Mission Story: Sanini (Saturday) Sangkahna (Agen: Nikita Kirkachev, 22)

November 11                                                                        Rostov-on-Don, Russia Gam

Nipi 6na: Sanini (Saturday)  Sangkahna   (Agen: Nikita Kirkachev, 22)

[Khangmoi laai papi khat geen sak in.]

Seventh-day Adventist khat ahi ka nu in pasalno ka hih laai-in Pasian thu hong hilha, ahizongin ka pa in ka kikhop ding hong khaam hi.  Ka pa in, “Kum 18 na phaakkhit ciangin na uut bangbang na hih thei ding hi. Ahihhangin, tua hun mateng, ka thu nong mankul ding hi,” hong ci hi.  

Kum 18 ka phaakkhit ciangin, Russia gam ii a khanglam aa om Rostov-on-Don khuapi ah a kihong saangpi (university) ah inn lamdaan tawh kisai pilna a sin dingin inn panin ka pai khiata hi. 

Ka vanteng ka suahkhiat khit ciangin saangpi tawh a kinaai pen Adventist biakinn ka zong pah hi. Limtakin Lai Siangtho sim ka kipan a, Sabbath ni-in ka kikhawm hi.

Sabbath Tawh Buaina

Ka saangkahna saangpi (university) tawh buaina ka nei seisai mawk hi. Ka saangsiate’n laihong khaak uh hi. Saturdayni simin saang ka kah lei laai khat ka ngah hi. Saturdayni tamveitak saangkah lo ka hihmanin laikhaak tampi ka ngah hi. Laikhaak tampi a ngah saangnaupang khat pen saangpi panin  ki hawlkhia thei hi.  

Ka pa in saang kah loin biakinn ah ka kikhop lam a theih ciaangin heh lua hi. Ka pa in phone tawh sawtveipitak ka kihona uah hong haangawp dikdek hi. Ka pa in biakna maan lopi a zui bangin hong mawhsak hi. Ka pa in kum 18 ka phaakkhit ciangin Pasian a mangngilh dingin hong lamen a hihlam kician takin ka thei hi.  Ka pa ka itna ka gena, ahizongin amah saangin Topa Pasian ka it zawkna leh Ama’ thu ka mannop zawkna thu ka gen giap hi.

Ka nuntakna ah Pasian’ thu amasapen in koih kahih manin kanu bel na lungdam hiuhiau hi. Ka nu in  Isaiah 41:10 pen ka zaak in hong sima, “Lau kei in, nang kong ompih hi; lunghiang hei in, Kei na pasian Kahi hi. Kong thahaatsak ding hi,” cih thu tawh tha hong pia in, ka nu in thu hong ngetsaka, ken zong thu ka ngen hi.

Saangpi bawda uk siapa kiangah Sabbath (Saturday) ni saangkah loh nadingin phalna ka ngen hi.  Ahizongin bawda ukpa in hong phal zawh lohna hong gen hi. “Adang saangnaupangte in nang pen maipha piatuam hi cih tawh hong mawhsak ding uh hi,” hong ci hi.  Kei zong lai hong hilh siate kiangah Saturday (Sabbath) ni taangin a nidang ni khat ah lai sinding nget ka sawm hi. Ka nget banglian in kum nih sung lem mahmah hi. Laivuanna tampi zong Sabbath (Saturday) ni-in kivuana, ka siate in a ni dang khat ah lai hong vuansak uh hi.  

Amasa lamin, ka khaanpihte in hong telsiam lo uh hi. Ahizongin a nunglam ciangin siate kiangah Sabbath (Saturday) ni saang k kha loh nadingin hong genpih uh hi.

Saangsia tampite’n dik hong salo mawk uh hi. Lai sin ding saangin biakin ah kikhop ding ka teelna a haang pen amau telsiam lo uh hi. Saangpi panin hong kihawlkhia kha ding cih ka lung khamna khang seemseem hi.  Ka pa in pilna thupi sa ahih mahbangin, amah lungkim loa a om ding zong ka deihtuan kei hi. 

Thupiak Nunungpen

Ni khat, bawda ukpa in a zum ah hong sama, ka laulau, ka lung khamkham mah bangin thu-piak nunungpen lai hong pia takpi hi. “Khatvei laai Sanini  saang na kah kei leh kong hawlkhia ding hi,” hong ci giap hi.

Hih buaina hangin biakinn ah thu ka ngen uh hi. Bawda ukpa kiangah ka pastorte  nih va hawh in Sanini sang ka kah lohna a haang va telgen uh hi.  Topa Pasian in hong panpih hi. Saangpi (University) aadingin laisin ding a dang ka sin nop leh saang kah suak thei dingin bawda ukpa in pastor nihte tung na gen hi. Amah in cidamna pholaakna pawl tuamtuam a phuan dingin kei hong sawl hi.  

Ka saangkahna vai pen lem mahmah hi. Tua zawh a sawt loin bawda ukpa saang pain paikhia ta ahih manin ka buaina hong kipan leuleu hi.

Ka siate khat in laivuanpi hong vuansak nuamlo mawk ahih manin buaina lianbel ka tuak hi. Ama’ laihilhna ah Sabbathni tawh kituak ahihmanin khatvei beek saang ka kah kei hi. Ka khaanpihte’n Sabbath ni aa innlai bawl dingte hong hilh in, a laisinte uh zong amau kiang panin kaa teisawn hi.  Ka saangsianu kiangah Sabbathni lai ka vuan theihlohna a haang ka gen hangin, “Sanini in saang hong kah in. Tua ahihkeileh, hong kah nawn vetken,” hong cingiau mawk hi.  

Ka pilna sinna a tawpna hita ding a hi vemaw ci-in ka ngaihsun hi. Bawda ukpa in hong huh loin, ka saangsianu inlah, hong awlmawh vetlo laailaai hi. Amahmah in laivuanpi pen Sanini dong hun geel ngiauta hi.

Topa Pasian in hong huh nadingin kap in thu ka ngen hi.

Lungsim Kikheelna

Ka thunget zawh a sawt loin, ka sianu ka kiangah hong pai in, “Ka zum sunah hong pai in,” hong cih ciangin a zum sungah ka pai hi. “Na innlai bawlte hong lak in,” hong cih ciangin ka innlai bawlte ka lakpah hi.

Tua saangsianu in laivuanpi a vuan theih loh nadingin vaihawm hi. Tu-in ka innlai bawlte hong sitsak dingin thukimta hi. Topa Pasian in ka thungetna hong dawng ahihmanin, ka sianu lungsim kheelsak a, ka laivuanna ka ongta (zota) hi.

Sabbath tonate tungtawnin, Topa Pasian thu ka man nading Ieh Ama’ khut sungah ka kipum-aap nadingin tha thak ka ngah hi. Topa Pasian in ka mailam hun aadingin lametna leh khamuanna hong pia ahihmanin Topa tungah ka lungdam mahmah hi.

A sawt loin lukhu neelkaai (degree) ka ngah dinga, Topa Pasian’ n aka seemta ding hi. Thu nih hangin ka mailam aadingin ka lung a kham kei hi. Thukhatna ah, Topa Pasian in Ama’ taklam khut tawh hong let ding kamciamna ah Amah citak hi. Thunihna ah, lukhu neelkaai ka khuk madiak a ka laiuan tawpna zong Sabbathni tawh kituak lo laailaai hi.

Tu kuata Sabbath sawm leh thumna sumpi pawlkhat tawh keimah bangin Topa Zeisu hong itna midangte tung a genkhiasawn ding sangnaupangte aadingin Rostov-on-Don khuapi ah Seventh-day Adventist kiim leh paam phaaktheih nading phualpi kilam ding hi.  

Lungdamna thu taangko zawh nadingin na Sabbath School sumpi uh tawh nong huh uh lungdam mahmah ung.

##########@@@@@@@@@@#########