FSS ZIRLAI 4 CAN CEMNAK LE RUNDAMNAK

ZIRLAI 4 

CAN CEMNAK LE RUNDAMNAK

                                                             April 21-27

SABAT TLAI LAM:                                                     April 21

TUZARH SIAR DING: John 14:9; Zef. 3:17; John 1:1-3; Rom 8:38,39; Ps. 91:15,16; Rev. 14:6,7; Eph. 4:4,5.

BIBLE CANG KEN: “Hihi duhdawtnak a si, kanmah in Pathian kan rak duhdawt tinak a si lo. Amah in in duhdawt ih a Fapa a run thlah. Cumi cu kan sual thlah raithawinak dingah a si” (1 John 4:10).

KHRIHFA le sakhaw dang an danglamnak cu a dinsuaktu ih thuzirhnak kha an thupitter. An sakhua dintu in an hrangih a tuahsak mi sim phuan ding kha sa khua dang pawl in an nei ve lo. An sakhua dintu in an hrangih a tuahsak mi le a tuarsaknak um hman sehla a run thei nawn lo. Hivek minungpawl ih an zirh mi cu pumpak zuamnak ih rundam ngahnak lawng a si.

Khrihfa sakhuanak cun Jesui thuzirhmi lawng si loin kan hrangih in tuahsak mi ruangah rundamnak tiang a tel. Khrih cu tisa in hringnun a hmang (Rom 8:3). Cross ah a thi (Rom 5:8), thihnak in a thosal (I Pet. 1:3) hnu ah vanah rawngbawlnak a nei (Heb. 7:25) Hi hna a tuannak lawngin rundamnak kan ngah thei. Kanmah in tuah theimi zianghman kan nei lo. Thatnak, thianghlimnak, upat tlaknak, thil tha tuah theinak pawl le thatnak pawl kha pathian hmaiah suah pi seh la dodaltu le phiartu vek kan si ding. E.G White, Faith and work, pp. 24.

A tui kan san ni neta lamah bumnak le tihnung phunkim karlak ah kan um ih himi thutak sunglawi hi kan hrangah a thupibik mi a si.

THAWHSAL NI                                                          April 22

PA IH DUHDAWTNAK

Jesuh Cross par a thlen hlan ni rei lote ah a hnen ihsin minungpawl in pai hnen thlen theinak thu a sim. Cu hnu ah Filipi in, “Bawipa na Pa in hmuh awla, kan lung a kim ding” a ti (John 14:8).

Fillip tong kha Jesuh in ziangtin so a sawn? John 14:9, Pa thu ih a lehnak in ziangso in zirh? Pathian thu ah kan thei sual (or) ruah palh mi thu ah Jesui a sawnnak thu in ziangvek in so theifiangnak in pek?

Mi tampi in thlung hlun Pathian hi thuthentu Pathian a si an ti ih, thlung thar Pathian hi zangfahnak, zawnruahnak le sual ngaidamtu Pathian a si, an ti. Himi hi thudik lo a si. Thlung hlun le thlung thar Pathian hi danglamnak a um lo sinak thlengaw dah lo mi Pathian a si.

Leitlun ah Khrih a ratnak san pakhat cu Pa Pathian thu ih thutak langter dingah a si. Kum za tampi Pathian ziaza ah ruahdan sual an neih mi kha a karh sinsin. Pathian be lo mipawl hnen lawngah si loin hril mi miphun zumtu hnen khalah a si ve. Leitlun hi thimnak in a tuam theh ih Pathian thuhla ah ruah sualnak le zum sualnak a um. Cuih thimnakah tleunak a thlen tikah Pathian hnenah leilungpi cu a thleng leh ding. Setan ih bumnak huham kha siatter theh a si ding. E.G White, The Desire of Ages. Pp. 22. Himi hi Jesuh leitlun ih a ratnak san a si.

Pathian a thlengaw dah lo. Thlung hlun ih thil thleng mipawl kan thei ahcuh thlung hlun ih Pathian kha thlung thar ih Pathian ngil nei a sinak kan hmu ding. Bible ih a simmi cu “Duhdawtnak Pathian” a si (John 4:8). Kan Pathian a danglam dah lo. “Jesuh hi mi zan tuni le a kumkhua in a danglam dah lo” (Heb. 13:8 NRSV).

Thlung Hlun ih Pathian kha Cross ih thah mi a si ti kan theih a tul. Himi Pathian hi a thin a sau, mi rinum mi ngil nei le zangfah thiam duhdawtnak thawn a khat mi Pathian a si (Ex. 34:6,7). Pathian hi duhdawtnak a tlasam dah lo (Saam 143:8), a dugnthluntupawl hnenih um hi nuam a ti (Ps. 147:11). Pathian in a mipawl hrangah hlawhtlinnak ding tumtah mi a nei ih, ruahsannak a pek (Jer. 29:11). A duhdawtmi sungih a umtupawl hrangah cun a mawh thluk dah loih lungawi zaihla thawn an hnenah a umpi theu (Zeph. 3:17). Pa Pathian sinak hi hihnakih tam in thatnak a nei tam sawn a si.

Pa Pathian thu kha Jesui a langter mipawl ruat aw. Himi ruangah hin can tampi Pathian tihzahtupawl hrangah a sunglawi mi thutak le ruahsannak an nei a si ko lo maw?

TLAWNGKAI NIKHAT                                               April 23

BAWI KHRIH IH DUHDAWTNAK

Sualnak in Pathian le milai a thenter ih, an karlakah pehzomaw thei lo in a umter. Cuih thenawknak hi anmahten an komaw theinawn lo. Minung tlaksiatnak in kumkhua siatnak a thlengter. Pathian le minung karlakah khur thukpi a um ih tihnung zet a si. Zohman in sual ruangih thenawknak thubuai relfel theitu an um lo. A thianghlim ih a dingfel mi Pathian le minung remaw sal thei dingih tuah theitu an um lo. Pathian thawn kumkhua a ummi, amah rori Pathian vekih sinak nei mi in milai sinak taksa nei in hringnun hmangtu ih kan sual hrangah a pekawk a tul.

John 1:1-3,14 le Fill. 2:5-8 siar aw. Jesuh hi zo a si tiah in zirh.

Bawi Khrih kha a um theinak dingah midang rinsan le bomnak ih ummi a si loih amahten kumkhua a nungmi Pathian a si ih, lenglam langnak men si loin Pathian ngaingai a si. A sinak ngaingai hi Pathian kumkhua nungmi a si. Misual kan zate ai-awh ih thi dingah le milai taksa rori ih Pathian dan thlun famkim dingah milai hringnun a hmannak ah Pathian a sinak a um ringring (Rom 3:23).

Bawi Khrih hringnun a hman tikah midang par ihsin hlawknak ngah duhnak a um lo. Pathian thukhaam a thlun tikah Pathian sinak thawn a thlun lo, minung sidan in Pathian bomnak rinsan in a thlun.

Jesuh kha Pathian sinak famkim le milai sinak famkim a nei a si. A thiltitheinak a thu in ziangkim a kilhim theitu (Heb. 1:3) a si ih, caw rawl einak kuang sungih naute an ihter mi a si (Luk. 2:16). Cuih a sullam cu, “Amah cu ziang hmuahhmuah hlanah a rak um zo ih, amah hi ziangkim funkhawm thehtu a si” (Col. 1:17). Amah kha hringnun hmangin naute ih hrinmi a si ih, taksa in siseh, fimnak in siseh a thang vivo (Luk. 2:52). A sullam cu amah tel loih tuah mi pakhat te hman a um lo (John 1:3). Cupa cu Cross parah mi ih thah ruangah a rak thi mi pa a si (Tirh. 5:30).

Hipawl hi Pathian ih in duhdawtnak langtertupawl a si. Khrih ih duhdawtnak hi Pathian ih in duhdawtnak langtertu a si. Khrih ih duhdawtnak hi Pathian ih in duhdawtnak langtertu a si. Curuangah Pathian hnenah lungawi thu sim ding leiba tampi kan nei.

Rom 8:38,39 siar aw. Tui ni kan zirmi ihsin hitawk ah Paul ih a simmi Pathian zumih rinsan ngamnak hmual nei zetin ziangvek in so in pek?

TLAWNGKAI NIHNIH                                                April 24

THLARAU THIANGHLIM IH DUHDAWTNAK

Pa Pathian ih thu kan theih sual vekin thlarau thianghlim ih thu khal kan theih sualnak tampi a um. Pathian thu midang zirhtu mifim tampipawl in Pa le Fapa duhdawtnak ih pehzomawknak kha thlarau a si tiah an ruat. Pa Pathian le Fapa Jesuh karlak lawngah thatnak a um tiah an ti. An ti duh mi cu Pa Pathian le Fapa Pathian hnakin thiang thlarau kha niam deuh ah ret ih Pathian sinak a nei ve lo an ti duhnak a si.

Asinan, Bible in Thiang Thlarau hi mi pakhat sinak taksa pum nei a si tiah a simfiang. Khrihfapawl in Pa Pathian le Fapa Pathian hmin sal tikah thlarau hmin sal tel a si ve (Matt. 28:19). Thiang Thlarau hi Khrih sunloihnak petu a si ve (John 16:14). Thiang Thlarau in minung sualnak a sim (John 16:8). A riah a sia thei ve (Eph. 4:30). Thin hnem theitu a si (John 14:16), mi bawmtu a si, ruahnak petu ti khalin an ko. Cuih tlunah thiang thlarau hi zirhtu a si (Luke 12:12), dilsaktu khal a si (Rom 8:26). Sual thianfaitertu tiah (I Pet. 1:2) a ti ih, Jesuh in thiang thlarau kha thutak hmuahhmuah sungah hruai luttu a si tiah a ti (John 16:13).

Pa Pathian, Fapa Pathian vekin thiang thlarau in Pathian sinak a nei ve. An pathum in Pathian sinak ah pumkhat an si ih, thumkom Pathian pakhat an si.

Thlarau Thianghlim in Pathian duhdawtnak kha ziangkim parah a langter. Kha mi ah a tuah mi ziangpawl so a si (Luke 12:12; John 16:8-13; Acts:2).

Thiang Thlarau ih a tuahmi ropibik cu Pathian Jesuh kha minung hringnun hmangih a canternak kha a si. Jesuh kha Thiang Thlarau thawngih hrinmi a si (Matt. 1:20). Hi thil hi Pathian sinak neitu lawngih tuah thei mi a si.

Thiang Thlarau in Khrih hrangah thil mangbangza a tuah (1) Hmuntin ih a um thei mi Pathian Jesuh kha Mary sul sungah a thlengter ih, van a kainak khalah temtawntu taksa pum thawn vanah a kaipi. (2) Temtawn ih a ummi Bawi Khrih hringnun taksa pum kha leitlun khuaza kipih a ummi Khrihfa in mangbangza an tuah theinak pawl hi minung ih theih thei ban lomi thiang thlarau ih in umpitnak a si.

Curuangah Thiang Thlarau Pathian kha Pa le Fapa Jesuh thawn kanmah aiawh in hna an tuan tlang. Pa Pathian, Fapa Pathian le Thiang Thlarau Pathian hi mi hmuahhmuah hnenah zangfahnak langtertu an si ih, rundamnak khawkhangtu tla an si.

Pa Pathian, Fapa Pathian le Thiang Thlarau Pathian pawlih in duhdawtdan an bangrepaw theh. Pathian kumkhua lal ramah rundam kan si theinak dingah an tuantlang.

Rundamnak sunglawi hi ziangvek in so kan thlahthlam thei. Kumkhua ih kan that lan theinak dingah Pa, Fapa, Thiang Thlarau pawlin an tuah cia zo miah in hruai ih cumi ah ziangtluk in so rinsannak kan neih?

TLAWNGKAI NITHUM                    April 25 RUNDAM HNANGAMNAK

Seventh-day    Adventist         hrekkhatpawl cu rundamnak ah laklawh zetin an um. Hnangamnak nun hrampi theihnak an tlaksam ruangah a si. Thil tha tampi an tuah mipawl kha santlaihnak a nei lo. An nun lamtluanah rundam hnangamnak an thinlung sungah a um lo.

Jesui nun le kan nunah nasa zetih a danglamnak kan hmu. Nunnak sungih luhnak kotka cu a fiakih a lamzin khal a har, a thleng theitu cu mi malte lawng an si (Matt. 7:14). Himi kan siar tikah awloksong le mangbangin kan um tikah olten zo so a feh lohli thei ding?

Ni neta hrangih kan timlamawk ahcun a tui kan damlai ah rundam hnangamnak, kan neih a tul. Kan hmai ih a ra thleng dingmi ih fehtlang thei dingah thinlung sungih rundam hnangamnak na neih a tul. Thumkom Pathian cun rundamnak ah hna an tuan tlang ti kan thei zo ruangah rundamnak ah hnangamten kan um thei a si.

A tangih Bible cangpawl siar aw. Rundamnak thuah ruahsannak le thlangamnak a ra thlen theinak dingah Pathian ih in tuahsak mi ziangso an si. Ziangvek in so thukamnak in pek.

Ps. 91:15,16 …………………………………………………..

Joel 2:31,32 ………………………………………………….. 

John 10:28 …………………………………………………..

Rom 10:9-13 …………………………………………………..

I John 5:11-13 …………………………………………………..

Bawi Khrih thawngin rundam mi kan si ruangah nun thianghlim ih nung dingah thupekmi le kawhmi kan si. Hihi rundam ngahnak dingah a si lo. Rundamnak laksawng in pek mi kha thih tiang hlah loin kan kainget ringring ding. Pathian zumtupawl cun can cem tiang rinumten zawnlung ding kan si. Khrih ih in tuahsak mi rundamnak ah kan lungkim rori ruangah kan hna a ngam ih, rinumnak le zawnlung in a thu kan thlun sawn a si.

TLAWNGKAI NILI                                                      April 26

KUMKHUA HMUNMI THUTHANGTHA

Thuphuan 14:6,7 siar aw. A danglam dah lo mi thuthangtha hi ziangso a si?

Hitawk ah danglam dah lo thuthangtha tiah a ti. Hi thu hi hlanlai ih rak um zo mi a si ih, a danglam dah lo thuthangtha neitu cu Pathian a si. A pomih zum duhtu hmuahhmuah hrangah pekmi a si. Himi thu in a danglam dah lo mi Pathian duhdawtnak a langter. Cuih thucah cu leitlun khuazakip ah a thlen a tul. Mi hmuahhmuah in co tha an ngah theinak dingah an theih a tul. A thehdarh (simphuangtu dingah) dingah a palaipawl a ko.

Leilung sem hlan ihsin amai hrilcia mi kan si. Amai in duhdawtnak sungah nun thianghlim soisel ding um loih a hmai ah kan um theinak dingah a si. Jesuh thawngin Pathian fa a lungawinak thlentertu dingah hrilcia mi kan si (Eph. 1:4,5). Kumkhua a hmunmi thuthangtha lawng si loin sim betmi ziangpawl so a neih?

Leilung sem hlan ihsin amai hrilmi kan si ih kumkhua a hmunmi thuthangtha kan sim tikah leilung sem hlan ihsin amah ruangah rundamnak ngah dingin Pathian remruat mi a si.

“Hril mi” timi tongfang zohsal sehla “ruat cia mi” a thlawsuah ram lut ding”’a fa cawm’ tiih hman theih a si. (Eph. 1:4,5). Sung thu zoh tikah Amah hnen ihsin kumkhua nunnak ngah dingah Pathian ih lungthlitum a langter. Hi hmuahhmuah hi Pathian hi Pthian in kumkhua catuan hrangah a tuah theh (2 Thess. 2:13; 2 Tim.1:9) khalah kan hmu. A zangfahnak fiang zetih a langter mi a si. Hi ruangah kan tuahnak ihsin rundamnak a ra lo timi le kan famkimnak in kan ngah thei lonak a langter. Himi hi Pathian duhdawtnak ziaza ihsin a hung put suak mi rundamnak a hung langsuak. Thil ziangkim semsuah hlan ihsin amai ruangah rundam dingih hril mi kan si tikah himi thuah ziangtin so kan tuahmi a rolh aw thei ding. Himi thu kan pom ding maw, kan hnong ding timi duhhrilnak lawng kan tuah thei.

Hril mipawl nunah ziang tivek ih langter ding so kan si. Duhdawtnak ruangah nun thianghlim soisel ding um loin a hmai ah um ding kan si (Eph. 1:4). Himi in a langter mi cu zianghrang ah so hril mi kan si ti mi a langter.

Jesuh a rat sal tikah kumkhua hmunmi thuthangtha kha khuazakip ah phuang dingih kawhmi kan si.

Midang hnenah simphuannak kan neih hlanah kumkhua a hmunmi thuthangtha hi kan nunih nei le kan theifel ding ziangah so a thupit?

TLAWNGKAI NINGA                                                  April 27

RUAH BET DING: Rundam hnangamnak hi kan neih thei mi a si. Asinan, khami ruangah poisak lonak kan nei ding a si lo. Khavek kha rundam hnangamnak fehsualpitupawl ih umdan a si. Himi thuah Jesuh in nasa zetin ralrin in pekmi thu a sim. “Bawipa, Bawipa titu hmuahhmuah in vanram an lut lo ding. Ka pai duhmi a tuahtu lawng vanram an lut ding. Cuih ni ah mi tampipawl in, ‘Bawipa, nah min in thu kan sim, nah min in khawsia kan dawi, mangbangza thil tampi na hminin kan tuah,’ an ti ding. An hnenah ka sim dingmi cu, ‘ka lo thei dah lo, that lonak a tuahtupawl ka hnenin tlan uh ka ti leh ding” tiah a ti (Matt. 7:21-23).

Minungpawl in thihnak thlenpi theitu sualnak pahnih an tuah. (1) Bawipai hminin thil mak tampi an tuah nan, Bawipai duhmi tuah loin le a thukam a dan vekin an nung lo. Curuangah misualpawl dan nei loih a nungtupawl tiah a ti a si. (2) An tuah thei mi ah an porhaw ih, Bawipa na hminin kan tuahmi a si lo maw? An ti. Pathian hmaiah an dingfel thatnak kha an uaraw ih Jesuh kha an hnong, ziangtik tiang an tuah hrih ding. Kanmah in rundamnak kha Jesui in tuahsak mi zum ih ka ta tiih pomnak lawngin rundamnak kan ngah thei ding. Kanmah ah rundam hnangamnak a um thei loih Khrih ih tuahsaknak lawngin kan ngah. Rundam hnangamnak ngah na duh maw? Jesui dingfel thianghlimnak a lo pekmi rinsan in Pathian thukhaam ih a simmi vekin zawnlungten nungaw, na tulsam mi rundam hnangamnak na ngah ding.

RELTLANG DING:

1.    Martin Luther ih a simmi cu, “Ka vun zohawk ihziangruangih rundam so ka si” ti ka theiaw thei lo. Jesuh ka zohsal tikah mi hlothlau ka sinak ka theiaw. Himi tongfang ihsin a ropi zetmi fimnak ziangso ka sar thei? Himi pomdan hi ziangtin so kan cin ringring thei ding?

2.    Leilung sem hlan ihsin rundam dingih hril zo mi kansi ruangah himi pomdan hi kan kai ringring ding mi a si. Ziangah so mi hmuahhmuah van ih lak dingah a sim lo? Rundam ih lakso lo mipawl kha Pathian ih hril lo mi maw an si? A si lole anmai duhhrilnak an tuah mi so a si? Nan zir canah reltlang uh.

3.    Do-awknak mak ah Pa, Fapa, Thiang Thlarau a umvekin thil tha lo, Setan a taktak in a um ve timi mitthlam in thate ih hmuthiam dingah hipawl in ziangtin so in bawm?