ZSS Lesson 2: KILANGPAN NA

SINNA 2 October 7 - 13
KILANGPAN NA

NIPI NI (SABBATH NITAK LAM) October 7

SIMDING TE: Heb. 8: 6; Mat. 19: 17; Rev. 12: 17; Lev 23; Acts 15: 1 - 29; Gal. 1: 1 - 12.

KAMNGAH: “Pasian in Moses tung tawnin Thukham hong pia a, ahi zongin Jesuh Khrih hangin itna leh cihtakna thu hong pai hi”(John 1: 17).

Tanglai Pawlpi masa te sunga om atam zaw Jew te in, Zeisu Khris pen Judah te Messiah pa hi ci in a san theihna hangun, a pu a pa te Upna pan in a lampial a hihna uh leh, Pasian mi a hi dingin Thuciam na tungtawn a Pasian kamciamna a ngahte a hihna uh, pan un pial khin

a hihna uh a kiphawk kha lo mihon te a hi uh hi. Tua bangin in ngeina lui pan in pialkhiatna in a man gamtatna a hi hi. A buaihuai thukhat in, Jew biakna a um Jew mikhat in Zeisu a san theihna dingin Christian a suah kul hi cih thu a hi hi. Tua mah bangin mi atam zaw te a

dingin a buaihuai thudang khat in, Gentile mikhat in Zeisu Khris a san theihna dingin Jew minam a suah phot kul cih thu a hi hi.

A sawt lo in, Jerusalem Council kikupna tungtawn pan in, tua buaina tawh kisai a ven na ding khensatna khat hong nei thei ta uh hi. Gentile mite tungah Thukham zuihna leh Ngeina te tawh buaina a pia lo dingin ki khensat hi. Cihnop na ah, Gentile mi khat a in Zeisu a san theihna Jew miman suah masak kul lo hi cih thu a hi hi.

Tua bangin a ki khensat khit hangin, Makai honkhat te in, Upna tawh a hong kikheel Gentile te tungah a vun-atna ding uh leh, zuih ding thukham tuamtuam te hong tangsawl kik veve uh ahih manin, Pawlpi sungah buaina a hong tung hi. A maute ngaihsutna ah, Gentile mite in Pasian’ thuciamna kamciam te tungtawn pan in a nopsakna khempeuh a ngah kim theihna dingun tua bangin, zuih dingin a kilawm thukham te leh thukhun te a man ding mah uh a hi hi ci uh hi. 

Tua bangin buaina hong om ciangin bang ci bang thupiak na tawh khensatna hong nei uh hiam?

NIMASA NI (SUNDAY) October 8
A HOIH ZAW THUCIAMNA

Heb. 8: 6 sim in. Hih Laisiangtho mun in a gen nop bang hiam? A hoih zaw kamciamna tawh kisai in eite in bang ci bangin tel thei ding i hi hiam?

__________________________________________________________________________________

Laisiangtho Bu sungah Thuciam Lui leh Thuciam thak a ki lamdan penpen na in, Laisiangtho thak hun sungin Messiah ahi, Nazareth khua Zeisu thu hong kidawk hi. Amah pen, Pasian in Gumpa (Messiah) dingin a hong sawl ahi hi. Mihing te in Amah ki theihmawh bawlna tawh

Gupkhiatna thu ki lamet ngam huai dek lo hi. Amah in manpia in tatkhiat ding a hong vaihawm sakna tungtawn bekin amau te mawhna kimaisak thei bek ding hi. A paubang lo a bukim Ama (Topa) nuntakna sungah kiphumna bek tawh Pasian mai ah, mawhsak thukhenna pan in ki dingtang zo bek ding hi. A thudang tawh gen le’ng Gupkhiatna ngah i cih pen, Zeisu’ sung bekah dik kisak ngah theihna hi a, lampi dang om lo hi.

Thuciam Lui a om misiangthote in, a hong piang ding Messiah hun leh Gupkhiatna thuciamna thupha te na-na ngaklah mahmah uh hi. Thuciam Thak hun ciangin mite in, “Nazareth khua Zeisu pen, Pasian in a hong sawl Messiah pen, amau te’ Gumpa dingin sang ding i hi hiam? cih’ dotna tawh kiphut tuahna hong om hi. A zenzen in, Amau te in Zeisu pen, ama hihna mah sangpah umpah mai uh hen la, Ama sungah amau leh amau ki-aap thei pah uh hi leh, Topa in amau te a khawnkhawnga apiak sawm diksakna tawh amau te in Gupna a ngah dinguh hi ziau hi.

Tua hun laitak, Thuciam Thak hun ah zong Pasian’ thukhamte pen, kikheelna om zenzen lo hi. Bang hang hiam cih leh, Pasian leh Khris Zeisu’ lungsim omzia te Thukham sungah kimu thei ahih man ahi hi. Pasian Thukham 10 te zuihna, leh tua te tawh kalsuanna in Thuciam Thak (New Covenant) sungah kalsuanna hi a, Thuciam Lui (Old Covenant) tawh kizopna zong ahi hi.

Mat. 19:17; Rev. 12:17; 14:12 leh James 2:10, 11 munte sim in. Hih Laisiangtho thak mun sungte ah, Thukham (a diakdiakin Thukham 10) tawh kisai in bang hong gen hiam?

_______________________________________________________

Tua mah bangin, tanglai Isreal te in namdangte tawh a ki lamdan na uh ahi amau’ aituam neih ngeina Pawite, zehtan thukham (ceremonial Laws) sunga kihel thuciam lui (Old Covenant) gamtatna khempeuh te in, Zeisu hangin, tua ngeina lui khempeuh kiphiat/kizom

nawn lo a, tua sangin a hoih zaw “thuciamna thak” (New Covenant) a hong kipan thei ahi hi.

Jew Biakna pan in Christian Biakna sungah kilaih tohna hangin, Jew minamte leh Gentile minam te kikaal ah kilamdan nate ki telsiamna a neihtheih na dinguh ngiimna tawh, Paul in Rom Laikhak a gelhna bulpi ahi hi. Tua banga kikheelna ah hunlak hong kul hi. Zeisu a hong

sang thei Jew minam tampi tak te in, tua banga hong piang toto a nasia mahmah ki kheelna sungah a zongsang thei dingin kiging zo mahmah lo uh hi.

Na deih mahmah Laisiangtho sunga kamciamna in bang te hiam? Tua Kamciamna a tangtun theihna dingin bangzah vei bang thu ngen na hi hiam? Bang ci bangin na teelna in, tua kamciamna te na nuntakna sungah hong tangtung thei ding hiam?

NINIH NI (MONDAY) October 9
JEW TE’ NGEINA TE’ LEH THUKHUN TE

Hun na piak zawh zahzah, Siampi Laibu sung limsim mahmah in. (A diakdiak in, Lev. 12, 16, 23 sung sim gai in). Hih bu sung na simna pan in, amau te ngeina, biakpiakna leh thukhun te tungtawn pan in na lungsim sungah bang thu te hong lungngai sak hiam? Bang hangin tua zaha ngeina thukhun khempeuh, Thuciam Thak sungah hel theih dingin piang thei lo hiam?

_______________________________________________________

Laisiangtho lui sunga Thukham te, anam tuamtuam in i khenkhiat ciangin kitel theih zaw hi. Tua te sungah (1) Thukham Sawm (Moral Law), (2) Zehtan/ gangawh Thukham (ceremonial law), (3) Gam-ukna Thukham (4) Upadi leh thukhenna tawh kisai Thukham (5) Cidamna Thukham cih te in kikhen thei hi.

Hih ci bangin khat leh khat anam in teltheih dingin a tuamtuam tawh a kikhen bek hi a, atak takin khat leh khat a kizopna uh zong om hi. Mun khatkhat te ah a ki thuapna mun zong om hi. Nidang lai mite in, a tuamtuak leh, a kikhen cih bangin a mu kei uh hi. 

Moral Law i cih ciangin Thukham Sawm cih tawh ki tomlak hi (Exo 20: 1 - 17). Hih Thukham in mihing hihna sungah ahoih gamtat theihna dingin pulaakna hi. Hih zuih ding thukham sawmte in Laisiangtho sunga Bu masa nga-te sungah, zai takin kigen a, thukhun na leh thukhenna te ah kizang thei mahmah hi. Hi ci bangin zaitakin a kigen man in, abang ci bang dinmun khempeuh ah, Pasian thukham zui pelmawh ding cihna ahi hi. A tuam om deuh thukham in Gam-ukna thukham ahi hi. Hih Gam-ukna thukham mahmah zong, Thukham Sawm sung mah-ah kinga hi. Hih thukham in gammi te leh kumpi te’ kikaal kizopna leh, gammi tektek tungah kizop dan ding theihsak na a hi hi. Tua bangin a thu tuamtuam tawh, thukham a palsat te thukhen dan ding zong tua te sungah ki ciamteh hi.

Ceremonial Law i cih Zehtan Thukham te in, Biakbuk ngeina tawh kizui in, gangawh biakpiak na, biakpiak dan a tuamtuam te leh, piakkhiatna a tuamtuam te ahi zongin, a milip in a sep ding uh a masuan tek uh kihilhna ahi hi. Biakpiak ni hun te kiciamteh a, koi ci bangin tua ni thupi te zang ding cih zong kigelh hi.

Cidamna tawh kisai Thukham in, thukham dangte mah tawh kithuap, a kizom mah ahi hi. A niin bang thukhamte a kicih nak leh, gangawh biakpiakna tawh kisai in, a siangtho lo hi pah uh hi. A hi zongin amau te in, tua thukham sungah pumpi sianthona leh cidamna tawh kisai

thugui pi te hel uh hi. A siangtho leh a siangtho lo an (sa) tawh kisai in thukhun te pen, pumpi’ ngaihsut-khensatna tungah kinga zaw hi.

A huampi in Jew mikhat in, hih Thukham khempeuh te zuih dingin, Pasian kiang pan in alom in a hong pai cih a teltheih hangin, amah in ngaihsut theihna tawh kician takin a khentuam theih ding kisam hi. Thukham Sawm leuleu pen, Pasian in a mite tungah direct in agen/a piak Thukham ahi hi. Tua hi a, thupi seh zaw ahih manin a tuam vilvel in tuam koih ding ahi hi. Thukham dangte ahih leh, Moses tungtawn pan-in a nung piak thuah ahi hi. Biakbuk tawh kisai in sep dinga kikoih thukhun khempeuh te ahih leh, biakbuk nasep hun sung bek mah huam pah hi. 

Gam-ukna tawh kisai Thukhamte a hih leh, Amau Jew te in a suahtakna te uh, mi namdangte ukna sungah a lut masiah uh kizang thei na pi in, Gam-uk dangte khutnuai ah kizang thei nawn lo hi. Gangawh biakpiakna tawh kisai te zehtan thukham te zong, Biakbuk a kisuksiat ni a kipan kizang thei nawn lo hi. Tua bek tham lo in, Messiah a hong tun khit a kipan in a limciing na khempeuhte, a taktak om khin a hih man in kisam nawn lo hi.

NITHUM NI (TUESDAY) October 10
MOSES NGEINA BANGIN

Acts 15:1 sim in. Bang thu tawh buaina piang hiam? Bang hangin mi honkhat te in hih thu tawh kisai Jews mite ading bek hi ci thei ahi hiam? Gen 17:10

_______________________________________________________

Zeisu kiangah kha tampi tun ding cih ngimna tawh citak taka na asem, a hahkat Sawltakte, Pawlpi makaite leh, Pawlpi mite in Antioch khua ah kipumkhat takin a omkhop laitak un, Judaea gam pan in “Pharisees pawlte” a kici Jew biakna sunga thu-um mi pawlkhat te hong pai uh a, Pawlpi sungah asawt lo in nasia taka buaina a piangsak thei ding dotna te hangin Gentile thu-um mite sungah lauhuai takin mite hong patau sak uh hi. Kimuang takin hih Siapi te in, Gupna ngah theihna dingin, mikhat in vunaat phot hen la, zehtan thukham tawh kisai aneng atawng in zuih phot kul hi ci in, hangsan takin hong gen uh hi. A taktak in zong, Jew mite limlim in, Pasian’ piak tua zehtan thukham tuamtuamte zuihna hangin amau leh amau a kipaak mahmahte ahih ban ah, Zeisu upna sungah a kikheel khin Jew minam atam zaw te mahmah in zong, kician takin Pasian in apiak ngei ahi “Biakpiakna ngeina” khat pen, Amah mah in kheel mawkmawk lo ding hi ci in um uh hi. Tua ahih manin Jew te’ Thukhamte leh Jew ten a zat uh Zehtan biakpiak dan a tuamtuam te Christian biakna ngeina sungah hel ding leh, gawm khawp dingin nakpi takin hanthawn uh hi. A taktak ahi Pasian Tapa a hong sihna hangin a limciing ahi gangawh biakpiak na te beikhin a hihna leh tua sihna hangin a bei Moses thukham ngeina, pawi leh ni te, kisam nawnlo a hihna amau te in a khentel theihna dingun, a lungsim te uh zia ol (kaai) lua hi.

Acts 15: 2 - 12 sim in. Koi ci bangin hih kinialna te lemtuah/siansuah thei ding i hi hiam?

_______________________________________________________

Pasian lamlahna ngak kawm in Paul in, Pawlpi sungah thu-um mite ki pumkhat in, kipawl khopna a neih theihna dingun atawntung in a kiging sa in om hi. Bang hun banghun in a thupi kikup khopna a om ciangin, Pawlpi sungah thusun na tawh Pasian kiang pan in pilna ngen kawm in a manpen khensatna aneih na tungtawn pan un kipumkhatna a piantheih na ding mah lunggulh uh hi. Ellen G. White: The Acts of Apostles, p. 200.

Pawlpi sungah a tangzai zaw in, pawlpi mite tawh na asem khawm ding leh ma a pang khawm dingin, amah leh amah nasep lianpi a sem dingin Zeisu in a saptuam sawltak a kici Paul in a lunggulhna pen lunglut huai mahmah hi. Bang ci bangin sapna angah ahi phial zongin, a mah in pawlpi a dingin panmun khat a letna tawh, mi a tam theithei te tawh kikhawl in ma apangkhop dinguh kisam ahih lam thei hi.

Pawlpi ki-ukna, ki-ukdan tawh kisai in, bang ci bang lungsim puakzia nei na hi hiam? Nangin bang ci bangin mapang khawm thei na hi hiam? Bang hangin mapan khopna thupi hiam? Pawlpi sung panin, tuamkai na tawh, a mimal in eite ut bang tekin suakta takin na asem dingin kituat len’g bang ci bang nasep te sem thei ding i hi hiam?

NILI NI (WEDNESDAY) October 11
GENTILE THU-UM MITE’

Acts 15: 5 - 29 sim in. Jerusalem Council, kikupna sungah bang khensatna nei thei uh ahi hiam? Tua kikupna a hang’ bang hi limlim hiam?

______________________________________________________________________________________________________

Amaute in a khensat uh thu in, Jew mite ngeina leh ngaihsut nate tungtawn a buaina khempeuh langpan uh hi. Amau te in upna hanga a kikheel Gentile te in, vun-atna leh, zehtan thukham khempeuh zuih dingin tang sawl uh hi. Tua bek tham lo in, “Jew te’ thukham khempeuh te leh zehtan thukham te khempeuh, Christian biakna pawi sungah guan dingin hanthawn uh hi.“ Ellen G. White: The Acts of Apostles, p. 189.

Acts 15: 10 sungah, Peter in tua a lui khin thukhamte tawh kizui in, “puak zawhloh ding “hakkol”kisuan a cih tawh a gentehna pen, lunglut huaileh ciapteh huai mahmah hi. Tua thukhamte a pia Pasian in ama mite tungah hakkol a suan mah ding hiam? Tua ci lo ding hi. Tua sangin a hun hong bei toh tawh kizui in, Makai tampi takte in, kam tungtawna akhang akhangin a kihilh toto ngeina pan in (Oral traditions), thupha a piangsak thei thukham tampi-te hakkol bangin na sang kik ta leuleu uh hi. Tua ahih manin hih kikupna in, Gentile mite tunga om hakkol te a zan’(zang’) theihna dingin a hanciam uh hi.

Tua kikupna sungah, Gentile mite a dingin Thukham Sawm zuihna kisam nawn lo hi, ahih kei leh, dotna bangmah a om loh lam aphawk huai/atheih huai mahmah thu khat ahi hi. Tua kikupna sungah, Gentile mite in sisan a neek loh na dinguh gen a, a hi zongin thukham sunga mizi mawhpih ken a cihna ahi zongin, that kei in a cihna ahi zongin awlmawh lo in a om na dinguh a kikup dinguh zong, a piang thei dingin ngaihsut theih hi tuan lo hi.

Thu-um Gentile te tungah zuih dingin bang thukhunte bawl uh hiam? (Acts. 15: 20, 29), bang hangin tua bangin thukhun tuampiak sese uh hiam?

______________________________________________________________________________________________________

Thu-um Jew mite in, amau ngeina te’ tungtawn pan in zuih dingin Gentile thu-um mite tungah zuih dingin mawk seh thei lo dinga, Gentile mite in zong Zeisu hangin upna tawh a kipawl Jew mite’ etkhialh dingin bangmah a gamtat lohna dinguh, tua Council kikupna ah phuang uh hi. Tua ahih manin, Sawltakte leh Elder te in, Gentile te a hih leh, Milim biakna-a kizang an leh sa khempeuh a sianglo suak ahih manin a neklohna ding uh, numei tawh khialhnate panin a kikepna ding uh, a si luangkhiasak loin a kigawlmek sate, leh sasi khat peuhpeuh a neklohna dingun lai tawh gelhin thukim na nei uh hi. Khat khat te in, Sabbath tawlngnakna tawh kisai in bangmah genkikna leh kutna om lo ahih manin, Gentile te a dingin kul nawn lo uh hi ci thei uh hi. (Atak takin, Thukham Sawm sunga zuau khemna leh, mithahna te zong kihel tuanlo a hih manin, tua hong kinialna te buaitham lo hi).

A zenzen in, Pasian’ Thukham sung a hi lo, ngeina khat peuhpeuh tungtawn pan in, mikhat tungah vangik a suak thei “hakkol te ” a kisuan thei ding mah ahi hiam?

NINGA NI (THURSDAY) October 12
PAUL LEH GALATI MITE’

Jerusalem council sunga kikupna kician mahmah ta leh, amau leh amau theihdan lampi tek mah tawn in, Gentile thu-um mite in, Jew mite’ thukhun leh ngeina te a zui dingin a lunggulh mi na om lai veve hi. Tua thu in Paul a dingin, a thupi mahmah khat suak hi. Hih thu-in Upna sungah kalsuan na ah thuneu hi dek lo a, Zeisu tungtawna lungdamna thupuak thal-nialna tawh kibang hi. 

Gal. 1: 1 - 12 sim in. Galati khua sunga thubuai tawh kisai Paul in, bangzah takin thupi seh hiam? Tua thu in hih dotna a thupit zia hong bang ci gen hiam?

________________________________________________________

A tunga i gen mah bangin, Galati mite dinmun tungtawn pan in a hong piang thubuai in, Rom mite tungah lai a gelh theihna dingin a hong piankhiatna bulpi ahi hi. Rom laikhak sungah Paul in, Galati laikhak sunga thugil te tawh kisai in a zai zaw in hong gen hi. Jew minam thuum mi honkhat te in, Moses tungtawn a Pasian in a piak thukhamte thupi thei mahmah ahih man in, Gentile thuumte in a zuih na dingun kun tangtang uh hi. Paul in bel

tua thukhamte’ nasep leh amun maan a kizat theihna te a tel theihna dingun hanciam takin hilh tangtang hi. Hih mite in Galati khua ah, tua Upna tawh kisai in panmun a lak theih mah bangun, Rom gam sungah a hong ngah khak ding uh deih vet lo hi.

Galati laikhak sung leh Rom laikhak sunga Thukham a cihte in, Zehtan Thukham hiam, Thukham Sawm hiam cih Paul tungah dot ding cih pen, a mawla bawl vai lua hi. A tangthu limlim sungah i kantel ciangin, kinialna a piangsak limlim buaina in, a hong kikheel Gentile mite in Vun-atna a neih na dinguh leh Moses thukham te zuih dingin kilawm maw kilawm lo cih thu ahi hi. Jerusalem Council ah zong hih thu tawh kisai in, buaina khempeuh vaisiang khin hi ta mah leh, mi honkhat te in tua khensatna te zuih dingin thukim thei lo uh hi.

Thukham zuihna tawh kisai in, Thukham Sawm te leh (a diakdiak in a li-na “Sabbath”) cih te pen Christian te’ hong hen nawnlo, hong huam nawnlo hi cih a bulphuh theihna dingun Rom laikhak bu sung leh Galati laikhak bu sung mah bulphuh in sim uh hi. A hi zongin amau te in, Paul in bang hangin hih Thukham te gen hiam cih, a tangthu paizia, anung amaa thupiang te a tel theihloh man uh ahi hi. Paul in a bulphuh ahi; Gupkhiatna ngah theihna cih pen, Upmuanna tungtawn bek pan hi a, Thukham te zuihna leh bek tham lo in Thukham Sawm zuihna tawh a hih loh zia a kammal te tungtawn pan in i mu toto ding hi. A hi zongin tua bang i cih ciangin Thukham Sawm zuih kullo hi cihna hi pah lo hi. Thuman na tawh Thukham Sawm zuihna tawh kisai in amau hun ah buaina om ngei lo hi. Tua thu tawh kizui in, a langpang te in tu khanghun buaina honkhat te a leptuah theihna dingun Paul hunlai buaina te tawh gawmtuah in a deihna a kilet khial (a ki lakhial) gawp kha hi bek hi.

Sabbath cih pen Christian te a dingin kul nawn kei e’ a ci te tungah bang ci dawn kik ding na hi hiam? Lungdamna thupuak dik tak lenkip kawm in Sabbath tawh kisai thumaan te bang ci bangin lakkhia thei ding na hi hiam? 

KIGIN NI (FRIDAY) October 13

SINBEH DING: I Pawlpi in, vei tampi takmah ki langpanna leh, lung kituah lohna tuak tawntung hi. Hih thu in thuthak hi lo hi. Satan in atawntung in Pawlpi a do den mah ahi hi. Christian biakna a hong kipat tunga kipan in thu-um mite sungah ki thutuah lohna leh ki langpan na hong piang pah hi. Tua buaina a hong piangte lemtuah lo in, a dap koih banguh hi leh, Pawlpi in a tung kipat pan-in mitcip in siatna tuak pah ding hi. 

Jerusalem a om thu-um mite sunga a maanlo biakna makai te’ huzapna hangin Galati gama om thu-um mite sungah nasia takin kikhen khapna, lampialna, leh angsung lunggulhna te hong kizeel ziau hi. Hih Sia maanlo te in amau Jewte ngeina leh Gospel thumaan pen hong

tok-hel khawm uh hi. Jerusalem Council kikupna tawh a ki thukim sa te nangawn ki theihmawh bawl uh a, a hong kikheel Gentile mite tungah amau’ Zehtan thukham te a zuihna theihna dingun phut(tangsawl) tentan uh hi. Ellen G. White: The Acts of Apostles, p. 383.

KIKUP DINGTE:

1. Nilini (Wednesday) sunga dotna tawpna tawh kisai in, na Pawlpi sungah, ahih kei leh na innkuan sungah a hih kei leh nangmah mahin, mite a dingin “vangik a suak thei “hakkol te ” kisam lo pi mahin a suansuan kha mah na hi hiam? A suan kha nahih leh zong Pasian hong sap nuntakna hoih a sem na hihna tawh kizui in bang ci bangin khiam thei ding i hi hiam?

2. Tu khang Christian te a dingin Thukham Sawm zuih kul nawn lo hi, a ki cihna dingin buaina a piangsak thu te in bang hiam? Tua a paulap te uh eite in bang ci dawn ding i hi hiam? Thukham in hong hen nawnlo hi a cih pen khial mahmah hi na pi in, tua thu a san theihna dingun bang ci bangin ki nungta ta hiam?

3. Gal. 1: 1- 12 sim kik in. Paul in a theih, Gospel thu tawh kizui in, ama tel thuman tungah a dintang ngamna tawh bang ci bangin mite tawh kinawk hiam? Eite in zong tua ci bangin i Upna ah , kilok lo in tu khanghun a om biakna sandan a tuamtuam te’ huzapna pan in dingtang thei ding i hi hiam? Hih thupiang te pan in i sandan’ thu honkhat te pen, biakna dangte tawh bangbangin a hi zongin kileptuah thei thu ahih loh zia hong phawk sak hiam?

4. Pawlpi kipuah phatna (Protestant Reformation)a hong piankhiatna thu kikum dih un.  Bang thu ah i kilamdan na lianpi khat, a ki puahpha nai lo om lai hiam?

oo00oo