SINNA 19 - A NIHNA THUKHAM GUKTE

  SINNA 19 - A NIHNA THUKHAM GUKTE

Thupatna: A masa thupiak lite, Pasian tawh ei' kizopna tawh kisai hi-a, a nunung thupiak gukte zong midangte tawh ih kizopna tawh kisai a hih hangin a thupi lo zaw hi tuan lo hi. Leitunga minam khempeuh Pasian in sisan khat tawh a hong bawl, Ama khut sung pana piang ngentang ih hi-a, singlateh tunga Jesu' sihna tawh a hong tat ih hihi. Mi dangte ih bawl dan in, amaute bawla a it Pasian' tungah eite in bang lungsim nei ih hiam cih kilang sak hi.

1. Thupiak ngana bang hiam? Paikhiatna 20:12.

Theih ding: Hih thupiak in ih tunga thunei khat peuhpeuh tunga ih lungsim puakzia zong huam hi (Titus 3:1). Pasian' thupiakte tawh a kilehbulh loh laiteng hih thu a maan a hihi. Sawltakte 5:29.

2. Nute-pate in bang masuan nei uh hiam? Ephesian 6:4.

Theih ding: Tate in Pasian ita a thu a manna dingin nute-pate in a pattah ding a hihi.

3. Thupiak gukna in bang kham hiam? Paikhiatna 20:13.

Theih ding: Pasian bek in nuntakna pia thei hi. Mihing in mi dangte thah theihna ding, amahmah zong a kithah theihna ding thu nei lo hi.

4. Jesu in hih thupiak koici zaigen hiam? Matthew 5:21,22.

Theih ding: Mi khat ih muhdah ciangin, amah a it nawn lo ih hi-a, hih thukham a palsat ih hita hi. 1 John 3:15.

5. Thupiak sagihna in bang phal lo hiam? Paikhiatna 20:14.

Theih ding: Lai Siangtho sunga "ang kawm" cih kammal in, nupa kipalngukna bek a gen hi lo hi. Nupa hih ma-a om khopna khempeuh zong huam hi. Pasian in Adam' zi ding, Eve, khat bek bawl sak hi. Mi (pasal) khempeuh' a dinga a geel a hihi. Numei leh pasal a kiteng uh a hih kei ngal leh om khawm thei lo ding hi. Nupa hihna in Jesu Khrist leh A pawlpi a kizopna lim a hihi. (Ephesian 5:25-28). A thupi, a siangthoa kepcing ding a hihi.

6. Thupiang sagihna in bang zah ciang hiam? Matthew 5:27,28.

Theih ding: Lunggulhna hoih lo khempeuh panin lungsim ngaihsutna kepcing ding a hihi. Jesu ettehin, Amah hong pai kik cianga a dawn thei dinga kiginkholh nopna lungsim tawh, ih lungsim leh ih pumpi ih siantho sak dng a hihi (1 John 3:2,3; Philipians 4:8).

7. Thupiak giatna bang hiam? Paikhiatna 20:15.

Theih ding: Hih thupiak in zong zaipi tak huam hi. Mi dangte' neihsa zawhthawhna tawh, a simthamin a hi-a khemna tawh a hi zongin lak ding hi lo hi. Hih in mi dangte' neihsa, a min, a za, cihte zong huam hi.

8. Thupiak kuana bang hiam? Paikhiatna 20:16.

Theih ding: Cihtakna in, thu a maana genna, sumlei sumzuakna ah thumaan genna cihte huam hi. Tawisuang maan lo, piciang maan lote in hih thupiak palsatna a hihi (Siampi 14:35,36).

9. Pasia in zuau-genna bangci ngaihsut hiam? Paunak 12:22.

Theih ding: Kineihna (simtatna) khempeuh zuau-genna a hihi. Pau lo-a, omna zong, a maan lo genna a suah leh, zuau-genna mah a hihi.

10. Thupiak sawmna in bang kham hiam? Paikhiatna 20:17.

Theih ding: Deihgawhna (enna) in thupiak dangte palsatna ding zungpi khat a hihi.

11. Deihgawhna tawh kisai-in Jesu in bang hong hilh hiam? Luke 12:15-21.

Theih ding: Paul in, leitung panin bangmah pua khia thei lo ding ih hih ciangin ih neih zahzah tawh lungkim mah a hoihpen hi, ci hi.

12. Thupiak sawmte khat leh khat koici kizop hiam? Jacob 2:10,11.

Theih ding: Bang thukhamte palsata, bang zahvei palsat cih Pasian in a ciamteh thapai hi lo hi. Thukham a buppi-in bangci ngaihsut ih hiam cih thupi sa zaw hi. Mi ih thah loh hangin mi' na ih guk leh, mi dangte it lo ih hihna a lak mah ih hihi.

Thukhupna: Thupiak Sawmte in Pasian' deihna hong gen hi. Pasian a kikhel loh mah bangin tuate zong kikhel lo hi. Thupiakte tawmcik khat a hih hangin, a deihna zai mahmaha, mi khati nuntakna buppi huam hi. Ih lung sungah Pasia itna takpi ih neih leh tuate a zui zo bek ding ih hihi. Ih lung sungah Pasian hong tuma, ih sung panin Ama deih bangbang a sem khia dingin Amah ki-ap ni.