Sinna 23: Upna leh Thungetna

Upna Leh Thungetna

        Thupatna:    Adam leh Eve in mawhna a neih ma-un Pasian tawh maitang kimu-in kiho thei uh hi. Ei leh Pasian kikalah mawhna in hong dal hangin, thungetna panin Amah tawh ih kiho theihna ding lampi Pasian in hong bawl hi. Lei tungah a om lai-in Jesu in thungetna hun tam zat mahmah hi. Hihzawhna leh hatna tua panin ngah hi. Ei zong tua bang maha ih  ngah theih ding a hihi. Thunget dan a hoih zaw thei lehang, kha lamah ih khantohna dingin nakpiin ih zang thei ding hi.

1.        Jesu in bang hihzawhna nei-a, Ama hihzawhna a umte' a dingin bang kamciam nei hiam? Matthew 28:18, 21:22.

            Theih ding:    Jesu in zawhna a ngah mah bangin, eite in zong zawhna ih ngahna ding hihzawhna hong pia hi. Thungetna panin tua hihzawhna a ngen dingin eite hong sawl hi.

2.        Thungetna tawh kisai-in Jesu in bang lim hong lak hiam? Matthew 6:6-13.

            Theih ding:    Hih kamml bang lianlian nget ding hi tuan lo hi. A dan khat hong lahna hi bek hi. Khatna ah, thungetna in Pasian tawh kihona a hihi. Lungsim sunga om teng kam pana ginkhiat sakna bek hi lo hi. Deihna teng huih laka a gen zong hi lo hi. Biakna hahkat ih hih lam kilat sakna zong hi lo hi. Nihna ah, thungetna in Pasian suang ih hih lam ih lahna, Ama huh ding ih ngetna,, Ama liatna ih phawkna, Ama thuphate hanga ih lungdamna a hihi.

3.        Thungetna ih ngahna dingin bang kisam masa hiam? James 1:5,6.

            Theih ding:    Thungetna ih ngahna dingin upna kisam masapen hi.

4.        Upna ih cih bang hiam? Hebrews 11:1.

            Theih ding:    Hihzawhna a kisam zah nei hi le'ng thungetna zong kisam lo hi. Upna in, ih mit, ih bil leh ih lawnnate ih a theih phak lohna mun va zapna, a banah bang khat om lai hi ci-a muanna a hihi.

5.        Upna koici kisap hiam? Hebrews 11:6

            Theih ding:    Pasian om hi cih ih up kul hi. Mimal kim tawh Pasian kisai hi, thungetna za hi, cih ih up kul lai hi. Jesu, A Tapa a hih lam zong ih up kul hi. Upna in muanna a hihi. John 1:12.

6.        Upna koici kingah hiam? Rom 10:17.

            Theih ding:    Upna in Pasian' letson hi-a, Ama Lai Siangtho simnan leh Ama bawlsa nate ngaihsutna panin kingah hi. Upna a khang thei hi-a, zang khia semsem le'ng, hong khang semsem hi. Thunget theihna neucik khat ih neihna bek panin zong upna a nasia zaw ih ngah dinga, tua  panin hihzawhna leh siamna a nasia zawh ih ngah ding hi. Upna ankam tang cia bek in zong mualte khin khia zo hi, Jesu in ci hi (Matthew 17:20; Eph 2:8).

7.        Pasian in thungetna bangzah ta in sang nuam hiam? Matthew 7:11.

            Theih ding:    Eite in ih tate ih it theih zah sangin Pasian in eite hong it zawa, ih ngetnate hong dawng nuam zaw hi. A hi zongin ih nget dan ding om hi.

8.        Kua' min tawh thu ngen ding ih hiam? John 16:23.

            Theih ding:    Mihing in Pasian' maipha a muh kik theihna dinga a sem pen Jesu a hih manin, Ama min tawh mawhneite' thungetna Pasian in ngai hi. Pasian' kiangah thu ih nget ciangin Jesu ih Palai a hih lam ih gen kul hi.

9.        Thungetna ih ngahna dingin bang dang kisam lai hiam? 1 John 5:14.

            Theih ding:    Ih deih hong pia dinga Pasian ih sawlgap ding hi lo hi. Ama deihna bulphuh ding hi hang. Pasian in "hi hen" "hi kei hen" "ngak lai in" hong ci zongin, hong cih bangbang a sang dingin a baihsa-in ih om ding hi.

10.        Ih thungetnate bang in khaktan thei hiam? Proverbs 28:9; Late 66:18.

            Theih ding:    Pasian langdona phualpi a hi mawh teitei nopna lungsim in,, ih thungetnate a kizak ding khaktan hi. Mi dangte' mawhna mai sak nop lohna in zong ih mawhnate hong kimai sak ding khaktan hi. Mark 11:26.

11.        Thungetna dingin bang hun teng hoih hiam? Ps. 55:17.

            Theih ding:    Ih zingthawh hun leh ih lup ding hun pen Pasian ki-apna Ama khut sunga ih pum leh ih kha ih ngak ding a hoihpen hun a hihi. An ih nek ding ciang, khensat ding ih neih ciang, mawhzolna leh lungkhamna ih tuah ciang, cihte zong Pasian' kiang thu ih nget ding hun a hihi. Tua tham lo-in, Pasian ih kiang nai-ah om a hih lam, ih heksuk ih hektohna ah zong hong om a hih lam ih phawk den ding kisam hi.

12.        Bang hangin thungetna kisam se hiam? Mark 14:38; Luke 21: 36.

            Theih ding:    Ama hun bei kuan ta cih thei a hih manin Satan in mawhzolna hong khan semsem hi. Tua a hih manin hatzawkna, hihzawh zawkna ih kisam hi. 

            Thukhupna:    "Thu ngen lo, hihzawhna nei lo; Tawmtawm ngen, tawmtawm hih zo; Tampi ngen, tampi hih zo." Leitunga ih nuntak hun sungin Pasian muan cintenna bek in siatna tungah zawhna hong ngah sak ding hi (1 John 5:4,5). Pasian tawh kihona a hi - Ama Lai Siangtho pana Ama thu manna leh, thungetna pana Ama hopihna panin, upna kipin kho bek hi. Thungetna tawh Pasian' kiang ih zuat ciangin lungdamna leh nopsakna kingah hi (Late 16:11).