ZSS SINNA 10: THUCIAMNA TATE’

SINNA 10: THUCIAMNA TATE’  December 2 - 8 

NIPINI (SABBATH) NITAAK LAM December 2 

SIMDING TE: Rom. 9 sung bup 

KAMNGAH: “Tua ahih manin Pasian in a hehpih nopte hehpih a, a paupeen’sak nopte paupeengsak hi.” (Rom. 9: 18)-(Mang Laisiangtho sungah “a lungkhauhsak nopte a lung khauhsak hi, ci hi). 

Tua mah bangin Lai Siangtho sungah, “Jakob ka it a, Esau ka mudah hi,” ci-in kigelh hi....Bang hang hiam cih leh Pasian in Moses kiangah, “Ka hehpih nopte ka hehpih ding a, ka khasiat nopte ka khasiat ding hi,” ci hi. (Rom. 9: 13, 15) 

Hih Laisiangtho mun sungah Paul in bang a gennuam hi ding hiam? Mihingte in lungsim suahtakna theihna leh deihteel theihna a nei lo bang ding hi le hang, i upna in khiatna a nei thei mawk ding hiam? Eite deih bangin Pasian pen, teel in eite deihlohna tawh kizui in a nial thei dingin suahtakna nei thei lo ding ihi hiam? A hih kei leh hih Laisiangtho mun in, amau te deihteel theihna hang hi se lo in, pawl khat te pen hotkhiatna a ngah a hi dingin kiseh khin a, pawl khat leuleu te pen, hotkhiatna a ngah lo dingin kiseh khin hi cihna ahi thei ding hiam? 

Hih thu i dawn theihna dingin Paul in a zai zaw leh a huampi in a hong gen tungtawn pan in kimu thei hi. Pasian in Ama deihna tawh kizui in a zat theih dingin mi “teel” thei hi cih thu, Paul in a hong theisak nuam ahi hi. A taktak in zong Leitung bup ah Lungdamna thupuak a genkhia dingin mawhpuak anei penpen in Pasian mah mah ahi hi. A tua bang hong hi mawk leh, Ama tawh a semkhawm dingin a lunggulh bangin mi khat peuhpeuh in Ama aitangin a sem dingin bang hangin teel thei lo mawk ding hiam? Pasian in mikhat peuhpeuh tungah Gupkhiatna ngah theihna ding dinmun pan in a khaktan masiah, hih Laisiangtho mun tungtawn pan Pasian sepkhiatna khat peuhpeuh in, Mihingte’ deihteel theihna tawh kizui in thukhun tawh a ki kingkalhna a om kei hi. A thupi zaw ah, mi khempeuh a dingin Zeisu a hong sihna tungtawn pan in mi khempeuhte in Gupkhiatna a ngah kim na dinguh alunggulh Pasian lungsim tawh zong a kingkalh kei hi. 

A tawntungin i phawk ding thu in, Rom 9 tawh kisai in, tua sunga min atuang te in, amau te’ aituam Gupkhiatna tawh kisai thu hi lo zaw in, nasep khat sepkhiat theihna dingin Pasian in a sapkhiat te hi ding hi cih i theihsiam nak leh, Hih Laisiangtho mun sungah tellah dingin thu haksa lua a om kei hi. 

NIKHATNI (SUNDAY) December 3 PAUL’ VANGIK 

“Note pen keima siampi nasep a sem minam, leh minam siangtho na hi ding uh hi. Israel mite tungah hih thute na gen ding ahi hi,” a ci hi. (Paikhiatna 19: 6). 

Pasian in milim biakna, khuamial gamsung, dawibiakna sungah a tuuk khin Leitung mite kiangah, lungdamna thupuak a tangko khia dingin, mi kisam hi. Tua Missionary a sem dingin Isreal mite na teel a, Amah mah na kipulaak khia hi. Amau te pen mi namdangte a dingin a etteh huai minam a suahna hangun, mi namdangte a huupna tungtawn panun a maan Pasian a hong mutheihna ding uh a ngiim na ahi hi. Isreal te tungtawn pan in Ama zia leh tong kilah khiatna hangin Leitung mi khempeuhte in Pasian lam a hong zuat theihna dingun geelna na nei hi. Tua gangawh biakpiakna te tungtawn pan in, Khris pen minam khempeuh te tungah hong kisang khai dinga, Amah a en mi khempeuh te in nuntakna a ngah theihna dinguh ahi hi. Isreal te a mihon ngiatin zong hong pung semsem dinga, a thupha san te uh zong hong kibeh laplap ding hi. Tua tungtawn pan amau te gam in hong ki khan semsem ding ahih manin, Leitung khempeuh in amau gam a hong zop ni dongin a keek ding uh hi. 

Rom. 9: 1 - 12 sim in. A lawhsam thei mihingte tangtun zawhlohna dinmun pan in, Pasian cihtakna tawh kisai in Paul in bang thu hong gen hiam? 
_________________________________________________________________________________________________________________ 

Israel mite tungah Pasian in a kamciamte lawhsam khin lo a hih zia a teltheihna dingun Paul in, a khen akhen hong gensuk hi. Pasian in Ama ngimna te a tangtung taka a sep theihna dingin a cianlai mi honkhat nei a hi zia pulaak hi. Tua bangin a cianlai mi honkhat zattheih dingin om lai ahih zia a kipsak na dingin, Paul in Isreal te tangthu honkhat hong suut kik hi. Pasian in a tawntungin teeltuam mi nei ahih zia a genna ah: (1) Pasian in Ama’ Thuciamna a dingin Abraham suan leh khak khempeuh na teel lo a, Isaac suan leh khak te bek na teel hi. (2) Pasian in Isaac suan leh khak khempeuh na teel lo in, Jacob suan leh khak te bek na teel hi. 

Paul in a theihsak nop thu ah, Gamh luahna vai hi ta leh, a kuakua suan leh khak ahi phial zongin Gupkhiatna tawh kisai in tua dinmun te hangin bangmah ki kawnlawh thei ahih loh zia theih dingin thupi hi. Nangmah in innkuan tapa takpi na hi mah ding hi, hih Innkuan sungah khangkhia khat zokng na hi kha mah ding hi, Pawlpi maan pen sungah a om na hi phial zongin a mang thei veve na hih man in, tua thuciamna a pua lam ah a om kha na hi veve thei hi. Upmuanna, Itna hangin a gamtang khia upmuanna a neite tungah “kamciamna tawh kisai suan leh khak taktak” hihna kilang khia zaw hi. (Rom. 9: 8). 

Rom. 9: 6 sim in. “Israel mi khempeuh Pasian’ teel mi hi khinlo hi” a cihna tawh kizui in, Ei Adventist te in zong tanglai Isreal te mah bangin i biakna mah tawh kisak theih khakna pan in, eite a dingin a thupi mahmah bang thupuak mukhia thei ding ihi hiam? 

NINIHNI (MONDAY) December 4 TEEL’SA TE 

“A uzaw in a nauzaw’ na sem ding hi,” na ci khinzo hi. “Jakob ka it a, Esau ka mudah hi,” ci-in kigelh hi” (Rom. 9: 12, 13). 
________________________________________________________________

Tu kaal i Lesson Thu masa sungah i sim khit mah bangin, Paul in mimal tawh kisai Gupkhiatna thu a gen nuam hi lo hi cih i ngaihsutsiam masiah, Rom a lian 9 tawh kisai in tel theih ding hi lo hi. Hih Laisiangtho mun in, nasep khiat ding a tuamkai pi khat a semkhia dingin mi a tuam in a sapkhiatna thu a hih zia Paul in a hong gen nuam hi cih, phawk tek ni. Pasian in hih Leitung ah Jacob pen, Lungdamna thu tangko khia ding mite’ phungpi ahi dingin deih hi. Hih laimun ah Esau in Gupkhiatna ngahlo ding hi cih bangin a ki hemgen na kamal a om kei hi. Pasian in a hi thei zahzah mi khempeuhte in, Gupkhiatna a ngah theihna ding a lunggulh mah bangin, Esau zong a ngah thei dingin lunggulh hi. 

Rom. 9: 14, 15 sim in. A tunga i sinsa te lungngai kawm in, hih Laisiangtho mun tawh kisai in bang ci bangin telsiam thei ding ihi hiam? 
_________________________________________________________________________________________________________________ 

Hih lai mun ah zong Paul in a mimal in Gupkhiatna tawh kisai in a gennuam ahi kei hi. Bang hang hiam cih leh, hih lai mun te ah Pasian’ hehpihna in mi khempeuh tungah huam a hih zia a kilat na dingin “Mi khempeuh in hotkhiatna ngahin, thuman a theihkim ding Pasian in deih hi” (1 Tim. 2: 4)cihna leh, “Bang hang hiam cih leh mi khempeuh in hotkhiatna a ngahtheihna dingun Pasian in ama hehpihna hong lak khinzo hi” (Titus 2: 11) na ci hi. A hi zongin Pasian in mi nampi khat tungtawn pan in, Ama na’ a sem dingin tengkhia thei a, amau te in zong tua nasepna tawh kisai in nial thei uh hi. Ahi zongin Pasian in amau te a teelna tawh kisai in nial theilo ding uh hi. Bang zah takin Esau in zong a lunggulh mahmah hangin, Messiah a hong pian theihna dingin khang gui bulpi suah theihna a hih kei leh, teeltuam minam lianpi phung dingin piang thei tuan lo ding hi. 

A tawpna ah, Esau tungtawn in thupiang te in, Ama thupiakna tawh Pasian in in Gupkhiatna a ngah theihloh na dingin a khaktan hi ki ci thei lo hi. Khris tungtawn pan in a hong piak Ama’ hehpihna in mi khempeuh tungah a khawnkhong in a kingah thei a hi hi. Ei te khempeuhin a mangthang ding hi lo in hotkhiatna a ngah kim dingin a hong teel ihi hi.(Ephet. 1: 4; 5: 2; 2 Pet. 1: 10). Khris Zeisu sunga om nuntak tawntung theihna kamciam na sungah i kip theihna dingin a hong dal pen in Pasian hi lo in, eima’ aituam deihteelna tungtawn pan in hi zaw hi. Mi khempeuh a dingin Zeisu a hong si zo hi. Ahi zongin Pasian in Ama Thubu sung tungtawn pan-in mi khempeuhte in nuntak tawntungna a ngah thei dingun lampi a hong bawlsak khin zo hi a, tua thu hangin Zeisu sungah a Upmuanna tungtawn pan dikna angah mawhnei mikhat in thumanna (obedience) sungah manawh pih ding hi. 

Mi kuamah a om nai lo dan khatin, nang pen leitung pian ma peka kipan in Gupna angah thei dingin Khris sungah a hong kiteel khin zo hi. Tua thu in nang pen, sapna angah na hihna leh, teeltuaam na hihna a hong kilang sak Zeisu tungtawn pan in Pasian in a hong vaihawm sak sa ahi hi. Bang zah takin a hamphat huai leh lametna muanhuai hi mawk lo hiam! Na dangdangte in hih a vanglian kamciamna teh tawh i tehkaak ciangin bangmah lo pi hong hi mawk lo hiam? Zeisu sungah tua kamciamna te nei khin na pi cin a, mawh bawl nopna, ci leh sa lunggulhna lam ah zuat kikna tawh beisak kik mawk le cin, dah huai lua lo ding maw? 

NITHUMNI (TUESDAY) December 5 THU THUKPITE 

Bang hang hiam cih leh keima ngaihsutnate nomau’ ngaihsutna bang hilo a, keima paiziate nomau’ paizia bang hilo hi, Topa in ci hi. Vantung pen leitung sangin a san’zawk mah bangin, keima paiziate zong, nomau paizia sangin sangzaw a, ka ngaihsutnate zong, nomau ngaihsutna sangin a sangzaw ahi hi” (Isaiah 55: 8, 9). 

Rom. 9: 17 - 24 sim in. Na simkhit sa khempeuh ciamteh kawm in, Hih Laisiangtho mun pan in Paul in bang a ci nuam hi ding hiam?

_____________________________________________________________________________________ 

Isreal mite tungah, Egypt gam sung panin, a paikhiat pih dan mahin, Pasian in mihingte tungah Gupkhiatna tawh kisai in a semkhiat dan kibang sak hi. Egypt gamsungah gimna lianpi a tunsak laitak mah in, Pasian in Amah leh Amah a hong kilaakna tawh a mite hong honkhiat na tungtawn pan in, Isreal te Pasian in Pasian takpi ahih zia, Egypt mite tungah mi namdangte tungah a ki pulaak khiat theihna dingin a geel kholsa ahi hi. Namdang mite in zong amaute pasiante nusia in amaan Pasian a hi, Ama kiangah a zuatna dinguh leh Amah bek a biak theihna dingun a sap theihna dingin a geelkhiatna zong ahi hi. 

Pharoah kumpi pa in bel kician takin ama lungsim deihteelna tawh Pasian a langpang ngiat dingin na khensat khin a hih manin, a lungtang na khauhsak mahmah hangin Pasian in bel Gupkhiatna tawh kisai a ngah theihna dingin khaktan tuanlo hi. A lungsim a khauhsakna taktak pen, Isreal mite a paikhiat na dingin a kingetna tungtawn hang bek hi a, ama aituam Gupkhiatna ngahtheihna dingin Pasian sapna hangin a lung ana khauhsak a hi kei hi. Khris sihna in Moses, Aaron leh Isreal mibup a dingin ahih mah bangin Pharoah kumpipa a ding zong ahi hi. 

Hih thu te tungtawn pan in, a thupi a hong kidawk khatin, mawhna sungah puuk mang khin i hih mah bangin i leitung mitmuh mahmah in hi ta leh, a taktak in a hong piang thute tungtawn pan in hi ta leh, Pasian in a hong sepna khempeuh tungah i muh theihna in toi lua mahmah lai hi. Hih i teenna i Leitung mahmah sungah i dak kawikawi ciangin i tel zawhloh thuthuk tampi bang om a hih lai mawk leh, Pasian’ geelna lampi te bang ci bangin telthei mawk ding i hi hiam? A taktak in, kikheina, ki-atna na a kibawl ma in khut silsiang masak phot hoih hi cih pen, thu tuma kum 171 lai in doctor te in na mu uh hi. Tua zahin thu a theithei lo ngiat te ihi hi. Hun a hong pai to zel dingin tuat leng, eite in mailam hun ah athak in i kimuhkhiat ding thukhat pen, tu laitak in eite in i phawkkhak loh thute mah a hong hi ding cih thu kua’n ci lo thei? 

A taktak in Pasian lampi in bang ci dan cihte i theihkim loh manin, Pasian in bang ci bang hiam cih a hong theisak dingin Zeisu a hong kum suk hi a (John 14: 9). I nuntakna ah thuthuk tampi te leh lam-etloh thupiang tampi te i nawk khak ciangin Khris zia leh tong neih theihna ding leh Pasian in eite a hong itna, tua a hong itna te a hong lahkhiatna te ngaihsut zel dingin bang zah takin thupi mawk hiam? Pasian zia leh tong theihtheihna in bang ci bangin haksatna, thuman lo takin mawhsakna te i thuakkhak ciangin bang ci bangin citaktak in i om theihna dingin hong huh hiam? 

NILINI (WEDNESDAY) December 6 “KA MITE” (Ammi) 

Paul in Hosea 2: 23 sunga thu pen Rom. 9: 25 sungah leh, Hosea 1: 10 sungthu pen Rom. 9: 26 sungah hong mankik/hong lasawn kik hi. Pasian in Isreal mite tawh a kizopna uh kilang takin a hilhcian nop man in, Hosea tungah “numei paktat” khat a teenpih dingin sawl hi (Hosea 1:2) tawh kisai tangthu ahi hi. Bang hang hiam cih leh Isreal mite in pasian dangte nung a zuih man uh a hi hi. Tua numei nu tungtawn pan in ahong piang khia Tate’ min khempeuh a dingin, Isreal mite milim a biakna hangun a mawhna te uh Pasian in nawlkhin khin a hih zia leh a dantat na ding tawh kisai in, a langkhia sak min lamdang te tawh na phuak hi. A tapa thumna pen “Loammi” (Hos. 1: 9) hi a, a khiatna in “ka mi’ na hi kei uh hi” a cihna ahi hi. 

Tua bangin, hi ci bang sung mah ah, Pasian in a dantatna teng a beikhit ciangin, amaute thupha pia kik dinga, amau te milim pasiante hepkhiat sakin, amaute tawh thuciamna te bawl kik ding hi cih thu Hosea in genkholhna na nei hi. (Hosea 2: 11 - 19). Tua hun tak ciangin “ka mite na hi kei uh hi” cihna ahi “Loammi” pen, “Ammi” (a mite na hi ta uh hi) ki ci ta ding hi. 

Paul hun lai takin “Ammi” te pen, Jew mite sung pan bek hi lo in, Mi nadangte ahi Gentile mite ahi zongin.....eite zong ki hi ta hi (Rom 9: 24). Hih thu in Leitung mi khempeuh te a dingin a tung pek pan in a ki geel khol Lungdamna Thupuak a kigenkhiatna tawh kisai hih thupuak pen, in kician mahmah in, vanglian mahmah hi. Tua ahih man in Ei Adventist te in Rev. 14: 6 sungah tangko na sungah” a kihel dingin sapna a ngahte i hih man in ki paak huai mahmah hi. Tua sungah “Tua ciangin leitungah a teng mi namkim, pau namkim a zang mite tungah a tawntungin Lungdamna ding Thu gen ding a nei vantung mi khat vankim lai-ah a leeng ka mu hi.”Hih Lungdamna thupuak a sem laitak te zong ihi hi. Tuni in, Paul hun lai leh, tanglai Israel te hun lai mah bangin, Gupkhiatna Lungdamna thu pen, Leitung mun khempeuh ah tangko khiat ding ahi hi. 

Rom. 9: 25 -29 sim in. Paul in ama hun laitak in a thupiangte a hilhcian theihna dingin, Laisiangtho Lui sung bangzah takin lasawn hiam cih phawk in. Hih Laisiangtho mun in a deihna laigil bang hi ding hiam? A sim mi khempeuh te a dingin bang’ lam-etna kimu thei hiam?
________________________________________________________________________

Ama’ mipih te mahmah sung pan in mi honkhat te in, Paul’ in a tangko khiat Lungdamna thupuak tawh kisai in nial tentan uh ahih manin, amah in “nakpi takin lunggimna leh dahna tawh kidim” sak hi (Rom. 9: 2). A hi zongin ama lam ah a cianlai a mitawm om sam hi. Mihingte in a thuciam na te uh palsat den mah ta leh, Pasian in a thuciamna te a palsat ngei kei hi. Eite in i neih theih ding Lam-etna in, a tawpna ah Pasian thuciamna te tangtung veve dinga, Tua thuciamna te tawh kisai in eite aituam dingin i neihtheih nak leh eite sung mahmah ah zong hong tangtung ding hi. 

Mite in nangma tungah bang zah vei bang kamciam hong pelh ngei uh hiam? Nangmah in zong bang zah vei bang mite tungah kamciam pelh ngei na hi hiam? Tam veipi tak tua bang hi khin hi lo na hia? Hi ci bangin lawhsam nate tungtawn pan in, muantheihna kua tungah kinga ding cih tawh kisai kisin theih ding bang nei na hi hiam? 

NINGANI (THURSDAY) December 7 KIPUK NA 

Tua ahih leh Pasian tawh kipawl theihna ding hanciamna a neilo Gentail mite pen upna hangin Pasian tawh kipawlthei a, Pasian tawh a kipawl theihna dingin thukham zuihna tawh hanciam napi-in a zuih zawhlohna hangun Israel mite kipawl theilo ahih leh a bangci thu ahi hiam? Amaute in upna suangloin nasepna a suan’ hang uh ahi hi. Amaute pen Lai Siangtho in a gen mah bangin, “Pukna ding suang,” a kici tungah a pukkha uh ahi hi (Rom. 9: 30 - 32). Hih Laisiangtho mun in bang a gennuam hi ding hiam? Nidang hun khat lai leh,  munkhat a kigen hih thupuak in, tu khanghun eite a dingin bang ci bangin zang kik thei ding ihi hiam? Isreal mite in nidang lai in a khialhna tungtawn pan in, eite in bang ci bangin tua khialhna i phutkhak loh na dingin kidawm thei ding ihi hiam? 

____________________________________________________________________________________ 

Telkhial theih ding a hi lo a kician mahmah Pasian in neih dingin a lunggulhsak te a nei thei dingin Paul in a mipihte tungah deihsak mahmah ta leh, kipelh denkeei mawk ahih manin, amaute telloh theihloh dingin Paul in hong hilhcian hi. 

A lawphuai mahmah thukhat in, Pasian in a mi dingin a san’ ahi Gentile te in, tua bangin a kisan na theihna dingun amau lam panin bangmah hanciamna a nei kei uh hi. Amau te kiangah Lungdamna thupuak ahong tun laitak in zong , amau te’ pahtak thu bek leh, a lunggulh thu te bek mah hanciam in zuih sawm uh hi. A hi zongin Lungdamna thupuak’ manphatna a hong theih uh tak ciangin hong pom ziau thei bilbel uh hi. Zeisu Khris pen amau te aiawh Pa dingin hong sang thei uh a hih manin, Pasian in zong amau te midik ci in hong phuang khia hi. Tua in Upmuanna tawh sepkhiatna ahi hi. 

Israel mite tungah buaina a hong om thukhat in amaute pen, “puktheihna ding suang” khat tungah ”(Rom. 9: 33)a pukna uh ahi hi. Tawmkhat bek hi sam a, a vekun bel hi khin sam lo uh hi (Sawl. 2 : 41). A maute in Nazareth mi Zeisu pen, Pasian in a hong sawl Messiah a hi dingin sang thei mahmah lo uh hi. Zeisu mahmah in zong Amaute lam-et bang Messiah bangin ki muhsak sawm lo hi. Tua ahih manin a hong pai laitak in amaute in a nung heisan uh ahi hi. 

Hih Rom a lian 9 sung, a tawpkuan ah Paul in Laisiangtho Lui Bu sung panin hong lasawn kik a, “Lai Siangtho in, “En un, keimah in Zion-ah mite a muktuk theihna ding, mite a puktheihna ding suang khat ka koih hi. Ahi zongin amah a muang mite khempeuh tavai cih om ngeilo ding hi,” (Rom. 9: 33), cih hong pulaak hi. Hi lai mun ah Paul in, Gupkhiatna tawh kisai ngiimna sungah Upmuanna maan taktak pen bang zah takin a kiphamawh zia hong thei sak hi (1 Pet. 2: 6 - 8 sung zong sim in). Tua suangin langdona suang ahi zaw tam? Amah a um te in zumhuaina thuak lo takpi ding maw? Hi mah hi. Mi tampi tak te a dingin Zeisu pen Puk theihna ding suangtum bang hi a, a hi zongin Amah a thei takpi te leh a It takpi te a dingin, Amah pen suang dangkhat ahi “Gupkhiatna suangpi” hi veve hi (Late 89: 26). 

Zeisu pen nang a dingin, “kipuk theihna suangpi” a hih kei leh, “ Langdona a piangsak suang” a hong hi ngei hiam? Tua bang a hih khak leh bang ci bangin hi thei hiam? Tua bang dinmun a tung dingin nang’ bang na sep man hiam? Tua mun pan in kipeek khia in, Zeisu tawh a kilang neih kizopna pan in cikmah hun in a lut kik ngei nawnlo dingin, bang ci bang kisin thei ding na hi hiam? 

KIGINNI (FRIDAY) December 8 
SINBEH DING: “A mimal in a hi zongin a minam in ahi zongin teeltuam na om thei hi. Tua pen Pasian kammal sung tungtawn pan in a kimu thei sunsun ahi, mihingte honkhiat dingin teeltuam na ahi hi. Mi a tam zaw te in a tawpna hun ding bekin na mu uh a, Vantung nopsakna sungah a tungthei dingin teeltuam te ah kingaihsun kha uh hi. A hi zongin tua in, Laisiangtho in a hong cih cih nop teelna hi lo hi. Mihingte in launa leh linna tawh amau’ Gupkhiatna ding a semkhia dingin a hong kiteel te i hi hi. Upna galdo na ah hoihtak in galdo theihna dingin, galvan te a silh dingin a hong kiteel te ihi hi. Satan in Leitung mihingte kha lam dinmun a puuk theihna dingin kimawl pih thei ahih man in, a sianglo lunggulhna khempeuh a do dingin leh, Pasian in ama bat dingin a piak lampi te a tawn dingin a hong kiteel te ihi hi., thungetna tawh a kiging den dingte, Laisiangtho thubu a sin dingin, Ze-etna sungah puuk lo in a kikeem dingte, Upmuanna a tawntungin a nei zom dingte ihi hi. Pasian kam pan in a pusuak khempeuh te a theite bek hi lo in, a gamta te ahi dingin a hong kiteel ahi hi. Hih bang teng pen, Laisiangtho in teel a cih te dinmun ahi hi.” - Ellen G. White: Gospel Workers. pp. 453, 454. 

“Ciangtan a nei lungsim in, ciangtan a nei lo pa zia leh tong ahih kei leh a sepna khempeuh theihzawh ding hi lo hi. Hanciam taka zonkhiat tawmna tawh Pasian pen a kimu thei ding hi lo hi. Mihingte ciimna a sang penpen leh a khangto penpen te a kipan in, a zawnkhal pen leh a mawlpen te lak ah, Tua a Siangtho Pa’ thu pen theih zawhloh batloh dingin a kituam cip ding ahi hi. A hi zongin i kankhiat theihna sun in “Meiipite leh khuamial sahpite ama kiimah om a, thumanna leh thutan’nate ama tokhom bulpi ahi hi, na ci hi(Late 97: 2). Bat dingin sanglua ahih na leh, a nasepna te thuk lua mahmah ahi ta zongin gi a nei lo Ama hong hehpihna in eite tungah hong kizom sak thei hi cih pen, a hong kepna te tungtawn pan in theihcianna i nei thei hi. Ama ngimna te zong eite in eimah tawh kituak in telsiam theihna i nei thei a, tua lo bel na khempeuh a bawl thei khut tungah leh, itna tawh a kidim lungtan anei Pa khut sung bek mah ah i ki-aap ding bek mah hong hi mai hi.” - Ellen G. White: Education, p. 169. 

KIKUP DINGTE: 

1. Christian honkhat te sungah updan khat ahi, Mihing khat in a pian ma a kipan in gupkhiat ngah ding leh ngah loh ding tawh kisai in Pasian in khensat sa in nei hi, ci uh hi. Itna thukpi leh genzawh loh Pilna a nei Pasian in nangma deihteel na thupi sim lo in, mi tampi tak te in tawntung sihna sungah a kangtum ding mahin a hong seh hi dinga, thukhat kik pan in, Pawl khat te pen, eima deihteelna hi lo in, Pasian in a sehna hangin Mi khatkhat te pen leitungah anuntak sunguh zong Zeisu tawh a kizopna a nei lo dingin khensat sa hi dinga, tua khit ciangin hell sungah a kuang dingin a kiseh hi sawnsawn lai leh, tua bang ngaihsutna in a maan i ci thei ding hiam? 

2. Tanglai Isreal te mah bangin Adventist te zong, Leitung bup Lungdamna thu a gen dingin a hong kiteel na thu ngaihsun kawm in, i kilamdan na leh, i kibatna bang teng om hiam? Amau te sangin bang mun ah eite in hoih zaw hanga, a bang munte ah a maute sangin sia zaw ihi hiam? ki sittel dih in.