MS 13 - Sabbath Sawm leh Thumna Hungeelna

Sabbath Sawm leh Thumna Hungeelna

Mipi Lasakna:           “Aw Mi Sang Tampi’n Zai Sa Ding” ZBC 152
Muakna:                   Sabbath School Makaai
Kipat thungetna:               _______________________
Thu geenna:          “A Min Na Lawh Ciangin Ama’n Nasa Hi”
Sumpi Donna:
Tawpna La:           “A Lamdang Tangthu La Sa Ning” ZBC 98
Tawpna Thungetna:     _______________________

Theih Ding: Taangthu geenpa in lotngah ding a kisaploh haangin, a thu paizia teng a tel ding kisam hi. Phawk dingin, Mission Kuata Facebook laaimaai pan maante zangin kigeen thei leh hoih peen hi.

Tu kuata sungin, Ebeye tuikulh pan ahizongin; Canada gam Alberta pine ah a kihong Mamawi Atosketan saang pan ahizongin; Nitumna lam Virginia leh US gam Arizona pine sungah a kihong Holbrook Seventh-day Adventist Indian saang panin ahizomgin taangthute i za khin hi. Tuni-in, Holbrook Seventh-day Adventist Indian saang panin taangthu khat i zaakbeh dingaa, tua in kidona lianpi peen a taktak ahihna hong phawksak in, Topa Zeisu hong paikik baih mahmah ta ding hi cih zong hong phawksak ding hi.  

Ama’ Min Na Lawh Ciangin, Ama’n Naasaa Hi

Kum 14 a phaa numeino khat, saangkah a pelh zeelzeelna hangin tua vaai kuppih dingin Pastorpa zum ah kisam hi. Ama’ gamtat hoihlohna a kikup dinguh taangin, thu kikupna peen Topa Zeisu leh Satan kikaal kidona lianpi thu lam ah thu kawng kihei ngiaumawk hi.

Saang buaina vaai ah makaai (manager) Giselle Ortiz in taangiat saangnaupang Dezba zum ah a sap uh ciangin a omdaan a maan loh lam thei hi. US gam Arizona pine (state) aa kihong Holbrook Seventh-day Adventist saang ii pastor pen Phil Vecchiarelli ahi hi. Pr. Phil in Topa Zeisu’ min a lawh ciangin numeino Dezba’ pumpi liing gauhgauh in, ngaihtakin kap aa, “Geen nawn peuhmah ken!” ci hi.  Tua zawh tawmvei khit ciangin a liing kauhkauh pen khawl aa, “Pastor aw, Topa Zeisu min na lawh ciangin ka pumpi nasak hi,” ci hi. 

Pastor Phil in a Laai Siangtho leem aa, Dawite zawh nading in Topa Zeisu vangliatna tawh kisai kamciamte sim hi. Topa Zeisu min a lawh simin, numeino nu pen  “Geennawn peuhmah ken! ci-in ku laalaa hi.”

Tua khit ciangin numeino nu pau samsam aa, Ka sungah a pau khat om aa, tua in na thugeente a maanlohna leh laibu zong zuaupi hi ci-in dawite in hong geen uh hi .

“Topa Zeisu in Topa hi. Suahtaakna na ngah thei aa, Topa Zeisu Topa in na saan naakleh, hong hopihpih aw in hong taaisan suak ding hi,” ci-in Pastor Phil in damtakin geen hi. Hih peen khuttum tawh a kitupna pawi et tawh kibangin, numeino nu awnggawp aa, pastorpa zong lau vetlo in leencip hi.  Saang ah buaina lam makaai (manager) Giselle in daaitakin thu ngeen aa, Laai Siangtho sungaa kamciamte pulaak in, a ngah dekdek ding uh gualzawhna haangin Topa Zeisu tungah lungdam ko uh hi. Laai Siangtho sungpan a dang kamciam khat pastor a simkik ciangin, Dezba in naa a sakna a zahnih khang aa, ku zeezaa in sual tungah tuuksuk tamawk hi.

“Kei tungah bangmah piangkei ci-in banghangin ngaihsun nahi hiam? Topa Zeisu in nang saangin vaanglian zaw hi. Topa khut sungah na nuntaakna na aap ding kisam hi,” ci-in aw ngaih taktawh Pastor Phil in geen hi.

Dezba sual tungah kihual gawpin, “Na lua veh, na lua veh,” ci-in ku zaazaa hi.

Tua khit ciangin diangkhia aa, kongkhaak ah pusuak khia in, bawda saang ii zum innpi sung aa inndeilianpen (hall) sungah luut hi.  Giselle zong huang sungpan a taaikhiat ding patau ahihmanin, delhpah hi. Dezba zong hong kihei-in, Giselle sal geegaa hi. Geen theih ding a hilo alauhuai maitang pua mawk hi.  Giselle in amah a en peen numeino nu a hihloh lam thei in, a lau haangin, “Topa Zeisu in nang hong hawlkhia ta hen,” ci-in taai giap hi.

Zum innpi pualam ah Giselle leh Dezba tu khawm uhaa, Pastor Phil zong a kiang vuah hong paipah h.

Pastor Phil in, “Topa Zeisu min na lawh ding kisam hi. Topa Zeisu’ min na lawh mateng, dawi gilo in hong taaisan lo ding hi,” ci-in haansuah hi.

Lopa tungah Dezba tuuksuk in, ku veevaa hi. Atawpkhakna ah, “Ka saang hi! Ka saang hi!” hong ci ta hi.

“Na nuntaaakna ah Topa Zeisu na saangta hiam?” ci-in pastor  Phil in dong hi.

“Ka nuntaakna ah Topa Zeisu ka saangtaa mah hi,” ci ta hi.  

A pau ciangin naa sa mahmah laai hi. Dawi in nusia taa aa, Dezba taanglo in om hi.

“Na tawl hiam?” ci-in Pastor Phil in dong hi.

“Tawl mah ing,” ci-in awneem tawh dawng hi.

Giselle peen numeino haangin a lungsim buai simtham in, kahna zong om himah taleh, tu-in gualzo ta hi.

“Tua gualzawhna ka muh ciangin Topa Pasian ka muanna khang seemseem hi,” ci-in lungdam takin geen hi.

Tawlkhat khit ciangin, Giselle in Dezba numei bawda ah paipih aa, Topa Zeisu aadingin inndei khat tuam seh uh hi. Lim tungah Laai Siangtho kamciam a kigelh laaidalpi 2 te kawm tungah suang uh hi.

Kum 27 phaa in, Southwestern Adventist University pan lukhu neelkaai a ngah Giselle leh Holbrook Adventist saang aa naseem tengin, hih kidona lianpi a theih masakna uh ahi hi. Khatvei, ama zum sungah numei khat tawh a kiho laitak un, numeino nu hong phunciak gawp in, zum sung a kiu khat ah a mit gau leelaa mawk aa, kihtaak huai mahmah hi. Numeino nu in a si saa a pa kik a muhna thu geen hi. Tua ciangin, Giselle zong a khuasik mul hong tho pianmawk ahihmanin, thakhatin thu ngeen pahaa, dawi hawlkhia hi. Dawi in nusia pah hi.

Saangnaupangte in bawda sungah dawi gamtatnate zaa in mu uh hi. Giselle in numei bawda ah bawda uk a huh nasep a kipat ciil laai-in, a omna inndei sungah zaan khat, khua a ziing melmal bangin ngaihsun hi. A lungsim sungah, “Tu mahmah in thu ngeen in” cih aw khat zaa hi.

Amah zong khukdin pah in, “Topa aw, ka kiim ah bang thu piang cih ka theikei hi. Ahizongin, kei leh numeino teng na vantungmite tawh hong keem hong cing in,” ci-in thu ngeen hi.

A zingsang ciangin, Giselle tungaa inndei sungah a lum numei bawda uknu in a zaan zaan in a lupna sungah a kimu theilo khut in ka lupna tungah a meekna thu geen hi. Amah lau lua in taang theilo hi. Tua khit ciangin, a taangzal khat om aa, tua khut mang ta hi.   

Tua bang dawi vaai tawh a buai ciangin, Topa Zeisu leh Satan kikaal kidona lianpi pen a taktak ahihna phawk in, Topa Zeisu hong paikik baih taktak ding hi cih Giselle in hong telsiam ta hi.

Giselle in, “Hih numei bawda ka tun masiah nisim, nai sim in, Pasian’ vantunggam tun nadingin hanciam keileh, dawite hong laangpah ahihna ka theikei hi. 

“Numeinote nuntaakna ah tatsat loin khuavaak i taansak kei leh khuamial in na tuam pahpah aa, a kipatna panin kipatkik zeel kuul  hi,” ci-in Giselle in geen hi.

Giselle in mission nasep nuamsa aa, nasep dang tawh kheek ngeilo ding ahihna thu geen hi.

Amah in, “Biakinn sungah kikhawm zeel aa, thu geen bek kicingtaak lo hi. Midangte tawh kithuahkhawm in kap khawm ding in hong kisam hi. Mission nasep in i tha beisak khamah ding hi, ahi zongin, ken ka hih leh kha lam ah haat ka kisa seemseem hi. Tua in Topa Pasian tawh nasepna ii  a hoihna ahi hi. A piang theilo dingin na ngaihsutte Topa in hong seemzo ding hi.  Topa nasepna kiu khat ah kihelna peen, thupha hi-in,  Topa huhna a kisam mite tawh kizopna ahi hi,” ci-in geen hi.  

Topa Zeisu hong pai baih ta ding hi. Tu kuata sungah Canada gam, Marshall tuikulh leh USA aa saangte tungah Kha Siangtho vaangliatna a kibuakna i zaa hi. Tuni-in, dotna in: Mission aadingin bang sepsaan nahi hiam? Holbrook saang ah a seem Giselle bangin, mission nasepna ah na lawp hiam? Mission nasep na sep ciangin, nidang saangin kha lam ah tha haatzaw na kisa hiam?  Tuni-in, eite sep theih ahi, sumpi piakkhiatna tawh maa pangkhawm ni. Topa Pasian in thupha hong pia ta hen. 

@@@@@@@@@#########@@@@@@@@