FSS Lesson 5: ABRAHAM IH ZUMNAK

ZIRLAI 5 ABRAHAM IH ZUMNAK
Oct. 28 – Nov. 3

SABAT TLAI LAM: October 28

TUZARH SIAR DING: Gen. 15:6; 2 Sam. 11:12; Rom 3:20,31; Rom 4:1-17; Gal. 3:21- 23; I John 3:4.

BIBLE CANG KEN: “Cuti a sile zumnak ruangah daan cu kan hlon ta tinak a si maw? Si lamlam hlah, daan kan hngetter sawn a si” (Rom 3:31).

ZUMNAK thawngih rundamnak le remnak a suahnak hrampi kha Rom 4 sungih Bible thu zirhnak kha sirhsan a tuah. Tuzarh kan zir dingmi cu hlanlai kum 500 laiih dungsip loih tan latu Luther le Protestant rinum zetpawl in hram an thok zomi a si. 

Paul in a nganmi siartupawl ih theihsual ding um loin daan thlunnak si loin zangfahnak ih rundamnak nun neitu Abraham ih thianghlimnak le nunze mawi kan zohthim dingmi a si. 

Milai ih daan thlun that ruangah Pathian hmai ah miding tiih pomtlak an um hrih lo. Cuti a si ahcun zoso ruahsannak nei thei ding? Abraham kha zangfahnak ruangih a ngah ahcun Judah le Zentail ti um loin, mi hmuahhmuah in Abraham vekin an ngah thei theh a si.

Rom 4 sungah Paul in rundam khawkhannak kha thlirdan phun thumin a tuah. (1) Pathian thukam thlawsuahnak, (zangfahnak thukam), (2) Milai in thukam cohlannak (zumnak ih cohlannak), (3) A zumtu kha dingfel thianghlimnak pek a si tiah Pathian ih phuanmi (thiam

conak) tipawl a si. Abraham ih tuahdan vek kha kanmah khalin tuah ding kan si ve.

Zangfahnak ih rundamnak kha a thupi tuk ruangah Paul in hngilh lo dingah a duh. Kan phu lo laksawng kan ngahmi a si. Kan phut a si ahcun kan hlawhmi a si ding. Cuih kan hlawhmi cu laksawng a si thei lo, bak in pek mi a si ding. Kannih cu daan buartu misual kan si lai ah, rundamnak laksawng in pek a si. 

Paul in zangfahnak ih rundamnak a simfiang tikah a tlaitluan in semtirnak cabu a hmang. Gen 15:6 sungih thu kha a lak . Abraham in Pathian a zum ih cuih a zumnak cu a dingfelnak ah Bawipa in a pomsak (NIV).  Zumnak ruangih thiam conak kha Bible bu sungih cang hmaisabik lamah a ummi a si.

THAWHSAL NI October 29
THUKHAAM

Rom 3:31 siar aw. Paul in ziangso a sim? Himi hi Adventist-pawl hrangah ziangah so a thupi zet? 

Paul in thukham uar zetih a sim ih, Pathian thukham a hlonnak a um lo. Thlung Hlun sungih cafang nganmi vekih a thlun theh theitu um hmansehla rundam an si lo ding. Thlung Hlun sakhuanak kha thlung thar sakhuanak vek a si thotho. Misual in Pathian zangfahnak an zum ruangah rundamnak an ngah . 

Rom 4:1-8 siar aw. Rundamnak hi zumnak ruangah a si ih, daan thlun ruangah a si lo timi Thlung Hlun sungih thu ziangtin so Paul in a langter. Thlung Hlun sung thu a tawi zawngin lak sehla Abraham in Pathian a zumnak kha a dingfelnak ah a pomsak timi a si. Cuti a si ahcun Thlung Hlun hi zumnak ruangah dingfel thianghlimnak zirhtu a si. Daan thupawl hi zumnak thu thawn pehzomaw in Grik tongah ‘katargeo’ timi a hmang ih, ‘hmantlak lo tinak’ a si.  Thlung Hlun sung hmun tampi ah zumnak ruangah rundam timi hmun tampi ah a hmang. A tlaitluan ih an zirhmi cu zangfahnak a si. Misual hrangih ai-awh thihnak in rundamnak thu kha puanthlam hnatuannak ih a hmuhsak mi an si.

David in Bathsheba thawn tisa hiarnak zohmawi lo zetih a tuahmi ah a sual ngaidam a sinak ziangtin so na simfiang ding. Daan a thlunnak in a run thei lo . Daan a bawhsiat mi a tum vekin daantatnak tampi tong . David kha daan thlunnak ruangih rundam ding sisehla famkimnak a nei lo a si.

Paul in David ih a dinthar awknak Pathian duhsaknak a ngahsal mi hi zumnak ruangih thiam a conak zohthim dingah a tuah mi a si. Sual thlahnak hi Pathian zangfahnak cangvaihnak a si. Himi hi zumnak ruangih thiam conak khihhmuhnak a si ve. Hlanlai Israel-pawl vekih cohlan an sinak kha Judah sakhua ah a tlaitluan in zangfahnak a si ringring. Daan thlun uar tuknak hi thatnak ihsin thil tha lo lamah a fehpi ih cumi cu a thu tumtah mi a si lo.

David ih tluknak le dintharsalnak kha ruat aw (2 Sam 11,12; Saam 51). Khavek riahsiatza thil umdan kha na parah thleng sehla ruahsannak ziangtin so na sarsuak thei ding. Himi zirlai vekin a tluk salmipawl kan kawhhran in ziangtin so kan cingfel ding?

TLAWNGKAI NIKHAT October 30
BAT PEKMI (OR) ZANGFAHNAK

Paul ih a cingfel mi hi zumnak thuzirhnak (theology) hnakin a sang sawn. Himi hi kan thlarau rundamnak le Pathian thawn kan pehzomawknak a thatnak dingah a si. Mi pakhat in cohlan tlak ah a ruataw ih a sual ngaithiam ih thiam coter a si hlanah a tumtahmi thianghlimnak tla a tuah thei ko ding. A sung lamih sin amai tuahnak ruangah danglamnak nei ah a ruataw ko ding. Cuvek sakhuanak kha mai hrang lawng ruahnak a si ih ziangsi maw tulsammi a nei thotho ding. 

Thuthangtha pakhat cu Pathian pekmi thiam-conak laksawng a si. Kan phu lomi a Sinan kanmai thil tha tuahmi kan thatnak ruangah si loin Pathian duhdawtnak ruangah a si. 

A netnak ah Pathian duhdawtnak le nunze mawi bang theinak ah mai pumpak nun hrang lawng ruahnak (or) Pathian lam sawnah so a lo hip? Rom 4:6-8 siar aw. Paul in hitawk ah zumnak ih thiam conak ziangtluk in so a uar?

Misual in Khrih hnenah zumnak in a panih a sualnak kha a phurhsak tui parah a thum cun a sualnak thlahsak a si dingih cupai nun ziaza cu amah ah a lak ding. Himi thil ruangah Bawi Khrih leitlun a ratnak a si. Zumtu misual pa cu a sualnak a sirawk ahcun Khrih dingfel thianghlimnak kha amah ah pek a si. Cuvek in Pathian ih inn sungsang van sungkua member ah a cang. E.G. White, Selected Messages book, p. 215. 

Paul in zumnak thawngih rundamnak kha Judah hrang lawngah a si loih Zentail hrang khalah a si tiih a sim fiang (Rom 4:9-12). Hrilhfiahdan phundang hmuh ding a um lai. Abraham kha Judah miphun a si lo. Amah cu mizuk bemi innsang ih thanglian a si (Josh 24:2). Amai sanah Zentail le Judah thleidanawknak a um lo. Abraham thiamcoter a si lai ah vunzim a tan hrih lo (Gen. 15:6).  Curuangah Abraham kha vunzim tan le tan lopawl ih an pa a si. Lei le van rundamnak Paul ih a simfiangnak ah tahthimnak ih a hman mi hi hi thil umdan thawn a rem zet. Jesui thihnak kha mi hmuahhmuah hrangah a si. Himi thawn a remawk lonak a um lo (Heb. 2:9).

Lei le van pumpi hrangih Cross kha ruataw. Cross in mi pakhat ih sunloihnak ziangso in sim? Miphun, nunphung, ram thleidanawknak pawl hi ziangah so tihnung za a si? Hivek thleidanawknak fihnung za kan thinlung sungih a um mi kha Pathian zangfahnak ih thianfaiter dingah ziangtin so kan zir thei ding?

TLAWNGKAI NIHNIH October 31
THUKAM

Hlanlai kum 500 lai ah Martin Luther in a duhphorhnak a tuahmi 95 theses kha Wittenberg biakinn pharih a tarmi kha tuini tiang a daih. Zumnak ruangih rundamnak a suahnak hrampi kha tui ni ah kan co ban ve. 

Rom 4:13 sungah “thu tiamkam” le thukham a kalhaw. Paul in zumnak ruangah miding ih cohlannak thuzirhnak kha Thlung Hlun sirhsan ding a hawl. Judah- pawl hringtupa ih an pommi Abraham ih thu tahthimnak a lak. Abraham cohlan a sinak (or) thiam coternak kha

daan thil tinak malte hman a tel lo. Pathian in Abraham kha leilung ro na co ding tiah thu a kam. Cuih thukam cu Abraham in a zum ih a pom hnu ah tuah ding a um mi hmuahhmuah tla a pom theh. A san cu Pathian in amah a cohlan ruangah a si. Thukam pekmi Abraham hnen ihsin rundamnak hna a tuan. Himi hi hmual a nei zetmi zangfahnak ih co hlan nak, zohthim ding ah Thlung Hlun thil umdan kha Paul in thukthun loten a hmang.

Rom 4:14-17 siar aw. Thlung Hlun ah zangfahnak ih rundamnak hi a tumtahbik mi a si tiah Paul in ziangvek in so a sim bet (Gal. 3:7-9).

Abraham nun ihsin kan sim zo mi vekin Paul ih nganmi hi kan hngilh lo ding. Judah miphun Khrihfapawl cu Thlung Hlun sungih daanpawl ah an ciahaw zet. Curuangah mi tampi in an rundamnak kha daan an thlunnak ah a thumaw tiah an zum. Cuih pomdan cu Thlung Hlun ih zirhdan a si lo. 

Hivek a palh mi pomdan rehter dingah Paul in Abraham a rel lang. Cumi cu Sinai tlangih dan a pek hlanih thil ummi a si. Thukam a co mi kha daan a thlun ruangah a si lo. Taima zetin Torah sungih thu thlunnak le raithawinak tuahdanpawl in zumnak ruangih rundamnak ai-awh in a ding thei lo. 

Paul in himi a zaten thukham (10) sim duhmi a si hmanah, Sinai tlangah daan a pek hlanih thil ummi a si. Curuangah a sim duhmi a bangaw ko. A sim betmi cu zumnak tel loin Pathian thutiamkam mi ngah thei dingah daan thlunnak hi san a tlai lo. Zumnak ruangih rundamnak a sim duh ruangah thukham santlaih lonak thu kha tongkam khoh zetin a sim. Khavek phun in rundamnak ngah tumih hruainak hi a soisel ih a thathnem lonak thu kha duhsak zetin a sim. Judah (or) Zentail kan si ah daan thu tel loin Abraham vekin kan tuah a tul. Jesui dingfel thianghlimnak in pekmi ruangah zumnak ih rundam kan si.Hi mi thutak sunglawi hi a tluktu a um loih Protestant remthatnak lamhruaitu a si.

TLAWNGKAI NITHUM November 1
THUKHAM LE ZUMNAK

Mizan zirlai ih kan hmuhmi vekin rundamnak kha thukham thlunnak si loin zangfahnak ih thukam pekmi ihsin a ra tiah Pathian in Abraham a theihter mi kha Paul in a tarlang. Curuangah rundamnak beiseitu Judah-pawl in Messiah a ratnak in a tu ih a famkim mi Abraham hnenih thukam mi an pom ding. Cule an rundamnak dingih a tuahmi ah zumnak famkim an nei ding.Cu vek in mi hmuahhmuah Judah (or) Zentail pawl in thiltha an tuahmi kha Pathian thawn remawknak an tuahmi a si.

Mizuk bia sakhuanak hmuahhmuah in amai thiltha tuahmi kha an rundamnak a si timi kha an daan hrampi a si. Himi hi hmuntin ah a um. Milai in sual do theinak dingah hauhruang kan nei lo. E.G. White, The Desire of Ages. Pp. 35,36. Hihi a san ziangso a si? Thiltha kan tuahmi in kan rundamaw thei timi pomdan in ziangah so duhduh ih sual tuah dingah thlahmi ah kan cang thei. 

Galati cakuat sungah thukham le zumnak an pehzomawknak Paul in ziangtin so a simfiang (Gal. 3:21- 23). Kan nunah daan thu a langmi a um ahcun Pathian thukham a si ko. Paul in daan thu in nunnak in pe lo timi a sim. Pathian thukham lawng kha a sim lo ih daan thu hmuahhmuah rundamnak ah man a nei lo tiah a soisel. 

Asinan thukam mi kan zum ahcun Khrih ruangah a famkim sawn mi a langter. Zumnak a neitupawl cu daan thu tangah an um lo. Miluat an si. Cumi daan thlunnak in rundam ngah tumnak kha mai phurh thei lomi phurrit zet a si ih mawhthluk mi ih um ringringnak a si. Thukham hi zumnak ruangih thlun mi a si lo ahcun phurrit ah a canng. Zumnak a um lo ruangah zangfahnak a um lo ih, zangfahnak a um lo cun zumnak ruangih dingfelnak thiamconak tla ngah theih a si lo. Daan hnuai ih um timi hi sual ruangah daan tatnak le mawh pekmi phurrit tangah a um.

Pathian thawn nan fehtlangnak ah zumnak ruangih dingfelnak hi ziangso a tumtah bik? Himi zirhnak hi miih hmu thei lo dingin phentu le a baaltertu si lo dingin ziangtin so kan tuah tha thei ding. Thiltha tuah ding tiih zirhawknak ah midang ih an zirh ve lomi thu pakhat hi ziangso a si? 

TLAWNGKAI NILI November 2
THUKHAM LE SUALNAK

Thukam thar sanah thukham a cem zo tiih an simmi kan thei theu. Khami thu thawn a kaihaw ih an zum mi Bible cang an lakih an hrilhfiah theu. Thu an simmi vekin a dik ciah maw, a tha bik cu a si lem lo. A tha mi zirhawknak tla a si lo.

1 John 2:3-6; I John 3:4 le Rom 3:20 siar aw. Hipawl in sualnak le thukham an pehzomawknak ziangso in sim? Irish rami cangantu Jonathan Swift in ca pakhat a nganmi cu hitin a ti, “Mirang tong le Dictionary ah zu in, fifir, bumawknak le thuphan pernak um hlah sehla zing kan thawhsal tikah suupawknak a neimi le thutak ngai na mi kan si thei ding sawm” (Jonathan Swift, A Modest Proposal and other Satires, New York Prometheus Book,

1995) p. 205.

Pathian daan a um nawn lo ahcun ziangah thuphan per, laithat, fifirpawl tla sual a si kan ti thei. Pathian in a daan a thleng taktak ahcun sualnak ih a sullam tla a danglam ve ding. Asilole Pathian thukham kha a hlo rori ahcun sualnak a um lo ding. Cumi cu kan zum dingmi a si lo sawm? (1 John 1:7-10; James 1:14,15).

Thlung Thar sungah daan thu le thuthangtha an tlem veve a si. Daan in sualnak a langter ih, thuthangtha in Jesui thihnak le thawhsalnak ih sual thawidamnak a langter. Daan timi um hlah sehla, sual timi a um lo ding (Rom 4:15, Rom 5:13). Cuti a si ahcun khuitawk hmun ihsin rundam kan si ding? Daan thu cu a hmannak hmunih kan hman lawngah thuthangtha in san a nei thei ding.

Cross in daan kha man nei lo ah a cangter timi kan thei theu. Cuvek cu phirsitnak tong a si. Ziangahtile Cross in daan thu kha a siatbal loih a thlengh danglam lo. Pathian in Jesui thih hlanah daan thu a thiat ih a thlengh danglam lo ahcun tlaikhaw hnuah ziangah so cumi cu a

tuah ding. Milai in sual a tuah hnu ah daan buar ruangih a thlengmi dantatnak kha ziangah so ngaidam ih a hlonhlo sak lo. Cuti sisehla Jesui thih a tul lo ding. Jesui thihnak in daan thu hi thiatbal ih thleng theih a si lonak a langter. Himi tuah ding sisehla Cross hnuah a tuah lo ding. Cross hlanah a tuah zo ding. Curuangah daan ih man a neihnak hi a lang rero lo ding. Jesui thihnak in dan a thlengh theih lonak kha fiangten a langter sawn. Sual ih kan tluk ruangah thukham thlengh sisehla, sualnak thubuai cinfel that theinak dingah Jesui thih a tul lo ding. 

Sual donak dingah Pathian daan a um lo ahcun kaa ih tong men pawl an tong a dim deuh (or) a na deuh in an tuar ding lo sawm? A phi na pekmi in ziangtin so Pathian daan a thathnemnak theithiam dingah ziangtin so a lo bawm? Pathian thukham upat loih na um tikah na tonnun thil umdan ziangvek so a si? 

TLAWNGKAI NINGA November 3

RUAHBET DING: Mi in hna a tuan tikah a tuanman kha  zangfahnak ih pek a si dah lo. Leiba ih ruah a si sawn (Rom 4:4). Tirhthlah in Sem. 15:4-6 ih catlang kha a simfiang ih zumnak ruangih thiamconak hi tuahtuannak a si lo, timi hi thunet kharnak ah a tuah. A hmaisa a simfiangmi cu, “Khami kha a dingfelnak ah a pomsak” timi a sullam cu a si. Himi thu simfiangnak hi Pathian in misual a cohlannak hi a zangfahnak ruangah a si ih, tuahthatnak ruangah a si lo. (Martin Luther, Commentary on Romans. P. 82).

Setan in minung kha amai thatnak le zemawi nei hnak le dingfelnak uar dingah a hruai ngahmi cu a duh vekin a neh thei ding a si ti a thei. Cuvek ih kaihngahmipawl parah hna a tuan theu…… Kalvari Cross ih tufa thisen in nan inn sangka biang le sangka tlunah nan hnih pei ih, nan luat ding. E.G. White, Advent Review and Sabbath Herald. Sept. 3.1889.

RELTLANG DING:

(1) Daan thu thlunnak si loin zumnak ruangah rundamnak theithiam dingah ziangah so a thupi?  Khami theihsualnak ihsin ziangtin so kan venhimawk thei ding? Himi Bible zirhmi hmufiang lopawl kha ziangvek thil tihnung in so a hngak?

(2) Thukham theihnak le thlunnak ruangah in run thei lo timi kan thei ih, Pathian thukham man neihnak le hman rero mi a sinak ziangtin so phundang in na sim thei ding?

(3) Remthatnak ih a hamda kha ziangtin so rundam kan si ding timi thu a si. Pumpak thinnatternak um lo dingin R.C.M le Protestant pawlih kan danglamnak kha tlang zetin ziangtin so na sim thei ding?

(4) Misual kan si ih a ral kan si laiah Pathian ih duhsaknak, zangfahnak, ngahtlak kan si lo laiah misual in thiamconak a lakin kan ngah. Midang thawn himi thu simfiangawk tikah thathnemnak ziangvek in so a um? Kan zangfahnak le kan duhsaknak kha ziangvek in so duhsaknak le zangfahnak a parah kan langter thei ding?