SINNA 18 - A MASA THUKHAM LITE

SINNA 18 - A MASA THUKHAM LITE

Thupatna: Pasian in A mi Isreal-te Egypt gam pan a pai khiatpih lai-in, thu hilh nuam a hih manin gamlak ah tawl khat khawlpih hi. Amaute teitang nai lo uh a hih manin, khat leh khat a kizop dan ding uh, a kim a pam uha minam dangte tawh a kizop dan ding uh, Pasian in Moses gensawn sak hi. Mun khempeuha om, mi khempeuh'a ding a hi Thupiak Sawm a hih leh Pasian mahmah in mite' kiangah genin, a tawntunga a kimang ding thu a hih lam a lahnain suangpek nih tungah gelh hi.

1. Thupiak Sawm sungah a khatna bang hiam? Paikhiatna 20:3.

Theih ding: Khawvannuai ah Pasian a lianbel a hih mah bangin eite' lung sungah zong a lianbel ih hih sak ding kilawm hi.

2. Pasian bang zah om hiam? Isaiah 44:6.

Theih ding: Egypt mite leh minam dangdangte in pasian tampi bia uh hi. A taktakin na khempeuhte a piang sak Pasian a hi - Pasian taktak khat bek om hi.

3. Mi kimkhatte' a dingin bang in a pasian uh hi thei hiam? Matthew 6:24.

Theih ding: Pahtakpena ih neih khat peuh ih pasian hi pah hi. Sum zong hi thei, minthanna zong hi thei, tate zong hi thei hi. Pasian a hi lo, bulhphuh dang khat peuhpeuh a khial hi pah hi.

4. Thupiak nihna in bang kham hiam? Paikhiatna 20:4,6.

Theih ding: Ih biak Pasian' taang dinga milim khawng, lim khawng leh, na dang khat peuhpeuh ih zat ding Thupiak Nihna in kham hi.

5. Mihing in Pasian leh Ama lampite ih theithei ding hiam? Isaiah 55:8,9.

Theih ding: Kuamah in Pasian mu ngei lo hi (John 1:18). Eiite sangin Pasian lian zaw thampek hi. Ama taang dinga na hat peuh bawlna in Amah ih ngaihsut dan hong neusuah sak hi.

6. Pasian koici biak ding ih hi hiam? John 4:23, 24.

Theih ding: Mihing' hamphatna a lianpen in, a muh theih loh Pasian, a lungsim tawh a biak theihna a hihi. Ganhingte tua bang hi thei lo hi. Mihing in bia thei a hih manin, tua biakna panin, amah a piang sak pa tawh mihing kinaizaw thei hi. Pasian in kha hi-a, kha lam thu tawh a kibia thei bek a hih manin, mihing' biak dingin Pasian' taangdinga milim khawng bawl theih hi lo hi.

7. Thupiak thumna bang hiam? Paikhiatna 20:7.

Theih ding: Pasian' min zangkhia zatna, ciamnuih bawlna, tomlawhna khawnga zatna in Thupiak Thumna palsatna a hihi. Pasian' thuzui ka hi, ci napi-a ih cihtak kei leh zong hih thupiak a palsat mah ih hihi.

8. Pasian' min zatna tawh kisai-in Lai Siangtho in bang hong hilh lai hiam? Siampi 19:12.

Theih ding: Kidawm lo-a Pasian' min thangzatna in Pasian simmawhna hi-a, thupak thumna palsatna lianpi khat a hihi.

9. Ih kampauna bang in hong uk leh hoih ding hiam? Matthew 5:33-37.

Theih ding: Jesu in, thukhenna ni ciangin ih motpuapuanate zong thu hong kisit ding hi, ci hi (Matthew 12:36). Pasian tawh kisai na khempeuh ih zahtak bawl ding Thupiak Thumna in hong sawl hi.

10. Thupiak Lina in bang hong ngen hiam? Paikhiatna 20:8-10.

Theih ding: Hih in, ut ni peuha a kipan nisagih a cinna peuhpeuh a cihna hi lo hi. Kal khat sunga nisagih ni, Saturday a cihna a hihi. Nasep silbawl, gualnop bawlna khempeuh panin khawlin, Pasian ih biakna ding ni tangtuam mahmaha Pasian in a seh a hih lam ih ngaihsun ding hi.

11. Nisagih ni Sabbath in bang phawkna mual-suang hiam? Paikhiatna 20:11.

Theih ding: Sabbath ni in Pasian, Piangsakpa a hih lam, Amah bek biak thamcing paai thamcing a hih lam phawk kik zelna a hihi.

12. A masa Thupiak Lite Jesu in koici tomgen hiam? Matthew 22:37,38.

Theih ding: Ih lungsim, ih pumpi, ih kha tawh Pasian ih it leh, ih gamtatnate a masa thupiak lite tawh hong kituak pah lian ding hi.

Thukhupna: Pasian in A Tapa Jesu Khrist a hong piakna ah, deih sak taka a hong pia a hihi. Ama hong itna leh hong piak letsong ih pahtak takpi leh, eite in zong deihsakna takpi tawh Pasian' a ding a hoihpen ih pia kik ding hi. Ih lungtang tokhom tungah Amah tu sakin, Amah pahtakpenin nei-in, Ama hong sawl bangbangin ih gamta ding hi.