thukhenna tawh kizom ahihna hong lak hi (Rev. 14:7). Lai Siangtho in Pasian pen thutang a thukhenpa ahihna ciantak hong hilh zo hi. Ni khat ni ciangin leitung in a kisap ahi thutang tawh thukhen ding hun hong tung ding hi.

Mite in Pasian a kihtak ding uh kilawm hi. Tua hangin a tawntung lungdamna thu ah thukhenna omzia dik hong gen hi. Hih gel kizopna bang hiam? Eite in Pasian thukham palsatna tawh mimawh te i hih hangin eite ngah ding kilawm gawtna leh daante thuak khalo ding cihna in “thuhoih” ahi lungdamna thu ahi hi.

Anuai a Lai Siangtho munte sim inla nang le nang kidong in. Bangzah hoihzo na kisa hiam? Matt. 12:36; Eccle. 12:14; Rom. 2:6; 1 Cor. 4:5.

Eite lutang tunga om sumzang phazah a thei Pasian in leitung thu hong khen ding hi. Ahi zongin, tua thu tektek mah a tawntung lungdamna in thuhoih ahihna ahi hi. Thu hong kikhen dinga, ahi zongin Jesu min ah a kisawpsiang, sianthosakna leh diktanna ngah a muanhuai Jesu nungzuite in mawhpaihna thuaklo ding uh hi (1 Cor. 6:1). Ahang in, Jesu Christ in amau diktanna hi a, Ama dikna in thukhenna ah amaute pengsak ding hi.

“Mihing in hih mawhsakna te thuak zolo ding hi.Mawhna nitsak puanpi tawh a khialhna thum in Pasian mai ah ding hi. Ahi zongin, eite tangding ahi Jesu in Ama tungah kisikna leh upnatawh akinga te a dingin a deihhuai thumna hong bawlsak hi. Jesu in amaute a ding thumsak aa, mawhkawkpa tungah a vanglian Calvary itna thu tawh gualzo sak hi. Singlamteh tunga sih ding dong Ama thumanna in vantung le leitung a om vangliatna khempeuh ngahsak khin ahih manin, a mawh mipa a dingin Pa hehpihna leh kipawlkikna a ngahsak hi.” – Ellen G. White, Testimonies for the Church, vol. 5, p.471.

Mawhmaisakna i kisap lam thukhenna in bang honghilh hiam? Pasian in Jesu tungtawn a hong piak hehpihna leh mawhaisakna bangin midang te tungah koi bangin pia thei ding na hiam?

THURSDAY                                                                                           May 24

LEITUNG LEH VANTUNG A BAWLPA BIA UN

Rev. 14:6,7 sim kik in. Vansawltak masa thupuak sunga thute bang hi a, khat le khat koibangin kizom uh hiam?

Lungdamna thu tawh kipawl in Pasian kihtak ding, Amah minthanna pia ding, teci pan ding nasepte in Pasian pen Piangsakpa a biak ding sapna ahi hi. Pasian in Piangsakpa cih gen kei leng a dang thutak ahi a tawntung lungdamna thu, tangko ding sapna, leh thukhenna te in khiatna neilo ding hi. Thutak dangte in Topa pen na khempeuh a bawlpa cih thutak pan in hong luangkhia hi.

Topa pen Piangsakpa a biakna tawh a kibul pat kik i hi hi. Eite pen piansak dangte tawh kibanglo in Pasian lim le meel sun a hong kibawl cih mihing hihna leh nuntakna thu bulpi ah a paikik i hi hi. Topa pen Piangsakpa a biakna tawh eite pianna le mailam a ding lametna thu ah Topa tungah kinga i hihna kitheihna ahi hi. Tua hangin, ni sagihni Sabbath tan ding thupi hi. Tua in Pasian bek mah Piangsakpa hi a, Amah bek biak ding hi cih phawkna ahi hi. Tua hi a, lungdmana, thukhenna, leh Topa pen Piangsakpa a biak ding sapna in a thupi ahihna hih mun ah kilang hi.

Rev. 14: 8-11 sim in. Hih mun in Topa pen Piangsakpa aa biak ding a thupina hong bangci lak hiam?

Hun nunung thupiangte hong kilatkhiat tawh kizui in Pasian sangin sapi le alim biak ding tawsawnna leitungbup ah hong tung ding hi. Sapi le a lim bi ate thuak ding lauhuaina thu vauhilhnate i ngaihsut khak leh, Piangsakpa Pasian bek biakhuai ahihna thu i telsiam thei zaw ding hi. A nunung buainapi ah, ni dang sangin hih thutak poimawh zaw ding hi.

Piansak leitung i lamdanzia te ngaihsun in. Tua te in Piangsakpa thu leh bang hangin Amah bek biaktaak cing cih thu bang hong hilh hiam?

FRIDAY                                                                                               May 25

NGAIHSUT BEH DING:Lai Siangtho sinte in Rev. 14:7 a “vantung le leitung, tuipi leh tuinakte a Bawlpa bia un” cih thu leh, Paikhiatna 20:11 a thupiak lina ahi Sabbath thu, “ni guk sungin Topa in vantung le leitung, tuipi le a sunga omte bawl hi” cih kammal te a kizopna tel mahmah ding uh hi. A kammal zat kinai mahmah ta se leh, a kilamdang khat in Mangmuhna sungah Topa in “tuinakte” a Bawlpa cih kammal na hel hi.

“Pasian in hong tung ding Ama thukhenna a genna tawh kizom in tuinakte cih kammal a zatna in, nidang a thukhenna tawh kizopna om ahihna laisimte theisak nuam hi kha ding hi. Psian in tuinakte cih kammal a zatna in thukhen Pasian, a tawntung muanhuai leh hehpihna dim Pasian ahihna a honggenna hi thei hi (Piancil tuiciin thu ah muanhuaina leh hehpihna kimu thei hi).Tua ahih leh Mangmuhna 14 sunga vansawltak masa thupuak a tuinakte cih a zatna in hong tung ding thukhenna thupi tak sangin kha lam nuntakna le mimal kiginna ding thapiakna ahi hi.” – John Baldwin, ed., Creation, Catastrophe, and Calvary: Why a Global Flood is Vital to the Doctrine of Atonement (Hagerstown, Md.: Review and Herald Publishing Association, 2000), p. 27.

KIKUP DING DOTNATE:

1.             Isaiah 53:6 ah “Eite i vekpi in tuu bangin lam ipialkhin hi” ci hi. Hebru kam in “i vek in” cih in Cullanu hi a, Isaiah mah in Topa Jesu tungah “i vekpi mawhna teng” kisuan khin hi ci hi. “i vekpi” cih na ah Cullanu mah na zang hi. Bangzah takin mawhna lian ta leh siansakna in kicing ahihna hong bangci lah hiam?

2.            Singlamteh tunga gutapa tangthu pan banghilhlak ding na mu thei hiam? Gutapa a mawhna kimaisak in singlamteh tungpan ki khahkhia kik in nungta hi leh, a nuntakna kilamdang dingin na um hiam? Na dawna in eite nuntakna hong khel thei Christ vangliatna thu bang hong theisak hiam?