ZSS Lesson 2 : DANIEL LEH HUN NUNUNG

Lesson 2 : DANIEL LEH HUN NUNUNG

                                    April 7 - 13

---

NIPI NITAK

TUKAL SUNG SIM DINGTE: Luke 16:10; Dan. 1, 2; Dan. 3:1-6; Rev. 13:11-15; Dan. 3:13-18; John 3:7; Daniel 4, 6.

LAI SIANGTHO BULPHUH: “Kumpipa in Daniel kiangah, ‘Na Pasian,  pasiante’ Pasian hitakpi in kumpite’ Topa hi a, thuthuk a lakkhiapa ahi hi; ahang in, note in hih thuthuk nong lakkhia thei tazen uh hi,’ a ci hi” (Daniel 2:47, ZIV).

Tanglai Israel a ding Topa in geelna lianpite nei hi. “Note kei a dingin siampi gam khat le minam siangtho khat na hi ding uh hi” (Ex.19:6, ZIV). Hih a siangtho minam, siampi gam in leitung khempeuh ah Yahweh in Pasian khat bek ahihna teci ding ahi hi (Isaiah 43:10,12). A dahhuai thu ah, hih gam in Pasian piak a siangtho sapna bang tangtun lo hi. Babylon gam ah salmat in kipaipih zawsop hi.

A lungluthuai thu in, Pasian in Judah mimal pawlkhat salmat hi tase leh ama teci dingin zang thei veve hi. Thudang in en leng, Pasian in Israel leh Judah tungtawn in a tangtung lo te Daniel leh a lawmte thum tungtawn in zo thei cih thu ahi hi. Hih mite in Pasian deihsak Israel i omzia leh sepzia dingte hong laktel hi.

Amau tangthu in ni tawpni hun leh mun tawh gamla kha mah ding hi. Ahi zongin hun nunung a nungta Pasian teci ding a hong kisam eite in etteh ding thu hih mite nuntakna ah kimu thei hi. Amau tangthu pan bang teng i sin thei ding hiam?

SUNDAY                                                                                         April 8

TAWMCIK TUNGAHMUANHUAINA

“‘Tawmcik tunga muanhuaite tampi tungah kimuang thei ding a, tawmcik tunga muanhuai lote tampi tungah zong a uanhuai kei ding hi’ “ (Luke 16:10, ZIV).

Hih lai a Jesu kammal en in. Tawmcik tunga kiholem aa muanhuai loh ding nak baih hi ven, hilo hia? Buaina in a tawmcik ahihna hilo a, holemna i neih khit nak leh a dang kiholem kik ding pen baihto tektek aa, a tawpna ah tampi tungah muanhuai loh mun dong hong tunna thu eimau phutkhakna pan i thei ciat hi.

Hih thu teng ngaihsut kawm in, Daniel 1 sung a Babylon gamah salmat a pai Judah khangno lite phutkhak thute en masa ni.

Daniel 1 sim in. Daniel, Hananiah, Mishael, leh Azariah te lungsim puak in tanglai Israel te gamte tungah a omzia ding uh hong bangci muhsak hiam?(Deut. 4:6-8, Zech. 8:23 zong sim in).

Amau nek le dawn in midangte sangin pilna leh theihna ah a zahsawm in siamzaw (Dan. 1:20) cih kizopna a lahpah loh hang, kizopna om cih kilang hi.Pasian in a maute theihna leh pilna pia cih thu zong hong gen hi. Tua in, Babylon te an sianglo nekloh ding nialna tawh Pasian tungah a muanhuaina hangun Topa in amau sungah nasem thei ahihna hong lak hi. Amau thumang uh a, Pasian amau thumanna thupha suaksak hi. Hih khangno lite in

muanhuai tak leh citak tak in Lai Siangtho hilh bang a zuih bangun tanglai Israel te in na zui uh hi leh Pasian in amau a dingin tua bang na sem ding hilo hiam? Sem lua ding hi. Hun nunung a nungta eite zong i muanhuai nak leh, eite a ding Pasian in tua bang hong sem ding hilo hiam?

Thutak leh khuavak tampi hong kipiakna tawh kizui in, pawlpi khat i hihna tawh eite kidot ding thu in: eite hong kipia te tungah muanhuaina leh thumanna i nei hiam? Tua ban ah, mimal khatsim in Pasian a ding thahat teci te koi bangin hi thei ding i hiam?

MONDAY                                                                                   April 9
DANIEL KINIAMKHIATNA

Leitung khempeuh ah, kum tul tampi sung Daniel 2 sung aa thu in mi tampi tak Lai Siangtho Pasian umsak hi. Hih in Pasian om takpi cih bek hilo in Ama theihkholhna thu hong hong telsak hi. Pasian theihkholhna in Pasian om takpi ahihna a lak lahtelna bu hi takpi hi.

Daniel 2 sim in. Hih bu in Pasian i hihna hong bang ci lahtel hiam? Hih bu sung a hong kigen bang tulai Europe gam en in (Daniel 2:40-43).Pasian lahtelna omlo in tum akum 2600 lai a nungta khat in diktak leh ciantak in tulai dinmun ding bangci bang genkhol thei mawk ding hiam?

Ama tungah kilak te Daniel in siangtak leh zumlotak in Pasian tungah phatna pia hi. Ama pilna leh theihna sa te tawh kumpipa mang leh a khiatna a gentheihna ama theihtawm bangin gen a kisialh ding baih mahmah ding hilo hiam?Tua sangin ahoih zaw Daniel in thei hi. Amah leh a lawmte thungetna (Daniel 2:17-23) in Pasian tungah a kingak zia uh hong lak a, tua hi kei leh amau zong mipil dangte tawh sikhawm thei ding uh hi.

Daniel in kumpipa mipilte, aisansiamte, mitphial-siamte in zong kumpipa mang a gen theihlohna phawksak kik hi. Tua bang hilo in, vantung a om Pasian in amah bek Pasian maan ahih manin thuthuk te a lahtheihna gen hi.

Tua hi a, ama kiniamkhiatna leh Pasian tungah a kingakna in a thahat teci hi thei sak hi. Tua bangin Daniel in kiniamkhiatna lak ahi leh tuni in eite in bangzah in kiniamkhiatna lahkul ding hiam? Daniel muhloh tatkhiat geelna thu lahtelna eite in i nei hi. Hong kiniamkhiat sak ding na khat peuh a om leh, tua in a dang hilo singlamteh tungah Jesu hong sepsakna hang a hih ding kilawm hi.

Singlamteh in kiniamkhiatna tawh kisai bang hong hilh ding kilawm hiam? Tua in eite mimawh hihna bek hilo gupkhiatna ding Pasian tungah kingak a kulna bang hong gen hiam? Singlamteh hang hi kei leh koi ah na om diam? Tua ahi leh, singlamteh lo a dang na kisialh ding bang om hiam? (Galati 6:14 zong sim in).

TUESDAY                                                                            April 10
KHAM MILIM

Lai Siangtho sinte in Daniel 3 a Dura zangkuam a Hebru tangval thumte leh Revelation 13 aa kigena beisa leh hun nunung aa Pasian mite kibawlsiatna ding thu a kizopzia thei mahmah ding uh hi.

Daniel 3:1- 6 leh Revelation 13:11-15 saikaak in. Hih tegel ah a kibang thu bang om hiam?

A mun nih in, biakpiakna thu tawh kisai buaina hi a, a nih tuak in a kigumsawl biakna thu gen tuak hi. Tua in, Topa bek i ngah ding biakna pen ukna len kumpi in a ngetna ahi hi.

Daniel 3:13-18 sim in. Hih tangthu in hun nunung ciangin i phutkhak ding te bek hilo koi bangin phukha ding cihte hong bangci telsak hiam?

Leitung ah a thahat pen kumpi ahihna tawh Nebuchadnezzar in hih khangnote leh a Pasian uh zahpih a, “keima khut sung panin note hong honkhia ding bang Pasian hiam” ci hi. A sawt hetlo in tua Pasian kua cih mu takpi a, “Shadrach, Meshach le Abednego te Pasian, a vansawltak sawl a, a nasemte a hukhiapa kiphat ta hen! Amaute in Amah muang uh a, kumpipa thupiak nial in amau Pasian longal Pasian dangte na sep ding le biak ding sangin singam zaw uh hi,”(Daniel 3:28, ZIV) ci in pulaak hi.

Hih bang a lamdang thu muh khit ciangin, hih khangnote biak Pasian in tuamdang deuh hi cih kumpipa in muangmawh nawn hetlo hi. Meiphual sung panin kihonkhia lo thei cih zong hih khangnote in tel uh hi (Daniel 3:18). Thumaan zuihna dingin kumpipa thu nialna tawh hingtang a kihal ding cih thei pipi banghangin a maan thu sem veve uh hiam? Hih tangthu in amau upmuanna leh a up uh thu hangin bangbang thuak ta leh a dingtang ngamna uh a vanglian teci hong musak hi.

Hun nunung ciangin biakna tawh kisai buaina hong om ciang, amaute bangin muanhuai tak i dintang ding koi bangin kician thei ding i hiam? “Tawmcik” ahi tu laitak in muanhuai kei le hang, a lian zaw a tawpna buaina ah bangin hong dingtang sak zo ding na ci hiam?

WEDNESDAY                                                                      April 11
GENTILES TE KIKHELNA

A maan Pasian om takpi ahihna leh a vangliatna Nebuchadnezzar in a theihtelna tawh Daniel alian 3 tawp hi. Ahi zongin Pasian leh a vangliatna theihna in gupkhiatna a ding a poimawh suahkik (pianthak) nuntakna neihna tawh ki banglo hi(John 3:7). Daniel 4:30 a kilak mipa in akikhel mi hi taktak hi.

Daniel 4:30 sim in. Hih mipa buaina bang hiam? (John 15:5, Acts 17:28, Dan. 5:23 zong sim in).

Daniel alian 4 a tawpna ah bel a deihhuailo lam pan ahi phial zongin Nebuchadnezzar in pilna hong ngah sam hi. Vangliatna taktak Pasian sung bek ah om a, Pasian lo tawh bang mah hilo cih Nebuchadnezzar in tel ta hi.

“A kiphasak ngei kumpipa tu in a kiniamkhiat Pasian ta hong suak a, a gilo ngongtat kumpi panin a pil, a khuatuah kumpi hong suak hi. Vantung Pasian a zahko pa in tu-in Sangpen Pa liatna phawk siam a, Jehovah zahtak ding leh gam mite lungnopna ding hahkat zawsem ta hi. Kumpite’ Kumpi, Tote’ Topa i thuhilhna hangin, gam-uk khempeuh theih kul thu ahi liatna diktak in hoihna ahihna thu Nebuchadnezzar in phawksiam ta hi. Jehovah pen a nungta Pasian ahihna a tangkona aa, ‘Keimah Nebuchadnezzar in a sepna khempeuh leh thukhenna ah a dik, a kiliansak te a niamkoih thei pa ahi vantung kumpi Pa phat, lamsang iin ka pahtawi hi.’ “ –Ellen G. White, Prophets and Kings, laimai 521.

Daniel 4:35 sim in. Hih lai ah Pasian in Nebuchadnezzar a lah thutak bang om hiam?

Gentile khat in Hebrew te Pasian vangliatna, ukna, leh thuneihna a phawktelna tawh Daniel alian 4 tawp hi. Pawlpi masa te hun lai zong hih bang mah in Jews te teci leh Pasian vangliatna tawh Gentile te in Topa’ thumaan thei uh a leitung bup ah tua thumaan tangko uh hi.

John 3:7 sim in. Hun nunung tawh kisai i ngaihsut ciangin sihdaan, biakna, leh bawlsiatna te hi kha mah leh, thudang tampi tak te sangin i kigin zia ding bang hong gen om hiam?

THURSDAY                                                                               April 12
DANIEL MUANHUAINA

Daniel a lian 6 sim inla a nuai a dotna te dawng in:

1.    Daniel 6:4,5 ah Daniel pianzil bang na mu hiam? Hih mun ah midang te hong muhzia ding bang hilhlaak i ngah thei diam?

2.    Hih Daniel 6 sunga thupiang leh Mangmuhna sung a hong kigen hun nunung a piang ding thute kibat zia bang om hiam? (Rev. 13:4, 8, 11-17 sim in).

3.    Daniel mun ah om in kingaihsun in. Thunget loh dingin bang matlap zang thei ding hiam? Humpinelkai kua sungah a kikhiat lohna dingin thungen lo hi zenzen leh, amah le amah kidiksak tawm thei lel lo ding hiam?

4.    Thunget ding kisam lua tangtang ta kei leh, bang-bangin Daniel in thungen den hiam?

5.    Humpinelkai kua sungah Daniel a kikhiatma in Daniel Pasian vangliat zia a theihna kumpi Darius in bang gen hiam? (Daniel 6:16).Tua kammal te in a biak Pasian thu Daniel in kumpipa mai ah teci hoih ahihna bang hong lak hiam?

FRIDAY                                                                      April 13

NGAIHSUT BEH DING: “Leitung hun beikuan a nungta i hih mah bangin Daniel sunga kiciamteh genkholhna thute kantel ding kisam mahmah hi. Mangmuhna laibu tawh kizom in sinkul hi. Genkholna bu ahi Daniel leh Mang-

muhna thute kuamah in tel zolo ding ci in Satan in mi tampi umkhial sak hi. Ahi zongin, hih genkholhnate sinna ah thupha tawh kizom hi cih kamciam kician om zo hi. ‘a pilte in tel ding hi’ (Daniel 12:10), cih hun nunung ciangin a kihong ding Daniel mangmuhna te hi a, mangmu John tungah kum zalom tampi Pasian mite a makaih ding Christ kilaakna ah kamciam in, ‘hih genkholhna thutea sim mi thupha ngah hi a, a sunga kigelhte za a, a lungtanga a kete thupha ngah ahi hi.’ (Rev. 1:3)” – Ellen G. White, Prophets and Kings, laimai 547.

Daniel thubu tawh kisai kumpi gam pianna leh siatna te, thukhenna (Daniel 7:22, 16; 8:14), leh haksat hun ah Pasian mite kihotkhiatna (Daniel 12:1) in ngaihsun kha thei hi hang. Tu kal sinna in sittelna leh bawlsiatna te hong tun ciangin mimal kiginkholhna ding etteh ding thute hong hilh hi. Hih thute in hun nunung a ding kisam thupuak hong pia hi. “Sapi ciaptehna leh haksatna hun” leh hong tung ding bawlsiatna te theihna in phattuamna hong pia kha mah ding hi, ahi zongin, a kisam pha bel ahi Pasian tawh mimal kizopna i neih kei leh tua theihna te in ei a ding mawhkawkhong suak zaw ding hi. Thu dangdang te sangin, Daniel leh a lawmte, leh Nebuchadnezzar mahmah in aneih uh “suahkikna/pianthakna” kisam pha bel hi.

KIKUP DING DOTNATE:

1.    Daniel 9:3-19 a Daniel thungetna sim in. Hih thungetna kammal in Pasian pen hehpihna nei Pasian hi a, eimau sepna leh dikna hilo ama hehpihna bek tawh hong it a hong honkhia Pasian ahihna koi bangin kilangsak hiam? Hih thutak pen theih bek hilo nuntakpih ding bangzah in thupi hiam?

2.    Daniel (Daniel 6) leh a lawmte thum (Daniel 3) te phutkhak bangin biakna thu tawh kisai in ukna lampan lausakna a om ciang dingtang na ding haksatna te kikum un. Amau thuak dan a kibang a om hiam? A kilamdang e? Muanhuaina tawh koi bangin teci hoih hi thei ding cih amau tangthu pan bang sin thei ding ihiam?

3.    “Suak-kik” cih koi bang dan hiam? Bang hangin Jesu in note “na suahkik uh kul hi” hong ci hiam? (John 3:7).