MS 11: Thungetna Thumte Ageen: Nadezhda Raya, 54

Thungetna Thumte 

Ageen: Nadezhda Raya, 54 (Min lawhzia: Nadezida Raza)

Nipi 11na: December 16 Moldova Gam

[Hih gamdang Adventist Thuthang pen nupi khat a hihkeileh siama khat gensak in]

Ka pasal tawh Seventh-day Adventist biakinn naai ah ka teeng uh hi. Biakinn ah kikhawm dingin Adventistte hong pai uh ciangin a Lai Siangtho bu uh a awm tung uah a nen uh ka mu zeelzeel hi. Ka nuntakna ah ka kitaangsap khat om hi ci-in ka ngaihsun hi, banghanghiamcihIeh Lai Siangtho sungah bangteng kigelh cih ka thei kei hi. 

Hih ka thumuhna pen Russia gam a kitapkhap laaitak hia, Maldova ah Lai Siangtho pen mi tawmcik bekin nei-in ko zong bu khat nangawn ka neikei uh hi. 

Lai Siantho bu thu theinuam ka hihmanin Adventist innkuan khatte kiangah a simthamin ka hawha, Lai Siangtho sungpanin hong simkhiatte ka ngai giigee hi. Hih bang ka hihlam kuamah ka theisak nuam kei hi, banghanghiamcihleh hih khuapi sungah a teengte in zahpih in nuihsan uh hi. 

Orthodox Pawlpimi A Hilote Lai Siangtho

Tua zawh a sawt loin, tua Adventist innkuan tungah Lai Siangtho ka nget leh bu khat hong pia uh hi. Ka simpah aaleh, laimai kimphial ah Sabbath kilang ahihmanin lamdang kasa hi. “Hih Lai Siangtho pen Ortodoxte aa hilo ding hi,” ci-in ka ngaihsun hi.

Topa Pasian biakni pen Lai Siangtho sungah a kigelh mahbangin Sabbath ni hi ding maw, ahihkeileh ka veengte Orthodox te zuih Sunday ni hi zaw ding cih ka thei nuam mahmah hi.

Ka nu in, ko teenna khuapi naai ah a om khuai neu ah a teeng siampipa kiangah va dong dingin hong sawl hi. “Amah pen thumaan mahmah hi. A thumaan hong gen ding hi,” hong ci hi.

Siampipa Tawh Kihona

Siampipa tawh ka kimuh ciangin, “Lai Siangtho bu khat a lei dingin hong pai kahi hi. Adventist Lai Siangtho bu khat ka neia, Orthodox Lai Siangtho bu tawh ka enkaak nuam hi,” ka ci hi. Siampipa zong Lai Siangtho bu khat a zuakte kiangah hong vaaikhaaksak hi. Tua Lai Siangtho ka ngaak sungin siampipa tungah, “Lai Siangtho in Pasian biakni dingin bangni geen hiam?” ci-in ka dong hi. 

Amah in, “Lai Siangtho bu khat lei nuam hivecin, nangmah in na kan in,” hong cihsan ziau hi. 

“Hilo hi. Hehpihna tawh hong geen tapeuh in. Nang tung panin a thumaan za nuam ngiat ing,” ci-in ka thuum hi. Ahizongin, ka dotna hong dawng nuam vetlo hi. 

Mi khat in Lai Siangtho hong pia peetmah ta-in, a man ding siampipa tungah ruble (Russia sum) 30 ka pia hi. Tua laai hun aadingin sum in man nei mahmah hi. Orthodox biakinn pan ka ciah ciangin lung patauhna khat ka nei hi. Ka pasal in Lai Siangtho bu man dingin ka piak sum tam lua sakha leh maw cih ka patau simsim hi. 

Ciahsuak pahIoh dingin ka khensat a, ka nute kiangah ka bang masa hi. Ka nu kiangpan ka ciaha, ka upa tawh kituakin, ka lung patauhna teng ka geen hi. Lampi laizang ah Lai Siangtho bu nihte ka enkaak kawikawi uh hi. A bu nih in a thu kibanglian a hihlam ka thei hi. ‘Banghangin, hih Lai Siangtho bu lei zenzen kahi hiam? A thu a kibang hinapi, sum tam piak lua kha ing’ ka kici hi. Ka pasal in hih ka lungpatauhna hong theihkhaak loh nadingin thu ka ngen hi. 

Adendeuh ciangin, ka upa in Lai Siangtho deiha, rubles (Russia sum) 30 tawh hong leikik hi. Hih bang a piang dingin ka um zokei liangh hi. Topa Pasian in ka thungetna hong dawng pahlian hi. 

Biakna A Kinlo Pasal

Inn ka tunkik ciangin Adventist khat ka suahnop hangin thaa hong pia lo mawk hi. Biakinn khat nangawn ah ka kikhawm kei uha, tu nangawn in kikhop dingpen ka pasal uut naailo laai tazen hi. Tua ni mahin ka pasal in Pasian aup theih nading leh a kikhop nop nadingin thu ka ngetsak pah hi. 

Adventist biakinn ah tui ka kiphuum laitakin, ka pasal awm tung leh a nungzaangah kiginneihloh laitakin a lipkhaphuai a kitam khat ommawk hi. Et dingin lipkhaphuai lua hi. Ka pasal’ liammate ka silsak simin Topa Pasian tungah huhna ka ngen hi. “Amah ka pasal hia, ka iit ka ngaai hi,” ci-in thu ka nget ciangin ka khitutete ka pasal nungzaang tungah a tu keuhkeuh te tuni dong ka phawk laai hi. 

Hun leh nite hong bei toto hi. Ni khat, ka pasal nungzaang ka silsak laaitakin, “Thakhat aa hong kitam peen bangci peuhmah a hiam? ci-in awng kawmin ka dong hi. 

Ka pasal in, “Thei kei mawk ing. Tua manlangtakin a kitam pen om nawnlo hi,” ci-in hong dawngkik hi. 

Tua khitzawh ciangin, biakinn ah ka kikhop ciangin a hehnate hong ngaihsunkik hi. Zaan khat a mangh in Topa Zeisu hong paikikna mu hi. Zin zong liing hi. A mangmatna pan a khanlawh ciangin, “Tui ka kiphuum theilaai ding iam?,” ci-in lung patau takin hong dong hi. 

Ka thungetna anihna Topa Pasian in hong dawng leuleu hi. Ka kituiphuum zawh kum 10 khit ciangin ka pasal zong tui kiphuum hi. Halleluijah! 

Lawm Luui Khat

Ka saangkah laai aa ka lawm iit mahmah khat aadingin thu ka ngen den hi. Ka kimuhloh zawh uh kum 20 bang sawtta in, gupna a ngah nadingin thu ka ngetsak hi. Ni khat, Moldova gam ii khuapi (capital) ah pawi siim dingin ka zin hi. Tua pawi pen Seventh-day Adventist zumpi ah kibawl hi. Tua pawi ah ka lamet hetloh laitakin ka lawm luui nu ka kiangah hong tai vengvang hi. “Hih munah, Adventistte tawh bang hih na hiam?” ci-in maitai takin ka dong hi. 

“Kei zong Adventist khat hi vengh lawm” ci-in maitak takin hong dawngkik hi. 

“Bangci daan in maw,” ci-in lamdang sakna tawh ka dongkik hi. 

Tuuma kum 20 laai-in Adventist Pawlpi bek a maan pawlpi a hihlam nong geen hi,” ci-in hong dawngkik hi. 

“Tua bel hi thei kei, lawm aw. Tua hun laai-in Adventist thu ka theih naailoh pi,” ci-in ka ze-et hi. 

Adventist upna ama’ kiangah geenpih ka hihlam hong geen teeiteei hi. 

Ama’ tungah ka geen thu ka ngaihsutkik ciangin Tapidaw nuntaakzia a geen ngei ding tawh ka kibanga, Topa Pasian in Tapidaw ci-in ka geen pen Adventist cih kammal tawh a zaak nadingin hong heisak hi ding hi cihloh buang ka geendaan ding ka thei kei hi. Tua bangin ka kiho khituh ciangin, ka lawmluuinu pen nuntak tawntungna laampi na zui-in, Adventist pawlpimi khat na suak hi. Tumaa kum 20 laai-in ka lawm luuinu in gupkhiatna a ngah nadingin ka thungetna pen Topa Pasian in hong dawng takpi hi. 

Hih in thungetna ii vangliatna ahi hi. 

Hih Moldova gam ah Adventist pawlpi min tawh cidamna thu hilh theih nading, Pathfinder camp bawlzawh nading leh, amah leh amah a dingzo conference pawlpi a suah theih nadingin tu kuata lina Sabbath School sumpi khen khat tawh kihuh ding hi. Hih a thupi mahmah Pasian’ nasepna ah hehpihna tawh hong pawl pih un. Lungdam lua! 

##########@@@@@@@@@@##########