FSS ZIRLAI 10: THUKAM FAPAWL

ZIRLAI 10: THUKAM FAPAWL
December 2-8  

SABAT TLAILAM December 2 

TUZARH SIAR DING: Rom 9. 

BIBLE CANG KEN: “Pathian in a duhmi poh a zangfah ih, a duhmi poh a lung a ruhter” (Rom 9:18). 

JAKOB ka duhdawt ih Esau ka hua …. Mosi hnenah zangfah ka duhmi ka zangfah ding, zawnruah ka duhmi an zawn ka ruat ding tiih nganmi a um (Rom 9:13,15).

Paul ih a simmi ziangso a si? Milai in zalen zetih Pathian kan hril thei hi ziangtluk ih sunglawi so a si? Pathian kha kan duhhrilnak in kan pom thei ih, kan pom lo thei a si. Cuti a silole himi Bible cangih a sim duhmi hrekkhat rundam dingih hril an si ih mi hrekkhat cu hloral dingih tuah mi an tinak maw si?

Paul ih a simmi ah a phi a um ko. Pathian ih a hrilmi kha amai duh vekin a hmang thei tiah Paul in a sim duhmi a si. Leitlun ih thuthangtha simnak ah tuanvo latu cu Pathian a si. Curuangah Amai tirhfialmi cu ziangah so amai duhmi a hril lo ding? Pathian in an rundamnak a khamsaknak a um lo. Pathian in zalen zetih duhhril theinak daan a tuahmi thawn a kalhaw lo. Cu hnakih a thupi sawn cu mi hmuahhmuah hrangah Jesui thihnak thutak sawn hi a si. A tumtahmi cu mi hmuahhmuah in rundamnak ngah hai seh timi a si.

Rom 9 ih a simmi kan theih zo mi vekin hminhmer ih rundamnak thu a sim mi a si lo. Hnatuan pakhat hrangih kawhnak thu a si. Hi mi bungah thu lamdang harsa a um lo.

THAWHSAL NI December 3
PAUL IH PHURRIT PHURHMI 

Nannih cu keimah hrangih pekmi miphun thianghlim, puithiam hnatuannak sungah keimah I riantu miphun nan si ding tiin Israel mipawl hnenah simaw. (Suah. 19:6) 
______________________________________________________________________________

Pathian in sakhaw nei lo, thim lakih a um mipawl le milem biaknak ih a ciahaw mipawl hnenah thuthangtha simtu minung a tul. Cui hnatuan dingah Israel miphun a hril ih, an hnenah a phuangaw. A tumtahdan ahcun zohthimtlak miphun si dingin a dikmi Pathian hnenah mi hruai theitu si dingah a duh. Israel miphun hmangin Pathian in mi hmuahhmuah amai hnenih hruai theh dingah a tumtah a si. Raithawinak hmangin leitlun mi hmuahhmuah in nunnak an ngah ding ti a langter. Israel miphunpawl cu thlawsuah tampi an ngah ih, an karh zet. An ramri an kauh sinsin ih leitlun ah an khat theh zikte.

Rom 9:1-12 siar aw. Tlasam zet le tawntai zetih milai an um can khalah Pathian cu a rinum ti thu Paul in ziangtin in sim?
_____________________________________________________________________________

Paul in Israel-pawl hnenih a thukammi a zatei a siatbal theh lo timi simfiang a tum. Pathian in a tumtahmi kha a tanglai mi hnenah tuahsuak a tum. A tanglai mipawl kha daan vekin cohlan an si theinak dingah Paul in Israelpawl thuanthu ah a luhpi sal. Pathian in mi hril mi a nei timi ah (1) Pathian in Abraham cithlah hmuahhmuah kha thukam fa an si thluh a ti lo. Isak ih cithlahnak lawngin a si ding tiah a ti. (2) Isak ih cithlah mi zaten a hril theh cuang lo, Jakob hnen lawngah thukamnak a tuah.

A dotdot in cithlahdan ihsin ro an sarawkdanpawl hi rundamnak ah hman theih a si lo nan rak theihthiam ding hi a thupi zet. Himipawl ih cithlah thisen tla na nei mai thei. Cule an cithlah mi tla na si men thei. Kawhhran sinak khal in covo ngahtlak na si men thei. Cupawl hmuahhmuah tla thulo lak men an si ih thukam lenglam an si theh. Duhdawtnak in hna a tuan mi zumnak a langtertupawl kha thukamfa an si (Rom 9:8).

Rom 9:6 ih catlang kha zoh aw. Israel mi an zaten Pathian ih minung an si theh lo. Hlanlai Israel ih an tuah vekin kha mi kha kan sanah phun tampi ih tuahmi a um tla a si thei. Adventist kan si vekin a thupi zetmi thucah hitawkah ziangso kan hmuh thei?

TLAWNGKAI NIKHAT December 4
HRILMI 

Pathian in nunau nui hnenah a u in a nau a rian ding tiah a ti. Cumi cu Jakob ka duhdaw ih Esau ka hua tiih nganmi thawn a bang aw (Rom 9:12,13). 
___________________________________________________________________________________

Tuzarh zirlai thuhmaihruai ih a langtermi vekin Rom 9 hi theih olte a si. Mi pakhat hril a sinak thu vekin a sim nan pumpak rundamnak thu a si lo. Hnatuan tum ce tuan dingah Pathian in mi pakhat a kawh thu a sim sawn. Leitlun ih thuthangtha simnak ah Pathian in Jakob kha palai hnatuan dingih cithlahtu si dingah a duh. Esau rundam a si lo ding tiih sim duhmi a si lo. Mi hmuahhmuah rundam ding hi Pathian in a duh vekin Esau khal a run duh ve a si.

Rom 9:14 siar aw. Kan rak zir zo mipawl thawn an pehzomawkdan ziangtin so kan theithiam ding? 
________________________________________________________________________________

Paul in pumpak rundamnak thu a sim lo, Pathian in a zangfahnak kha mi hmuahhmuah a pek. Pathian in mi hmuahhmuah rundam si ding a duh (I Tim. 2:4). Rundamnak thlentu Pathian zangfahnak kha mi hmuahhmuah hnenah a lang (Titus. 2:11). Kha mi hnatuan dingah Pathian in miphun pakhat a hril ih, cui miphunpawl in an duh lo ahcun hril an sinak kha an kilhim thei lo a si. Esau in taimak suahin zuam rero hman sehla, Messiah ra suahnak dingih cithlahtu ah hril a si cuang lo ding.

Pathian ih hnatuan, mai duhnak ih hril theih a si lo. Esau kha rundam si hlah seh tiah Pathian ih a khamnak a si lo. Khrih thawngih pekmi zangfahnak kha mi hmuahhmuah hrangah laksawng a si. Kan zaten rundam dingih hrilnak a si ih hloral ding kan um lo (Efe. 1:4,5; 2 Pet. 1:10). Himi hi kanmai duhhril dingmi a si. Duhhrilnak in Khrih sungih in kam mi kumkhaw nunnak kha kan kilhim thei. Mi hmuahhmuah hrangah Jesuh a thi ih, amah a zumtu hmuahhmuah kumkhaw nunnak ngah dingih hril mi an si tiah Pathian in a sim zo. Cuih zumnak in misual thiam a coter ih zawnlung ih thu thlun dingah a tuah.

Leilung sersiam a si hlanin Jesui ruangah rundam dingih hrilmi kan si. Hril na si ruangah kawhmi na si. Jesui thawngin Pathian in na hnenah ziangkim a lo pek. Co tha kan co ngah mi le ruahsannak kan neih  mi hmuahhmuah kha ruat aw. Himi thukam sunglawi kha thildang thawn tahthim ding a um lo. Ziangruangah? Na taksa duhnak in Jesuh thawn nan pialawknak ruangah ziangtluk ih riahsiatnak so na tuar?

TLAWNGKAI NIHNIH December 5
RUAH BAN LO THUTHUP 

Bawipa in, “Ka ruahnak cu nan ruahnak vek a si lo. Ka lamzin le nan lamzin tla a bangaw lo, Van khi lei hnakin a sang vekin ka ruahnak le ka lamzin cu nan ruahnak le nan lamzin hnakin a sangsawn” (Isai. 55:8,9).

Rom 9:17-24 siar aw. Tampi kan siar mi a um zo ih hitawk ah Paul ih a sim duhmi ziangtin so kan theithiam ding? 
___________________________________________________________________________________

Paul in Pathian ih rundamnak hna a tuannak kha Izipt ram sal suahnak ihsin a sim. Pathian in amah le amah a phuanawknak ah Izipt ramah natsia a thlenter. Pathian in a mipawl luatnak dingah Izipt-pawl parih a thlenter mi a si. Israel-pawl ih Pathian hi Pathian ngaingai a si timi langternak ah miphun dangpawl hnen khalah a tuah theu. Himi hi amah an biak theinak dingih sawmnak a si.

Faro cun Pathian do dingih thuthen catnak a tuah zo ruangah a thinlung a hakter. Cucing khalin a rundamnak a khar sak cuang lo. Pathian in Faro pumpak rundamnak a kharsak ruangah a thinlung hakter mi a si lo. Israel-pawl thlah dingih dilnak lawngah a lung ruhter mi a si. Faro hrangah Khrih a thi. Mosi le Aron le midangpawl thawn an bangaw theh.

A poi zetmi cu a tlusia mi milai ih ruahnak bite thawn Pathian le a hnatuannakpawl thlirnak kan neih theu ruangah a si. Leilung hmuntin ih a um mipawl in Pathian lamzin theithiam dingin ziangtin so ruahnak kan neih theu? Doctor in Oparation a tuah hlanah kut kholh ding timi kha a liamzo mi kum 171 lawngah an theihmi a si. Leitlun ah theih har zetmi Pathian ih lamzin kan hmai ih kan ton dingmi ziangtin so kan theih thei ding? Can tampi um lai sehla, ziangso an hmuhsuak lai ding timi tuini ah kan theih ban lo mi a si.

Pathian lamzin kan thei thei lo. Jesuh a ra ih ziangvek so Pathian a si ti in theihter (John 14:9). Pathian le a duhdawtnak Jesuh in kan hnenih a langter mi le a ziaza vekih kan nun thei venak dingah ziangah so kan nunah theih thei lo mi thuthup mangbangza thil kan karlak ah a um thei? Kan parah dik lo zetih an tuah mi ruangah kan tuar mi harsatnak ihsin Pathian in rinum zetin in bawm ding tiah ziangtin so kan theih thei?

TLAWNGKAI NITHUM December 6
AMMI: KA MINUNG

Paul in Rom 9:25 kha Hosea 2:23 ih thu a lakih Rom 9:26 ah Hosea 1:10 ih thu a lak. Hosea kha hlawhhlang nu kha vathit aw tiah a fial mi sirhsan in a tuah. Khami kha Pathian le Israel-pawl an pehzomawknak langtertu ah a hmang. Ziangahtile hi miphunpawl in Pathian dang dung an thlun. Himi thit-umdan ihsin hrinmi fatepawl tla Pathian ih a hnonnak langtertu a si. Milem biak ruangih Israel-pawl hrem tuarnak ding a si. A fa pathumnak cu Loammi ti a si ih, Hos. 1:9 ah ka minung nan sinawn lo tinak a si.

Pathian in a minungpawl hremnak can a cem hnuah a dinthar salnak can a thleng ding. A dik lomi an pathian hlon hlo in anmah thawn thukam tuahnak ding ni a thleng ding tiah a rak sim cia a si (Hosea 2:11-19). Ka mi nan sinawn lo timi kha “Ka minung” Ammi tiah a cangsal a si.

Paul san ahcun Ammi timi ah “Kanmah tiangin kan tel…… Judah miphun lawng a si lo. Zentail tla an tel ve” (Rom 9:24). Leitlun pumpi hrangah thuthangtha hramthoknak kha fiang zet le hmual nei zetin a sim. Adventist kan si ih Thuphuan 14:6 ih in kawhnak ah kan tel zo ruangah thilmak a si lo. Cule vanah a zam rero mi vancung mi pakhat ka hmu. Amah cu leitlun miphun kip, hrin kip, tongkip, ram kip le mikip hnenah kumkhua ih a hmunmi thuthangtha thantu a si (NKJV). Paul ih san a thlen hlan Israel-pawl ih san lai vekin tuisan khalah rundamnak thuthangtha leitlun khuazakip ah than ding a si.

Rom 9:25-29 siar aw. Paul in amai san ih thil cangmi thuhla ah thlung hlun thu laktahrat in thu simfiangnak a tuah. Himi catlang a sirhsan mi ah ziangso thucah a neih? Ca siartupawl hnenah ruahsannak a pekmi ziangso a um? 
___________________________________________________________________________________

Paul ih sungkhatpawl in thuthangtha an duh lo ih an hnonnak kha a nasa zetmi riahsiatnak le thinnatnak a nei a si (Rom 9:2). Anmah cu a tangmi umsun an rak si. Milai thukam tuahmi vekin Pathian thukam tuahmi a pelh dah lo. Kan zum thei a si ahcun can cem tiang Pathian thukam mi cu a thleng famkim ding. Cui thukam cu keimai hrangah a si tiah kan phuang ahcun kanmah ah a famkim ve ding.

Thu a lo kamtupawl in an thu kami an pelhter theu maw? Midang hnenih na thukam mi na pelh dah maw? Thukam na tuah mi ah na pelh mi a tam sawn lo sawm? Na rinsan zetmi ih thu a lo kami ah a thukam pelhnak ihsin ziangso na zirsuak thei? 

TLAWNGKAI NILI December 7
BAHNAK LUNGTO 

Cuti a si ruangah ziangtin kan sim ding, dingfelnak a hawl lotu Zentail-pawl in dingfelnak cu an hmu ngah zo. Cuih dingfelnak cu zumnak parih thumaw mi a si. Asinan dingfelnak daan a dawitu Israel-pawl in dingfelnak daan ih umdan an hmu ngah lo. Ziangahtile zumnak parih a thumaw mi dingfelnak an dawi ve lo (Rom 9:30-32). Hi mi hi a thupi zetmi thuthangtha a si. Himi hi cankhat lai ah hmun pakhat hrang lawngih nganmi thucah a si. Kanmai hrangah ziangtin so kan hmang thei ve ding? Israelpawl ih an palhnak ah ziangtin so kan hrial thei ding?

Israel-pawl in Pathian in an hrang a tumtah sakmi hnakih tha sawnin an dawi rero nan, an hlawhsam. Ziangahso an palh? Paul in a phunpipawl thu a simfiangnak a tuahmi tongfang hi theihsual ding a um lo. 

A mak zetmi cu Pathian in Zentail miphun cohlan dingah duh hleicenak a nei cuang lo. An hnenih a thleng mi thuthangtha ruangah a si sawn. Pathian in an hrangah dinfelnak a phuanmi cu anmai ai-awhtu Jesuh Khrih an pomnak ruangah a si ih zumnak ruangah a si.

An buainak cu Israel-pawl ih an bahnak lungto kha a si (Rom 9:33). An zaten an sitheh cuang lo (Tirh. 2:41). Nazareth khua mi Jesuh Pathian thlahmi Messiah 115 116 a si tiah a pom duh lotupawl an si. An rak ruahdan vekin Messiah a rat lo ruangah, a rat ngaingai tikah cun a theithiam lo a si.

Himi bung a cem hlanah Paul in thlung hlun cang a dang a lak sal. “Ngai hnik Zion ah bahnak lung le tluknak lungpi ka ret, zokhal a zumtu cu an mualpho lo ding” tiah ngan in a um (Rom 9:33). Himi cangah Paul in rundamnak hrangih a khawkhanmi ziangtluk in so a thupi timi a langter sal (I Pet. 2:6-8). Tluknak lungpi tiah a hmang. Amah zumtupawl cu an mual pho lo ding. Jesuh kha mi tampi hrangah cun tluknak lungpi a si ngaingai. Asinan amah zumih a duhdawtui hrangah cun “rundamnak lungpi” a si (Sem. 89:26).

Jesuh kha bahnak lungpi (or) dodalnak lungpi ih na theih can a um maw? Cuti sisehla ziangvek phun in so a si ding? Kha vek khan a tuahmi ihsin a suak mi a si lo sawm? Jesuh thawn na pehzomawknak ah khavek phunih na theihawk lonak dingah ruahsannak pakhat ten a zirsuah mi ziangso a si ih, ziangvek in so na sarsuah thei? 

TLAWNGKAI NINGA December 8
RUAHBET DING: 

Mipi dinhmun le pumpak dinhmun ihsin hril kan si. Rundamnak ahcun Pathian thu vekih hrilnak lawng a um. Mi tampi in hrilmi kan si ahcun vanlam thlawsuah a netnak tiangin an thlir. Kha mi kha Bible in hrilmi a ti mi ih a sullam a si lo. Rundam dingah khur le thia phahin tuan suak dingah hrilmi a si. Thatnak hrangah zumnak ih raldo dingin ralthuam hruk dingih hrilmi a si. Pathian in a thianghlim lomi duhhiarnakpawl do dingah le setan kutthak hnoihnak do ding a si. Tukforhnak sungih lut pang lo dingah cat bang loih zumnak nei dingah hrilmi a si ih Pathian thu vekih thlun dingah le Pathian thu kha a ngaitu men si loin nunih tarlangtu si dingah hrilmi a si. Hivek hi hrilmi tiah Bible ih a sim duhmi a si. E.G. White, Testimonies to Minister and Gospel Worker. Pp. 453, 454).

A nungmi Pathian ih hnatuannak (or) a ziaza hi a thi thei milai in a thei famkim thei lo. Kanmahten Pathian hmu dingih hawl thei khal kan si lo. A cak zetmi mi neinung Bawi phun khal siseh, mi nauta tawntai mi farah thawn bangrep in a thianghlim mi in mangbangza ih milai a thomnak a tang ringring lai. Khawdur le khawthim a kimvel ah an um. A tohkham cu dingfelnak le dingthluk lairelnak parah a toh (Sam 97:2 RV). A thiltitheinak a cem dah lo mi le a zangfahnak hmuahhmuah kan theih theinak dingah kan hnenih in umpinak ruangah tampi kan thei thei. A tumtah mipawl kha kan phutawk in theih theinak kan nei. Cui tlunah ziangkim tithei duhdawtnak thawn a khatmi a kut cak kan rinsan thei a si (E.G. White, Education p. 169).

RELTLANG DING: 
1. Pathian in mi hrekkhat rundam dingin a hril ih, mi hrekkhat thi hloral dingah a hril timi Khrihfa zirhnak hi kan suah hlan ihsin a rak um zo. Duhdawtnak cem thei lo le ziangkim titheitu Pathian in hloral dingah na sem hlan ihsin hrilmi rak si bang awla, duhhrilnak na tuahmi tangkainak a nei lo dingih, thiam lo coter mi hremhmun ai ih kaih mi mi tampi hell mei ih kang dingmi an si ding. Phundang ih sim ahcun, kan duhhrilnak tel lo, Pathian khawkhannak tangah mi hrek cu kumkhua nung lo ding le Jesuh thawn pehzomaw ih nunnak nei lo an si dingih hell ah kumkhua kangral ding an si. Hivek ih thu hi ziangtluk in so an palh. An fehpi mi thu le an hmuhdan le kan hmuhdan zohthim aw, ziangvek so an danglamnak a si? 

2. Tui ni Seventh-day Adventist kawhhran hi leitlun ah kawhmi kan sinak le hlanlai Israel mipawl kawh an sidan bangawknak ziangvek in so na hmuh? An danglamawknak le an bangawknak ziangpawl so an si? Kan tuahthat thei ding mi ziangso a um?