ZSS SINNA 1:KHUAVANNUAI KIDONA

SINNA 1: KHUAVANNUAI KIDONA

---

                                                    March 31- April 6

NIPI NITAK

TUKAL SINNA AH SIMDING: Ezek. 28:1,2, 11-17; Gen.3:17; Rev. 12:1-17; Rom. 8:31-39; Rev. 14:12.

LAI SIANGTHO BULPHUH: Tua ciangin tua numei tungah gulpi-sikhiam thangpai a, Pasian thupiak mangin, Jesu teci panna a len a om lai tua numei tate sim dingin a kuankhia hi. (Rev. 12:17, ZIV).

“Kidona Lianpi” zong akici khuavannuai kidona in Lai Siangtho tawh kisai muhzia ahi hi. Tua in i leitung leh khuavannuai pianzia khempeuh tawphah ahi hi. Mawhna, thuaksiatna, sihna, gamte vangliatna leh puukna, lungdamthu kizelhna, ni nunung thupiangte – a vek khempeuh in khuavannuai kidona hang vive ahi hi.

Tukaal, hih kidona koi pan hong kipan khia a, a kicing piansak ahi Lucifer lungtang sung pan lamdangtak in koi bangin hong kipan aa picing tak a kibawl piansak dang ahi Adam leh Eve te puukna koi ci bangin hong tun cihte i sin ding hi. Lucifer leh i nu le pa masa te puukna thu lian nihte ah hih kidona lianpi zungkha hi a, tua hun pan tu dong kido lai zen hi. Tua vannuai thupiang sungah eite khat ciat zong i kihel hi.

A lungdam huai thu in tua kidona a bei ding bek hilo in Satan tungah Christ gualzawhna tawh tawp ding hi. Tua sangin a lungdam huai zaw thu in singlamteh tungah a kicing hong sepsakna hangin eite zong Christ tawh gualzawhna i ngah khawm ding hi. Pello a hong paikik na ding kamciam i ngak kawm in upmuan leh thumang ding Pasian in eite hong sam hi.

SUNDAY                                                                       April 1
GEN BAANGLO KHAT I PUUKNA

Khuavannuai kidona hong pianzia tawh kisai dotna tampi om hi. A thupi khat in, hih kidona koi bangin hong kipan khia hiam? Itna tawh kidim Pasian in khuavannuai bawl ahih manin siatna, ngongtatna, leh buaina te tawh a patcil in bawlkhawm hetlo ding cih uphuai hi. Tua kidona in piansakna tawh kizomlo hong piangtawm ahih kul hi. Bangbang hi ta se leh, kidona om takpi a eite zong i kihelkha ciat hi.

Ezekiel 28:1, 2, 11-17 leh Isaiah 14:12-14 sim in. Hih mun te in Lucifer puukna leh siatna hong kipatna thu bang hong hilh hiam?

Lucifer pen vantung ah om a paubaanglo khat hi. Tua bang kiim le paam pan in koici bangin ama sungah gitlohna hong khanglian thei hiam? Eite in i thei kei hi. Lai Siangtho in “a kiphawklo a telhak gitlohna” (2 Thess. 2:7) a cihna zong hih thu hang hikha ding hi.

Pasian in a ciim a bawlsa te deihteel theihna a piakna thu lo buang, Lucifer puukna ahang dang omlo hi. Ellen G. White in siangtak hong genna ah, “mawhna hong kipatkhiatna a hang lahtel theih ding hilo hi. Mawhna pen a pianna a-hang a kigensiang theilo deihlopi hong lut omphal ding deih huailo na ahi hi. A telhak thusim hi a gencian ding haksa hi. A pianna hang siangtak in kimu thei leh, mawhna ahihna bei ding hi.” – The Great Controversy, pp. 492, 493.

Mawhna cih kammal siatna cih kammal tawh zong kibulh tuah thei hi. Siatna hong kipatna zong telgen theih ding haksa mahmah hi. Siatna zong deihlo pi hong phuluttu hi a, a pianna bulpi kipatna hang gensiang theihloh na khat hi. Lamdang in thuk a, gencian hak hi. A pianna hang siangtak kimu thei leh, siatna ahih na bei ding hi.

Deihteel theihna ah na gamtatna ki ngaihsun in. Deihtel theihna zangin i khensat thute banghangin thungetna leh kidawmtak in bawl huai hiam?

MONDAY                                                                      April 2
THEIHNA BEK HILO

Siatna hong bangci kipat cih i telloh hangin, Lucifer lungtang sungpan hong ki pan cih Lai Siangtho in hong lak hi. Ellen G. White laigelhte (adiak in, Kidona Lianpi bu sung a “Siatna hong Kipatna”) pan in a lunglut huai tampi mu thei cih simloh tua siatna vantung ah hong koici kipat cih Lai Siangtho in tampi hong genbeh khollo hi. Leitung ah koi bangin hong kipan khia cih bel Lai Siangtho in ciantak in hong lak hi.

Piancilna 3:1-7 sim in. Hih lai a piang thu ah Adam leh Eve te khialhna bang kimu thei hiam?

Eve in, “Pasian in, ‘Huan laizanga sing panin a gah nane kei ding uh a, zong na lawng peuhmah kei ding uh hi, na hih uh leh na si ding uh hi,’ hong ci mah hi” ci hi (Gen. 3:3, ZIV). Lai Siangtho sungah singkung lawnloh ding genna omlo hi. Singgah nekna in sihna tun ding cih thutak Eve in tel mahmah hi.

Satan in a kilanghtang in tua kammal te lehdo aa, “na si peuhmah kei ding uh hi” ci hi (Pian. 3;4, ZIV). Tua bang lehdona te bangzah tak hai vai hiam? Satan zolkhemna te a tunglim in a kilanglo hi mah leh, Eve in lunglut iin a nial loh lam a muh ciangin, a langhtang in Pasian kammal to iin langbawl hi. A dahhuai thu ah Eve in theilo hi peuhmah lo hi. “Thei keng, thei kha keng ei,” cih theihna ding omlo hi.

Thei gegu na pi, khialna bawl veve hi. A kicing Eden huan sung nangawn ah, theihna bek in mawhna ding pan in Eve kemcing zolo hi (thutak a thei adam zong khialbeh lai). Theihna bek in hong honkhiatna ding kicingzo cih i kingaihsut khak loh ding thupi hi. Pasian kammal in bang hong gen cih i theih ding thupi tham mah hi. Tua i theih ban ah, tua thu i zuih theihna ding in kipum-apna kisam den hi.

Pasian in thu khat gen leh, Satan in a dang khat gen pah lian hi. Adam leh Eve te in theihna nei hi mah ta leh Satan thu ngaih ding teelzaw uh hi. Kum tampi khit ah zong a kilamdang lua tam khollo ahihna ngaihsun in. Tua bang khialhna i bawlkhak lohna ding ki bangci kep ding i hiam?

TUESDAY                                                                     April 3
VANTUNG LEH LEITUNG A GALKIDONA

Nu le pa masa te khialhna in mawhna, gitlohna, leh sihna sungah leitung tumcip sak hi. Banghang hih thute piang, kua khialhna cihte mikim in i sandan a kibat loh hangin, tua in hong tun siatna, ngongtatna, gitlohna, leh buainate nial theih hilo hi.

Khuavannuai kidona thu a gen i hi hi. Tua khua vannuai kidona bangbang in hong ki pan hitase leh, hih leitung ah zong kithuak cih thu hi. Lai Siangtho khangthu khempeuh – Eden ah puukna pan Jesu kumkikna dong – in hih kidona lianpi lahtelna vive ahi hi. Tua kidona kawmkal ah a nungta ihi hi. Pasian kammal in bang thu piang, bang hang piang, leh a thupi pen ah, koici bangin tawp ding cih te hong hilh hi.

Kilaakna (Revelation 12:1-17) sim in. Vantung leh Leitung ah buaina thu hih galkidona in hong bang ci lahtel hiam?

Gal kidona vantung leh leitung ah om ahih na i mu thei hi. Kidona masa in gulpi (Satan, Rev. 12:7-9) leh Michael (Hebru kam a khiatna: “Pasian a bang Mi”) kidona hi. A lehdo Lucifer pen Satan (Langpangtu) hi aa, piansak lel khat in a tawntung Piangsakpa, Jesu (Heb. 1:1,2; John 1:1-4) do hi. Lucifer in a mah a Bawlpa langpan hi. Kidona lianpi in pasian nih kido hilo aa, piansak khat in a Piangsakpa langdo hi a, piansakte dona tawh tua langpanna liansak hi.

Vantung ah Christ langpan galdona a lelh ciangin, mihing a hong pian khit phet in zong thah ding sawm lai hi (Mang. 12:4). Tua lai ah a zawhloh khit, gamlak ah ze-etna leh singlamteh ah a lelh khit ciangin – Calvary ah a kidokkik theilo guallelhna khit ah – Satan in Christ mite do ding kuankhia hi. Christian khangthu bupphial ah tua gal kimu thei aa (Rev. 12:6, 14-16) guallelhna lianpi khat a muh kik hun Jesu hong kumkik hun ahi hun bei dong tua gal kizom lai ding hi (Rev. 12:17).\

(Kilaakna) Mangmuhna 12:10-12 sim in. Kidona leh buaina kawmkal ah bang lametna eite aa ding kimu thei hiam?

WEDNESDAY                                                               April 4
A TAWP DONGIN NOTE TAWH OMKHAWM DING

Mangmuhna thubu in Pasian mite thuak ding bawlsiatna te genkhol hi. Mangmuhna 12:6 a ni 1260 genkholna (Rev. 12;14) in kum 1260 sung pawlpi thuak ding bawlsiatna kawk hi.

“Tua bawlsiatnate, Nero kumpi uk nuai Paul kithah pan kipan khauhzaw hiam nemzaw hiam in kum zalom tampi kizom toto hi. Christian te a lauhuaipen khialhna leh gitlohna te kimawhngawh aa siatna tampi ahi kial, puulnatna, leh zinling te amau hang hi ci in tangkona thuak uh hi. Muanmawhna leh muhdahna a thuakte hong suak uh ahih manin, ngahna ding lametna tawh thupuakte in midik te lehheek ding haksa sa hetlo uh hi. Kumpi langpangte ci in minvawh ngah uh a, biakna gal leh khuasung buaisak te bangin mawhmatna thuak uh hi. Mipi kikhopna mun te ah a hingtang a kihalna leh gamsa te an ding piakna mi tampi in thuak uh hi.” – The Great Controversy, laimai 40.

Tua hun mah in, numei (pawlpi) gamlak ah tai hi (Rev. 12:6). Muvanlai bangin kha nih a neihna mun nih ah kimu hi. Tua in huhna ngah theihna ding mun ah galtai (leeng) cihna ahi hi. Gamlak ah kepbitna ngah a, gulpi ahi Satan in va ban zolo hi (Rev. 12:14). Nakpi bawlsiatna kawmkal nangawn ah, Pasian in a cianlai na kemcing a, hun bei kuan ciangin zong tua bangin kemcing kik lai ding hi.

Ni nunung laihuaina tawh kisai Christ in a mite a genna ah, “khanghun a bei tektek dong a tawntungin note kong ompih taktak ding hi” (Matt. 28:20, ZIV). A nungzui te a ki bawlsiatna lianpi sung nangawn ah hih a lungdamhuai kamciam  i bangci tel hiam?(Rom. 8:3139; Matt. 10:28).

Bawlsiatna, kial, sihna – bangmah in Pasian hong itna panin eite hong khen zolo ding hi. Christ hong ompihna, tu in ahi a hun bei kuan ciang ahi zong, in natna, thuaksiatna, sittelna, leh sihna dong thuaklo ding cihna hilo hi. Tua bang te tawh kipelh ding cih hong ki kamciam ngeilo hi. Tua in, haksatna te sungah Pasian in hong ompih ding cih lametna leh Jesu leh ama  hong sepsaksa nate hangin vantung thak leh leitung thak ah nuntak tawntungna nei ding cih kamciam tawh nungta thei ding cihna hi zaw hi. Hih leitungah bangbang i tuak zongin, Paul bangin, lametna tawh “thumaan a thukhenpa Topa in tua ni cianga kei hong piak ding thumaanna lukhu kei a ding a om zo hi. Kei bek hong kipia loin ama kilat ding lawpa a ngakte khempeuh zong a pia ding hi” (2 Tim. 4:8, ZIV)cih teltak i thei ding hi. “Ama hong kilat ding a ngak” eite in zong hih lametna leh kamciam i la thei taktak hi.

THURSDAY                                                                  April 5
THUKHAM LEH LUNGDAMNA THU

Seventh-day Adventist ihih zui in, i min mahmah ah thu tampi i pua hi. Seventh-day cih in ni sagih Sabbath limla a, tua i upna kawk in thukham lina bek hilo a sawm in um cih lahna hi. Adventist cih kammal in Jesu kumkik ding lamet upna kawk a, Jesu hong pai masak lai a Ama thoihdam sihna hangin i ngah thutak ahi hi. Tua hi a, eimau min Seventh-day Adventist in a poimawh leh kikhen theilo tulai thutak ahi thukham leh lungdamna thu lak hi.

Hih a nuai a Lai Siangtho munte in thukham leh lungdamna thu a kizop zia hong koici lak hiam?

Jer. 44:23_____________________________________

Rom. 3:20-26 _________________________________

Rom. 7:7 ______________________________________

Lungdamna thu in thuhoih hi. Tua thu hoih in Pasian thukham i palsat man in mawhna i bawl hangin, Christ in singlamteh tungah hong sepsakna i upmuanna tungtawn in mawhmaina i ngah theihna thu ahi hi. Tua ban ah, tua thukham bittak leh picing tak in zuihzawhna ding vangliatna zong hong kipia lai hi.

Revevlation 14:12 sim in. Hih mun ah thukham leh lungdamna thu a kizop zia hong bangci lak hiam?

Pasian thukham zuih ding a um ahi Seventh-day Adventist i hihna tawh thukham zuihna in Pasian itna tung tawn a hong khangkhia tawm utna hi aa thukham zeksakna hilo hi cih koi bangin midangte lak thei ding na hiam? Deuteronomy 11:1 leh 1 John 5:3 te in hih thu bangci panpih hiam?

FRIDAY                                                                        April 6

NGAIHSUT BEH DING: Rev. 12:9-12 leh Ellen G. White laigelh Tuan Pupate leh Kamsangte sung a “Banghang in Mawhna Om Kiphal Hiam?” cih thu sim in.

“Piansak khempeuh in itna i muanhuai cihtakna a tel lai siah kilemna leh kithuhualna om hi. Vansawltakte nopsak pen in Piangsakpa ngimna bang tangtun dinga sepna ahi hi. Pasian vang kilengsak leh Amah phatna lasakte nuam sa uh hi. Pasian itna a thupi pen in a koihna mun ah, khat le khat ki-itna in muanhuai iin angsungkhualna omlo hi. Vantung kilemna a siasak ding kithuhuallohna neukha zong kimu lo hi. Ahi hangin, hih nopsakna dinmun ah kilamdanna hong om hi. Pasian piak suahtakna zangkhial in thutangpeek khat hong om se hi. Christ khit a lianpen a Pasian lapsangpa in mawhna hong phuangkhia hi.” – Ellen G. White, Patriarchs and Prophets, p. 35 (Tuan Pupate leh Kamsangte, laimai 16)

Ellen White kammal en in, “itna i muanhuai cihtakna.” Kammal dik leh deihna thuk nei hi a, itna in muanhuai cihtakna hong tun cih kawk hi. Nupa kikal ah itna in khat le khat tungah muanhuai cihtakna neisak hi. Vantung a piansak te leh eite in Pasian tawh i kizopna ah tua bang itna neih ding ahi hi.

KIKUP DING DOTNATE:

1.    Bang Lai Siangtho munte in Satan a taktak aomna thu leh kidona lianpi sungah a panlaak bang cih hong lak hiam? Satan a om taktak hi a siatna genna limcing hilo ahihna midangte teltheih ding koi bangin gen ding na hiam?

2.    Seventh-day Adventist te Lai Siangtho thutaktampi theihna ah thupha ngahte hi hang. Ahihangin, hih theihna bek bang hangin hong honkhia zolo hiam?Khuak tawh theihna bek lo bang dang i kisam lai hiam?

3.    Tu laitak in na nuntakna ah Jesu a omna koibangin thei na hiam? Tua na kitheihna in mailam na tuah ding haksatna te phutna ding hong koici huh hiam?

4.    “Itna i muanhuai cihtakna” cihthu kikum behun. Hih thu in thukham leh hehpihna, upna leh thumanna kizopzia hong koici telsak hiam? Hih thu in itna sungah kihualkhawm suahtakna thu bang hong hilh hiam?