Mission Story: Zatopi Ah A Piang Na Lamdang Thumte Agen: Natalya Grigiryeva, 57

November 4                                                                       Rostov-on-Don, Russia Gam

 Nipi 5na: Zatopi Ah A Piang Na Lamdang Thumte  

Agen: Natalya Grigiryeva, 57– (Min simzia- Natalia Giligilzeva)

[Nupi khat or Siama khat geensak in]

Seventh-day Adventist pawlpi sungah kum 19 ka phaak ciangin tui ka kiphuum hi. Ahizongin, ka khi tuiphuum zawh kha guk hong sawt ciangin pawlpi ka taaisan hi. Pawlpi ka taaisan zawh kum 33 hong cin ciangin zatopi sungah ka innkuan uah nalamdang thum hong piang hi. Tua in Topa Zeisu kiangah hong tunpihkik hi.

Nalamdang Khatna

Ka sanggam numei 4 te lakah khat ahi Olga a ciinatna ah nalamdang a masapen hong piang hi. Olga pen khuapi dang khat ah a teeng, a citak Adventist khat ahi hi. Amah pen ama’ pumpi tungah thumveitak a ki-aat khin ahi hi. Siavuanpa in a liiveina aat kuul ding hi a cih ciangin Olga in thu a ngetsak dingin kei hong sawl hi

 “Lau ing eih,” ong ci vat hi. Olga pumpi daatmaan (X-ray) tawh a zaih ciangin a sungah a kigen thei lo a bawk khat om a, tua pen kensa (cancer) tawh kibang hi. “Ki-at ding lau lua ing ing,” Olga in ci hi.

Khuukdin in thu ka ngen hi. “Topa Pasian aw, ka sanggamnu na damsak aaleh, zuu dawn nawn loin, zaa zong ka teep nawn kei dinga, voksa zong ka ne nawnkei ding hi,” ci-in Pasian tungah ka kiciam hi. Ka sanggamnu a ki-aat ma kaal nih sung thu ngenden in, zuu leh zaa ka zang nawn keia, sa sianglote zong ka ne nawn kei hi.

A ki-aat ni ding ciangin, Olga in zatopi panin, “Siavuante’n ka natna hong aat lo uh hi. Inn ah a ciah ding hita ing,” ci-in lai khaak hi.

Ka lauthawn bangin piang hileh kilawm kasa hi. Olga in a kibawl zo nawnlo kensa natnat nei hi hamtang kha ding hi ka ci hi. Olga hopih in, “Banghangin  Siavuante’n hong aat lo uh hiam?,” ci-in ka dong hi.

Olga in, “Ki-aatna inndei sungah hong paipih ma-un, siavuante’n daatmaan X-ray a thak hong zaihkik uh hi. Tu-a daatmaan kizaihna ah natna bangmah mu nawnlo uh hi. Kei dam ta ing,” ci-in lungdamtakin gen hi.

Lamdang zensi e, hibang cidamna! Tua ni aa kipan Topa tungah lungdaamna ka ko ngiitngeet hi. Sanini (Saturday) zingsang ciangin a ngeibangin ka nasepna ah ka kuan hi. Manlaangtakin ka lungsim sungah  buaina hong ompah hi. Topa Pasian in ka sanggamnu Olga a damsak khit ciangin  Topa’ Sabbath ni-in na ka sepna hangin Pasian thukhaam ka palsat pen Iipkhaphuai ka sa hi.  

Ka nasep tawppah in, Seventh-day Adventist  biakinn ah ka paipah vingveng a, Sabbath School kipat hun ka lap lian hi. Ka lung hong nuampah heuhau hi. Ka inn uah a cih bangin ka kingaihsun hi. Tua Sabbaath ni-in ka lungtang leh ka nuntakna Topa Zeisu khut sungah ka aap hi.

Nalamdang Nihna

Kum 4 bang hong beita hi. 2015 kumin, a teek mahmahta ka nu in pumzaw natna nasiatakin thuak hi. Ka sanggamnu tawh zatopi ah ka lak uha, lupna tungah lum in kampau hetlo in hong salgeegaa hi. Hih a thahaat nupi, tanu 4 a khansuah, Adventist khat peen, bangmah hih thei loin kam khat zong pau loin hong salgeegaa mawk hi.

Ka nu aadingin kaalnih sung thu ka ngen uh hi. Damdamin ka nu hong nuamtuam seemseem a, ahizongin taang thei naailo hi. A sawtna ciangin inn ah ka ciahpih uh hi.  

Ni khat, ka nu zatopi pan hong ciah zawh kaal khat khitciangin thakhat thu-in dingto a, pai thei hi. Kum 9 a phaa a tuunu in a pii a pai theihlam a muh ciangin lungdam lua in kuveva hi. Ka nu in, “Topa tungah lungdam ko ni!” hong ci a, Topa tungah lungdam ka kokhawm uh hi.

2016 kum ciangin, kum 79 a phaata ka pa in adang khuapi khat ah tuahsiatna hangin nasiatakin liam hi. Amah siksakol (bicycle)  a tuang kimlaai, maanlong mawtaw (bus) khat in phukha ahihmanin zatopi ah diipkuathuai dinmun tawh nawhsatakin ka paipih uh hi.

Ka pa pen Pasian a um hetlo khat hia, kum 13 ka phaak in ka nu maa (khen) in a nungciangin teenpih kik hi. Adventist pawlpi ah ka kikhop thu ka gen ciangin hong hopih nawnlo hi. Tua baanah, amah ka khaak Pasian thu tawh kisai DVD te leh Tapidaw vaai limtaangthei (film) te lawnkhia mang hi. Ama’ sim dingin ka khaak Lai Siangtho nangawn a tuahsiat ma kaal nih laai-in balkeek gawp hi.

Nalamdang Thumna

Ka pa pen zatopi ah khuapawk nawnlo in omta hi. Gamla lua ahihmanin ka pa veh dingin ka pai zokei uh hi.

Ka sanggamnu Olga leh ka nu zatopi ah a kibawl ciangun Topa Pasian in a damsak nadingin thu ka ngetsak uh hi. Ahizongin, ka pa tungtaangah ka nu leh ka innkuanpih khempeuhun khua a phawkkik nading leh a kisiikkik nadingin Topa Pasian tungah ka thuum uh hi. Topa Zeisu Gumpa in a saan theih nading zong thu ka ngen uh hi.

A ni thumna ni ciangin ka pa in khua phawkkikta a, a lungsim zong teita in ama’ tungah thupiangte a naaihuaite tungah dong hi. Zatopi ah a tunna a hang zong dong hi. Tuazawh nai thum khit ciangin hong sihsanta hi. Ka pa in hong sihsan madeuhin a lungsim sungah a om thu pen Topa Pasian bekin thei hi. Bangbang ahizongin, Topa Pasian in ka pa a kisiikkik theih nadingin a tawpna hunpha kha thong piaksak hamtang ahihmanin Topa tungah ka lungdam mahmah hi.

A thumveina dongtak ka thungetna uh hong dawng Topa Pasian tawh ka kinaai mahmah ta hi, Topa Pasian in thungetnate hong za bekloin hong dawng hi cih thu ka telsiamta hi.  

Ei mihingte in thu ih nget hamtang ding ahi hi. Na innkuanpihte aading, na tate aading,  na nu leh na pa aading leh na veengte aadingin thu ngeen in. Topa Pasian in Ama’ tate thungetna za in dawng hi.

Tu kuata Sabbath sawm leh thumna sumpi pawlkhat tawh ka khua ahi, Rostov-on-Don khuapi ah veengleh paam phaak nading phualpi khat lam nadingin hong kihuh ding hi. Tua phualpi aadingin thu hong ngetpih unla, leitung mun khempeuhah Lungdamnathu tangko zawh nadingin a hong huh Sabbath School sumpi zong phalna taktawh hong piakpih ta un. Lungdam lua hi.

##########@@@@@@@@@@##########