ZSS SINNA 13: CHRISTIAN NUNTAKNA

SINNA 13: CHRISTIAN NUNTAKNA December 23 - 29  

NIPINI (SABBATH) NITAAK LAM December 23 

SIM DING TE: Rom. 14 - 16 
KAMNGAH: “Tua ahih leh bang hangin na Khristianpihte uh tungah thu khen a, bang hangin simmawhbawl thei na hi uh hiam? Thukhenna a thuak dingin Pasian’ mai-ah eite khempeuh a ding ciat ding ihi hi.” (Rom. 14: 10). 

Tukaal sungah Rom Laikhak tawh kisai i sinna te a zo ding i hi ta hi. Hih Laikhak pen “Pawlpi kipuah phatna” (Prostestant Reformation) a hong piankhiat theihna, Laibu dang a tuamtuamte sangin Protestant i suahna leh, mai lam ah zong i hih zel lai na ding a hang hong lakkhia bu a hi hi. Protestant sung pan in zong , Seventh Day Adventist te i hih manin eite in, Latin pau tawh “sola scriptura” a ki ci “Pasian Kammal Laisiangtho bek” cih mah Upna ding tehna leh i ki ngakna phungpi ahi hi. I pu pi te’ khang hun kum tampi lai pek pan a kipan in, Rome gama om Biakna pan a kisuan khia sak, “Upna bek tawh Gupkhiatna ngah theihna” thumaan, Rom mite tungah Paul in a hilhcianna tawh kisai Laisiangtho sung pan in i theisiam ta hi. 

Hih sunga a om thu khempeuh a tomkaih theih pen na dingin, milim bia thonginn a cingpa dotna in kician takin hong telsiam sak hi. “ Tote aw, hotkhiatna ka ngahna dingin bangci gamtat ding ka hi hiam? (Sawl. 16:31). Hih dotna i dawn theihna dingin Rom laikhak sungah ki mu thei hi. A hi zongin, Hih dona tawh kisai dawnna pen, Martin Luther te hun lai in Biakna sungah kipia nai lo hi. Tua a hih man in kipuahphatna (Reformation) hong piangkhia a, eite in hih dinmun a tung thei ihi hi. 

Hih a tawpna lam i thusim na sungah Paul in thulu dang pian khat hong khel khia a, tua in “Upna hang tawh diktan theihna” a hi i mungtup pi pen a hih nawnloh hangin, a thupi veve laikhak te hong gelhsuk hi. Tua te in eite a dingin Laisiangtho sunga a kihel mah ahi hi. 

Paul in hih Laikhak pen, bang ci bangin tawp khakna bawl hiam? Bang thu tawh kisai gelh hiam? Paul bek ahi lo, Protestant pawlpi a phuante nung a zui, eite a ding bang thuman thutak kimu thei hiam? 

NIMASANI (SUNDAY) December 24 UPNA NEU 

Rom. 14: 1- 3 sunga buaina in, milim mai a biakpiakna dingin a kizang khin sa tawh kisai in a siang leh sianglo cih kinialna ahi hi. Jerusalem Council (Acts 15) sungah zong Gentile thu-um mite in tua an leh sa tawh kisai neek loh dingin kikupna nei khin uh hi. Tua bang hi khin mah ta leh, sumbuuk sai a kizuak sa te i lei ding tak ciangin milim biakpiakna dingin a kizang sa te hi maw, hi lo cih dot masak phot a kul ding mah a hi hiam cih kinialna hong om leuleu hi (1 Cor. 10: 25). Chrisitian sung pan in honkhat te in, dongdong se lo in lei suk neksuk ziau ding cih thukim uh a, a dangte leuleu in, milim a dingin biakpiak khitsa a hih khak mawk leh, ci in kisuang takin neek sangin mehteh mehgah mah neek zawk ding hi, ci uh hi. Hih thu tawh kisai neek dingin mehteh mehgah neekna (vegeterianism) leh cidamna (healthful living)tawh kisai buaina hi lo hi. Paul mahmah in zong sa niin leh sa siang neekna tawh kisai beisak nuam hi a cihna zong ahi tuan kei hi. Tua vai mahmah zong a lungsim sungah ngaihsut dingin a seh zong ahi kei hi. 

“A vekpi in neek theih hi” (Rom. 14: 3) cih kammal in, tu a kipan in ganhing khempeuh siangta a hih man in, neek gaih theih hi cihna hi lo a, tua bang ngaihsutna i neih khak leh, Thuciam Thak bu sung pan in a kigen na mundang te tawh ki kingkalh mang ding hi. 

Tua mah bangin upna neu te in “sangsiam” un a cihna ah zong, a pawlpi mi hihna uh hoih takin sang siam un cihna leh hoihtak in ki lawmtatna na nei un cihna ahi hi. Tua bang mite pen nial se lo in, ama’ ngaisutna te ah san pih siam ding cih na ahi hi. 

Tua bang ahih leh, Rom. 14: 1 - 3, sung pan in bang thugui pi te suut khia ding ihi hiam? 
_______________________________________________________________________________________________________________________ 

Rom. 14: 3 sung tungtawn pan in a thupi mahmah i telkhiat ding thu khatin, Paul in “Upna sungah a thaneem” (Rom. 14:1)te a mawhsak na leh a sialam in bang mah gen lo a hih zia kimu thei hi. Bang ci bangin a thakhauh suak thei ding cih zong genna a nei tuan kei hi. Pasian in mi mawhsak te zong sangsiam lel hi. (mawhna kigem khinkhian na zong Pasian vai lo a mihing leh mihing te hi lel hi). 

Tu in i sinkhit thu te tawh kisai Rom. 14: 4 in bang ci bangin kicing takin hong genbeh hiam? 
____________________________________________________________________________________________________________________ 

Tuni in i sin lesson thu tawh kisai in lungsim sungah ciamteh kawm in, khat veivei ciangin mikhat in a lungsim ngaihsutna, a sepna tungtawn in i va sai / kiholh (judge) hun ding leh, i va sai na mun ding zong hong om thei hi lo hiam? Tua bang hunte ah bang dinmun a tung zongin dai takin va sai supsup se lo in i om ding mah ahi zaw diam? Isaiah 56: 10 sungah “Galvil te” pen a ham theilo “ui” bangin genteh zel hi. Ei te in bang ci bang hun ciangin paukhia ding hang a, bang ci bang hun ciangin dai didee ding cih bang ci theih ding ihi hiam? Bang ci bangin a ki leekkim dingin om tei ding ihi hiam? 

NINIHNI (MONDAY) December 25 THUKHENNA TOKHOM MAI AH 

Rom. 14: 10 sim in. Midang te tungah gensiatna tawh kisai Paul in bang ci bangin a kidawm dingin hong gen hiam? 
________________________________________________________________________________________________________________ 

Ei mahmah in i gamtat ngeisa khat hi na pi in, midang te in a gamtat uh ciangin i va gensia gawp kha thei zel hi. Eite in i sep lai takin, midang te sepna sangin a mawh dingin kituat kha lo ihi hi. Eite in a tua ci bangin i simtatna, (a hi pipi a hi lo banga om na) hangin ei leh ei mah a kikhem ihi hi. Ahi zongin Pasian pen i khem thei kei ding hi. Topa mahmah in, “Pasian in note hong mawhsak lohna dingin midangte va mawhsaksak nawn kei un, Bang hang hiam cih leh midangte’ thu na khenzia uh tawh kizui- in note tungah hong khen ding a, midangte tungah na zat uh ngeina mah note tungah hong zang ding hi. Bang hangin na lawmte’ mit sunga ninthem tang muhsak thei napi-in nangma mit sunga singluang tang phawk theilo na hi hiam? Nangma mit sungah singluang a tang kimlai, bangci-in na lawmte kiangah, ‘Na mit sunga ninthem tang hong lakkhiatsak ning,’ ci thei ding na hi hiam? (Mat. 7: 1 - 4) ci in hong thuhilh hi. 

Rom. 14: 11 sunga Paul in Thuciam Lui bu sung agenna tawh kisai a thupitna bang ahi hiam? 
____________________________________________________________________________________ 

Hih Laisiangtho mun pen, Isai. 45: 23 sung thu hi a, Mi khempeuh in thukhenna a kithuak ding hi cih thu tawh kisai a panpih Laisiangtho mun khat ahi hi. “khuk khempeuh” cih leh “lei khempeuh” a cih ciangin mikim in eima thu tek a gen ding a cihnopna ahi hi. “Tua ahih manin a kuamah peuh in i gamtatna ciat Pasian’ mai-ah a va kigentel ciat ding ihi hi.” (Rom. 14: 12). A kuama peuh in midang’ aitang in kidawn sak thei lo ding hi. Hih tungtang pan in a thupi mahmah i theih dingin, eite sanggam te a keem te kihi lo ding hi. 

Hih thu tawh kisai lungsim sungah ciamteh kawm in, Rom. 14: 14 sungah Paul in a gen thu te bang ci bangin tel thei na hi hiam? 
____________________________________________________________________________________ 

Hih sungah zong milim mai a biakpiakna dingin a kipia sa neek a sian leh sianloh kikaal buaina tawh kisai a genna ahi hi. I gensa mah bangin hih muna a buaina uh pen, sa siang leh sianglo kikaal ki lamdan na ahi kei hi. Paul genna ah bel, milim biakpiakna mai a kipia khin sa pen, neekna hangin a poi na, khialhna a om loh zia hong gen hi. Tua bang a hih leh, Milim i cih in bang hi limlim a hia? Tua in bangmah hi lo hi ( 1 Cor. 8: 4). Tua ahih man in, milim bia te in amaute pasian ahi, uiphuk lim ahi zongin bawnglim ahi zongin bia uh ahih manun, tua te mai a kikoih an leh sa te tungtawn in, a bang a lau huaina om ding ahi hiam? 

Mi te tungah (a diakdiak in a lungneu thei te tungah), amau te’ sia leh pha theihtheihna a kantan in a khengval lua in i buaisak/totgawp loh ding thupi hi. Tua theihtheihna in thuaklah na piangsak thei ahih manin, amau ut thu a koih a kul hun zong om ding hi. Tua thu pen Upna lama a “thahat”te in theisiam tuak lo mawk uh hi. Amau te in tua upna thu ah “a tha neem” mite khensat zawhloh thu te pen huat huai sa in lungduai zo lo uh hi. Tua bangin ki etkhialhna hangin, tua a thaneem te a dingin puk theihna suang tumpi suak thei uh hi. 

Pasian a dingin na hanciam nop luat manin, Paul in vauna a hong piakna sungah a lauhuai dinmun ah na om phial tam maw? Eite ngiimna in bang zah tak in a hoih hangin, midang te lungsim kisuan takna a om loh na dingin bang ci bangin kidawm takin mapang thei ding ihi hiam? 

NITHUMNI (TUESDAY) December 26 PHAMAWH KEI! 

Rom. 14: 15 - 23 sim in (1 Kor. 8: 12, 13 zong sim in). Paul in a gente tawh kisai tomkaih in. Eite in i nuntakna sungah a huamkim in bang ci bangin zang khia thei ding ihi hiam? 
__________________________________________________________________________________________________________________________ 

Rom. 14: 17 - 20 sungah Paul in, Christian nuntakna sungah gamtat zia dingte muhna a tuamtuam tawh hong 175 176 pulaak khia hi. Neek leh dawn pen a thupi mahmah khat a hih hangin, mi khatkhat te in milim mai a kikoih khin sa cih a up man un, mehteh meh gah bek a neekna uh tawh kizui in, tua banga amau deihteelna tungtawn in a gamtat na uh ah, Christian te in va sai vanvan na tawh va kitawt kul liang lo hi. Tua te sangin dikna, kilemna, Kha sungah lawpna te i bulphuh zawk ding ahi hi. Hih ngaihsutna tungtawn pan in, tulai i Pawlpi sungah sa neek leh neek loh tawh kisai a kibuai thei dotna te tungtang ah zat theih pah dingin a om diam? Cidam na tawh kisai thu tangko na i neihna ah, neek leh dawn tawh kisai i kihilhna te in eite a dingin thupha ngahna hi thei kha ding hi. A hi zongin midang khatkhat te a dingin tua bang na hi lo zel hi. Tua ahih manin tua banga i ki lamdan na te ah, khat leh khat i ki zahtak sak tek ding kisam hi. (ki-kosak se lo ding, a diakdiak in saneek leh neek loh pen Upna kitehna dingin zat ding hi lo hi-by translator). 

Rom. 14: 22 sim in. Amau te in amau te lungsim theihtheihna tawh kizui in agamtat na ding tek uh a genkhit ciangin, phawk ding a hong genbeh thu in “Amau lungsim sungah man a sak bangun a gamta zote pen a lung uh nuam mahmah/thupha a ngah hi”. Hih lai mun ah Paul in bang vauna hong pia hiam? Hih bangin kidawp siamna a genna tungtawn pan in, a dang a genbeh lai thute tawh kisai in bang ci bangin khaikim thei ding ihi hiam? 
____________________________________________________________________________________ 

Mikhat khatte in, “bang ka ne zongin, bang ka silh zongin, gualnopna ah ka ut bangbangin ka om zongin, “kuamah tawh kisai keng ei”, “ ka thu thu hi lel ei”, “nong sai uh zong kul keng ei” cih bangin a kigen na za ngei uh hiam? Tua bang ahi takpi mah hiam? Eite a kua mah peuh ei kia bekin a ki nungta ki om lo a, eite’ gamtatna, eite’ kampau na, eite’ nasepna , eite’ neek leh dawn na ngawn in midangte tungah a hoih lam in a hi zongin a sia lam in ngong nei in kihuzap kha veve hi. Tua bangin i kimuh theihna ding haksa lo hi. Nangmah hong pakta sim giugiau khatin, siatna na bawl khak’ khat a hong muhkhak leh, amah in nang hong etteh dinga, nangma gamtat bangin na huzapna tungtawn hangin hong gamta ziau ding hi. Tua bang na ngaihsut khak kei leh, nang leh nang a kikhem na hi lel ding hi. Tua bangin a hih dingin keimah in tua pa/ tua nu tungah thagum tawh sawl tentan sam keng e ci kha mai ding hi teh! Christian i hihna tawh kizui in, eite in midangte tungah mi khat teitei tungah mawhpuak kinei tek a, a hong ki-ettehna tungtawn pan in i huzap na tawh, mi khat teitei tungah lampial sak kha i hih leh, tua mawhna hangin eite tungah mawhsak theihna om hi. 

Midangte in a hong etteh theihna dingin bang ci bangin na om hiam? Mun khempeuh ah nang gamtat zia tawh kizui in khangno te ahih kei leh, thu-um thak te in hong ciing bang ding hi leh, na om a nuam thei lel ding hiam? Tua na dawnna in bang dan mi na hi hiam cih hong lak ding hiam? 

NITHUMNI (WEDNESDAY) December 27 NI KHAT PEUHPEUH TANNA 

Eite ngaihsut danin ahi lo a tuamdang khat tawh a ngaihsun te tungah mawhsak/gensiat loh ding a hihna thu, leh tua i gamtat na hangin midangte in a puuk khak lohna dingin kidawpna ding thu a genkhit ciangin Paul in ni tawh kisai in, mikim khat te in a pahtawi nop uh leh kimkhat te in a pahtawi nop loh uh ni tawh kisai hong gen kik hi. 

Rom. 14: 4 - 10 sim in. Hih lai mun ah Paul in bang thute a gen nuam hiam? Thukham Sawm sungah a li na tawh kisai agen nuam ahi ding hiam? A hih kei ding leh bang bang hangin hi lo hiam? 
_________________________________________________________________________________________________________________ 

Paul in bang ni tawh kisai a gen hi ding hiam? Pawlpi masa te hun laitak in, nikhat teitei tan ding tawh kisai in kinialna a om ngei hiam? Om ngeilo kha ding hi. Gal. 4: 9i - 10 na sungah hih buaina tawh kisai a kigenna na om a, Galati gama om thu-um mite in “ni te” “kha te” “hun te” leh “kum te” tawh kisai a buaina hangun Paul in na taai ngei hi. Sinna 2na sungah i sin khitsa mah bangin pawlpi mi honkhat te in Galate gama Christian te tungah vun-atna ahi zongin Moses thukham te honkhat mah a zui dingin hong pattah na uh tangsawl uh hi. Tua bang ngaihsutna te Rom gama om pawlpi sungah a hong lut khak ding Paul in lauthawng mahmah hi. Ahi zongin Rom gama om Jew Christian te in Jew te biakna thukhun te zuih a kul nawn ding hi kei ci-in a sang thei te na hi bilbel uh hi. Hih thu tawh kisai Paul in a genna ah, “note lunggulhna bangin sem ta un, a hi zongin note ngaihsutna tawh a ki banglo te tungah thukhen se kei un, ci hi. Tua bangin Christian honkhat in ki theisiam na tawh, Jew minamte pawi ni te tawh kisai in khat leh nih beek a zui dingin a khensat om hih tuak hi. Paul cianpiak na in bel: Amau te in bawl dingin hoih a sak uh leh bawl mai ta hen, ci hi. 

Rom. 14: 5 sunga ni tawh kisai in kaal Sabbath a hi dingin guang nuam uh a, tua pen paulap dingin mat tak cing lo hi. Paul in Thukham Sawm sunga a lina Sabbath pen bangmah lo bangin a ngaihsun dingin tuat ngam ding i hi hiam? Tu Quarter sunga i muh theih mah bangin Paul in, thukham tawh kisai zuih dingin nasia takin bulphuh hi. Tua hi a, Sabbath thukham tawh kisai pen, tua milim biakna mai a kipia sa a ne nuamlo te thu kigen na ah guang lo ding hi cih kician hi. Tua mah bangin hih mun pen, ni sagihni Sabbath zuih kul nawnlo hi cih lahkhiatna dingin gentehna in mi tampi te in a bulphuh mun khat ahi hi. A hi zongin hih mun in tua bangin genlo hi. Paul laikhak te tawh kisai in buaina a piangsak thei zel mite tungah Peter in vauna a piakna ah, “Lai a hong gelhna sungah a thugente tu-ate mah a gennuam ahi hi. A laigelhna sungah a telhak thu tampi om a, theihna kicing loin lungsim kiplo mi pawlkhatte in Lai Siangtho sung thu a ututun a kawihei uh bangin Paul’ thugente zong a manlopi-in khia uh ahih manin siatna a tuaklawh uh hi”(2 Pet. 3: 16) na ci hi. 

Sabbath tanna tawh kisai bang ci bang in na zang ngei hiam? A deihna bangin na zatna hangin thupha na ngahlawh hiam? Pasian in a picing in thupha a hong piak theihna dingin bang ci bangin na Sabbath zat zia khel thei ding na hi hiam? 

NINGANI (THURSDAY) December 28 KAMMAL NUNUNG 

Rom. 5: 1 - 3 sim in. Hih laigual sung panin Christian te a ding a thupi mahmah thuman thutak in bang hiam? 
____________________________________________________________________________________ 

Zeisu nungzui hihna a khiatna a bang ci bang lampi tawh hiam ci in, hong telgen hiam? 
____________________________________________________________________________________ 

Hih dan tawh a kibang a kigenna Laisiangtho mundang bang mun te in gen hiam? A thupi pen in bang hiam? Bang ci bangin nangmah ngiat in nuntak pih thei ding na hi hiam? 
____________________________________________________________________________________ 

Paul in a laikhak a tawpkhak na dingin, mangpha khakna dingin a zat thupha te hong bang ci sam khiat hiam? Rom. 15: 5, 13, 33. 
_____________________________________________________________________________________ 

A lungduai Pasian i cih ciangin a tate tungah a kip bikbek a thuakzo te cihna ahi hi. Lungduaina i cih ciangin Greek lai in “hupomone” hi a, a khiatna in “thuak keikai zawhna”, “kipkho bikbek in thuak”cihna te hi. “thahatna” a cih ciangin “hansuahna, hanthotna: a cihna hi pah hi. A thahat Pasian in a hansuah Pasian hi pah hi. Lam-etna Pasian in mihing te tungah lam-etna aguan Pasian cih na ahi hi. Tua mah bangin daihna Pasian in khamuanna a pia thei Pasian a hihna leh, Ama sungah khamuanna i neih theihna Pasian ahi hi. 

Mimal a kuakua tungah muakna kammal tawh a hopih khit ciangin Paul in a laikhak bang ci bangin a tawp khak hiam? Rom. 16: 25 - 27). 
_______________________________________________________________________________________________________________________ 

Paul in ama laikhak a tawpkhak na dingin Thu khempeuhah pilna a nei, amah bek ahi Pasian in Jesuh Khrih hangin a tawntungin phatna ngah ta hen! ci in Pasian a pahtawi hi. Rome gam sunga om Christian te hi ta leh, a mun tuamtuam a om Christian te hi ta leh, Pasian’ ta te leh tanu te adingin a tatkhiat te sa te hi uh a, upna tawh diktansakna angah khinte a hih ban ah Khasiangtho in a makaih ding te kiptakin a dingtang ding te ahi uh hi. 

Tua hun lai takin buaina khat hangin Pasian in hih Rom laikhak agelh dingin akisap hun lian leh a kisap dinmun ah humopna tawh a sawl hi kha ding hi cih i um hi. 

Paul in bel “langpanna”(2 The. 2: 3) a hong tun ding cih thu bel na thei hi. Ahi zongin bang zah takin a kician in thei hiam cih bel Laisiangtho in hong gen lo hi. A tom in gen leng Paul in a ma laigelh te, a diakdiak in a laikhak te sungah, nitawp ni a ding tawh kisai bang zah tak in thupi sak hiam cih ahi zongin, amah in zong theihna ciang khat a nei ding hiam nei lo ding hiam cih i thei zo kei hi. I thei phial zongin, i phattuam lawhna ding zong om lo hi mai ding hi. A thupi pen zaw in hih Rom laikhak tungtawn pan in Protestant Biakna a hong piang khia thei ahi hi. Hih thu sungah citakna tawh Zeisu tungah a citak te a dingin, Leitungin tua a damkik Sapi lamdang sa in a zuih ngeingai hun na ngawn ah (Mang. 13: 3) a mau te Laisiangtho sungah Upna kician takin bulkip khin a hih manin kiptak in a ding paisuak ding uh hi. 

KIGINNI (FRIDAY) December 29 

SINBEH DING: Pasian tate in, Ko nupa (Mr. & Mrs. White) te tungah a vangik te uh hong manawh uh a, ko mau cianpiakna te angai dingin ahong pai na uh in, a lauhuai zia hong kimu sak hi. Tua dan kalsuan zia maan a hi kei hi. Amau te a hehpih thei, itna tawh a kidim Gumpa in, amau te lungkham na leh a vangik uh tawh Ama kiangah a manawh dingin lunggulh hi. Mi tampi tak te in ko kiangah hong pai zaw uh hi. Amau buai na tuamtuam te hong dong uh a,..ka tua cih ding hia? hih nasepna ah ka kipan ding hiam? a hih kei leh puan silh niik teen tawh kisai in, hih puan ka silh ding hia? hih van ka bulh ding hia? cih bang in hong dong thei zel uh hi. Keimah in ka dawn na ah, Note in Zeisu nungzui dingin a kiciam khin te hi lo na hi uh maw? Laisiangtho te sim un la, hih leitungah mihing te kiang ah Gumpa a hong om lai dan in anuntak zia citak tak in thungetna tawh sim un la tua a nuntak zia etteh dih un. Tua bang hi leh kawng kawcik pan in lam na pial kei ding uh hi. Na lungsim ngaihsutna bangbang uh a khensat ding in utnawn keng. kei bek in na kisap na khempeuh uh hong gen khin hi leng, Zeisu kiangah no leh no na pai uh sangin, kei kiang bek nong pai kha ding uh hi, ka ci hi. : Ellen G. White: Testomonies for the Church, pp. 118, 119. 

Pawlpi sungah amau thu bek tawh akalsuan nuam amau leh amau bek a ki thupi sim mi om thei hi. Tua a suahtak luat nopna lungsim te un amau leh amau ki muanluat theihna hangin midang a u anau te tungah telsiam theihna nei nawn lo uh hi. A u a nau te cianpiak na leh kuppihna te sangin amau leh amau kimuan na bek kalsuan nopna tunga khensatna bek mah hong kimuan pi in hong nei ta uh hi. -Ellen G. White: The Acts of Apostles, p. 164. 

KIKUP DING TE: 
Christian khat i hihna tawh, tu kaal lesson te sunga pan in, 

1. Bang ci bangin eima Upna sungah citak mahmah in kiptak in om kawm sak in i om na pan in eite muh dan in amu thei lo te tungah gensia se lo in, bang ci bangin huh thei ding? 

2. Pasian a dingin mi suakta khat i suah theih hangin ei te hong en thei lo khat adingin, etteh tak cing a suak thei dingin bang mawh puak nei i hi hiam?