MS 10: Meileeng Tungah Topa Zeisu Thu Geenkhiatsawnna

Meileeng Tungah Topa Zeisu Thu Geenkhiatsawnna 

Agen: Nikolai Zhukalyuk, 84 - Min simzia: Nikolai Zukaluk

Nipi 10na: December 9 Ukraine Gam

[Siate ahih kei leh upate khat geensak in]

Tapidaw khat ih hihnaak leh kampi bektawh nuntaak ding hi theilo hi. Tapidaw citak khat ih hih naakleh midangte hong muhna ah kilamdan om hamtang ding hi. Midangte’n dotna tuamtuam hong dot ciangin a dawna thei nahihmanin lungluut takin na dawngkik hi. Ahizongin, kuamah’n thu hong dot kei leh na hopih nading a thu om lo hi. 

Akizen Pawlpimi Kibehlapsak Pa

Midangte tawh ka kiho theih nading lampi tuamtuam ka zong hi. Mite tawh kiho ciangin Sabbth thu a hihkeileh i upna bulpite geen masakdingin hoih in ka um kei hi. Tua saangin, midangte kitaang-sapna thei in ka huh nopna amaute’n thei leh ka uut zaw hi. Ni khat ni-in, Ukraine gam ii khuapi ahi, Kiev khuapi ah zaan thapaai meileeng tawh ka zin hi. Mi nih lupna khan ah ka tuanpih pen nupi khat ahi hi. 

Meileeng sungah ka tuankhop kawm un hun hoih khat ciangin nupi nu kiangah, “Ih nih in kimeeltheihbawl dih ni. Tawmvei sung khualzin khawm ding ihi hi. Lviv khuapi pan nahia ahihkeh lviv khuapi ah nasep nein a hia?” ci-in ka dong hi. 

Nupi in, “Lviv khuapi pan hi keng. Kiev khuapi pan hi ing. Inn a ciah ding kahi hi,” hong ci hi. Kei zong nuihsan in, “Lviv khuapi pan Kiev ah a zin kahi hi. I

“Banghangin Kiev khuapi ah hong pai nahi hiam?” ci-in awneem tawh hong dong hi.

Pawlpi ah makaai khat ka hihIam leh leitung mun khempeuh ah lawm ka neih kawikawi lam amah ka geen hi. Ka lawmte Ukraine ah hong pai ciangin khatveivei Kiev khuapi ah kituah dingin hongs am theizeel uh hi. Amau tawh kimu dingin ka va zinzeel pen a lemzawkna leh ka lungnopna amah ke geen hi. Tua ka kihona uh hangin ka taangthu tawm nupi tungah ka geen thei hi..

Lungluutna Khangsak

Nupi in ka thugeente zaaknop sa hi. “Ka min in Nadya (Nadia) ahi hi. Bang pawlpi makaih nahi hiam?” ci-in hong dong hi.

Nupi hong dotna thakhatin ka dawngpah kei hi. Ka dawnkik taangin, amah ka nuihsana, “Bang pawlpi ah kikhawm nahi hiam?” ci-in ka dong hi.

“Kikhopna ka neikei hi. Ahizongin Orthodox pawlpimi khat, upna lamah a citak khat ahi dingin ka ki-um hi,” ci-in hong dawngkik hi. Nupi Nadya in Ukraine gam nisuahna lamah, lungsim ngaihsutna lam a theisiam khat (psychologist) a hihlam leh buaina tuamtuam a neite a lemtuahsak siapinu khat a hihlam hong geen hi. Aman zong a thugeenna hong zoma, “Nang pen Orthodox pawlpimi khat na hih lohlam kong thei hi. Tua ahihleh, nang pawlpi leh Orthodox pawlpi a kilamdanzia hehpihna tawh nong geen thei ding hiam?” ci-in hong dong hi.

“Orthodox pawlpimite in Sunday ni-in kikhawm uha, ko bel Sanini (Saturday) ni-in ka kikhawm uh hi,” ka ci hi.

“Sanini (Saturday) ni-in kikhawm ung na cihpen bang na deihna ahi hiam? ci-in hong dong phasaan hi.

“Lai Siangtho na sim maw leh?” ci-in ka dot leh “Sim mah ing,” hong ci hi. 

“Thukham Sawm thu na za ngei maw leh? ci-in ka dong leuleu a, Nadya zong ungngaai kawm in, “Za ngei mah ing. Gu ke’n. That ke’n,” ci-in hong dawngkik hi.

“Thukhaam lina in Sanini (Saturday) thu geen hi veen,” ka cithuah hi.

Sawtveipi mah ka kiho uh hi. Zaan thapaai dong nangawn a kiho thei ding kahi uh hi. Ahizongin, lum in tawlngak ding ka geen ciangin Nadya in Thumaan theibeh nuam ahihmanin Kiev laibu zuakna saite ah ka laibu aatte kizuak ding maw kizuak lo ding cih thu hong dotbeh hi. Laibu sai ah laibu om ahihlam leh bu (15) a aatpa ka hihlam ka telgeen hi. 

Kithuzaak Zeelzeelna

Ka laaibu aat te ka thoh nawnloh lam ka geen ciangin nupi nadya in a lungkiatna thu hong geen hi. Ken zong ama’ omna leh ama’ nasep cihte ka kizop theih nadingin ka ngena, ama’ deih laibu tawh laito tungtawnin khaak dingin ka kamciam hi. Ama’n zong a omna mun leh phong nambat hong aat hi. 

A zingsang ciangin Kiev khuapi ka ungta uha, meileengbuta ah nupi Nadya in amah a dawn a pasal tawh hong kimeeltheihsak hi. “Hong dawn ding mi a om keileh, ko hong dawn ding hi ung,” hong ci sawnsawn laai hi.

Tu tung aa ka tuahkhaak thu pen teci panna ahi hi. Tu-in, Topa Pasian thu leh Ama’ Thumaan sin ding a lungluut lawm thak khat ka neita hi. Amah tawh ka kiho zeelzeel ding uh hi.

Na Sabbath School sumpi-un, an lunggulh bangin Thumaan a lunglunggulh leitung mun tuamtuam ah a om, kha mangthangte aadingin Pasian’ thubu leh laihawmte a sim theih nadingun hong huh ding hi. Na thungetna uah, ko gam ah pawlpi nasepna a khantoh nadingin thu nong ngetpih uh lungdam lua ung. 

Nikolai Zhukalyuk pen kum 84 phata hi. Amah pen, Ukraine gam Seventh-day Adventist pawlpi President a seem ngei khat ahi hi. Russiate khut sung panin a suahtaakma un, a upna hangin kum 2 thongkia hi. 

##########@@@@@@@@@@##########